Lonon mo 22 - Yálá laawoo hɛɓɛ (dc)Israɛlə nuą həliɛ Moab lɔi hu Balaamə da tɔɔmun Balakə di mąą mɛ̨nį 1 Israɛlə nuą di bələ həɠə, diɛ li; di tɔɔ Moabə ɲɛɛ kɔ́wɔ hu, Ɉurdɛn yá pulu pələ Ɉeriko tənən ma. 2 Mɛ̨nįi kpɔ Israɛlə ə naa Amɔrə nuą diɛ, Sipɔrə lon Balakə ə gəlee nąą kaa. 3 Moabə taa kwəi ə pili mą, ɉu ə pu mą a ɲɔw, Israɛlə nuą kaai ə mo di kpulu hu kɛnɛ̨ɛ̨ mąą mɛ̨nį ɓa. 4 Sipɔrə lon Balakə ə mo Madian nu kpɛa-kpɛa diɛ, yɛ diɛ: «Kaa nu kpulu kɛnɛ̨i ŋɛ̨i kaa! Di kaa pai hɛn gəlee mįi gu kwɛlɛ, yɛ bələi nįŋɛ̨ a kala nwunu mįi la.» Sipɔrə lon Balakə ɓə kɛ a Moabə tɔɔmun nąąlɔwai. 5 Ə nuą tɔɔ Beɔrə lon Balaamə pɔ, Petɔrə daai, ɲá kwɛlɛ, nąą ɓə ɉuwu ə həɠə laa. Ə də li, yɛ mą: «Kwaa nu huwu ta kaa ɓɛ, daa həɠə Eziptə lɔi hu, daa nɔi kpɛɛ mą, daa tɔɔ ɓɛ nwɔ́ lɔi tənən ma. 6 Nɛ̨ɛ̨ yɛ́ nąn! Pa, ə́ nu huwui tii nɛ̨ŋɛ̨n naa; mąąhɔlɔɓo, di hvaŋą kɛnɛ̨i di tɛɛ kuɔ. Akɛ yá di nɛ̨ŋɛ̨n naa, ɲéé a pɛli tɛɛi diɛ, ŋą́ di kpɛ nɔi. Mąąhɔlɔɓo, ŋį́ gɔlɔn gɛ́, nui yá lúwɔ́ too mą, doɔ li mą; nui yá nɛ̨ŋɛ̨n naa, nɛ̨ŋɛ̨n naa li.» 7 Moabə nu kpɛa-kpɛa, da Madian nu kpɛa-kpɛa di hvilɛn bələ ɓa. Hɛn kpɔ da pɛli dɔlu kpɛmun hvɛla kulɔi la, di ɉəɠə. Di li di həli Balaamə ɓa. Di Balakə wooɠaa tii laa həli mą. 8 Balaamə yɛ diɛ: «Ka yii ɓɛ, bələi Yai-Laa kaa pai moi la mą́ą́, bələ lɔ ɓə gáá pai ka woo pulu pənəi la.» Moabə kalanɉonŋąą di yii laa Balaamə pɔɔli. 9 Yálá yɛ Balaamə ɓa: «Gbɛɛ nuą ɓə ŋɛ̨i ə́ yəi bɛlɛ́n?» 10 Balaamə yɛ Yálá ɓa: «Sipɔrə lon Balakə, yai gaa a Moabə tɔɔmun, ya ɓə nuą ŋɛ̨i tɔɔ ɓɛ, diɛ kɛ mą́ą́: 11 ‹Nu huwui tii kulɔ Eziptə lɔi hu, daa nɔi kpɛɛ mą, pa tai ə́ di nɛ̨ŋɛ̨n naa, gbəli hu kiɛ, ŋą́ kɔ́ pɛlɛ diɛ, ɲéé kaa pai lɔi diɛ, ŋį́ di kpɛ.