Lonon mo 20 - Yálá laawoo hɛɓɛ (dc)Meriba yá 1 Israɛlə lonnii kəlee di həli Sin nɔi pun ɉu, a gwɛlan nwɔ ɲąnin dɔlɔɔ. Nuą di hee Kadɛsə daai. Nąą ɓə Miriamə ə haa laa, di noo laa. 2 Yá hvo kɛ nuą yəi, di di muhəɠə Moisə da Aarɔn di laa ɓa. 3 Di hvaa pɛlɛ Moisə ɓa, diɛ kɛ mą: «Kwəli kpɛli mąn haa, ɓɛlɔwai ku kaayɔwɔɠaa di haa la Yai-Laa ɲɛ̨i ɓai. 4 Lə ɓə kɛ yai ə́ pa a Yai-Laa nwɔ nu kpɔnŋąąi nɔi pun ŋɛ̨i hu? 5 Lə ɓə kɛ yai ə́ ku kulɔ Eziptə lɔi hu, yɛ́ pa a kuɔ gɛɛnąąi ŋɛ̨i ɓa? Gɛɛnąąi ŋɛ̨i hvo lɛlɛ li a tíi kɛi, ɓɔɔlaa wulu da viɲə, da ɓá wulu ta lɔpee hva hin mɛ. Kpələyá kpɛli hvo ɓɛ.» 6 Moisə da Aarɔn di nu kpɔn nɛɛ laa, di pa gee kaa kələ laaləi, di pɛlɛ nɔi ɓa, Yai-Laa nwɔ mąąwiɛ ə kulɔ diɛ pɔ̨nɔ̨ŋą. 7 Yai-Laa yɛ Moisə ɓa: 8 «Ə́ wɔ tunwɔ̨n həɠə, ka ə́ liɛ Aarɔn ka nuą, ɲąąkpɔn, mo gwɛni kpuwulu ŋɛ̨i ɓa, ə ɉu yá tɛɛ ka pɔ. Ə kaa pai yá kulɔi gwɛni hu di mąą mɛ̨nį ɓa, ə́ yá tɛɛ nu kpulu pɔ da di wɔ taatɛlɛɛɠaai, diɛ di kpələ la.» 9 Bələi tii di Moisə tí la, ə dunwɔ̨n tii kɛ Yai-Laa lííla ə ɉəɠə; 10 Moisə da Aarɔn di nu kpulu ɲąąkpɔn gwɛni kpuwulu lííla, diɛ diɛ: «Ka ka wəli tɔɔ, wɛa nuą, kwa pɛli mɔ̨ɔ̨ ya kulɔi gwɛni kpuwului ŋɛ̨i hu kuɔ dɛɛ ka pɔ?» 11 Moisə ə ɲee tɛ ɲələi, ə gwɛni kpuwulu kɛlɛ gee mɛ̨i hveelɛ a dunwɔ̨n. Yá kpoloon gɛnɛ̨ ə kulɔ gwɛni kpuwulu hu, nuą di di kpələ, ə mą kɛ di wɔ taatɛlɛɛɠaai. 12 Yai-Laa yɛ Moisə da Aarɔn diɛ: «Yii ka hvo laali ná, kaa pɛli nwɔ́ mąąwiɛ kulɔi pɔ̨nɔ̨ŋą Israɛlə lonnii ɲɛ̨i ɓa; yili mąą mɛ̨nį ɓa, ka hvo pai nu kpului ŋɛ̨i lɔi ɓɛi ŋɛ̨i ŋį́ naakwɛlanmo diɛ ɉu.» 13 Di ɲái tii laa hee a Meriba yá, mąąhɔlɔɓo nąą ɓə Israɛlə lonnii di hvaa laa Yai-Laa ɓa. Yili yaan yɛ nwɔ mąąwiɛ lɛ laa. Edɔmə tɔɔmun hvo pələ tɛɛ Israɛlə pɔ 14 Di lɛɛ Kadɛsə, Moisə ə nuą tɔɔ Edɔmə tɔɔmun bɔ, yɛ mą: «Ə́ nąn non Israɛlə woo li, mɔ̨nɔ̨ɠaai kpɔ laa kuɔ, gbaɠala kaa yɛ́. 