Lonon mo 24 - Yálá laawoo hɛɓɛ (dc)1 Balaamə ə gbaɠala kaa yɛ: Yai-Laa liiɓa ɓaa ə lúwɔ́ too Israɛlə ɓa. Hvo kɛa li tɔlukpɛi, yɛ pələi ə kɛi gɛ la gɛɛnąą takpɛliɠaai tii ɓa. Kɛlaa, ə ɲɛ̨i hee nɔi pun ɉu pələ. 2 Balaamə ə ɲɛ̨i muhəɠə, ə Israɛlə nuą kaa diɛ di hvįįtɔɔ. Di hee kpəlin na kɛɛ a di kpolo laa. Yálá nwɔ Kilii ə pa bɔ. 3 Yɛ kɛa nwooɠaai ŋɛ̨i ɓo; Yálá yee kɔ́nma yɛ kɛ mą: «Beɔrə lon Balaamə nwɔ tɔlu woo ka, Yai ŋɛ̨i a kwɛa la kaa, nwɔ tɔlu woo ka. 4 Nui Yálá wooɠaa da too nwəlii nwoo ka, Mɛ̨nįɠaai Huwalawala Kəlee Nąmu Yálá a kɛ nɛi mą, gwɛlɛɛn gɛɛ kaa hu, hvo gbɔwɔ yee kɔ́n mą, a ɲɛ̨i laa ɓo yɛ di kaa, diɛ ka: 5 «Ə́ wɔ həɠə pɛlɛ́ɠaai lɛlɛɛi ɓə Ɉakɔbə, ə́ yii pɛlɛ́ɠaa lɛlɛɛi Israɛlə. 6 Di kaa yɛ yee lɔwai lɔiɠaa. Diɛ li lɔ dąną dąną yɛ yá kɛnɛ̨ kwɛlɛ nɔw yɛa, yɛ alowɛsə wulu Yai-Laa ə ɉin, yɛ yá kwɛlɛ kpitili. 7 Di wɔ yá haɠa hɛnɲąŋąɠaai laa a hvɛɛ, yɛ pu mą, tulɔ yɛ di wɔ hihɛnŋąąi lɛlɛ. Nu wala wala ta kaa pai kulɔi Israɛlə huwu hu, di kaa pai heei lɔi tamąą mɛ̨i. Israɛlə nwɔ tɔɔmun hvaŋą kɛnɛ̨i Agagə ɓa. Nwɔ tɔɔlaai hvaŋą kaa pai tɛi. 8 Yálá ɓə Israɛlə kulɔ Eziptə lɔi hu, a vaŋą kɛnɛ̨ yɛ laŋ mįnɛ̨ mąą. Israɛlə a ɲonwoɠaa hukala, yɛ di kɔ́wɠaa kiin giin, yɛ di hon a nwɔ mɛ̨ikɔwɠaai. 9 Aa mąąyɛɛ, aa pɛlɛ yɛ yala hilɛ, gbɛɛ ɓə nii a kpələ yɛ ɉəɠə bɛlɛi? «Nui a lúwɔ́ too yɛ́, lúwɔ́ ə kɛ mąą nu ɓa, nui a ə́ nɛ̨ŋɛ̨n naa, mąą nu nɛ̨ŋɛ̨n ə laa.» 10 Balakə ə níiholi kpɔ Balaamə pɔ, ə ɲee pili gee hu, yɛ mą: «Ŋą́ ə́ təli ɲówoɠaa nɛ̨ŋɛ̨n naa mɛ̨nį ɓa, ya ɓə ə́ lúwɔ́ too diɛ kpɔ gee mɛ̨i haaɓa. 11 Yii gɛ pələ kaa tii, kulɔ ɲɛ̨́i mu, 'li ə́ pɔɔli. Ŋą́ mo gɛ́ gáá pai ə́ mąąwiɛi kɛnɛ̨, kɛlaa Yai-Laa aa ə́ hvɛɠɛ ɉu.» Balaamə ə Israɛlə hvaŋą kɛnɛ̨ pələ lɛɛ tɔwɔ ə ɉukulɔ 12 Balaamə ə nwoo pulu pənə, yɛ mą: «Nuąi ə́ di tɔɔ, və́ mɔ̨ɔ̨ mo diɛ, gɛ́ kɛ diɛ: 13 ‹Ə mą kɛ Balakə aa ɲəi bɛlɛ́n nwaliɠaa da ɉɛni kəlee tɛɛ bɔ́, vá pɛli Yai-Laa nwɔ tíɓo lɛɛi laa, gɛ́ lɛɛ gbɔ́wɔ́ ɓa, gɛ́ mɛ̨nį lɛlɛɛ a wala kɛ tii ɲɔ̨nwɔ̨ɔ̨ laa nu ɓa. Mɛ̨nįi Yai-Laa kaa pai moi, ya ɓə gáá pai gɛi.