Lonon mo 15 - Yálá laawoo hɛɓɛ (dc)

Yálá kɔ́ hɛn

¹ Yai-Laa ə mo nwɔ̨nɔ̨ Moisə ɓa, yɛ mą:

² «'Mo Israɛlə lonnii diɛ, yɛ́ diɛ: «Nɔi ŋɛ̨i ka káá lii heei ɉu, a ɓɛi ŋɛ̨i ŋį́ nąą tɛɛ ka pɔi, ka həli laa,

³ ka kɛi kɛ ka Yálá kɔ́, ka haláá huwɔ ta kələn a Yai-Laa nwɔɔ, ə kɛ a nu a nwoo kwɛlɛ Yálá ɓa bɔ mɛ̨nį kɛɛ, awala kɛ tii, hvóló kəlee haláá kulaa, awala kɛ tii, a ka wɔ hɛli hvóló ta, ka gɛ a nįŋɛ̨, awala kɛ tii, ɓɛlaa, mąą kun nɛ̨ɛ̨, yɛ Yai-Laa lii hon.

⁴ Nui pai gɔɓo huwui tii kɛi Yai-Laa ɓa, a pa a lɛɠɛ hunwɔ̨ gəgən ɉu haaɓa, ɲɔwɔɔn ŋąą a wulɔ litɛlɛ tɔ̨nɔ̨ da gbulɔ.

⁵ Akɛ ɓɛlaa lon mə ka káá gələn ɉii, a wala kɛ tii liilaa haláá ɓə ka káá gulɔi, ka lɔɔ litɛlɛ tɔ̨nɔ̨ da gbulɔ pɛlɛ mą.

⁶ Akɛ ɓɛlaa hilɛ ɓə mąąnɛ̨ɛ̨ di gələn, mąąnɛ̨ɛ̨ di lɛɠɛ hunwɔ̨ gəgən ɉu mɛ̨ida pɛlɛ mą, ɲɔwɔn ŋąą a wulɔ litɛlɛ hveelɛ.

⁷ Ka bɛlɛ lɔɔ litɛlɛ hveelɛ ɓa. Yá gɔ̨nɔ̨nŋąąi tii laa həli Yai-Laa ɓa, mąą kun nɛ̨ɛ̨ yɛ niilaa.

⁸ Akɛ nįŋɛ̨ hilɛ ɓə di kaa gələn ɉii Yai-Laa ɓa, awala kɛ tii liilaa haláá, awala kɛ tii a haláá daa naakwɛlanmo,

⁹ da lɛɠɛ hunwɔ̨ gəgən ɉu nąąn yɔwɔn a wulɔ litɛlɛ haaɓa,

¹⁰ di bɛlɛ lɔɔ litɛlɛ haaɓa ɓa. Yili a kɛ a haláá hɛn mąą kun nɛ̨ɛ̨ yɛ Yai-Laa liilaa.

¹¹ «Bələ ɓə da gɛ la, yɛi kɛ a nįŋɛ̨ hilɛ, ɓɛlaa hilɛ, ɓɛlaa lon, a wala kɛ tii ɓooli.

¹² Ə mą kpɛli kɛ a daatɛlɛɛi ka káá naa həlii aa tamą, ka dɛi tɛi kəlee nwɛi kɛ a gɛ pələ.

¹³ Bələ ɓə mąąnɛ̨ɛ̨ kaa haláá kulɔ la, akɛ ka káá bɔ ka hɛn da laa həli Yai-Laa ɓa, a kɔ̨nɔ̨n mąą kun nɛ̨ɛ̨ yɛ niilaa.

¹⁴ Akɛ nwɛ̨ąi gaa heeni ka kɔ́wɔ mɛ̨i, yii kɛa aa lamu ka lɔwai, akɛ bɔ ə hɛn da laa həli Yai-Laa ɓa, mąą kun nɛ̨ɛ̨ yɛ Yai-Laa liilaa, a gɛ yɛ bələi lɔ ka gɛ la.

¹⁵ Yɛ bələi ka káá la kɛa a kpulu tɔ̨nɔ̨, ɉɛnŋąą laakwɛlanmo pələ kaa lɔ tanɔ̨n ka yəi, ə kɛ a nwɛ̨ą, ə kɛ a taa hee. Ka wɔ yii pələ ta li hva ɉəɠə mą, ə mą kɛ ka mąą nwɛ̨ąą.

