Lonon mo 27 - Yálá laawoo hɛɓɛ (dc)

Nɛ̨ąą kwɛlin mąą mɛ̨nį

¹ Nąąlɔwai, Selofehadə lonnii nɛ̨ąą, diɛi kɛ a: Mala, Noa, Hogla, Milka, da Tirsa. Selofehadə ə kɛ a Manase huwu ta, Manase yaan, ə ɓo a Ɉosɛfə lon. Selofehadə kala pɔlɔ ɓaa kɛ a: Makirə, Galaadə, da Hefɛrə.

² Nɛ̨ąą lɔɔlii tii, di pa di həli Moisə ɓa, da ɉaláá laa həli mun Eleazarə, ə mą kɛ nɔi ɲɛ̨itɔwɔ nuą, da nɔi nuą kəlee, gee kaa kələ laaləi.

³ Diɛ nuą diɛ: «Ku nąn ə haa nɔi pun ɉu, nuą ŋɛ̨i di muhəɠə Yai-Laa laa ɓa, hvo kɛ di lɔwai, hvo kɛ a Kore nwɔ nuą ta. Kɛlaa, gbɔ kpɔɔ nɛ̨ŋɛ̨n mąą mɛ̨nį ɓa ə haa ɉu, hvo kɛ lon ɉulɔnu kaa li.

⁴ Akɛti, ku nąn laa yɛ mɔ̨ɔ̨ ə pa kpɛɛ ɉuwu hu? Mąąhɔlɔɓo, lon ɉulɔnu hvo kɛ mą? Yili ɓa tii, lɔi tɛɛ ku pɔ, yɛ bələi ə́ dɛɛ la ku nąn niɛni, da nəɠəni di pɔ.»

⁵ Moisə ə li ə mɛ̨nįɠaa tii laa həli Yai-Laa ɓa.

⁶ Yai-Laa yɛ Moisə ɓa:

⁷ «Tɛ̨ąą kaa Selofehadə lon nɛ̨ąą pɔ. Mąąnɛ̨ɛ̨ ə́ lɔi tɛɛ di pɔ a di wɔɔ, ɛlɛɛ, nąą ə kɛ di yəi a di nąn gwɛlin.

⁸ Yili pulu, mo Israɛlə lonnii diɛ, yɛ́ diɛ: ‹Hulɔnu ta a haa, lon ɉulɔnu a wala kɛ mą, mąąnɛ̨ɛ̨ ka gwɛlin dɛɛ non nɛ̨ɛ̨nu pɔ.

⁹ Lon nɛ̨ɛ̨nu a wala kɛ mą, ka gwɛlin dɛɛ nəɠəni da niɛni di pɔ.

¹⁰ Nąn non a wala kɛ laa, ka dɛɛ nąn niɛni, a wala kɛ tii nąn nəɠəni pɔ.

¹¹ Akɛ liɛ, a wala kɛ tii ləɠə a wala kɛ nąn ma, ka gwɛlin dɛɛ gaayɔwɔ ta pɔ, yii nɛɠɛɛ mą di yəi gwəlii; mąą nu ɓə ɉɛn tii a lɛɛ ɲəi.› Israɛlə yii pələ mąą tɔ́n da ka tii, yɛ bələi Yai-Laa ə mo la Moisə ɓa.»

Ɉosue ɓə pai kɛi a Moisə mąą hvalin

¹² Yai-Laa yɛ Moisə ɓa: «Tɛ́ Avarimə yee tonna, nɔi gɛ́ ŋį́ pa dɛɛ Israɛlə lonnii pɔ, ə́ gaa.

¹³ Ə́ kaa lɔ ə́ ɲɛ̨i tɔɔi mą, kɛlaa, yɛ́ kpɛli, ə́ kaa pai laŋąn ɉii ə́ kalani diɛ, yɛ bələi ə́ liɛ Aarɔn ə laŋąn na diɛ.

¹⁴ Mąąhɔlɔɓo, Sin lɔi pun ɉu, ɓɛlɔwai Israɛlə nuą di hvaa pɛlɛ la mą́ą́, ka kulɔ nwóó mu, a ka tíi ŋį́ mo gɛ́ ka nwɔ́ mąąhəɠə laa lɛ nuą diɛ di gaa, a yá kulaa a kpalo mɛ̨nį.» Yili hvilɛn ŋąąi Meriba yá mɛ̨nį ɓa, yii kɛ Kadɛsə, Sin nɔi pun ɉu.

¹⁵ Nąąlɔwai Moisə yɛ Yai-La ɓa:

¹⁶ «Yai-Laa, yɛ́i ə́ kaa a Yálái pɛli hɛn gəlee nɔ̨ɔ̨ kaa ɲee kɔ́nma, gɛ́ ə́ nu ta lɛ, yai pai lɛɛi nuą nwun na.

¹⁷ Mąą nu yɛ li, yɛ pa, yɛ ɓo nuą ɲɛ̨i tɔwɔ, yɛ di lɔ, yɛ di kulɔ; ə gɛ, Yai-Laa nwɔ nu kpului hvo pa lɛɛ lɔ yɛ taatɛlɛɛi mɛ̨i kaa mun və mą.»

¹⁸ Yai-Laa ə Moisə woo pulu pənə yɛ mą: «Nun lon Ɉosue həɠə, gaa a nui nwɔ́ Kilii kaa ɲəi. 'Lí, ə́ ə́ yee laa mɛ̨i,

¹⁹ ə́ nɛ ɉaláá laa həli mun Eleazarə ɓa, da nu kpulu kəlee, ə́ dɔɔ gɛ kóló ɓa di ɲɛ̨i ɓa;

²⁰ ə́ ə́ wɔ heeɓo laa tɛɛ bɔ, Israɛlə nuą kəlee diɛ tí mą.

²¹ Mąąnɛ̨ɛ̨ ə li ɉaláá laa həli mun Eleazarə pɔ, yili ə urimə mɛ̨nį mąąni kɛ, yɛ hvilɛn na mą Yai-Laa ɲɛ̨i ɓa. Bələi urimə kaa pai moi la, bələ ɓə di kaa pai gɛi la, diɛ lɔ, diɛ kulɔ, yaa da Israɛlə nuą kəlee.»

²² Moisə ə gɛ, yɛ bələi Yai-Laa ə mo la mą. Ə Ɉosue həɠə, ə nɛ ɉaláá laa həli mun Eleazarə ɓa, da nu kpɔn gəlee.

²³ Moisə ə ɲee pɛlɛ nwuɔ̨, ə dɔɔ gɛ kóló ɓa, yɛ bələi Yai-Laa ə gbɛa mo la Moisə ɓa.