Lonon mo 29 - Yálá laawoo hɛɓɛ (dc)Túlú hɛli 1 «Ɲąnin mɛ̨ihveelɛnąą nwɔ hɛli yələ, ka ka ɲąąkpɔn, ka kwɛlihvilɛn Yálá ɓa; ka hva kóló walawala ta kɛ a ka yee a ɉɛli yələ. 2 Ka haláái da gəlee kələn gulɔ Yai-Laa ɓa, mąą kun nɛ̨ɛ̨, yɛ niilaa. Ka gɛ a nįŋɛ̨ tɔ̨nɔ̨, da ɓɛlaa hilɛ tɔ̨nɔ̨; da kwɛlan dɔ̨nɔ̨ ɓɛlaa lonnii mɛ̨ihveelɛ, yiiɠaa kpɛɠii hva kɛ diɛ. 3 Da lɛɠɛ hunwɔ̨ kiin ŋąą wulɔ hu, ka gəgən ɲąą haaɓa pɛlɛ nįŋɛ̨ hilɛ ɓa, ka gəgən ɲąą hveelɛ pɛlɛ mɛlaa hilɛ ɓa. 4 Ka gəgən ɲąą tɛitɛi pɛlɛ mɛlaa lonnii tɛitɛi ɓa. 5 Yili pulu, ka ɓolu hilɛ tɔ̨nɔ̨ kulɔ a nɛ̨ŋɛ̨n ɉaláá, ɉaláá kulɔ nuą diɛ nɛ̨ŋɛ̨n mąąhvaalɛɛ woo ɓo ka mɛ̨i. 6 Haláái da gəlee kələn ka gulɔ Yálá ɓa a ɲąnin dɔɔ pələ tɛitɛi kəlee, yili a kɛ laa a dee, da Yálá kɔ́ hɛn. Haláái da gəlee kələn ka káá pai kɛi gulɔi hvóló tɛitɛi yee mu, da ɉɛnŋąąi ka káá pai kɛi gɔ́i la, da nɔɔ, yili yaa kpɛli gulaai ɉu. Ka káá pai kɛi ɉalááɠaa tii kulɔi yɛ bələi di di kulɔ pələ mąą tɔ́nŋąą laa la. Kɔ̨nɔ̨n mąą kun nɛ̨ɛ̨li yɛ Yai-Laa liilaa. Nɛ̨ŋɛ̨n mąąhvaalɛɛ hvóló 7 «Ɲąnin mɛ̨ihveelɛnąą nwɔ hvóló bow yələ, ka ɲąąkpɔn mąąhəɠɛɛ too, ka hin nɔ, ka hva kóló ta kɛ. 8 Ka haláái da gəlee kələn gulɔ Yai-Laa ɓa, mąą kun nɛ̨ɛ̨ yɛ niilaa; nįŋɛ̨ hilɛ tɔ̨nɔ̨, ɓɛlaa hilɛ tɔ̨nɔ̨, kwɛlan dɔ̨nɔ̨ ɓɛlaa hilɛ mɛ̨ihveelɛ yiiɠaa kpɛɠii hva kɛ diɛ, 9 da lɛɠɛ hunwɔ̨ kiin ŋąą wulɔ hu; gəgən ɲąą haaɓa bɛlɛ nįŋɛ̨ hilɛ ɓa, da gəgən ɲąą hveelɛ bɛlɛ mɛlaa hilɛ ɓa; 10 Ɛlɛɛ, ɓɛlaa lonnii mɛ̨ihveelɛ gəgən ɲąą tɛitɛi. 11 Yili pulu, ɓolu hilɛ tɔ̨nɔ̨, a nɛ̨ŋɛ̨n mąąhvaalɛɛ haláá, ə pɛlɛ la nɛ̨ŋɛ̨n mąąhvaalɛɛ haláái ka gulɔ a nɛ̨ŋɛ̨n mąąhvaalɛɛ hvóló kɛnɛ̨i nwɛi ɓa. Haláái da gəlee kələn ka gulɔ a yələ kəlee, da ɉɛnŋąąi ka Yálá kɔ́ la a bɔlɔ bɛlɛɛ nɔɔ ɓa. Ɉəɠə ɓɛla kələɠaa di wɔ hɛli 12 «Ɲąnin mɛ̨ihveelɛnąą nwɔ hvóló pow kɔ́w lɔɔli yələ, ka ɲąąkpɔn mąąhəɠɛɛ too, ka hva kóló walawala ta kɛ. Ka Yai-Laa mąąwiɛ hvóló mɛ̨ihveelɛ yee mu. 13 Ka kɔ̨nɔ̨n mąą kun nɛ̨ɛ̨ tɛɛ Yai-Laa pɔ a haláái da gəlee kələn, yɛ niilaa, nįŋɛ̨ hilɛ pow kɔ́w haaɓa, ɓɛlaa hilɛ hveelɛ, kwɛlan dɔ̨nɔ̨ ɓɛlaa hilɛ pow kɔ́w nąąn, yiiɠaa kpɛɠii hva kɛ da ɓa. 14 Ka lɛɠɛ hunwɔ̨ kiin wulɔ hu, ka bɛlɛ mą, gəgən ɲąą haaɓa a nįŋɛ̨ hilɛ tɛitɛi nwɔɔ, gəgən ɲąą hveelɛ a ɓɛlaa hilɛ tɛitɛi nwɔɔ. 15 Gəgən ɲąą tɔ̨nɔ̨ ɓɛlaa lon dɔ̨nɔ̨. 