¹⁶ Tɔ́n dɔ̨nɔ̨ gbən lɔ ɓə a kɛ ka yəi, da ɉon bələ tanɔ̨n; Kaa, ə mą kɛ ka mąą nwɛ̨ąi heeni ka kɔ́wɔ mɛ̨i.»

¹⁷ Yai-Laa yɛ Moisə ɓa:

¹⁸ «'Mo Israɛlə lonnii diɛ, yɛ́ diɛ: «Nɔi ŋɛ̨i gu kaa lii ɉu, gwa həli laa;

¹⁹ ka kɛi pa nɔi tii hu kɔ̨nɔ̨n nįnɛ̨ mįi, ka da həɠə ɉu a Yai-Laa nwɔ.

²⁰ Nɛɠɛ dɔlɔɔɠaai ka mɔ̨n, ka dɔ̨nɔ̨ həɠə ɉu a Yálá nwɔ, ka gɛ pələ kɛ yɛ bələi ka ka wɔɔ hihɛn dɔlɔɔ kɛ la, ɓɛlɔwai ka kpɛɛ la a ka wɔɔ mɔ̨nunŋaa tanŋąą.

²¹ Nɛɠɛ dɔlɔɔ mɔ̨n bələ ka yəi dɛitɛi kəlee, mąąnɛ̨ɛ̨ ka da həɠə ɉu a Yai-Laa nwɔɔ. Bələ ɓə mąąnɛ̨ɛ̨ kaa gɛ la a kwɛlan gəlee.

Nu tɛɠii nɛ̨ŋɛ̨n mąą haláá kulɔ pələ

²² «Akɛ dɔ́nŋąą ŋɛ̨i Yai-Laa ə di tɛɛ Moisə pɔ, nu ta a da mąą kala dɛɠii pələ,

²³ diɓoɠaai kpɔ tii Yai-Laa ə mąą pamą kaa Moisə laaləi, ə həɠə gɔwɔ tɔɔi yələ ɓa, yɛ həli la yiihu ɓa,

²⁴ nui a da mąą kala nɔi lonnii tɛɠii, nɔi lonnii kəlee da nįŋɛ̨ hilɛ tɔ̨nɔ̨ kulɔ Yai-Laa ɓa a haláá hɛn da gəlee kələn, mąą kun nɛ̨ɛ̨, da ɉaláá yiiɠaai tii da gɔ́ hɛnŋąą pɛlɛ mą, yɛ bələi gɛ pələ pɔlɔ kaa la. Di ɓooli tɔ̨nɔ̨ kɛ a nɛ̨ŋɛ̨n mąąhvaalɛɛ hɛn.

²⁵ Ɉaláá laa hɛlimun a nɛ̨ŋɛ̨n mąąhvaalɛɛ woo ɓo, Israɛlə lonnii kəlee mąą mɛ̨nį ɓa, Yálá yɛ kɛa di mąą hvaalɛɛ; hvo gaai ə kɛ a nu tɛɠii nɛ̨ŋɛ̨n. Da pa a ɉaláá hɛn, a kɔ̨nɔ̨n da gələn Yai-Laa ɓa. Ɛlɛɛ, da nɛ̨ŋɛ̨n mąąhvaalɛɛ haláá laa həli Yai-Laa ɓa, di tɛɠii nɛ̨ŋɛ̨n tii mąą mɛ̨nį ɓa.

²⁶ Israɛlə lonnii kəlee di mąą hvaa a lɛɛ, ə mą kɛ nwɛ̨ąi gaa heeni di kɔ́wɔ mɛ̨i; mąąhɔlɔɓo, nuą kəlee ɓə di laa kaa dɛɠii nɛ̨ŋɛ̨n tii hu.

²⁷ «Akɛ nu tɔ̨nɔ̨ gbən ɓə dɛɠii nɛ̨ŋɛ̨n tii həɠə, a pa a kwɛlan dɔ̨nɔ̨ ɓooli, a nɛ̨ŋɛ̨n mąąhvaalɛɛ haláá kulɔ hɛn.

