Lonon mo 10 - Yálá laawoo hɛɓɛ (dc)Wali kwɛli túlú 1 Yai-Laa yɛ Moisə ɓa: 2 «'Mo di túlú hveelɛ yɔw a wali kwɛli. Diɛ ɓə pai kɛi a nuą təli hɛn, a wala kɛ tii di muhəɠə túlú, di li mɛ̨nį ɓa. 3 Ɓɛlɔwai da dúlú wooi tii mɛ̨n na, mąąnɛ̨ɛ̨ nuą kəlee di di ɲąąkpɔn ə́ lííla, gee kaa kələ laaləi. 4 Akɛ dɔ̨nɔ̨ lɔ ɓə di vɛɛ, yili a kɛ a ɲɛ̨itɔwɔ nuą da gɔ́laɠa nwun nąmįnąi di kaa Israɛlə nuą lɔwai, di təli túlú diɛ di ɲąąkpɔn na ə́ lííla. 5 Da vɛɛ a wələ too pələ ɉu, a kɛ tii nuąi heeni gee kaa kələ voló həɠəi pələ, diɛ ɓə mąąnɛ̨ɛ̨ di di muhəɠə, di hvilɛn tɔwɔ. 6 Da pənə da bulu ɓa hvɛɛ tii, yiiɠaai di kaa ɉɛɠɛɛ pələ, di di muhəɠə. Da vɛɛ a wələ too pələ ɉu, a kɛ tii nu kəlee muhəɠə mɛ̨nį li, diɛ li. 7 Kɛlaa akɛ nuą ɲąąkpɔn mɛ̨nį ɓə, da dúlú hvɛɛ, di hva wələ too ɉu. 8 «Aarɔn lonnii a ɉaláá laa həli nuą, diɛ ɓə da dúlúɠaai tii hvɛɛ. Dúlú mɛ̨nįi tii kaa pai kɛi ka yíi pələ hu, mąą hva hvalin. 9 «Ɓɛlɔwai ka kɛ la ka wɔ lɔi hu, ka kɛi pai lii kɔ́ pɛlɛi ka yowoɠaa diɛ, da tómą a kɔ́ mɛ̨i woo, ka dúlú hvɛɛ. Ka gɛ tii, a ka nąą kili too pələ Yai-Laa ka wɔ Yálá ŋą, yɛ ka kulɔ ka yowoɠaa yəi. 10 Ka wɔ hɛli hvólóɠaa, da ka wɔ ɲąnin nįnɛ̨ nwɔ hɛliɠaa, a wala kɛ tii hɛli mąąwiɛi takpɛliɠaa hu, ɓɛlɔwai ka kɛi haláá hɛn gələn na, kaa nɛ̨ɛ̨yɔwɔ laa haláá kulɔ, ka dúlúɠaai tii hvɛɛ, ə gɛ ka ka nąą kili too la Yai-Laa ka wɔ Yálái ŋą. Ɲą́ą́ Yai-Laa ka wɔ Yálá.» Ə həɠə Sinai ə həli la Moab lɔi ɲɛ̨n ma 10—21 Nuą tɔɔ pələ ɉiɛ kulɔi lɔwai 11 Israɛlə nuą kulaa Eziptə lɔi hu, gwɛlan veelɛnąą ɲąnin veelɛ nwɔ hvoló pow hveelɛ yələ, dulɔ kpinįn ə muhəɠə gee kaa kələ mɛ̨i. 12 Israɛlə lonnii di həɠə Sinai nɔi pun ɉu, diɛ li. Paran nɔi pun ɉu ɓə dulɔ kpinįn ə tɔɔ laa. 13 Yili ɓə kɛ a di muhəɠɛɛ dɔlɔɔ yii Yai-Laa ə di tí la Moisə pɔ pələ. 14 Nuąi tɛɛ tɔwɔ, diɛ ɓaa Ɉuda lonnii di wɔ kɔlaɠai. Ɉuda lonnii di wɔ kɔlaɠai, nui kɛ ɲɛ̨itɔwɔ, ya ɓaa kɛ Aminadavə lon Nasɔn 15 Isakarə lonnii di wɔ kɔlaɠai ɲɛ̨itɔwɔ mun mąą kɛ a Suarə lon Netanɛlə. 16 Zabulɔn lonnii di wɔ kɔlaɠai ɲɛ̨itɔwɔ mun mąą kɛ a Helɔn lon Eliavə. 