Lonon mo 17 - Yálá laawoo hɛɓɛ (dc)Kore pulu nuą di wɔ lansan kpowoɠaa 1 Yai-Laa yɛ Moisə ɓa: 2 «'Mo ɉaláá laa həli mun, Aarɔn lon Eleazarə ɓa, ə lansan kpowoɠaa kulɔ nwɔ̨n ɉu, mąąhɔlɔɓo di kaa a hɛn mąąhəɠɛɛɠaa, ɛlɛɛ ə́ di mąą kwɛa nwɔ̨n mą. 3 Nuąi tii nɛ̨ŋɛ̨n ɉəɠə di nwun yɛ lɛɛ ɉu, ka di wɔ lansan kpowoɠaai yɔw a kwɛli ɓɛlaɠaa, di di pɛlɛ ɉaláá kulɔ kəhi ɓa, hvo gaai di di laa həli Yai-Laa ɓa, ɛlɛɛ di kaa a nwɔ hɛnŋąą, yili kaa pai kɛi a mɛ̨nį nąą kili too ŋą hɛn Israɛlə lonnii diɛ.» 4 Lansan kpowoɠaai tii pɛliɛi kɛ a kwɛli kpɔlu, diɛi kɛ nuąi kələn di yəi. Eleazarə ə di həɠə, di di yɔw a kwɛli ɓɛlaɠaa, di di pɛlɛ ɉaláá kulɔ kəhi ɓa. 5 Mɛ̨nį kili too hɛn ni Israɛlə lonnii ŋą, yɛ diɛ nu takpɛli yii hvo a Aarɔn huwu, mąą hvo nɛ̨ɛ̨li hvo tɔɔ yɛ kɛ gaa lansan kələn ɉii Yai-Laa lííla. Mɛ̨nįi laa Kore da bulu nuą diɛ, da hvo pa nee laa mąą nu ɓa. Yai-Laa ə bu Moisə la, yili yɛ ɉukulɔ Aarɔn ɓa. Nuą di hvaa di nwun ɉu Moisə da Aarɔn diɛ 6 Yələ ɓoɔ, Israɛlə lonnii kəlee di hvaa pɛlɛ Moisə da Aarɔn diɛ, diɛ kɛ diɛ: «Kaa Yai-Laa nwɔ nu huwui paa.» 7 Kɛlaa, ɓɛlɔwai nuą ɲąąkpɔn ŋąąi kɛ la, Moisə da Aarɔn diɛ di di ɲɛ̨i heei gee kaa kələ mɛ̨i, Yai-Laa nwɔɔ mąąwiɛ ə gbɔwɔ lɛ diɛ. 8 Moisə da Aarɔn di li gee kaa kələ laaləi. 9 Yai-Laa yɛ Moisə ɓa: 10 «Ka kulɔ nu kpului ŋɛ̨i lɔwai, ŋį́ di hukala kpɔlɔɔ yiihu.» Moisə da Aarɔn di pɛlɛ nɔi ɓa. 11 Moisə yɛ Aarɔn ɓa: «Ə́ wɔ lansan kələn gbowoi həɠə, ɉaláá kulɔ nwɔ̨n da pu ɉu, lansan da pu ŋą, lí kilɛ nu kpului tii pɔ, ə́ nɛ̨ŋɛ̨n mąąhvaalɛɛ woo ɓo di mɛ̨i. Ə́ kaa gaai, Yai-Laa aa níiholi, ɛlɛɛ, mɛ̨nį nwąnąą aa gbɛa gɔwɔ tɔɔ yɛ laa nuą diɛ.» 12 Aarɔn ə lansan kələn gbowo həɠə, yɛ bələi Moisə ə mo la mą, ə li a gilɛ nuą lɔwai, kɛlaa, ɲɔ̨n aa gbɛa kɛ gɔwɔ tɔɔ nuą lɔwai, yɛ di hukala. Aarɔn ə lansan pu gbowo hu, ə nɛ̨ŋɛ̨n mąąhvaalɛɛ woo ɓo nu kpulu mɛ̨i. 13 Nuą kɛ daa haa, da yiiɠaa kɛ ni a di hvulú, Aarɔn ə tɔɔ di lɔwai. Mɛ̨nį nwąnąą tii ə kpɛla bələi. 