²⁸ Ɉaláá laa həli mun a tɛɠii nɛ̨ŋɛ̨n mąąhvaalɛɛ woo ɓo nui tii mɛ̨i, a kɛ tii, mąąhvaa a lɛɛ.

²⁹ Ə kɛ a Israɛlə lon da, awala kɛ tii nwɛ̨ąi gaa ka kɔ́wɔ mɛ̨i, a nɛ̨ŋɛ̨n daaləi tii ta həɠə, mąą tɔɔ ɓo pələ kaa lɔ tanɔ̨n.

³⁰ «Kɛlɛɛ, nui a gili a gɛ, ə kɛ a nɔi lon da, ə kɛ a nwɛ̨ąi gaa heeni ka kɔ́wɔ mɛ̨i, yili kaa a Yai-Laa lalan ŋąą. Mąąnɛ̨ɛ̨ di mąą nu lɛɛ dɔ̨nɔ̨ kon ɉu.

³¹ Mąąhɔlɔɓo, mąą nu a tɛɠɛɓo Yai-Laa woo hu, aa nwɔ tɔ́n gala; gɛ nɛ̨ŋɛ̨n tii wulu a lɛɛ gbɔwɔ nwuɔ̨. Mąąnɛ̨ɛ̨ di nɛɛ dɔ̨nɔ̨ kon ɉu.»

Nui a hvįįtɔɔ hvóló mąą kala

³² Ɓɛlɔwai Israɛlə lonnii di kɛ nii la nɔi pun ɉu; di nu ta hon, yɛ kwɛi kwɛli a hvįįtɔɔ yələ.

³³ Nuąi tii ɉon yɛ gwɛi kwɛli, di paa la di dɔɔ Moisə da Aarɔn di lííla, ə mą kɛ nɔi nuą kəlee.

³⁴ Di dɛɛ nu ta pɔ ə ɲee kɛ mą, mąąhɔlɔɓo, mɛ̨nįi kɛ mąąnɛ̨ɛ̨ di naa mɛ̨nį taaləi tii kalamun ma, di hvo ni kɛ yili ɓo li.

³⁵ Nąąlɔwai, Yai-Laa yɛ Moisə ɓa: «Mąąnɛ̨ɛ̨ di nui tii paa. Mąąnɛ̨ɛ̨ nuą kəlee di ɉɔɔ a kwɛni daa pulu pələ.»

³⁶ Nuą kəlee di ɉon, di kulɔ la ɉįi pulu pələ, di ɉɔɔ a kwɛni ə haa. Yili ɓə Yai-Laa ə Moisə tí la.

Həɠəɠaa wəli la mąą pu mɛ̨nį

³⁷ Yai-Laa yɛ Moisə ɓa:

³⁸ «'Mo Israɛlə lonnii diɛ, yɛ́ diɛ: «Di di wɔ həɠəɠaai kɔ́wɔ la laa; yili kaa a kwɛlan gəlee mɛ̨nį. Di yeekali kpɔluɔ mu tɛgiɛɠaa laa nwəli la.

³⁹ Bələ ɓə mąąnɛ̨ɛ̨ ka ka mąą həɠə kɔ́wɔ la laa la, ka kɛi gaa, Yai-Laa nwɔ tɔ́nŋąą nąą kili yɛ too ka ŋą. Ka di kaa, ka hva hvilɛn ka wɔ kiliŋąhiɛ da ka wɔ ɲɛ̨i kulɔ bɔɠaa pulu, yai a gɛ kaa Yálá woo tee ŋą.

⁴⁰ Yili pɔ pələ ɓə, ka káá pai kɛi nwɔ tɔ́nŋąąi pɔ mɛ̨nį kɛi la, kaa kɛ a nu mąąhəɠɛɛɠaa ka wɔ Yálái ɲɛ̨i ɓa.

⁴¹ Ɲą́ą́ Yai-Laa ka wɔ Yálá, ɲą́ą́ ɓə ka kulɔ Eziptə lɔi hu, ŋá kɛ a ka wɔ Yálá. Ɲą́ą́ ka wɔ Yálá Yai-Laa nwóó li.»