Lonon mo 19 - Yálá laawoo hɛɓɛ (dc)

Nįŋɛ̨ haa kpɔluɔ mąą mɛ̨nį

¹ Yai-Laa yɛ Moisə da Aarɔn diɛ:

² «Ɲɛnɛ̨ɛ̨ hon bələ ta ka; Yai-Laa ɓə mo. 'Mo Israɛlə lonnii diɛ di pa ə́ pɔ a nįŋɛ̨ háá kpɔluɔ, pɔɔ hva kɛ mą, mąą kulɔi hva kɛ mą, a nįŋɛ̨i hvo nii kóló kɛ li.

³ Ka dɛɛ ɉaláá laa həli mun Eleazarə pɔ, di kulɔ la daa pulu, di nwun dee Eleazarə ɲɛ̨i ɓa.

⁴ Ɉaláá laa həli mun a nįŋɛ̨ haai tii ɲąmą ta həɠə a ɲee kpuɔ, ə daɠaa gee kaa kələ ɲɛ̨i lɛlɛi ɓa pələ gee mɛ̨i mɛ̨ihveelɛ.

⁵ Yili pulu, ə mo diɛ di nįŋɛ̨ haai tii kələn ɲɛ̨i ɓa; gɔlɔ, ɉuwɔ, ɲąmą da gbo, di gəlee kələn.

⁶ Ɉaláá laa həli mun ə kpitili kwɛi həɠə da isopə kpaɠa da həɠə ɓɛla kpɔluɔ gbələ tətə, ə di pili nįŋɛ̨ kələn nwɔ̨n ɉu.

⁷ Yili pulu, ɉaláá laa həli mun ə mąąhəɠəɠaa waa, ə gbinį waa a yá; yili pulu, ə tɛ taai. Kɛlaa, tɔ́n a lɛɛ mą ə lɛɛ ɉu yələ ə wulu.

⁸ Nui tii nįŋɛ̨ kələn, yaa kpɛli a mąą həɠəɠaa waa, ə gbinį waa, yaa kpɛli tɔ́n a lɛɛ mą ə lɛɛ ɉu yələ ə wulu.

⁹ Nui tɔ́n və mą, ya ɓə a nįŋɛ̨ haa luwui tii kələ, ə bui kɛ kɛɛnąą lɛlɛɛ ɓa daa kpala. Gaa pai kɛi Israɛlə lonnii yəi a mąąhəɠə yá pɛli hɛn. Nɛ̨ŋɛ̨n mąąhvaalɛɛ hɛn ni.

¹⁰ Nui a nįŋɛ̨ háá luwui tii kələ, yaa kpɛli mąąnɛ̨ɛ̨ ə mąąhəɠəɠaa waa, tɔ́n a lɛɛ mą ə lɛɛ ɉu yələ ə wulu. Ka yíi pələ ta li, yɛi kɛ a Israɛlə ə mą kɛ nwɛ̨ąi ka lɔwai, yili mąą hva hvalin.

Nuą mąąhəɠə pələ

¹¹ «Nui a tunwɔ̨n powa ɓa, ə kɛ a powa huwui lɔpee, tɔ́n gaa mą hvóló mɛ̨ihveelɛ yee mu.

¹² Mąąnɛ̨ɛ̨ ə nwaa a ɲái tii da bɛli a nįŋɛ̨ háá kələn nuwu, a voló haaɓa yələ da voló mɛ̨ihveelɛ yələ, a kɛ tii tɔ́n va kɛa kɛ mą. Kɛlaa, a wala gɛ hvo nwaa a voló haaɓa yələ da voló mɛ̨ihveelɛ yələ, tɔ́n va kulɔ mą.

¹³ Nui lɔpee a tunwɔ̨n nu powa ɓa, ɛlɛɛ hva mąą həɠə a ɲái tii ta, a kɛ tii aa Yai-Laa nwɔ pɛ́lɛ́i mąą liɓi; mąąnɛ̨ɛ̨ di mąą nu lɛɛ dɔ̨nɔ̨ kon ɉu. Yii hvo gɛ li di hvo nu mąą həɠə yá ta taɠa mą, tɔ́n a kɛ mą, nwɔ tɔ́n tii hva kulɔ mą.

¹⁴ «Nu ta a haa pɛlɛ́n, ɉon bələ ka: Nui lɔpee a lɔ bɛlɛ́i tii mu, da nuąi kpɔ kɛ bɛlɛ́n, tɔ́n gaa diɛ hvóló mɛ̨ihveelɛ yee mu.

¹⁵ Hɛn ɲąŋąi lɔpee naa hvo kɛ kpulu li, naa kalan və kɛ mą, ɲilɛɛ a yɛli, tɔ́n a kɛ mą.

¹⁶ Nui lɔpee a kalin a nui daa baa a ɓɔwa kwɛa kpomói, a wala kɛ tii nui aa haa gbɔwɔ ɓa, a wala kɛ tii nu kɔ́wɠaa, a wala kɛ tii kámą, tɔ́n gaa mąą nu ɓa hvóló mɛ̨ihveelɛ yee mu.

¹⁷ Mąąnɛ̨ɛ̨ di nɛ̨ŋɛ̨n mąąhvaalɛɛ haláá luwu ta həɠə nui tii mąą mɛ̨nį ɓa, di tɛɛyá pu mą.

¹⁸ Nui tɔ́n və mą, a isopə kpaɠa ta həɠə, ə nɔ ɲái tii hu, ə daɠa bɛlɛ́i tii ɓa da mu hɛnŋąą kəlee, da nuąi da kɛ laa. Da nui aa tunwɔ̨n nu kɔ́wɠaa a wala kɛ tii nui daa baa, a wala kɛ tii kámą ɓa.

¹⁹ Nui tɔ́n və mą, a ɲá ta taɠa nui tɔ́n gaa mą mą, a voló ɉaaɓa yələ da voló mɛ̨ihveelɛ yələ. Voló mɛ̨ihveelɛ yələ nwɛi tii a mąą nu nwɔ nɛ̨ŋɛ̨n kulɔ mą. Yili ə mąą həɠəɠaa waa, ə nwaa yái; yələ wulii pɔ, mąą a kɛ a ɉəɠɛɛ.

²⁰ «Kɛlɛɛ nui a tɔ́n bɛlɛ gbɔwɔ ɓa hva mąąhəɠə kóló kɛ, nu taaləi tii, mąąnɛ̨ɛ̨ di nɛɛ dɔ̨nɔ̨ kon ɉu. Hvo pa nee Yai-Laa nwɔ kɛɛnąą mąąhəɠɛɛi mąą liɓi. Mąąhɔlɔɓo di hvo ɲá mąąhəɠɛɛ taɠa li mą, tɔ́n gaa mą.

²¹ «Israɛlə lonnii di wɔ yɛnɛ̨ɛ̨ hon bələ ta ka tii, hva ɉəɠə mą. Nui a ɲá taɠa mɛlaa diɛ, mąąnɛ̨ɛ̨ ə mąąhəɠəɠaa waa, ə lɛɛ nui a tunwɔ̨n ɲá mąąhəɠɛɛ ɓa, tɔ́n a kɛ mą, ə lɛɛ ɉu yələ ə wulu.

²² Nui tɔ́n gaa mą a tunwɔ̨n hɛn da ɓa, mąą hɛn yaa kpɛli mąą a liɓi. Ɛlɛɛ nui a tunwɔ̨n ɉɛn tii ɓa, tɔ́n a kɛ mą ə lɛɛ ɉu yələ ə wulu.»