Lonon mo 3 - Yálá laawoo hɛɓɛ (dc)Levi nu huwu mąą mɛ̨nį 1 Nuąi kɛ a Aarɔn da Moisə di huwu hu nuą, ɓɛlɔwai Yai-Laa ə kɛi pələ ɓo la Moisə ɓa Sinai yee nwuɔ̨, diɛ ka: 2 Aarɔn lonnii laa ka: Non dɔlɔɔ ɓa a Nadavə, a həɠə laa Avihu, Eleazarə da Itamarə. 3 Diɛ ɓə kɛ a Aarɔn lonnii, diɛi a ɉaláá laa həli nuąi di di hee a nwulɔ mąąhəɠɛɛ, di wɔ kólói ə kɛ lɔ kɛa a ɉaláá laa həli mɛ̨nį. 4 Nadavə da Avihu di haa Yai-Laa lííla; Mąąhɔlɔɓo, di nwɔ̨n da kpɛli həɠə diɛ paa la Yai-Laa lííla. Di haa Sinai lɔi pun ɉu, di hvo lon ɉɔlɔɓo. Eleazarə da Itamarə ɓə kɛi kɛa ɉaláá kólóɠaa kɛ di nąn Aarɔn ɲɛ̨i ɓa. 5 Yai-Laa yɛ Moisə ɓa: 6 «Levi lonnii lɛɠɛ ɓɛ, ə́ di tɛɛ Aarɔn pɔ, diɛ ɓə pai lɛɛi a bɔɔ tɔɔi. 7 Di kaa pai kɛi kóló kɛi, da diɛni diɛ nɔi lonnii kəlee mąą kóló kɛ gee kaa kələ mu. Diɛ pɛli gee kaa kələ mąą mɛ̨nį kəlee ɲɛ̨i kulɔi. 8 Di kaa pai kɛi di ɲɛ̨i kɛi gee kaa kəlee mu hɛnŋąą diɛ di ɓo Israɛlə lonnii kəlee di wɔ kóló ɓa. 9 Yili ɓa, ə́ kaa pai Levi lonnii tɛɛi Aarɔn da nonnii pai lɛɛi di pɔ, Israɛlə lonnii kaa pai di tɛɛi, ɛlɛɛ ə kɛ kpɔ a di tɛɛ a neelee. 10 'Gɛ a nɛlɛɛ, Aarɔn da nonnii diɛ tɔ̨nɔ̨ di kɛ lɔ a ɉaláá laa həli nuą; Nui lɔpee hvo a di ta, a lɛɠɛ laa, da baa.» 11 Yai-Laa yɛ nwɔ̨nɔ̨ Moisə ɓa: 12 «Ɲą́ą́ gbinįi ɓə Levi lonnii həɠə Israɛlə lonnii lɔwai. Di kaa a Israɛlə lonnii lon ɉinąą dɔlɔɔɠaa mąąhvalin, nwɔ́ɔ́ ɓaa diɛ. 13 Mąąhɔlɔɓo, lon dɔlɔɔ kəlee kaa a nwɔ́ɔ́; ə həɠə ɲələi ŋį́ Eziptə nuą lon ɉinąą dɔlɔɔɠaa paa la, Israɛlə lonnii hinąą dɔlɔɔ kəlee kaa a nwɔ́ɔ́, ə mą kɛ daatɛlɛɛ lonnii dɔlɔɔ da nu kan nonnii dɔlɔɔɠaa. Ɲą́ą́ ɓə gáá a Yai-Laa.» Levi nu huwu lonon mɛ̨nį 14 Yai-Laa ə pələ ɓo Moisə ɓa, Sinai nɔi pun ɉu, yɛ mą: 15 «Levi lonnii kəlee lonon, a bɛlɛ́ɠaa laa, da gwəliɠaa laa. Yiiɠaai kpɔ a ɉinąą, gəlee lonon, ə həɠə ɲąnin dɔ̨nɔ̨ ɓa.» 16 Moisə ə gəlee lonon, yɛ bələi Yai-Laa ə dí la. 17 Nuąi kɛ a Levi lonnii, diɛ ka: Gɛrsɔn, Kehatə da Merari. 18 Gɛrsɔn lonnii hee kpəlin na kɛ a di wɔ kwəli laa: Livni da Simei. 19 Kehatə lonnii hee kpəlin na kɛ a di wɔ kwəli laa: Amramə, Yiseharə, Hebrɔn da Uziɛlə. 