Lonon mo 21 - Yálá laawoo hɛɓɛ (dc)Israɛlə yee ə tɛɛ Kanaan nuą diɛ 1 Tɔɔmun Aradə yai kɛ a Kanaan nuą di wɔ tɔɔmun, ə kɛ ɉɛɠɛɛ lɔi hu pələ. Di bələ mɛ̨n diɛ kɛ Israɛlə kaa pai a Atarimə pələ. Di pɛlɛ Israɛlə ɓa a kɔ́, di nuą taɠaa hon a kɔluwɔ. 2 Israɛlə ə nwoo kwɛlɛ Yai-Laa ɓa, yɛ mą: «Yá hvaa mą, yá nu huwui ŋɛ̨i lɔ ku yee ŋą, kwa nwɔ taaɠaai wolo, ku di kulɔ yɛ́ a haláá.» 3 Yai-Laa ə hvaa Israɛlə woo ɓa, ə di yee tɛɛ Kanaan nuą diɛ, Israɛlə ə di paa, ə di wɔ taaɠaai wolo. Di gɛɛnąąi tii laa hee a Hɔrma. Kaalə ɲɔ̨nwɔ̨ɔ̨ɠaa 4 Di həɠɛɛ Horə ɲee ɓa, di ɉon a veen gbɔ̨nɔ̨ gboloyá pɔ pələ, diɛ Edɔmə lɔi mąą laa. Kɛlaa, liikpələ hvo kɛa kɛ di yəi ɉiɛ hu. 5 Nuą diɛ Yálá da Moisə di laa ɲɔ̨nwɔ̨ɔ̨ ɓo, diɛ kɛ diɛ: «Lə ɓə kɛ yai, ka ku kulɔ Eziptə lɔi hu, kaa pa a kuɔ ɓɛ ku nwun na pili mɛ̨nį ɓa? Kuɔ haa nɔi pun ɉu ɓɛ? Kɔ̨nɔ̨n və lɛɠɛ li ɓɛ, yá hvo lɛɠɛ li ɓɛ? Gɔ̨nɔ̨n mąą laɠiɛ ŋɛ̨i kun aa hee ku hu.» 6 Yili ɓə gɛ, Yai-Laa ə kaalə kpəɠiɛ kulɔ, ə ɲąątɔɔ nuą diɛ, diɛ di ɲin. Nu kpulu kɛnɛ̨ ə haa Israɛlə lonnii lɔwai. 7 Nuą di pa Moisə pɔ diɛ mą: «Kwaa nɛ̨ŋɛ̨n ɉəɠə Yai-Laa ɓa, a ka yaa ka laa pələ́ ɲɔ̨nwɔ̨ɔ̨i ku moi. Ku mąą nɛ̨ɛ̨mąą hvə Yai-Laa ɓa, ə gaalə huwui ŋɛ̨i mąą kwɛa kuɔ.» Moisə ə nuą mąą nɛ̨ɛ̨mą hvə Yai-Laa ɓa. 8 Yai-Laa yɛ Moisə ɓa: «Kaalə mąą nįnįn bɛli a kwɛli, ə ɉɛlɛn wulu gbiɛ ɓa. Nui lɔpee gaaləi tii ta a ɲin, a nwun muhəɠə a ɲɛ̨i hee mą, a ɓalo.» 9 Moisə ə kaalə mąą nįnįn ɉəɠə a ɓala kwɛli, ə ɉɛlɛn wulu gbiɛ da ɓa. Gaaləi tii ta a nu ɲin nɔ kɛ, mąą nu a ɲɛ̨i hee gwɛli kaaləi tii ɓa, ə ɓalo. Sihɔn da Ogə 10 Israɛlə lonnii di həɠə laa, di tɔɔ Ovotə. 11 Di həɠə Ovotə, di həli Iye-Avarimə nɔi pun ɉu, Moabə tənən ma voló həɠəi pələ. 12 Di həɠə laa, də li di kpəla Ɉerɛdə yá kwɛlɛ. 13 Di həɠə laa də li di tɔɔ Arnɔn yá pulu pələ, yai a tɛɛ nɔi pun ɉu, yɛ yɛɛ Amɔrə lɔi hu pələ. Arnɔn yá ɓə kɛ a Moabə lɔi ɲɛn. Moabə nuą da Amɔrə nuą di ɲɛn ni. 14 Di yili mąą mɛ̨nįi pɛ̨ɛ̨ Yai-Laa nwɔ kɔ́ kɔ́ hɛɓɛ́i hu, diɛ kɛ mą: «Wahɛbə yai gaa Sufa da nwɔ tɛɛyáɠaa; Arnɔn yá, 15 da nwɔ ɓoloon ɉu kwɛaɠaa di ka yɛɛi Arə pələ, diɛ laa a Moabə koo.» 16 Di həɠɛɛ laa, dəli Beɛrə ɲálɔwa la. Beɛrə tii ɓə Yai-Laa ə mąą mɛ̨nį ɓo Moisə ɓa, yɛ kɛ mą: «Nuą ɲąąkpɔn, ŋį́ yá tɛɛ di pɔ.» 17 Nąąlɔwai ɓə Israɛlə ə nwələi ŋɛ̨i too la; yɛ kɛ mą: «Yá ə tɛ ɲálɔwa hu, ka ka yee lɔwa! 18 Ɲálɔwai tii, tɔɔɓɛlaa ɓə dee, nɔi kalanɉonŋąą ɓə dee, a di wɔ tɔɔ hviliɠaa da di wɔ tɔɔ tunwɔ̨nŋąą!» Di həɠə nɔi pun ɉu, di həli Matana. Di həɠə Matana, 19 di həli Nahaliɛlə, di həɠə Nahaliɛlə, di həli Bamotə. 