›» 12 Yálá yɛ Balaamə ɓa: «Mąą hvo nɛ̨ɛ̨li hvó lɛɛ di pulu, ka diɛni ka hvo li, ɛlɛɛ, hvó nu huwui tii nɛ̨ŋɛ̨n naa, mąąhɔlɔɓo, lúwɔ́ kaa diɛ.» 13 Yələ ɓɔɔ, Balaamə yɛ Balakə nwɔ kalanɉonŋąą diɛ: «Ka pənə ka li ka pɔ lɔi, Yai-Laa hvo hvaa li mą gu hvo li.» 14 Moabə kalanɉonŋąą di di muhəɠə, di pənə də li Balakə pɔ, diɛ mą: «Balaamə hvo gɛ li kwa diɛni ku hvo pa.» 15 Balakə ə pənə ə kalanɉon dakpɛliɠaa tɔɔ di kpulu kɛnɛ̨, di mąąwia di tɛɛ dɔlɔɔɠaa tii diɛ. 16 Yiliɠaa di li di həli Balaamə ɓa, diɛ mą: «Sipɔrə lon Balakə woo ka, yɛ: ‹Nɛ̨ɛ̨mąą ɓə gaa vəi yɛ́, hvó kɛ ə́ kaa kwəi ɲɔ̨n gulɔi mą, ə́ lɛɛ kpɔlɔɔ ku pulu gwə li bɔɔli. 17 Gaa lii ə́ mąąwiɛi kɛnɛ̨, ɛlɛɛ, yii kpɔ ə́ kaa lii vɛli mą, a gəlee kɛ yɛ́. Pa kani gwə li, ə́ nu huwui tii nɛ̨ŋɛ̨n naa.›» 18 Balaamə ə Balakə nwɔ tínuą woo pulu pənə, yɛ diɛ: «Ə mą kpɛli kɛ Balakə aa ɲəi bɛlɛ́n nwali kəlee da ɉɛni kəlee tɛɛ bɔ́, vá pɛli mɛ̨nįi lɔpee ta kɛi, ə kɛ kɛnɛ̨-o, ə kɛ tiikpə-o, yii kwa Yai-Laa nwɔ́ Yálá ku woo hvo gee kaa li. 19 Kaa kpɛli mąn, ka yii ɓɛ, mɛ̨nįi Yai-Laa yɛ ə mo mą́ą́, ŋį́ kɛ a gɔlɔn ŋąą.» 20 Yálá ə pa Balaamə pɔ kpinįi yɛ mą: «Akɛ ə́ təli mɛ̨nį ɓə nuą ŋɛ̨i di paa lai, ə́ muhəɠə ka diɛni ka li. Kɛlaa, mɛ̨nįi gáá pai moi yɛ́, ya ɓə ə́ kaa pai gɛi.» 21 Yələ ɓɔɔ, Balaamə ə muhəɠə yələ wala pɔ, ə nwɔ hoohvaalən ɉąą yili, da Moabə kalanɉonŋąą di tɛɛ diɛ li. Balaamə nwɔ hoohvaalən ɉaai ɲɛ̨i ə kɛɛ kaa 22 Yálá ə níiholi, ɓɛlɔwai ə Balaamə kaa la yɛ li. Yai-Laa nwɔ malaka ə kpəɲan bələi, ə bələ too dɔwɔ, ɓɛlɔwai ə kɛi li la, ə ɓo heeni nwɔ hoohvaalən mɛ̨i. Nwɔ tínuą hveelɛi di ɓo bɔ. 23 Ɉoohvaalən ɉaai tii, ə Yái-Laa nwɔ malaka kaa tɔɔni bələi, ɓɔwa kwɛa ə ɓo ɲəi, gulaa daa hu. Ə həɠə bələ mɛ̨i, ə ɉon a gbomoi pələ. Balaamə ə ɉoohvaalən gɛlɛ, yɛ kɛ yili ə pənə ə pa bələ mɛ̨i. 24 Yai-Laa nwɔ malaka ə tɔɔ nwɔ̨nɔ̨ gɛɛnąą ɲąąkɔlɔɔ ɓa bələi, viɲə yɛa; gala hveelɛ lɔwai. 25 Ɉoohvaalən ə Yai-Laa nwɔ malakai kaa, ə tiliin gala ɓa, ə Balaamə kɔ́wɔ kiin gala ɓa. Yili ə pənə nwɔ̨nɔ̨ ə gɛlɛ. 26 Yai-Laa nwɔ malakai ə tɛɛ diɛ nwɔ̨nɔ̨, ə li ə tɔɔ kɛɛnąą ɲąąkɔlɔɔ ɓa, nu tɛɛi takpɛli hvo kɛ laa; gɔɓɛ yee hu pələ da ɓa-mįi-yee hu pələ. 27 Ɉoohvaalən ə Yai-Laa nwɔ malakai kaa, ə pɛlɛ nɔi ɓa, Balaamə ə níiholi, yɛ gɛlɛ a gbɔn. 28 Yai-Laa ə nu woo too ɉoohvaalən na, yɛ Balaamə ɓa: «Lə ɓə ŋį́ gɛ yai yáá gɛ́lɛ a gbɔn gee mɛ̨i haaɓa?» 