17 Di gee kaa kələ kulɔ di ŋąli gee ŋą. Gɛrsɔn lonnii da Merari lonnii ɓə gee kaa kələ həɠə diɛ li la. 18 Rubɛn lonnii di wɔ kɔlaɠai ə hvilɛn bələ ɓa. Di ɲɛ̨itɔwɔ mun mąą kɛ a Sedeurə lon Elisurə. 19 Simeɔn lonnii di wɔ kɔlaɠai ɲɛ̨itɔwɔ mun maa kɛ a Surisadai lon Selumiɛlə. 20 Gadə lonnii di wɔ kɔlaɠai ɲɛ̨itɔwɔ mun mąą kɛ a Deuɛlə lon Ɛliasafə. 21 Yili pulu, Kehatə lonnii ɓə Yai-Laa hee kələ həɠə. Da pənə kɛ di gee kaa kələ hvilɛn, Kehatə lonnii di hvo teɠa kɛ pai. 22 Yili pulu, Ɛfraimə lonnii di di muhəɠə. Amihudə lon Elisama ɓə kɛ Ɛfraimə lonnii di wɔ kɔlaɠai nwun na. 23 Manase lonnii di wɔ kɔlaɠai ə ɓo Pedasurə lon Gameliɛlə yee mu. 24 Bɛnɉamɛn lonnii di wɔ kɔlaɠai ə ɓo Gideoni lon Avidan yee mu. 25 Nuąi lɛɛ a nu gbəliɠaa, diɛ ɓaa Dan lonnii di wɔ kɔlaɠai, nui kɛ gɔ́laɠai tii ɲɛ̨itɔwɔ, ya ɓaa Amisadai lon Ahiezɛrə. 26 Asɛrə lonnii di wɔ kɔlaɠai ə ɓo Okran lon Pagiɛlə yee mu. 27 Nɛftali lonnii di wɔ kɔlaɠai ə ɓo Einan lon Ahira yee mu. 28 Bələ ɓə Israɛlə lonnii tɔɔ pələ ə kɛ la ɉiɛ hu, di lii lɔwai. Gbɛɛ ɓə pai pələ kulɔi a nuą? 29 Reuɛlə lon Hobabə, yai kɛ a Madian mun, yɛ ɓo a Moisə mɔ́lɔ; Moisə ə mo mą, yɛ mą: «Ku kaa lii nɔi ɲɛ̨i Yai-Laa ə kɛ yɛ gaa dɛɛi ku pɔ ɉu. Pa gwəli, gwa li, mɛ̨inɛ̨ɛ̨ Yai-Laa aa naakwɛlanmo kuɔ, ə́ ə́ wɔɔ nąą hɔlɔɓo ɉu.» 30 Hobabə yɛ mą: «Və́ pai lɛɛ ka pɔ, gu hvo li, gáá pənəi ŋį́ li bɔ́ lɔi, nwɔ́ nuą pɔ.» 31 Moisə ə pənə yɛ mą: «Hvo kɛ ə́ kaa həɠəi ku pɔ. Yɛ bələi yɛ́ kpinįi ə́ gɛɛnąąɠaa kəlee kɔ́lɔn na, ɓɛɠaai mąąnɛ̨ɛ̨ ku ku hvįįtɔɔ laa nɔi pun ɉu, yɛ́ ɓə pai kɛi ku tənən dɔɔi. 32 Gwa kaa ni gwa li, mɛ̨inɛ̨ɛ̨ Yai-Laa yɛ gaa gɛi kuɔ, a gɛ kuɔ, ə́ wɔ a hɔlɔɓo ɉu.» 33 Da diɛni di həɠə Yai-Laa nwɔ yeei ɓa, di hvóló haaɓa hiɛ kɛ. Yai-Laa nwɔ mįnɛ̨ kəhii ə kɛ di tɔwɔ diɛ li voló haaɓa hiɛi tii hu, ə gɛ ɓɛi mąąnɛ̨ɛ̨ diɛ daa pu laa, yɛ nąą lɛ diɛ. 34 Yai-Laa nwɔ tulɔ kpinįn a kɛ pɛlɛ ni di mɛ̨i hvóló ŋą, ɓɛlɔwai da diɛ taa həɠə la diɛ li. 35 Ɓɛlɔwai mąąnɛ̨ɛ̨ kɛ di li la a mįnɛ̨ kəhi, Moisə a kɛ mą: «Yai-Laa ə́ muhəɠə Ə́i yowoɠaa hu taɠa, nuąi diɛ di tɔɔ Ə́ la, di pu di həɠə Ə́ ɲɛ̨itɔwɔ!» 36 Gəhi a kpala a tɔɔ, Moisə a kɛ mą: «Yai-Laa pənə Ə́ pa! Israɛlə nu kpului ŋɛ̨i kɛnɛ̨i!» |