› 14 Yii gaa tii, ní hiɛ ka tii nwɔ́ nuą pɔ; kɛlaa, 'pá, mɛ̨nįi nu huwui ŋɛ̨i kaa pai naai ə́ wɔ lɔi ɓa tɔwɔ pələ, ŋį́ ɉukulɔ yɛ́.» 15 Balaamə yɛ kɛa hvaa Yálá nwɔ Kilii yee kɔ́n mą, yɛ kɛ diɛ: «Beɔrə lon Balaamə wóó li, nui ɲɛ̨i a kwɛa la kaa nwoo li, 16 nui a Yálá wooɠaa mɛ̨n, nui Hɛn Gəlee mɛ̨i Mun nwɔ Kilii kaa mɛ̨i. Nui Huwalawala Kəlee Nąmu a mɛ̨nį lɛ mą, yɛ gaa hįį hu pələ, ɛlɛɛ ɲɛ̨i kɔ́w yɛ mɛ̨nį mąąkpɛɛ, nwoo ka. 17 «Gáá mɛ̨nį kaai, Kɛlaa yiihu mɛ̨nį hvə li, gáá mąąkpɛɛi, kɛlaa ɲɛ̨́i mu mɛ̨nį hvə li. Pɛmɛ̨lɛ̨n-gɔw ta kaa kulɔi Ɉakɔbə huwu hu. Yɛ kɛ a tɔɔmun; tɔɔ hvili kaa muhəɠəi Israɛlə hu. Yɛ Moabə laa kpaɠa yali. Yɛ Sɛtə lonnii kəlee paa. 18 Daa Edɔmə hon a kɔ́, Seirə aa lɛɛ ɲowoɠaa yee kɔ́nma. Israɛlə aa vaŋą həɠə. 19 Lɔi ɲąąwooɓomun gaa kulɔi Ɉakɔbə huwuhu, yɛ daai nuą kpəli hu kala.» Balaamə ə Israɛlə ɲowoɠaa too mɛ̨nį ɓo 20 Yili pulu, Balaamə ə Amalɛkə kaa, ə mɛ̨nįi ŋɛ̨i ɓo, yɛ həɠə Yálá yəi, yɛ mą: «Amalɛkə kaa lɔi kəlee ɲɛ̨i tɔwɔ, Kɛlaa, mɛ̨nįi ɉeɛ dɔwɔ ya ɓaa ɉukala mɛ̨nį.» 21 Yili pulu, ə Keni nuą kaa, ə nwooi ŋɛ̨i ɓo, yɛ həɠə Yálá yəi, yɛ mą: «Keni, ə́ wɔ pɛ́lɛ́i tɔɔi a nwalawalaa, ə́ taa heɛ kwɛni kpuwulu mɛ̨i. 22 Kɛlaa, ə mą kɛ tii, ə́ kaa pai lɛɛi a nwɔ̨n naa kpəli, ɛlɛɛ ə́ wɔ yɛnɛ̨ɛ̨ laa kulɔi lɔwai, Asurə kaa pai ə́ hon ɉii a kɔluwɔ.» 23 Balaamə ə nwoo laa kulɔ, yɛ diɛ: «Kpalo ka! Gbɛɛ ɓə pai kulɔi Yálá yee ŋą? 24 Gáá ya ŋą kələnŋąą kaai, diɛ həɠə Kitimə, di kaa pai heei Asurə mɛ̨i, diɛ hee Ebɛrə mɛ̨i. Kɛlaa gɛɛ kalamun tii yaa kpɛli, nwun na kaa pai pilii.» 25 Balaamə ə pənə kɛa yɛ li nwɔ lɔi hu, Balakə yaa kpɛli ə tɛɛ yɛ li. |