Lonon mo 12 - Yálá laawoo hɛɓɛ (dc)Hvólóɲɔ̨n ə pɛlɛ Miriamə ɓa 1 Miriamə da Aarɔn di Moisə laa pələ ɓo, yɛ hvilɛn na Nubi nɛ̨ɛ̨nui tii ə ɉəɠə a nɛ̨ą mąą mɛ̨nį ɓa. 2 Diɛ kɛ mą: «A kɛ tii, Moisə yaa tɔ̨nɔ̨ lɔ ɓə Yai-Laa a pələ ɓo mą? Hva mɔ̨ɔ̨ pɛli pələ ɓoi kuɔ kpɛli kuɔ?» Yai-Laa ə di wooi tii mɛ̨n. 3 Moisə ə kɛ a nui a gbɔwɔ mąą yɛɛ ə tɛɛ nu kəlee ɓa ɓɛ yɛnɛ̨ɛ̨. 4 Yai-Laa ə nɛɛ mą ə mo, Moisə, Aarɔn da Miriamə diɛ, yɛ diɛ: «'Ka nu haaɓai ka li gee kaa kəle laaləi.» Di nu haaɓai di nɛɛ mą di li. 5 Yai-Laa ə yɛɛ tulɔ kpinįn ɉu, ə tɔɔ gee kaa kələ laaləi. Ə Aarɔn da Miriamə di təli, di nu hveelɛi di lɛɠɛ laa. 6 Yɛ diɛ: «Ka ka wəli tɔɔ nwóó ɓa. Nu ta a kɛ ka lɔwai a gwə́i mɛ̨nį hukulɔ mun, ɲą́ą́ Yai-Laa, ŋą́ gbɔ́wɔ́ lɛ hįį pələ, gɛ́ mɛ̨nį ɓo mą. 7 Nwɔ́ tímun Moisə nwɛi hvo kɛ li tii, yai gaa a kwəi kwələmun, nwɔ́ pɛ́lɛ́i mu nuą kəlee mąą mɛ̨nį ɓa. 8 Ŋą́ kɛ gáá mɛ̨nį ɓoi mą ŋą́ mo mą a ɉu pɔ̨nɔ̨ɔ̨, yɛ kwa kɛi ku kee ɲɛ̨ilai kaa. Ɛlɛɛ, a Yai-Laa koloon ɉu kaa. Ka tɔɔ pələ kɛ ləi, kaa nwɔ́ tímun Moisə laa pələ ɓo?» 9 Yai-Laa nwɔ liiholi ə ɓɛla di mɛ̨i, ə tɛɛ yɛ li. 10 Dulɔ kpinįn ə həɠə gee kaa kələ mɛ̨i, hvólóɲɔ̨n ə nɛɛ mą ə yɛɛ a Miriamə, gɔlɔ mu ə kwələ kpɔ yɛ yee hunwɔ̨; Aarɔn ə tinɛ̨n ə gaa, nąą kəlee ə ɓo a hvólóɲɔ̨n. 11 Aarɔn yɛ Moisə ɓa: «Ə kə nwɔ́ mɛ̨nį nąmu Moisə! Nɛ̨ɛ̨ yɛ́. Nɛ̨ŋɛ̨n ŋɛ̨i ku ɉəɠə yɛ́ a kilikpɛɛgwəi laai, hvo yili hee ə́ kwəi. 12 Nɛ̨ɛ̨ yɛ́ ną́n, əgɛ Miriamə hvo kɛ gaa kɛi yɛ yee kala lon, yai gɔlɔ ɲąą hva kɛ a bɛliɛ gaai lɔwai.» 13 Moisə ə nɛɛ mą ə wɔlɔ Yai-Laa ɓa, yɛ mą: «Ee kə Yálá, gáá nɛ̨ɛ̨mąą hvəi Yɛ́, kɔ́lɔi pɔ̨nɔ̨ tɛɛ bɔ.» 14 Nąąlɔwai, Yai-Laa ə mo Moisə ɓa, yɛ mą: «Akɛ nąn a naa ya taɠa kɛ ɲɛ̨i, nwumɛ̨ hvo li mɔ̨ɔ̨ tɛ la hvóló mɛ̨ihveelɛ yee mu? Yili ɓa tii, ka gulɔ ka lɔwai, ə hvóló mɛ̨ihveelɛ kɛ daa pulu, yili pulu, a pɛli ə pənə ə tɛ taai.» 15 Di Miriamə kulɔ nuą lɔwai, ə hvóló mɛ̨ihveelɛ kɛ dɔ̨nɔ̨ kon ɉu, daa pulu. Nuą di hvo di muhəɠə di hvo hvilɛn bələ pɔ, ə lɛɛ ɉu nwɔ hvóló mɛ̨ihveelɛi tii ə kpɛɛ. 16 Nuą di həɠə Haserotə, di li di daa pu Paran nɔi pun ɉu. |