Lonon mo 13 - Yálá laawoo hɛɓɛ (dc)Moisə ə nuą tɔɔ diɛ li Kanaan lɔi hu kaai 1 Yai-Laa yɛ Moisə ɓa: 2 «Nuą tɔɔ, di li di Kanaan lɔi ŋɛ̨i gáá pai dɛɛi Israɛlə lonnii pɔ, di ɉu kaa, nu huwu pow kɔ́w hveelɛi tii, nu kəlee ə nu tɛitɛi kulɔ a di huwuɠaa laa. Diɛ ɓo a ɲɛ̨itɔwɔ nuą.» 3 Moisə ə lɛɛ Paran nɔi pun ɉu, ə di tɔɔ yɛ bələi Yai-Laa ə dí la. Nuą tii kəlee di kɛ a ɲɛ̨itɔwɔ nuą Israɛlə lonnii lɔwai. 4 Nuą tii laa ka: Rubɛn nu huwu nwɛi, Ɉakurə lon Samua ɓə di gulɔ. 5 Simeɔn nu huwu nwɛi, Hori lon Safatə ɓə di gulɔ. 6 Ɉuda huwu hu nuą, Yefunɛ lon Kalɛbə ɓə di gulɔ. 7 Isakarə huwu hu nuą Ɉosɛfə lon Yigealə ɓə di gulɔ. 8 Ɛfraimə huwu hu nuą Nun lon Hosea ɓə di gulɔ. 9 Bɛnɉamɛn huwu hu nuą Rafu lon Palti ɓə di gulɔ. 10 Zabulɔn huwu hu nuą Sodi lon Gadiɛlə ɓə di gulɔ. 11 Ɉosɛfə lon Manase huwu hu nuą Susi lon Gadi ɓə di gulɔ. 12 Dan huwu hu nuą Gemali lon Amiɛlə ɓə di gulɔ. 13 Asɛrə huwu hu nuą Mikaɛlə lon Seturə ɓə di gulɔ. 14 Nɛftali huwu hu nuą Wofsi lon Nabi ɓə di gulɔ. 15 Gadə huwu hu nuą Maki lon Geuɛlə ɓə di gulɔ. 16 Nuąi Moisə ə di tɔɔ nɔi hu kaai, di laa ka tii. Moisə ə Nun lon Hosea laa hee a Ɉosue. 17 Moisə ə di tɔɔ, diɛ li Kanaan lɔi mąą kpɛɛi, yɛ diɛ: «'Ka tɛɛ a nɛ̨ŋɛ̨ lɔi hu pələ, ka lɔ ɲee lɔi hu. 18 Ka nɔi kaa, pələi gaa la, ka mąąkpɛɛ. Nuąi di kaa heeni laa, ka di mąąkpɛɛ, akɛ di walaai a wala kɛ tii di hviŋąąi; a kɛ di kpulu kɛnɛ̨i, awala kɛ tii di kaa ɠɛlɛɛ-ɠɛlɛɛ. 19 Akɛ nuąi tii di wɔ lɔi lɛlɛɛi, a wala kɛ tii di ɲɔ̨nwɔ̨ɔ̨i, ka di hee taaɠaa mąą kpɛɛ, akɛ hįį hvo tinɛ̨n ni ma, akɛ hįį tinɛ̨n ŋąąi diɛ. 20 Ka nɔi kɛ pələ kaa, akɛ hihɛn a lɛlɛ mą, a wala kɛ tii hva lɛlɛ mą. Akɛ lɔwɔ lɔi li, a wala kɛ tii gbali lɔi li. Ka tɔɔ a ka nwąnąi, ka nɔi tii hu hɛn má ta həɠə.» Ɓɛlɔwai di kɛi di tɔɔ la pələi, ə kɛ a viɲə dɔɔ dɔwɔɠaa ɓá kulɔi lɔwai. 21 Nuąi tii di tɛɛ diɛ li nɔi mąąkpɛɛi. Ə həɠə Sin nɔi pun ma, ə həli la Rehɔvə, Lebo-Hamatə kwɛlɛ. 