Lonon mo 14 - Yálá laawoo hɛɓɛ (dc)Israɛlə lonnii di di kwɛli tee 1 Israɛlə lonnii kəlee di tómą a wɔlɔ kɛnɛ̨, di yíi kpɔ wɔlɔi pili pili. 2 Israɛlə lonnii kəlee di kɛi hvaa di nwun ɉu, Moisə da Aarɔn diɛ, di kəlee diɛ kɛ diɛ: «Kwəli kpɛli haa Eziptə lɔi hu wɛ! A wala kɛ tii, ku haa kɛ nɔi pun ɉu kpɛli kɛ. 3 Lə mɛ̨nį ɓa Yai-Laa ə li tɔɔi ku mu, yɛ pa a kuɔ nɔi ŋɛ̨i hu? Kɔ́ yɛ ku paa, ku nɛ̨ąni da ku lonnii diɛ pa lɛɛi a luwɔɠaa! Ka gu pənə gwəli Eziptə lɔi hu, yili hviɛlaɓoɔi.» 4 Di kɛi mo di kee ɓa diɛ kɛ mą: «Ka gu nu ta hee gu nwun na, ə pənə a guɔ, gwəli Eziptə lɔi hu.» 5 Israɛlə lonnii kəlee ɲąąkpɔn ŋąą kɛ, Moisə da Aarɔn di pɛlɛ di kɔ́wɔ mu. 6 Yii ɓaa Nun lon Ɉosue da Yefunɛ lon Kalɛbə, diɛi kɛ nɛ̨nɛ̨ɛ̨n naa kɛ nuą tii pɔ, di wɛi di di mąąhəɠəɠaa huɓɛla a liikələn gwəi. 7 Diɛ Israɛlə lonnii kəlee diɛ: «Nɔi tii kwəli ɉu hiɛi, kuɔ ɉu mąąkpɛɛ, gaa a lɔi lɛlɛɛ kpɔ kpɔɔ, 8 Yai-Laa a tɔɔ gu pulu, gaa gu lɔi nɔi tii hu, ə nąą tɛɛ gu pɔ. A nɔi lɛlɛɛ tii hihɛn ɉuwui lɔpee gəlee a lɛlɛ ɉui. 9 Ka hvo ka kwɛli tee Yai-Laa ɓa, ka hvo ɲɔw nɔi tii hu nuą diɛ, mąąhɔlɔɓo di kaa lɔ gu yəi a nɔ na tɔ̨nɔ̨. Di wɔ haliɠaai daa kulɔ di pulu, guɔ yaan Yai-Laa kaa gu pulu, yili ɓa, ka hvo ɲɔw diɛ.» 10 Israɛlə lonnii kəlee di bili gee mɛ̨i diɛ mą: ka gu Ɉosue da Kalɛbə di hɔɔ a kwɛni di haa. Di lɛɛ lɔ moi tii, Yai-Laa mąąɲįnɛ̨n ə gbɔwɔ lɛ Israɛlə lonnii kəlee diɛ gee kaa kələ mɛ̨i. Moisə ə nuą mąą nɛ̨ɛ̨mąą hvə 11 Yai-Laa yɛ Moisə ɓa: «Nuąi ŋɛ̨i ɲɛ̨i kaa pai lɛɛi tɛɠɛɓoi ɉú, ə lɛɛ ɉu mįnɛ̨ lɔwai? Mįnɛ̨ lɔwai ɓə di kaa pai hvaai la mą di laa ná. Pələi mąn gáá kpalo mɛ̨nįɠaa kɛi la di lɔwai? 12 Gáá di hukala ɲɔ̨n bilii di lɔwai, ɛlɛɛ ŋį́ di hvɛɠɛ di kwɛlin ɉu. Kɛlaa ə́ wɛi, gáá ə́ huwu ɓɛlɛi, ŋį́ ə́ yee kɔ́nwɔ̨n ɉu wala wala ə tɛɛ diɛ.» 13 Moisə yɛ Yai-Laa ɓa: «Eziptə nuą di gɔlɔn diɛ, ə́ Israɛlə lonnii kulɔ di yee mu a ə́ wɔ huwalawalai hɛn da hva tɔɔ na. 14 Nɔi ŋɛ̨i ku kaa ɉu, Eziptə nuą daa mɛ̨nį tii hukulɔ diɛ. Daa bələ mɛ̨n diɛ; yɛ́ Yai-Laa, ə́ kaa nuąi ŋɛ̨i lɔwai, ɛlɛɛ, yɛ́ ə́ kpɔɔ lɛ diɛ, kaa ka kee kaa. Di gɔlɔn diɛ; yɛ́ Yai-Laa, yɛ́ ɓə ə́ kaa di mɛ̨i a tulɔ kpinįn, hvóló ŋą yɛ́ ɓo di ɲɛ̨i tɔwɔ, kpinįi, yɛ́ ɓo di mɛ̨i nwɔ̨n nən ɉu. 15 Akɛ ya nuąi ŋɛ̨i kəlee nwun na pili lɔ tanɔ̨n, nɔiɠaai daa ə́ mąą mɛ̨nį bələ mɛ̨n, di kaa pai kɛi diɛ: 16 ‹Nɔi ŋɛ̨i Yai-Laa ə naakwɛlanmo nwɔ nuąi diɛ, hvo pɛli li di mu, hvo li a diɛ laa, ya ka tii, aa gəlee nwun na pili nɔi pun ɉu.