14 Nuąi haa ɲɔ̨n tii yəi, di kɛ a nu waa pow kɔ́w nąąn pulu nwun mɛ̨ihveelɛ. Nuąi haa Kore mɛ̨nįi hu, di laa kulaa ɉu. 15 Ɲɔ̨n tii kpɛlaa mą pulu, Aarɔn ə pənə ə li Moisə pɔ gee kaa kələ laaləi. Aarɔn nwɔ tunwɔ̨n 16 Yai-Laa yɛ Moisə ɓa: 17 «'Mo Israɛlə lonnii diɛ, huwu tɛitɛi kəlee di tunwɔ̨n dɛitɛi tɛɛ ə́ pɔ. Tunwɔ̨n bow kɔ́w hveelɛ ɓə gəlee da paa la, a di huwu laa, ə́ di laa pɛ̨ɛ̨ huwu kəlee nwɛi ɓa. 18 Ə́ Aarɔn laa pɛ̨ɛ̨ Levi huwu hu nuą di wɔɔ tunwɔ̨n ma. A kɛ tii, nu huwu tɔ̨nɔ̨ tunwɔ̨n dɔ̨nɔ̨. 19 Ə́ dunwɔ̨nŋąą laa gee kaa kələ mu, mįnɛ̨ kəhi lííla, ɓɛi tii gwa kɛ gu kee kaai laai. 20 Huwu yii nwɔ tunwɔ̨n mɔn gaa pai tɔɔi mą, a kɛ tii, yaa ɓə ŋą́ą́ ɉəɠə ɉu a nííɓa. Bələ ɓə gáá pai vaa nwun ɉu mɛ̨nįɠaa həɠəi la nwə́li pulu, yii Israɛlə lonnii da kɛ moi ka laa mɛ̨i.» 21 Moisə ə mo Israɛlə lonnii diɛ, ɲɛ̨itɔwɔ nuą di pa bɔ a dunwɔ̨nŋąą. Pɛlɛ́ nąmu tɔ̨nɔ̨, tunwɔ̨n dɔ̨nɔ̨. Gəlee pɛlɛɛ gee ɓa tunwɔ̨n bow kɔ́w hveelɛ, Aarɔn nwɛi pɛlɛɛ mą. 22 Moisə ə dunwɔ̨nŋąą laa Yai-Laa lííla gee kaa kələ mu, mįnɛ̨ kəhi lííla. 23 Mąą yələ laa ɓoɔ, Moisə ə lɔ gee kaa kələ mu, Aarɔn nwɔ tunwɔ̨n ŋɛ̨i kɛ a Levi huwu nwɛi, ə gaa mɔn aa tɔɔ mą, bowa ə ɓo mą, daɠaa daa ɓa daa kpɔlu. 24 Moisə ə dunwɔ̨n gəlee həɠə Yai-Laa lííla, ə li ə di lɛ Israɛlə lonnii kəlee diɛ, yiliɠaai di di kaa, nu kəlee ə nwɔ tunwɔ̨n həɠə. 25 Yai-Laa ə pənə ə mo Moisə ɓa, yɛ mą: «Pənə ə́ Aarɔn nwɔ tunwɔ̨n laa mįnɛ̨ kəhi lííla, naa laa dúwó lawala kulɔ nuąi tii mąą mɛ̨nį ɓa; ə́ di wɔ hvaa nwun ɉuɠaai həɠə la tii nwə́li pulu. Ɛlɛɛ, di hva kɛa tɔɔ di haa pələ nwun na.» 26 Mɛ̨nįi Yai-Laa ə Moisə tí la, ə gəlee kɛ. Ɉaláá kulɔ mɛ̨nį dɔlɔɔ 27 Israɛlə lonnii diɛ Moisə ɓa: «Ɓɛ kaa li, ku kaa haai, ku nwun na kaa pilii, ku kəlee ku kaa pai haai. 28 Nui lɔpee a lɛɠɛ Yai-Laa nwɔ pɛ́lɛ́i ɓa, yɛ kɛ ə gɔ́, haa a wolo mą. Ku kəlee ku kaa mɔ̨ɔ̨ pai haai, ə lɛɛ ɉu ku kpɛɛ?» |