22 Di tɛɛ nɛɠɛ lɔi hu pələ, di həli Hebrɔn, ɓɛi Ahiman, Sesai da Talmai di kɛ laa heeni, Nuąi tii di kɛ a Anakə lonnii. Di Hebrɔn taa tɔɔ, kwɛlan mɛ̨ihveelɛ tɛɛ pulu, di hvo teɠa Tanisə taa tɔɔ Eziptə lɔi hu. 23 Di həli Ɛskɔlə yɛɛ kɔwɔ hu, di viɲə kpaɠa tɔ̨nɔ̨ tee máɠaa di lɛɛ mą, di ɲili wulu ɓa di tɔɔ mu a nu hveelɛ. Di nąą hihɛn má takpɛliɠaa həɠə. 24 Di gɛɛnąąi tii laa hee a Ɛskɔlə, mukulaa ɓaa: viɲə ɓá ɓoloon ɉu, yɛɛ kɔwɔi. Viɲə ɓái tii Israɛlə lonnii di dee nąą, mąą mɛ̨nį ɓa. Moisə nwɔ nɛ̨nɛ̨ɛ̨n naa kɛ nuą di di kwɛlanmo 25 Lii di mo nɔi mąąkpɛɛi, hvóló pow nąąn mə di gɛ laa, di pənə di pa. 26 Di pənə di pa di həli Moisə ɓa, da Aarɔn, ə mą kɛ Israɛlə lonnii kəlee, ɓɛi di kɛ laa Paran nɔi pun ɉu, Kadɛsə daai. Di di kwɛlanmo Moisə da Aarɔn diɛ nu kpulu kəlee ɲɛ̨i ɓa. Nɔi tii hu hihɛnŋąąi di paa la di nɛ diɛ. 27 Nwoo hukulɔi di gɛ Moisə ɓa, ya ka, diɛ mą: Lɔi nɛ̨ɛ̨ kpɔkpɔɔ li, hihɛn ɉuwui lɔpee gəlee da lɛlɛ mą. Nąą wulu ɓa taɠaa ka. 28 Kɛlaa nu huwui laa heeni, di huwalawalaai, daaɠaa mąą tinɛ̨n ŋąą a hįį kpɛa-kpɛa, ɛlɛɛ ku Anakə nu huwu taɠaa kaa kpɔ laa heeni. 29 Amalɛkə lonnii ɓə heeni ɉɛɠɛɛ pələ, Hɛtə nuą, Ɉebusə nuą da Amɔrə nuą di kaa heeni ɲee lɔi hu pələ. Kanaan nuą leeleeɠaa di kaa heeni gboloyá kwɛlɛ, da Ɉurdɛn ɲá ɓɛlaaŋąą pɔ. 30 Nu kpului tii kɛ tɔɔni Moisə kwɛlɛ, Kalɛbə ə di laa pilɛ, yɛ diɛ: «'Ka gwəli, gu kɔ́ pɛlɛ diɛ, gu di hon! Gu yee kaa lii tɛɛi diɛ hɛa hvo ɉu.» 31 Kɛlaa, di ɓɛlaai ŋɛ̨i da diɛni di li di pənə diɛ nuą diɛ: «Gu hva pɛli lii gu hvo kɔ́ pɛlɛ nuąi tii diɛ, mąąhɔlɔɓo, di hvaŋą tɛɛi guɔ.» 32 Di tɔɔ kɛa diɛ nɔi tii di tɛɛ ɉu, diɛ mąą kun ɲɔ̨n vaa ɓo, Israɛlə nuą diɛ, diɛ kɛ mą: «Nɔi ŋɛ̨i kwəli nɛ̨nɛ̨ɛ̨n naa kɛi ɉu, gaa a lɔi da kɛ di kee mįi ɉu, ə lɛɛ nuąi kpɔ di kaa laa, di kaa a nu kpaɠala kpaɠalaɠaa. 33 Ku nu yee muhəɠɛɛ kowolo kowoloɠaa kaa hɔlɔ laa, diɛ ɓo a Anakə lonnii. Diɛi kulɔ nu kwɛa hveelɛi tii hu. Ku kɛi ku kpɔɔ kaa di mu yɛ poninŋąą, ɛlɛɛ bələ kpɔlɔ ɓə di kɛi ku kaa la.» |