› 17 Ee kə Yai-Laa! Hvó gɛ tii! Nwɔ́ mɛ̨nį nąmu! Bələi tii ə́ mo la kuɔ, lɛɛ tii ə́ woo pulu; yɛ́ ɓə kɛ diɛ: 18 ‹Yɛ́ Yai-Laa, ə́ líiholi laa walaai, ɛlɛɛ, ə́ wɔ mɛ̨inɛ̨ɛ̨ hu kɛnɛ̨i, yɛ́ túwɔ́ pələ ɲɔ̨n da kɛɛ kalaa mąąhvaalɛɛ. Hva mɛ̨nį lɔpee ta gwələ kulɔ laa lɛɛ. Yɛ́i ya nu nąnni kɛ mɛ̨nį ɲɔ̨n gwələ kulɔ nonnii diɛ, ə həɠə kálaɓɔlɔ haaɓa ɓa ə həli la nąąn bɔ.› 19 Yili ɓa tii, nuą ŋɛ̨i ɲɛ̨imąąwɛli kaa, yɛ bələi Ə́ wɔ lii nɛ̨ɛ̨ kwəi laa hu kɛnɛ̨ɛ̨ la, yɛ bələi Yáá ə́ yee lɛɛ la diɛ, ə həɠə Eziptə lɔi hu ə pa ɓɛ.» 20 Yai-Laa ə Moisə woo pulu pənə yɛ mą: «Gáá di mąąhvaalɛɛi, yɛ bələi ə́ ɉu hvɛli la. 21 Kɛlaa, akɛ kpɔ gáá a vúlú, akɛ nwɔ mąąwiɛ aa lɔi mɛ̨i kəlee laa hvɛɛ, 22 Nuąi ŋɛ̨i kpɔ nwɔ́ mąąwiɛlaa kaa, da mɛ̨nįi ŋį́ gɛ Eziptə lɔi hu, ə mą kɛ nɔi pun ɉu ɓɛ. Nuą ŋɛ̨i daa ɉúkɔɔn ɉii kɛ gee mɛ̨i pow, di hvo nwóó hon ni. 23 Nɔi Ŋį́ naakwɛlanmo di lonnii diɛ, di hvo pai həlii nɔi tii hu. Nuą kpɔ ŋɛ̨i daa tɛɠɛɓo ɉú dɔ̨nɔ̨ kpɛli hva nąą kaa. 24 Kɛlaa, nwɔ́ tímun Kalɛbə nwɛi, yii kpɔ kili takpɛli ɓə too gwəi, ə nwóó hon, nɔi tii ə li mɛ̨i kaai, gaa lɔi ɉu, ɉuwu hu nuą di da hɔlɔɓo. 25 Amalɛkə nuą, da Kanaan nuą di kaa heeni nɛ̨ŋɛ̨ lɔi hu. Tínąą, ka pənə ka pulu, ka li nɔi pun ɉu pələ, ka ɉaŋą a Veen gbɔ̨nɔ̨ gboloyá tənən ma pələ.» Yai-Laa ə nwɔ nuąi di wɔ nɛ̨ŋɛ̨n gwələ kulɔ diɛ 26 Yai-Laa yɛ Moisə da Aarɔn diɛ: 27 «Ŋą́ą́ nuą ŋɛ̨i woo mɛ̨n, diɛ náá pələ ɓo. Gɛɛ kala nuą ŋɛ̨i, mįnɛ̨ lɔwai ɓə di kaa pai kpɛlai la mą? 28 Ka mo diɛ, kaa diɛ: ‹Ɲą́ą́ Yai-Laa nwóó li, Ŋą́ą́ gwɛ́la a gbɔ́ɔ́, gɛ́ diɛ; nwoo tii kulɔ ka la yɛ too nwə́lii, bələ kpɔlɔɔ ɓə gáá gɛi la a kaa. 29 Ka powa kaa lɛɛi puuni nɔi pun ɉu ɓɛ, kaa kpɔ ŋɛ̨i di ka lono, ka káá kwɛlan ə həɠə pow hveelɛ ɓa, yɛ li la tɔwɔ pələ, kaai kpɔ hvaa ka nwun ɉu yɛ hvilɛn na mą́ą́, 30 Ŋą́ą́ gwɛ́la gɛ́ diɛ, nɔi tii ŋį́ naakwɛlanmo kaa, ka hva kɛa lɔ nɔi kpɔ ɉu. Hvo kɛ li lɔ Yefunɛ lon Kalɛbə da Nun lon Ɉosue, diɛ lɔ ɓə lɔi laa. 31 Ka kwəi lonnii ŋɛ̨i ka kɛi kɛ diɛ; di kaa pai lɛɛi a kɔ́ pulu hɛn, da diɛni ɓə lɔi nɔi tii hu, yii ka mɛlɛkpɛɛ mą. 32 Yii ɓaa ka wɛi, ka powa kaa lɛɛi nɔi pun ɉu ɓɛ. 33 Ka kwəi lonnii di kaa ka wɔ túwɔ́ pələ ɲɔ̨n tii ɉu mɔ̨nɔ̨ mįi kwɛlan bow nąąn ɲee mu, ə lɛɛ ɉu ka powa ə too ɓɛ nɔi pun ɉu. 34 Hvóló pow nąąn ɓə ka gɛ kaa nɔi tii hu hiɛ, kaa mąąkpɛɛ; yili ɓa, hvóló tɔ̨nɔ̨ kaa a kwɛlan dɔ̨nɔ̨. Kwɛlan bow nąąn ɓə ka káá gɛi, kaa ka wɔ mɛ̨nį ɲɔ̨n tii ɉu mɔ̨nɔ̨ mįi. Yili pɔ pələ ɓə ka gaa la, kaa diɛ, nu a gili kulɔ ɉú, ɲɔ̨nwɔ̨ɔ̨i.› 35 Ɲą́ą́ Yai-Laa, Nwóó li. A tɛ̨ą, bələ ɓə gáá pai naai la nu ɲɔ̨nwɔ̨ɔ̨ɠaa ŋɛ̨i diɛ, diɛi di kwɛli tee mą́ą́. Nɔi pun ɉu ɓɛ, dɔ̨nɔ̨ kpɛli hvo pai kulɔi ɉu; ɓɛ ɓə gəlee kaa haai laa.» 36 Nuą ŋɛ̨i li nɔi hu hiɛi, diɛ mąąkpɛɛ, di pənə di pa di gwɛlanmo ɲɔ̨nwɔ̨ɔ̨ too, diɛ nuą ɲąątɔɔ Moisə ɓa, a nɔi mąą kun ɲɔ̨n vaa ɓo pələ, 37 nuą tii gwɛlanmo ɲɔ̨nwɔ̨ɔ̨ too, di haa laa Yai-Laa lííla. 38 Nɔi hu hiɛ nuą tii lɔwai, Nun lon Ɉosue, da Yefunɛ lon Kalɛbə, diɛ lɔ ɓə kulɔ ɉu, di lɛɛ a di hvulú. Nuą di kulɔ nwɔ̨nɔ̨ Yálá woo mu 39 Moisə ə nwooɠaa tii hukulɔ Israɛlə lonnii diɛ, nuą di di woo laa kpɔ kɛnɛ̨. 40 Yili pulu yələ laaɓoɔ, yələwala piinɛ̨ɛ̨, di hvilɛn bələ ɓa diɛ li ɲee lɔi hu pələ, diɛ kɛ diɛ: «Ku kaa a hɔn mąą nuą tɛ̨ą li, kɛlaa, ɓɛi ŋɛ̨i Yai-Laa ə naa hvaa ɓo, ku kaa kɛa lii laa.» 41 Moisə yɛ diɛ: «Lə ɓə ŋɛ̨i ka káá gɛi? Lə mɛ̨nį ɓa ka káá kulɔi Yai-Laa woo mu? Yili hvo pai pɛli. 42 Ka hvo kɛ ka káá lii laa, mąąhɔlɔɓo, Yai-Laa hvo tɔɔ li ka pulu yili hu. Ka li laa, ka yówóɠaa yee kaa pai tɛɛi kaa. 43 Amalɛkə nuą da Kanaan nuą di kaa laa ka tɔwɔ, di kaa lii ka paai, mąąhɔlɔɓo, kaa ka pulu tɔɔ Yai-Laa ɓa, ɛlɛɛ, Yai-Laa hvo kpɛli ka pɔ yili hu.» 44 Kɛlaa, ə mą kɛ tii, nuą di ɉəɠə kpɔ a di nwąnąi diɛ kɛ di kaa lii ɲee lɔiɠaa hu. Yai-Laa nwɔ mįnɛ̨ kəhii da Moisə kpinįi di hvo di kɔ́wɔ kulɔ taai. 45 Amalɛkə nuą da Kanaan nuąi kɛ heeni ɲeeɠaa ɓa, di yɛɛ Israɛlə nuą mɛ̨i, di yee ə tɛɛ diɛ, di lɛɛ kpɔ di paai, di həli a diɛ Hɔrma. |