20 Merari lonnii hee kpəlin na kɛ, a di wɔ kwəliɠaa laa, Mahli da Musi Levi lonnii di wɔ kwəliɠaai hee kpəlin na ka tii kɛ, da di wɔ pɛlɛ́ɠaai. 21 Gɛrsɔn huwu hu nuą ka: Livni yəi gwəlii nuą, Simei yəi gwəlii nuą. Diɛ ɓə kɛ a Gɛrsɔn yəi gwəlii nuą. 22 Gɛrsɔn yəi bɛlɛ́n ɉinąą kəlee lonoɔ ka, ə həɠə ɲąnin dɔ̨nɔ̨ lon ma, da pɛli kɛ kɛi a nu waa mɛ̨ihveelɛ pulu nwun nɔɔli (7500). 23 Gɛrsɔn yəi gwəlii nuą di di wɔ buwui pu gee kaa kələ pulu pələ, voló tooi pələ. 24 Gɛrsɔn yəi bɛlɛ́n nuą nwun nąmu ɓa kɛ a: Ɛliasafə, yai kɛ a Laɛlə lon. 25 Gɛrsɔn lonnii di wɔ kólói di kɛi gɛ gee kaa kələ mu, ya ɓaa: Gee kaa kələ mɛ̨i kaa mɛ̨nį da ɉəɠəi ŋɛ̨i di kɛi ɉɛlɛn bələi. 26 Gee kaa kələ mąą kwəli gala laaləi həɠə ɓɛla, da ɉəɠəi a ɉaláá kulɔi mąątinɛ̨n da ɲɛliɠaa kpɔ mąąnɛ̨ɛ̨ ə kɛ mą diɛ góló kɛ la. 27 Kehatə huwu hu nuą, Amramə yəi gwəlii nuą, Yiseharə yəi bɛlɛ́n nuą, da Hebrɔn yəi bɛlɛ́n nuą, ə mą kɛ Uziɛlə yəi bɛlɛ́n nuą. Yiiɠaa kpɔ a Kehatə nu huwu. 28 Di Kehatə yəi bɛlɛ́n ɉinąą kəlee lonon, ə mą kɛ yiiɠaai daa di kaa, a kɛ a ɲąnin dɔ̨nɔ̨, di kɛ a nu waa mɛ̨ihaaɓa pulu nwun mɛ̨ida (8600), a diɛi di di tɔɔ, diɛ kóló kɛ ɉaláá kulɔi. 29 Kehatə yəi bɛlɛ́n nuą di wɔɔ ɓuwui ə kɛ gee kaa kələ kwɛlɛ ɉɛɠɛɛ pələ. 30 Kehatə nwɔ pɛ́lɛ́i, da nwɔ kwəlii nwun nąmu ɓa kɛ a Uziɛlə lon Elisafan. 31 Diɛ ɓə mįnɛ̨ kəhi mąą mɛ̨nį ə kɛ di nwuɔ̨, da daɓali, nwɔ̨n ɉee hɛn, ə mą kɛ, ɉaláá kulɔ kəhi, da yiiɠaa kpɔ mąąnɛ̨ɛ̨ ə kɛ a gólói tii kɛ hɛn, ə mą kɛ, ɉəɠəi da ɉɛlɛn naa, da ɉɛnŋąą pɛli kóló kəlee. 32 Eleazarə ɓə kɛ a Levi lonnii nwun nąmu kɛnɛ̨, yaa tii kɛ a ɉaláá laa həli mun gɛnɛ̨ Aarɔn lon. Nuą kpɔ di kɛi di tɛɛ laa ɉaláá kóló kɛ mɛ̨nį ɓa, Eleazarə ɓə kɛ di nwun na. 33 Merari lonnii; Mahli yəi gwəli nuą, da Musi yəi gwəlii, diɛ ɓə kɛ a Merari huwu hu nuą. 34 Ɉinąą lonɔɔ, yiiɠaa di kaa kwɛlan ə həɠə ɲąnin dɔ̨nɔ̨ ɓa, di kɛ a nu waa mɛ̨ida pulu nwun veelɛ (6200). 35 Merari yəi bɛlɛ́n, da ɲəi gwəlii nwun nąmu ɓaa Avihailə lon Suriɛlə di wɔ ɓuwui ə kɛ gee kaa kələ kwɛlɛ ɲələi pələ. 36 Gólói kɛ Merari yəi bɛlɛ́n nuą yəi, ya ɓaa: Gee kaa kələ nɔ̨nwɔ̨ɠaa, naaŋąɠaa, gɔwɔɠaa, da di hvilɛn ɉɛnŋąą mąą mɛ̨nį, da ɉɛnŋąą kpɔ mąąnɛ̨ɛ̨ di góló kɛ la, diɛ yiliɠaa kɛ la. 37 Ə mą kɛ nwɔ̨nɔ̨, galai ŋɛ̨i dɔɔ gee kaa kələ ɓa, nɔ̨nwɔ̨ɠaa da di kɔ́wɔ hvilɛn ɉɛnŋąą, ə mą kɛ gbanwo wulu pɛlɛɛɠaa da ɲɛliɠaa. 