15 Ku nąnni di wɔlɔ li Eziptə lɔi hu, ku lamun naa kpɔ kpaan. Kɛlaa, Eziptə nuą di hee ku mɛ̨i kwa ku nąn ni. 16 Ku wɔlɔ Yai-Laa ɓa, ə ku tómą woo mɛ̨n, ə malaka ta tɔɔ, yɛ ku kulɔ Eziptə lɔi hu. Kwaa həli kɛa Kadɛsə daai, yii gaa ə́ wɔ lɔi ɲɛ̨n ma. 17 Hvaa mą ku tɛɛ ə́ wɔ lɔi hu ku hvo pai lɔi díiɠaa hu, ə mą kɛ viɲə yɛaɠaa. Ku hvo pai nąą yálɔwa hu ya ta kpələi, ku kaa lɔ pai lɛɛi bələ lee mɛ̨i, ku hva kulɔ mɛ̨i ku hvo ɉaŋą ɓa-mįi-yee hu pələ, a wala kɛ tii kɔ́ɓɛyee hu pələ; ɛlɛɛ ɉu ku ə́ wɔ lɔi hu ɓɔ.» 18 Kɛlaa, Edɔmə tɔɔmun ə nwoo pulu pənə yɛ mą: «Hvá tɛɛ bɔ́ɔ́li, ya ɉu kɔ́ɔn, ŋą́ ə́ laakwiɛn a kwɛli hɛn.» 19 Israɛlə lonnii diɛ mą: «Ku kaa lɔ pai tɛɛi a bələ lee. Kuɔ kwa ku wɔ taatɛlɛɛɠaai kwa ə́ wɔ yai ta kpələ kwa ɉɔ̨nwɔ̨ tɛɛ ə́ pɔ. Yii lɔ ku kaa vɛlii yɛ́ ya ɓaa: ɓɛi lɔ ku kɔ́wɔ a hvilɛn naa kuɔ tɛɛ.» 20 Edɔmə tɔɔmun yɛ mą: «Hvá tɛɛ ɓɛ.» Ə kulɔ kɛa yɛ li naakwiɛn ɉii a nu kpulu kɛnɛ̨ da kɔlaɠa hvaŋą kɛnɛ̨. 21 Edɔmə hvo hvaa mą Israɛlə hvo tɛɛ nwɔ lɔi hu, Israɛlə ə mąą laa. Aarɔn haa mɛ̨nį 22 Israɛlə nu kpulu kəlee di həɠə Kadɛsə, di pa Horə ɲee hu. 23 Di həliɛ Horə ɲee hu. Edɔmə lɔi ɲɛ̨n ma, Yai-Laa yɛ Moisə da Aarɔn diɛ: 24 «Aarɔn kaa pai kulɔi ka pɔ, yɛ laŋąn nąnni diɛ. Hva pɛli lɔi nɔi ŋą dɛɛ Israɛlə lonnii pɔ ɉu. Mąąhɔlɔɓo, ka kulɔ nwóó mu Meriba yá nwun gulɔi. 25 Yili ɓa, yɛ́ Moisə, Aarɔn da non Eleazarə di həɠə, ka tɛ Horə ɲee ɓa. 26 Ka li, ə́ Aarɔn nwɔ həɠəi kulɔ laa gwąną, ə́ doo non Eleazarə kwąną; nąą ɓə Aarɔn kaa pai kulɔi laa ka lɔwai, gaa pai haai laa.» 27 Moisə ə gɛ yɛ bələi Yai-Laa ə dí la. Di həɠə nu kpulu kəlee ɲɛ̨i ɓa, di tɛ Horə ɲee ɓa. 28 Moisə ə Aarɔn nwɔ həɠəɠaai həɠə, ə di too Aarɔn lon Eleazarə kwąną. Aarɔn ə haa laa ɲee tonna. Yili pulu Moisə da Eleazarə di ɲee yɛɛ. 29 Nuą kəlee di gaa diɛ kɛ Aarɔn aa haa; Israɛlə pɛlɛ́ɠaa kəlee di Aarɔn haa wɔlɔ ɓo hvóló pow haaɓa yee mu. |