Lomaŋ 9 - Yálá laawoo hɛɓɛ (dc)Yálá ŋą nu həɠɛɛ ɉuɠaa 1 Kristə hu, tɛ̨ą ɓə gáá moi, və́ lɛɛ kɛi, ŋą́ gbɔ́ɔ́ mąą kɛla hvaaɓo a yili, Kili-Mąąhəɠɛɛ háálai, və́ lɛɛ kɛi. 2 Níi kələn ŋąąi gwə́i, ɛlɛɛ, níí holuɛ lɔ a yələ kəlee. 3 A tɛ̨ą, yii gáá bɔ, a nɛ̨ɛ̨mąn, nɛ́ŋɛ̨n ə laa, ŋį́ gulɔ Kristə nwɔ wɛlikɛmąąlaa hu, nąn nonniii, a diɛi a ɉúwu hu nuą di mąą mɛ̨nį ɓa. 4 Diɛi a Israɛlə lonnii, Yálá ə di kɛ a ŋą ɲąąkɔn-nonnii ə di mąąɲįnɛ̨n gɛ diɛ, da diɛni di mįnɛ̨ həɠə, ə tɔ́n dɛɛ di pɔ, da ɉalaa kulɔ pələ, ɛlɛɛ, ə mɛ̨nįɠaa laakwɛlanmo diɛ 5 di kaa a di kalaɓɔlɔni lonnii, di kaa pələ hu, diɛ ɓə Kristə ə hɔlɔɓo di huwu hu, yai hee ni hɛn gəlee nwun mɛ̨i. Lúwɔ́ kɛ mą a yələ kəlee da nwɔɔ, kɛi a mo tii Yálá ə kɛ! Mįiną! 6 Və́ kɛli diɛ: Yálá nwɔ mįnɛ̨i kalaa li. Kɛlaa yaamun, gaa má, nuąi kpɔ Israɛlə pɛlɛ́i mui, gəlee hvəə a Israɛlə lonnii. 7 Abrahamə huwu hu nuą kəlee hvə a Abrahamə lonni leeleeɠaa. Mąąhɔlɔɓo, Yálá ə mo Abrahamə ɓa yɛ mą: Ə́ lón Isaakə lonni ɓə di kaa pai kɛi diɛ: Abrahamə lonnii. 8 Yili mukulaa ɓaa: Lonŋąai da hɔlɔɓo lɔ a kɔ́lɔ liiɓa, diɛ hvəə a Yálá lonni, hvə kɛi yiiɠaai da hɔlɔɓo yɛ bələi Yálá ə naakwɛlanmo la, diɛ ɓə a Yálá lonni leeleeɠaa. 9 Mąąhɔlɔɓo, Yálá ə naakwɛlan mo Abrahamə ɓa yɛ mą: «Gwəlan pai, a ɓɛlɔwai, ŋą́ pənə ŋą́ pa; a kɛ kɛa tii, lon ə ɓo ə́ nɛ̨ą Sara yəi.» 10 Gəlee hvə li, gu kalaɓɔlɔ Isaakə tanɔ̨n tii ɓə, nɛ̨ą Rebeka ə koo həɠə mą. 11 Bələi mąn tii, nɛapɛlɛɛ di hvo ni kɛ hɔlɔɓo li la, gu hvomun kɛ, mɛ̨nį lɛlɛɛ da mɛ̨nį ɲɔ̨nwɔ̨ɔ̨ di kulɔɉu kɔlɔn mɛ̨nį di yəi; əgɛ, Yálá wooi ə gwɛlɛ ə lɛɛ dɔwɔ ɓa, yɛ bələi yaa kpinįi ə naala gwəi, 12 yili hvo kulɔ li di túwɔ́ pələ hu, kɛlaa ə kulɔ nui dəliɓo kɛ na yai kɛ diɛ: «Nu pɔlɔ kaa pai kɛi nəɠə yee mu.» 13 Yɛ bələi bɛ̨ɛ̨ la, yɛ diɛ: «Ŋą́ą́ Ɉakɔbə wɛli la kɛ, ŋą́ą́ dɛɛ Esau ɓa.» 14 Akɛti gwa mɔ̨ɔ̨ kɛ diɛ, Yálá huluɔi? Kpaa-o! Hvo hulu li. 15 Yaan, ə kɛ Moisə ɓa: «Nui ŋą́ kɛ bɔ, ŋą́ ɲɛ̨imąąwɛli kaa; nui ŋą́ kɛ bɔ ŋą́ nwɛlila kɛ.» 16 Yili hva kulɔ nu liiɓa da nwɔ huwalawalaa