Lonon mo 30 - Yálá laawoo hɛɓɛ (dc)

Nu woo kwɛlɛ mɛ̨nį

¹ Mɛ̨nįɠaai kpɔ Yai-Laa ə Moisə tí la, ə gəlee laa həli Israɛlə lonnii diɛ:

² Moisə yɛ Israɛlə nu huwu ɲɛ̨itɔwɔ nuą diɛ: «Nwooi Yai-Laa ə mo ya ka:

³ Hulɔnu ta a nwoo kwɛlɛ Yai-Laa ɓa, a wala kɛ tii ə gbɔwɔ kanąn a gwɛla woo, mąą hvo nɛ̨ɛ̨li hvo nwoo kala. Nwooi kulɔ na, mąąnɛ̨ɛ̨ ə bɔ mɛ̨nį kɛ.

⁴ «Halakpəlai gaa ni nąn ɲəi bɛlɛ́n, a nwoo kwɛlɛ Yai-Laa ɓa, a wala kɛ tii a gbɔwɔ kanąn a gwɛla woo;

⁵ nąn a gili kɔ́lɔn yɛ kɛ non aa nwoo kwɛlɛ tii, a wala kɛ tii aa gwɛla aa gbɔwɔ kanąn na; nąn a wala mɛ̨nį ta ɓo mą, nɛ̨ɛ̨nui tii nwoo kəlee a nɛ̨ɛ̨ mą. Mɛ̨nįi lɔpee a gwɛla ɉu a gbɔwɔ mąą mɛ̨nį, gaa mą.

⁶ Kɛlaa, nąn a gili kɔ́lɔn, a wala hvaa mą, nɛ̨ɛ̨nui tii wooi ə gwɛlɛ, da mɛ̨nįɠaai kpɔ ə gwɛla ɉu, da lɛɛ a kpɛli. Yai-Laa a nɛ̨ɛ̨nui tii kaa yɛ mɛ̨nį ta a wala kɛ nwəli pulu. Mąąhɔlɔɓo nąn və hvaa li nwoo ɓa.

⁷ «Mąą nɛ̨ɛ̨nu a li hilɛtai, nwooi ə gwɛlɛ a wala kɛ tii gwɛla wooi kulɔ na, ə ɓo ni mą,

⁸ ɉilɛ a nwoo kwɛlɛ mɛ̨nįi tii kili kɔ́lɔn, hvo da ɓo li a volói lɔ tii a gili kɔ́lɔn na, mɛ̨nįɠaai nɛ̨ɛ̨nui tii ə naakwɛlanmo, da nɛ̨ɛ̨ mą. Mɛ̨nįɠaai ə gwɛla ɉu a gbɔwɔ nwuɔ̨ mɛ̨nį, a lɛɛ a gbaan ŋąą di yəi.

⁹ Kɛlaa, ɲələi lɔ ɉilɛ a mɛ̨nįɠaai tii kili kɔ́lɔn na, a lənə mą, nɛ̨ɛ̨nui tii nwooi ə gwɛlɛ ganąn ŋąą ɲəi, da gwɛla wooi kulɔ na; a gbɔwɔ mąą mɛ̨nį, ɉilɛ a di lɛɛ a kpɛli, Yai-laa a gaa a nui mɛ̨nį hvo mą.

¹⁰ «Kɛlɛɛ, akɛ kalanin a wala kɛ tii nɛ̨ɛ̨nui daa gulɔ lɔwɔi, a nwoo kwɛlɛ; mɛ̨nįi lɔpee ə nwoo kwɛlɛ ɉu, gbaan ŋąąi ə gɛ.

¹¹ «Akɛ ɉilɛ yəi bɛlɛ́n mə ə nwoo kwɛlɛ laa tii, a wala kɛ tii yɛ gwɛla ti mɛ̨nį ta hu, yɛ gbɔwɔ yili la,

¹² ɉilɛ a gbaɠala kaa, hva mɛ̨nį ta ɓo mą, hva lənə nwoo ɓa, wooi lɔpee nɛ̨ɛ̨nui tii ə mo, gaa mą, mɛ̨nįi lɔpee ə gwɛla ɉu a gbɔwɔ yili pələ, gaa mą.

¹³ Kɛlaa, ɉilɛ a naa gwəi yɛ kɛ ə gəlee lɛɛ a kpɛli a ɲələi lɔ a gbaɠala kaa la, mɛ̨nįi lɔpee nɛ̨ɛ̨nui tii ə mo a nwoo kwɛlɛ pələ, a wala kɛ tii a gwɛla pələ, gəlee da lɛɛ a kpɛli; mąąhɔlɔɓo ɉilɛ hvo gɛ li hvo hvaa mą. Yai-Laa a nɛ̨ɛ̨nui tii kaa yɛ nui mɛ̨nį hvo mą.

¹⁴ Mɛ̨nįi lɔpee nɛ̨ɛ̨nu a naakwɛlanmo a gwɛla pələ ɉu, ɉilɛ ɓə a pɛli nɛɛi mą, a wala kɛ tii ə ɉəɠə mą.

¹⁵ Ɉilɛ a wala mɛ̨nį ta ɓo ɉu, ə lɛɛ ɉu yələ ə ɓɔ, mɛ̨nįɠaai kpɔ ə di laakwɛlanmo a gwɛla pələ ɉu, di kaa mą, ɉilɛ a di lɛɛ mą, akɛ aa naa pilɛ mą a ɲələi lɔ ə gbaɠala kaa la.

¹⁶ Kɛlaa, akɛ bɔ ə di lɛɛ a kpɛli, ɲələ tii ə gbaɠala kaa la yili aa gbɛa tɛɛ, yaai tii ɓə nɛ̨ą nwɔ nɛ̨ŋɛ̨n wulu a lɛɛ nwuɔ̨.

¹⁷ «Dɔnŋąąi Yai-Laa ə di laa yɛ di ɓo Moisə ɓa, yɛ hvilɛn hulɔnu da nɛ̨ą diɛ, lon gaa nąn da non nɛ̨ɛ̨nu ɓa, awala kɛ tii nɛ̨ɛ̨gbɛla ɓa, ə ɓo nąn ɲəi bɛlɛ́n, mąą tɔ́nŋąą ka tii.»