29 Balaamə yɛ mą: «Mąąhɔlɔɓo, ə́ kaa túwɔi a ɲą́ą́ a tɛɠɛɓoɉu laa. Ə li kɛ ɓɔwa kwɛa kaa ɲəi, ŋį́ li kɛ ə́ paa kpɔlɔ la yiihu.» 30 Ɉoohvaalən yɛ Balaamə ɓa: «Kɛlɛi ə́ wɔ hoohvaalən ɉaa ɓaa ɲą́ą́, ɲą́ą́i ya kɛ tɛi mɛ̨́i a yələ kəlee. Ŋą́ kɛ mɔ̨ɔ̨ túwɔ́i tii a yɛ a bɔlɔ?» Balaamə yɛ mą: «Kpaa-o!» 31 Yai-Laa ə Balaamə ɲɛ̨i həɠə mą, ə Yai-Laa nwɔ malakai kaa tɔɔni bələi, ɓɔwa kwɛa kulaa daai, ə ɓo ɲee ŋą. Balaamə ə nwun vilɛn, ə pɛlɛ niiɓa. 32 Yai-Laa nwɔ malakai yɛ kɛa mą: «Lə ɓə kɛ yai ə́ ə́ wɔ hoohvaalən kɛlɛ gee mɛ̨i haaɓa? Yáá gaa, ɲą́ą́ ɓə pa gɛ kpeɲan bələi ə́ tɔwɔ; yíli ɓa, yáá ɉiɛi ŋɛ̨i kulɔ hvo ə́ kiliŋąhiɛ li a nɛlɛɛ. 33 Ɉoohvaalən ŋɛ̨i aa gáá gee mɛ̨i haaɓa, yɛ mą́ą́ laa. A wala kɛ mą́ą́ laa, ŋą́ li kɛ nɛɛ laa ŋą́ ə́ paa ɲąąɓa, yaa tii ə lɛɛ a vulú.» 34 Balaamə yɛ Yai-laa nwɔ malakai ɓa: «Ŋą́ą́ nɛ̨ŋɛ̨n ɉəɠə, mąąhɔlɔɓo gbaɠala hvo kɛ mą́ą́, gɛ́ kɛ yɛ́ ɓə tɔɔni bələi dɔ́wɔ. Akɛ ka ni ɉiɛi ŋɛ̨i nąą wɛli hvo yɛ́, gáá yalii búlú.» 35 Kɛlaa, Yai-Laa nwɔ malakai yɛ mą: «Ka nuąi ŋɛ̨i ka li. Kɛlaa, nwooi lɔ gáá pai moi yɛ́, ya ɓə ə́ kaa pai moi.» Balaamə da Balakə nwɔ kalanɉonŋąąi diɛ kɛa li. Balaamə da Balakə 36 Bələ mɛ̨n Balakə ə mo diɛ kɛ Balaamə kaa pai, ə li ə naakwiɛn, Irə-Moabə daai; nwɔ lɔi ɲɛ̨n ma, ɲái tii gaa a nɔi ɲɛ̨n diɛ kɛ mą Arnɔn na. 37 Balakə yɛ mą: «Kɛlɛi ŋą́ nuą tɔɔ a di tamąą diɛ pa ə́ təlii, lə ɓə kɛ yai hvo pa? Vá mɔ̨ɔ̨ pɛli kɛ ə́ hon ɉii a ə́ ɓɛlɛ?» 38 Balaamə yɛ Balakə ɓa: «Ee, kɛlɛi ŋą́ą́ həli kɛa yɛ́. Mąą laa kaa mɔ̨ɔ̨ ɲə́i ŋį́ pɛli mɛ̨nį ta ɓoi? Nwooi Yálá kaa pai bui ná, ya ɓə gáá pai moi.» 39 Balaamə da Balakə di li, di həli Kiriatə-Husotə. 40 Balakə ə taatɛlɛɛ kpɛa kpɛa da bɛlɛɛ haláá kulɔ. Ə da tɛɛ Balaamə pɔ, da bɔ kalanɉonŋąą. 41 Mąą yələ laaɓoɔ, Balakə ə li a Balaamə Bamotə-Baalə; nu a kɛ laa a pɛli Israɛlə lonnii kpulu bələ tɔ̨nɔ̨ kaai. |