38 Nuąi kɛ heeni gee kaa kələ voló həɠəi pələ, diɛ ɓaa kɛ a Moisə da Aarɔn lonnii, diɛ ɓə kɛi ɉaláá mɛ̨nįɠaa ɲɛ̨i kulɔ, Israɛlə lonnii kəlee mąą mɛ̨nį ɓa. Nui hvo kɛ a di ta, a lɛɠɛ laa da baa. 39 Levi lonnii, Moisə da Aarɔn di di lonon a bɛlɛ́ɠaa da gwəliɠaa laa, yɛ bələi Yai-Laa ə di tí la, Levi huwu hu hinąą ə həɠə ɲąnin dɔ̨nɔ̨ ɓa yɛ li la tɔwɔ pələ, di kɛ a nu waa pow hveelɛ kɔ́w hveelɛ (22000). Lon ɉinąą dɔlɔɔɠaa di nwun mąąɓo mɛ̨nį 40 Yai-Laa yɛ Moisə ɓa: «Lon ɉinąą dɔlɔɔɠaai kpɔ di kaa Israɛlə lonnii yəi, ə həɠə kɛa ɲąnin dɔlɔɔ lon ma yɛ li la tɔwɔ pələ, gəlee lonon. 41 Levi nwɛiɠaai ɓə yá di lɛɛ a nwɔ́ɔ́; ɲą́ą́ ɓə a Yai-Laa. Diɛ ɓə kɛi a Israɛlə lon ɉinąą dɔlɔɔɠaa kəlee mąąhvalin. Bələ lɔ ɓə ə́ kaa gɛi la a di yəi taatɛlɛɛɠaa; a Israɛlə lonnii di wɔ taatɛlɛɛ lon dɔlɔɔɠaa mąąhvalin.» 42 Moisə ə Israɛlə lon ɉinąą dɔlɔɔɠaa kəlee lonon, yɛ bələi Yai-Laa ə dí la. 43 Non ɉinąą dɔlɔɔɠaai tii kəlee, diɛi di di lonon, ə həɠə ɲąnin dɔ̨nɔ̨ lon ma, yɛ li la tɔwɔ pələ, di kɛ a nu waa pow hveelɛ kɔ́w hveelɛ pulu nwun veelɛ yee mɛ̨ihveelɛ kɔ́w haaɓa (22273). 44 Yai-Laa yɛ Moisə ɓa: 45 «Levi nu huwu həɠə a Israɛlə lon ɉinąą dɔlɔɔɠaa mąąhvalin. Ə́ Levi nu huwu nwɔ taatɛlɛɛɠaai həɠə, a Israɛlə taatɛlɛɛ lon dɔlɔɔɠaa mąąhvalin, Levi huwu kaa a nwɔ́ɔ́. Ɲą́ą́ ɓə gáá a Yai-Laa. 46 Israɛlə lon ɉinąą dɔlɔɔ yiiɠaai ŋɛ̨i lɛɛ a nu nwun veelɛ nu pow mɛ̨ihveelɛ kɔ́w haaɓa (273) yii Levi lonnii di hvo pɛli kɛi a di nwun mąąɓo nuą, 47 yá wali kwələ lɔɔli həɠə nu tɛi tɛi kəlee nwuɔ̨, yá ɉəɠə yɛ bələi gee kaa kələ mu wali kɔ́ɔn bələ kaa la. Wali kwələ tɔ̨nɔ̨ mu ə kɛ a nwia a gramə pow. 48 Nwalii tii ɓə yá dɛɛ Aarɔn lonnii pɔ, a nu nwun veelɛ nu pow mɛ̨ihveelɛ kɔ́w haaɓai (273) tii nwun mąąɓo hɛn.» 49 Di pa a nuą nwun mąąɓo walii tii di dɛɛ Moisə pɔ, yii kɛ nanŋąą nu kwɛni mɛ̨i, diɛi Levi lonnii di di nwun mąąɓo. 50 Nwalii ŋɛ̨i kɛ a Israɛlə lon dɔlɔɔɠaa nwun mąąɓo wali, ə kɛ a wali kwələ waa tɔ̨nɔ̨ pulu nwun ɉaaɓa yee mɛ̨ida kɔ́w lɔɔli (1365), yɛ bələi gee kaa kələ nwɔ wali kɔ́ɔn ŋąą ə kɛ la. 51 Moisə ə nwun mąąɓo walii tii tɛɛ Aarɔn da nonnii di pɔ, yɛ bələi Yai-Laa nwɔ tɔ́n gaa la; Moisə ə gɛ yɛ bələi Yai-Laa ə dí la. |