16 Yili pulu, ɓolu hilɛ tɔ̨nɔ̨ a nɛ̨ŋɛ̨n mąąhvaalɛɛ haláá. Haláái da gəlee kələn da gulɔ a yələ kəlee, da ɉɛnŋąąi da Yálá kɔ́ la, da nɔɔi mąąnɛ̨ɛ̨ ə pu, yili kəlee pɛlɛɛ mą. 17 «Voló hveelɛ yələ, nįŋɛ̨ hilɛ pow kɔ́w hveelɛ, ɓɛlaa hilɛ hveelɛ, kwɛlan dɔ̨nɔ̨ ɓɛlaa hilɛ pow kɔ́w nąąn yiiɠaai kpɛɠii hva kɛ da ɓa. 18 Da ɉaláá hɛnŋąą, da nɔɔi mąąnɛ̨ɛ̨ ə pɛlɛ nįŋɛ̨ hilɛɠaa diɛ da mɛlaa hilɛɠaa, ə mą kɛ mɛlaa lonnii, yɛ bələi da gɛ la a bɔlɔ, di pɛlɛɛ daatɛlɛɛɠaa diɛ. 19 Yili pulu, ɓolu hilɛ tɔ̨nɔ̨ a nɛ̨ŋɛ̨n mąąhvaalɛɛ haláá; haláái da gəlee kələn da gulɔ hvóló tɛitɛi yee mu da ɉɛnŋąąi da gɔ́ la, ə mą kɛ, nɔɔi mąąnɛ̨ɛ̨ ə pu, di di pɛlɛ mą. 20 Voló haaɓa yələ, nįŋɛ̨ hilɛ pow kɔ́w tanɔ̨n, ɓɛlaa hilɛ hveelɛ, kwɛlan dɔ̨nɔ̨ ɓɛlaa hilɛ pow kɔ́w nąąn yiiɠaai kpɛɠii hva kɛ da ɓa. 21 Da nɛɠɛ hunwɔ̨ kiin ŋąą a wulɔ, yai di ɉəɠə nįŋɛ̨ɠaa mąą mɛ̨nį ɓa, da mɛlaa hilɛɠaa, ə mą kɛ mɛlaa lonnii, yɛ bələi da gɛ la a bɔlɔ, di pɛlɛɛ daatɛlɛɛɠaa diɛ. 22 Yili pulu, ɓolu hilɛ tɔ̨nɔ̨ a nɛ̨ŋɛ̨n mąąhvaalɛɛ haláá; haláái da gəlee kələn da gulɔ hvóló tɛitɛi yee mu da ɉɛnŋąąi da gɔ́ la, ə mą kɛ, nɔɔi mąąnɛ̨ɛ̨ ə pu, di di pɛlɛ mą. 23 Voló nąąn ɲələ, nįŋɛ̨ hilɛ pow, ɓɛlaa hilɛ hveelɛ, kwɛlan dɔ̨nɔ̨ ɓɛlaa hilɛ pow kɔ́w nąąn yiiɠaai kpɛɠii hva kɛ da ɓa, 24 Da ɉaláá hɛnŋąą, nɔɔi mąąnɛ̨ɛ̨ ə pɛlɛ nįŋɛ̨ hilɛɠaa diɛ da mɛlaa hilɛɠaa, ə mą kɛ mɛlaa lonnii, yɛ bələi da gɛ la a bɔlɔ, di pɛlɛɛ daatɛlɛɛɠaa diɛ. 25 Yili pulu, ɓolu hilɛ tɔ̨nɔ̨ a nɛ̨ŋɛ̨n mąąhvaalɛɛ haláá; haláái da gəlee kələn da gulɔ hvóló tɛitɛi yee mu da ɉɛnŋąąi da gɔ́ la, ə mą kɛ, nɔɔi mąąnɛ̨ɛ̨ ə pu, di di pɛlɛ mą. 26 Voló lɔɔli yələ, nįŋɛ̨ hilɛ mɛ̨inąąn, ɓɛlaa hilɛ hveelɛ, kwɛlan dɔ̨nɔ̨ ɓɛlaa hilɛ pow kɔ́w nąąn yiiɠaai pɔɔ hva kɛ da ɓa, 27 Da ɉaláá hɛnŋąą, nɔɔi mąąnɛ̨ɛ̨ ə pɛlɛ nįŋɛ̨ hilɛɠaa diɛ da mɛlaa hilɛɠaa, ə