20 Di həɠə Bamotə, di li ɲee lɔwai lɔi tii a həli Moabə yee ɓa ɉu, yii gaa a Pisga yee nwun laŋįn ŋąą nɔi pun mɛ̨i. Di Sihɔn da Ogə di hon a kɔ́ 21 Israɛlə ə nuą tɔɔ diɛ li Amɔrə tɔɔmun Sihɔn pɔ, diɛ kɛ mą: 22 «Hvaa mą ku tɛɛ ə́ wɔ lɔi hu, ku hvo pai lɔi díiɠaa hu da viɲə yeeɠaa, ku hvo pai yá kpələi ə wɔ yálɔwai ta hu, ku kaa lɔ pai lɛɛi bələ mɛ̨i, ə lɛɛ ɉu ku ə́ wɔ lɔi hu ɓɔ.» 23 Kɛlaa, Sihɔn hvo hvaa mą Israɛlə hvo tɛɛ nwɔ lɔi hu. Ə́ nwɔ nuąi kəlee ɲąąkpɔn, yɛ li pɛlɛi Israɛlə ɓa nɔi pun ɉu. Ə həli Yahsa, di gɔ́ yili laa ŋą da Israɛlə. 24 Israɛlə ə ɓɔ ɉu a nwɔ kɔ́ kɔ́ ɓɔwa, ə nwɔ lɔi hon, ə həɠə Arnɔn yá ɓa, ə həli la Yabɔkə yá ɓa; ə həli kpɔ la Amɔn lonnii ɲɛn ma. Hįį kpoloon dɔɔ di wɔ lɔi ɲɛn ma. 25 Israɛlə ə daaɠaa kəlee hon, ə hee Amɔrə taaɠaa kəlee hu, Hɛsbɔn taa da gwɛlɛ lɔi kəlee. 26 Hɛsbɔn ɓə kɛ a Amɔrə tɔɔmun Sihɔn nwɔ taalee. Daa kɛ kɔ́ pɛlɛ Moabə tɔɔmun kɛ laa tɔwɔ mą, ɛlɛɛ aa kɛ nwɔ lɔi kəlee kulɔ ɲəi, ə həli la Arnɔn yá ɓa. 27 Yili mąą mɛ̨nį ɓə nwələ too nuą di kɛi kɛ la diɛ: «Ka pa Hɛsbɔn daai, di pənə di dɔɔ Sihɔn nwɔ taai ə pənə ə pu nįnɛ̨ kɔ́lɔi. 28 Nwɔ̨n ə kulɔ Hɛsbɔn daai, nwɔ̨n nən ə kulɔ Sihɔn nwɔ taai hu. Ə Arə kələn Moabə lɔi hu, da Arnɔn yee hu tɔɔɓɛlaa. 29 Moabə, kpalo aa ɓɛla yɛ́! Kemɔsə nwɔ lɔi ə lɛɛ ɉu. Nonnii nɛ̨ąą daa lɛɛ a luwɔɠaa, non ɉinąą daa kɛ a pu nuą. Amɔrə tɔɔmun Sihɔn yəi. 30 Ku ɓɔ Amɔrə nuą hu a tonwąɠaa. Hɛsbɔn a kala yiihu, Divɔn lɔi kəlee aa lɛɛ ɉu, ku nɔi kala, Ə həli kpɔ la Nofa, ə li kpɔ Madaba.» 31 Israɛlə ə hee Amɔrə nuą di wɔ lɔi hu. 32 Moisə ə nuą tɔɔ, diɛ li Yazerə taa mąąkpɛɛi, di gwɛlɛ lɔiɠaa hon. Amɔrə nuąi kɛ laa, Moisə ə di kpɛ. 33 Di ɉon a pələ takpɛli, Basan tɔɔmun Ogə, ə kulɔ, ə naa kwiɛn a kɔ́, yaa da nwɔ lɔi hu nuą kəlee. Ə kɔ́ pɛlɛ Israɛlə nuą diɛ Ɛdrɛi daai. 34 Yai-Laa yɛ Moisə ɓa: «Hvó ɲɔw Ogə ɓa, ŋą́ą́ doo ə́ yee ŋą; yaa, nwɔ nuą kəlee da nwɔ lɔi. Ɉon yɛ bələi ə́ Amɔrə tɔɔmun Sihɔn hon na, yii kɛ heeni Hɛsbɔn.» 35 Di yee ə tɛɛ Ogə ɓa, yaa da nonnii, da nwɔ nuą kəlee. Di tɔ̨nɔ̨ kpɛli hvo kulɔ ɉu. Di nwɔ lɔi hon, di hee laa. |