Lonon mo 25 - Yálá laawoo hɛɓɛ (dc)Israɛlə lonnii di di yee lɔ hali mɛ̨nį hu 1 Israɛlə ə hee Sitimə, nuą di gbala tɔɔ diɛ di yee lɔ wɛli mɛ̨nį hu, da Moabə nɛ̨ɛ̨lɛa. 2 Moabə nɛ̨ɛ̨lɛa di kɛi Israɛlə lonnii təli di wɔ haliɠaai kɔ́ halááɠaa diɛ, diɛ di laa mįi laa; diɛ kwɛli hvilɛn nɛ̨ąąi tii di wɔ haliɠaai diɛ. 3 Israɛlə ə gbɔwɔ kɛ a Peɔrə Baalə nwɔ tímun. Yai-Laa lii ə holi Israɛlə pɔ. 4 Yai-Laa yɛ́ Moisə ɓa: «Nɔi ɲɛ̨itɔwɔ nuą kəlee hon, ə di hɛlɛn wulu ɓa Yai-Laa lííla, di ɲɛ̨i heɛ hvóló ɓa; Yai-Laa nwɔ liiholi kɛnɛ̨i yɛ pɛli həɠəi Israɛlə pulu.» 5 Moisə yɛ Israɛlə ɲɛ̨itɔwɔ nuą diɛ: «Nui lɔpee nwɔ nu ə hvilɛn Baalə ŋɛ̨i Peɔrə bulu, ka baa.» 6 Nąąlɔwai, Israɛlə hulɔnon da ə Madian nɛ̨ɛ̨non da həɠə, ə paa la nąn nonnii lɔwai, Moisə da Israɛlə nu kpulu kəlee ɲɛ̨i ɓa, ɓɛlɔwai di kɛi wɔlɔ la gee kaa kələ laaləi 7 Yili nąą kaai ɉaláá laa həli mun Aarɔn lon Eleazarə nwɔ lon Pinasə ə mo, ə muhəɠə nuą lɔwai, ə kpala həɠə; 8 ə lɔ la Israɛlə mun tii pɔ bɛlɛ́n, ə ɓɔ la di nu hveelɛi di hu, ɉulɔnu mąn nɛ̨ɛ̨nu mąn. Nɔi kala ɲɔ̨n tii kɛi Israɛlə lonnii paa, ə kpəla kɛa mą. 9 Nuąi lɛɛ ɲɔ̨n tii hu, di kɛ a nu waa pow hveelɛ kɔ́w nąąn. 10 Yai-Laa yɛ Moisə ɓa: 11 «Ɉaláá laa həli mun Aarɔn lon Eleazarə nwɔ lon Pinasə, aa nwɔ́ liiholii həɠə Israɛlə lonnii mɛ̨i, aa mą́ą́ tolo kulɔ. Yili ɓa nwɔ́ liiholii ɲąą aa yɛɛ, və́ kɛa pai Israɛlə lonnii paai, və́ di kpɛɛ yɛnɛ̨ɛ̨. 12 Yili mąą mɛ̨nį ɓa gɛ́ kwa yaa ku mįnɛ̨ həɠə, liilaa ə kɛ ku lɔwai. 13 Mįnɛ̨i tii kaa lɛɛ a yaa da ɉuwu di wɔɔ. Mįnɛ̨i tii kaa pai ɉaláá laa həliɛ mąą laa lɛɛi di yəi a yələ kəlee, hvo gaai ə nwɔ Yálái mąą tolo kulɔ; yɛ Israɛlə lonnii di wɔ nɛ̨ŋɛ̨n mąą kwələ kulɔ kóló kɛ.» 14 Israɛlə mun tii di baa da Madian nɛ̨ɛ̨nui, naa ɓaa kɛ a Zimri Salu lon yai kɛ a Simeɔn huwu ta. 15 Ɛlɛɛ Madian nɛ̨ɛ̨nui tii di baa, naa ɓaa kɛ a Kozbi yai kɛ a Surə lon nɛ̨ɛ̨nu. Surə ə kɛ a kalanɉon, ə ɓo a Madian pɛlɛ́ ta nwun nąmu. 16 Yai-Laa yɛ kɛa kɛ Moisə ɓa: 17 «Ka wolo Madian nuą diɛ, ka di paa. 18 Mąąhɔlɔɓo, di hvaa kwɛli kaa, a gili ɲɔ̨nwɔ̨ɔ̨i di ka hon na Peɔrə mɛ̨nį hu, da Kozbi mɛ̨nį hu, yai kɛ a Madian kalanɉon da lon nɛ̨ɛ̨nui yaa tii di baa, a ɲɔ̨n tii pɛlɛ kaa Peɔrə mąą mɛ̨nį hu.» Di pənə di Israɛlə lonnii lonon 19 Nɔi kala ɲɔ̨n tii ə kpɛɛ. |