Lonon mo 28 - Yálá laawoo hɛɓɛ (dc)

Hvóló tɛitɛi haláá kulɔ pələ

¹ Yai-Laa ə mo Moisə ɓa,

² yɛ mą mɛ̨nįɠaa ŋɛ̨i ɓo Israɛlə lonnii diɛ, yɛ́ diɛ: «Ka tɔɔ a ka nwąnąi, ɉɛnŋąąi mąąnɛ̨ɛ̨ ka gɔ́ la, kaa paa la a guui da ɉee. Gɔ̨nɔ̨n da gələn, mąą kun nɛ̨ɛ̨.

³ 'Mo diɛ, yɛ́ diɛ: Kɔ̨nɔ̨nŋąąi mąąnɛ̨ɛ̨ ka Yai-Laa kɔ́ la, diɛ ka: kwɛlan dɔ̨nɔ̨ ɓɛlaa lon veelɛ, kpɛɠii hvo kɛ diɛ; hvóló tɛitɛi haláá hɛn ni, kaa gulɔ a haláái da gəlee kələn, yələ kəlee mɛ̨nį li.

⁴ Da dɔ̨nɔ̨ kulɔ a haláá yələwala pɔ, di veelɛnąą kulɔ hvitili ɓa.

⁵ Lɛɠɛ hunwɔ̨ gəgən ɉu tɔ̨nɔ̨ yɔwɔɔn ŋąą olivə wulɔ nįnɛ̨ litɛlɛ tɔ̨nɔ̨ da gbulɔ hu.

⁶ Haláá da gəlee kələn, kaa gulɔ a yələ kəlee mɛ̨nį, yɛ bələi di kɛi gulɔ la Sinai yee ɓa, yai kɛ a kɔ̨nɔ̨n mąą kun nɛ̨ɛ̨ yɛ Yai-Laa líílaa, yaa li.

⁷ Mɛlaa lon dɔ̨nɔ̨ paai lɔwai, ka pa a lɔɔ litɛlɛ tɔ̨nɔ̨ da gbulɔ, ka naa həli Yai-Laa ɓa bɛlɛ́ mąąhəɠɛɛ mu.

⁸ Da mɛlaa lon veelɛnąą kulɔ a haláá hvitili ɓa lɔwai; lɔ yɛ bələi da yələwala pɔ nwɛi kɛ la, da naa həli Yálá ɓa da gɔ́ hɛnŋąą, bɛlɛɛ nɔɔ ɓa. Kɔ̨nɔ̨n mąą kun nɛ̨ɛ̨ li, a Yai-Laa nwɔɔ, yɛ níílaa.

Hviitɔɔ yələ nwɔ haláá

⁹ «Hviitɔɔ yələ, da kwɛlan dɔ̨nɔ̨ ɓɛlaa lon veelɛ kulɔ a haláá, kpɛɠii hva kɛ diɛ; diɛ di kələn. Bɛlɛɛ lɛɠɛ hunwɔ̨ gəgən ɲąą hveelɛ ɓa, giin ŋąą wulɔ hu, da nɔɔi mąąnɛ̨ɛ̨ di paa la.

¹⁰ Haláá hɛn da gəlee kələn yaa li, a hvįįtɔɔ yələ, ə pɛlɛ la ɉaláái mąąnɛ̨ɛ̨ di gulɔ a yələ kəlee mą.

Ɲąnin voló tɔlɔɔ nwɔ haláá

¹¹ «Ɲąnin gəlee kɔ́wɔ tɔɔ hvóló, mąąnɛ̨ɛ̨ ka Yai-Laa kɔ́, a haláá hɛn da gəlee kələn, ka gɛ a nįŋɛ̨ hilɛ hveelɛ, ɓɛlaa hilɛ tɔ̨nɔ̨, kwɛlan dɔ̨nɔ̨ ɓɛlaa lonnii mɛ̨ihveelɛ. Kpɛɠii hva kɛ da ɓa.

¹² Ɉɛn mąąnɛ̨ɛ̨ ə pɛlɛ nįŋɛ̨ hilɛ tɛi tɛi ɓa, ya ka: Lɛɠɛ hunwɔ̨ gəgən ɲąą haaɓa, giin ŋąą a wulɔ; mɛlaa hilɛ nwɛi, lɛɠɛ hunwɔ̨ gəgən ɲąą hveelɛ, giin ŋąą a wulɔ.

¹³ Mɛlaa lonnii tɛi tɛi, gəgən ɲąą tɔ̨nɔ̨ ɓɛlaa lon dɔ̨nɔ̨; giin ŋąą a wulɔ. Haláá hɛn da gəlee kələn mąą kun nɛ̨ɛ̨ yɛ Yai-Laa líílaa.

¹⁴ Nɔɔi mąąnɛ̨ɛ̨ di paa la, ya ka: Nįŋɛ̨ hilɛ tɔ̨nɔ̨ lɔɔ ɓala tɔ̨nɔ̨; mɛlaa hilɛ nwɛi, lɔɔ golo tɔ̨nɔ̨, mɛlaa lon dɔ̨nɔ̨ da lɔɔ litɛtɛ tɔ̨nɔ̨. Ɲąnin dɔɔ nįnɛ̨ haláái da gələn ya ka tii. Yai mąąnɛ̨ɛ̨ kaa gulɔ ɲąnin nįnɛ̨ tɛi tɛi yee mu kwɛlan ɉu.