mą kɛ mɛlaa lonnii, yɛ bələi da gɛ la a bɔlɔ, di pɛlɛɛ daatɛlɛɛɠaa diɛ. 28 Yili pulu, ɓolu hilɛ tɔ̨nɔ̨ a nɛ̨ŋɛ̨n mąąhvaalɛɛ haláá; haláái da gəlee kələn da gulɔ hvóló tɛitɛi yee mu da ɉɛnŋąąi da gɔ́ la, ə mą kɛ, nɔɔi mąąnɛ̨ɛ̨ ə pu, di di pɛlɛ mą. 29 Voló mɛ̨ida nąą, nįŋɛ̨ hilɛ mɛ̨ihaaɓa, ɓɛlaa hilɛ hveelɛ, kwɛlan dɔ̨nɔ̨ ɓɛlaa hilɛ pow kɔ́w nąąn yiiɠaai pɔɔ hva kɛ da ɓa, 30 Da ɉaláá hɛnŋąą, nɔɔi mąąnɛ̨ɛ̨ ə pɛlɛ nįŋɛ̨ hilɛɠaa diɛ da mɛlaa hilɛɠaa, ə mą kɛ mɛlaa lonnii, yɛ bələi da gɛ la a bɔlɔ, di pɛlɛɛ daatɛlɛɛɠaa diɛ. 31 Yili pulu, ɓolu hilɛ tɔ̨nɔ̨ a nɛ̨ŋɛ̨n mąąhvaalɛɛ haláá; haláái da gəlee kələn da gulɔ hvóló tɛitɛi yee mu da ɉɛnŋąąi da gɔ́ la, ə mą kɛ, nɔɔi mąąnɛ̨ɛ̨ ə pu, di di pɛlɛ mą. 32 Voló mɛ̨ihveelɛ yələ, nįŋɛ̨ mɛ̨ihveelɛ, ɓɛlaa hilɛ hveelɛ, kwɛlan dɔ̨nɔ̨ ɓɛlaa hilɛ pow kɔ́w nąąn yiiɠaai pɔɔ hva kɛ da ɓa, 33 Da ɉaláá hɛnŋąą, nɔɔi mąąnɛ̨ɛ̨ ə pɛlɛ nįŋɛ̨ hilɛɠaa diɛ da mɛlaa hilɛɠaa, ə mą kɛ mɛlaa lonnii, yɛ bələi da gɛ la a bɔlɔ, di pɛlɛɛ daatɛlɛɛɠaa diɛ. 34 Yili pulu, ɓolu hilɛ tɔ̨nɔ̨ a nɛ̨ŋɛ̨n mąąhvaalɛɛ haláá; haláái da gəlee kələn da gulɔ hvóló tɛitɛi yee mu da ɉɛnŋąąi da gɔ́ la, ə mą kɛ, nɔɔi mąąnɛ̨ɛ̨ ə pu, di di pɛlɛ mą. 35 «Voló mɛ̨ihaaɓa yələ kaa a ɉɛli laa kulɔ yələ. Ka hvo kóló walawala ta kɛ. 36 Mąąnɛ̨ɛ̨ ka Yai-Laa mąąwiɛ haláá kulɔ mą, a kɔ̨nɔ̨n mąą kun nɛ̨ɛ̨ yɛ niilaa, nįŋɛ̨ hilɛ tɔ̨nɔ̨, ɓɛlaa hilɛ tɔ̨nɔ̨ da kwɛlan dɔ̨nɔ̨ ɓɛlaa lonnii mɛ̨ihveelɛ, yiiɠaai pɔɔ hva kɛ da ɓa, ka gəlee kələn. 37 Da ɉaláá hɛnŋąą, nɔɔi mąąnɛ̨ɛ̨ ə pɛlɛ nįŋɛ̨ hilɛɠaa diɛ da mɛlaa hilɛɠaa, ə mą kɛ mɛlaa lonnii, yɛ bələi da gɛ la a bɔlɔ, di pɛlɛɛ daatɛlɛɛɠaa diɛ. 38 Yili pulu, ɓolu hilɛ tɔ̨nɔ̨ a nɛ̨ŋɛ̨n mąąhvaalɛɛ haláá; haláái da gəlee kələn da gulɔ hvóló tɛitɛi yee mu da ɉɛnŋąąi da gɔ́ la, ə mą kɛ, nɔɔi mąąnɛ̨ɛ̨ ə pu, di di pɛlɛ mą. 39 «Ɉɛn mąąnɛ̨ɛ̨ ka Yai-Laa kɔ́ la a volóɠaai di ɉee kaa, ya ka tii. Ɉalááɠaai ka ka woo kwɛlɛ la, ɉalááɠaai ka gulɔ lɔ a ka kwəinɛ̨ɛ̨ pələ. Halááɠaai da gəlee kələn, nɛɠɛ hunwɔ̨ halááɠaa, nɔɔi ka bu da niilaa halááɠaa, yaa li.» |