¹⁵ Yili pulu, ka ɓolu hilɛ tɔ̨nɔ̨ kulɔ a haláá Yai-Laa ɓa, a nɛ̨ŋɛ̨n mąąhvaalɛɛ haláá, ka bɛlɛ yələ kəlee haláái da gələn mą, da nɔɔi mąąnɛ̨ɛ̨ di paa la.

Pakə haláá

¹⁶ «Ɲąnin dɔlɔɔ nwɔ hvóló pow kɔ́w nąąn ɲələ kaa a pakə, Yai-Laa mąąwiɛ yələ li.

¹⁷ Ɲąnin nwɔ hvóló pow kɔ́w lɔɔli yələ, kaa a hɛli, hvóló mɛ̨ihveelɛ yee mu, lɛɠɛi dɛ hɛn və ɉu ya ɓə ka mįi.

¹⁸ Ɉɛlii tii nwɔ hvóló dɔlɔɔ yələ, ka ɲąąkpɔn mąąhəɠɛɛ kɛ ka hva lɔwɔ mu kóló ta kɛ.

¹⁹ Kaa kɔ̨nɔ̨nŋąą laa həli Yai-Laa ɓa, a haláái da gələn. Nįŋɛ̨ hilɛ hveelɛ ɓɛlaa hilɛ tɔ̨nɔ̨, kwɛlan dɔ̨nɔ̨ ɓɛlaa lonnii mɛ̨ihveelɛ, a taatɛlɛɛɠaai kpɛɠii hva kɛ diɛ.

²⁰ Ka Yálá kɔ́ haláá pɛlɛ taatɛlɛɛ tɛi tɛi ɓa, a lɛɠɛ hunwɔ̨ kiin ŋąą a wulɔ; Gəgən ɲąą haaɓa nįŋɛ̨ hilɛ tɔ̨nɔ̨, mɛlaa hilɛ nwɛi gəgən ɲąą hveelɛ.

²¹ Mɛlaa lonnii mɛ̨ihveelɛi di wɛi, gəgən ɲąą tɔ̨nɔ̨ ɓɛlaa lon dɔ̨nɔ̨.

²² Yili pulu, ɓolu hilɛ tɔ̨nɔ̨ a nɛ̨ŋɛ̨n mąąhvaalɛɛ haláá, a nɛ̨ŋɛ̨n mąąhvaalɛɛ woo ɓo mɛ̨nį ɓa ka mɛ̨i.

²³ Ka yiliɠaai kəlee kɛ, ka bɛlɛ haláái da gəlee kələn mą, diɛ gulɔ yələ wala pɔ tɛitɛi.

²⁴ Bələ ɓə mąąnɛ̨ɛ̨ ka gɛ la a yələ kəlee voló mɛ̨ihveelɛi tii yee mu. Yai-Laa liilaa kɔ̨nɔ̨n mąą kun nɛ̨ɛ̨li. Yili kəlee a pɛlɛ ɉaláái mąąnɛ̨ɛ̨ di gəlee kələn mą, diɛ gulɔ a yələ kəlee da nɔɔi mąąnɛ̨ɛ̨ ə pu ɉaláá kulɔi.

²⁵ Voló mɛ̨ihveelɛ yələ, ka ɲąąkpɔn mąąhəɠɛɛ kɛ, ka hva lɔwɔi kóló ta kɛ a mąą yələ.

Pantəkotə a wala kɛ tii lɔwɔ mɛ̨ihveelɛ hɛli

²⁶ «Ka kɛ kóló má tɔlɔɔɠaa mąą hɛli pu yələ, ka kɛi pa Yai-Laa kɔ́i a ka pɔ yɛa ɓá nįnɛ̨ɠaa a nɔwɔ mɛ̨ihveelɛ hɛli yələ, mąąnɛ̨ɛ̨ ka ɲąąkpɔn mąąhəɠɛɛ too; ka hva kóló ta kɛ a mąą yələ.

²⁷ Ɉɛn mąąnɛ̨ɛ̨ ka gələn Yai-Laa ɓa, yɛ niilaa ya ka: Nįŋɛ̨ hveelɛ, ɓɛlaa hilɛ tɔ̨nɔ̨, da kwɛlan dɔ̨nɔ̨ ɓɛlaa lonnii mɛ̨ihveelɛ.

²⁸ Yálá kɔ́ hɛnŋąąi mąąnɛ̨ɛ̨ ka bɛlɛ diɛ ya ka: Ka lɛɠɛ hunwɔ̨ kiinŋąą wulɔ hu pɛlɛ daatɛlɛɛɠaai tii diɛ; lɛɠɛ hunwɔ̨ kilə mɛ̨inąąn mə ka bɛlɛ mɛlaa ɓa, kilə mɛ̨ida ɓə ka bɛlɛ mɛlaa hilɛ ɓa.

²⁹ Kilə haaɓa ɓə ka bɛlɛ ɓɛlaa lonnii tɛi tɛi ɓa.

³⁰ Yili pulu, ka ɓolu hilɛ tɔ̨nɔ̨ kulɔ a nɛ̨ŋɛ̨n mąąhvaalɛɛ haláá, diɛ nɛ̨ŋɛ̨n mąąhvaalɛɛ woo ɓo ka mɛ̨i.

³¹ Ka ɉɛnŋąąi tii kəlee pɛlɛ ɉaláái mąąnɛ̨ɛ̨ di gəlee kələn mą, ka gulɔ a yələ kəlee, da Yálá kɔ́ hɛn dakpɛliɠaa, da nɔɔi mąąnɛ̨ɛ̨ ə pɛlɛ diɛ. Ka gɛ a taatɛlɛɛɠaai kpɛɠii hva kɛ diɛ.