hu, kɛlaa, Yálá nwɔ ŋɛ̨imąąwɛli kaa ɓə a kulɔ ɉu. 17 Bələ ɓə Ɉɛɓɛ́ ə mo la Eziptə tɔɔmun ma, yɛ mą: «Ŋą́ ə́ kɛ a tɔɔmun, ə gɛ, ŋą́ nwɔ́ huwalawalaa lɛ ə́ yee hu, lɔi mɛ̨i nuą kəlee di náá kɔ́lɔn.» 18 Yili ɓa, nui Yálá kaa bɔ ə ɲɛ̨imąąwɛli kaa a ɲɛ̨imąąwɛli kaa. Nui a kɛ bɔ ə gili walawala, ə gili walawala. Yálá nwɔ Hééɓolaa 19 Ə́ kaa pai kɛi mą́ą́, akɛ yili kaa ti; Nɛlɛ ŋą woolaa ɓə kani a kɛ? Hvó gaai, mɛ̨nįi a hvaa mą, ya ɓə a kɛ. 20 Kɛlaa, yɛi ŋɛ̨i ə́ kaa a nu, lə ɓaa yɛ́, yaai ya Yálá laa hɛatoo? Ləɠi hva kɛ dɔɔmun ma: Ə́ kɛ ŋɛ̨, lə mɛ̨nį ɓa? 21 Ləɠi-tɔɔmun hva pɛli niiɓa kɛi a ŋą ləɠi-pɔlɔi? A da kɛ a yáləɠi, ə da kɛ a ləɠi lon. 22 Bələi mąn, Yálá ə kɛ la bɔ ə nwɔ lííholi lɛ, di nwɔ huwalawalaa kɔ́lɔn; ə yili lɛɛ laa, nuąi mąąnɛ̨ɛ̨ kɛ ə niiɲąnwąną di pɔ, diɛi kɛ di nwun na pili pələ mɛ̨i, ə nii kpələ, ə ɲee hee di mu, 23 bələ ɓə Yálá ə kɛ la bɔ ə nwɔ mąąwiɛlaa too la pono ŋą gu ɲɛ̨i ɓa, a guɔi ŋɛ̨i aa gu ɲɛ̨imąąwɛli kaa, aa gu həɠə ɉu, ə gɛ, gu nwɔ mąąwiɛlaai ta hɔlɔɓo. 24 Hvó gaai, guɔ ɓə aa gu həɠə ɉu, Ɉuifəɠaa da huwu takpɛliɠaa di lɔwai. 25 Yɛ bələi moɔ la Ose ŋą hɛɓɛ́i hu, yɛ mą: «Nu huwui hvo kɛ a nwɔ́ nu huwu. Gáá pai gɛi a nwɔ́ nu huwu. Nɛ̨ɛ̨nui nwɛli hvo kɛ mą́ą́, ŋą́ gɛ a nwɛ́likɛmąą nɛ̨ą.» 26 Ɛlɛɛ, ɓɛi di kɛi kulɔ laa yɛ kɛ mą: «Ká hvo a nwɔ nu huwu», di kaa pai kɛi laa diɛ: «Yálá húlúmąą lonnii.» 27 Esai nwɛi, ə mo yɛ: «Israɛlə lonnii di mąn tamąą yɛ gboloyá hu ɲɛa kɔw, da wolo lɔ ɓə pai ɓaloi.» 28 Mąąhɔlɔɓo, mɛ̨nįi Ną́mu ə mo, gaa pai bɔ mɛ̨nį kɛi, kpɔlɔɔ ti ɲą́ą́lee a mąąhulaa. 29 Yili ɓə nwɔ̨nɔ̨ Esai ə nɛɛ kwɛaa la ə mo, yɛ kɛ: «Akɛ kɛ, Huwalawala Kəlee Nąmu Yai-Laa, hvo ku kpəli wolo lɛɛ kɛ, yɛ kwə́ li kɛ yɛ, Sodomə, ku mąą mɛ̨nį ə kɛ yɛ Gomorə.» Israɛlə nuą da nwɛlɛɛ lɛlɛɛ 30 Gwa kɛ kpɔ lə? Nuąi di hvo a Ɉuifəɠaa, diɛi di hvo kɛi tələnmolaa kwɛli Yálá ɲɛ̨i ɓa, daa tələnmolaa hɔlɔɓo Yálá yəi; laa na laa hu. 31 Yá pa, Ɉuifəɠaa kɛi tələnmolaa kwɛli tɔ́n ɉu, di tɛɠɛ gɛlɛ. 32 Lə mɛ̨nį ɓa? Mąąhɔlɔɓo, di hvo dələnmolaa tii kwɛli li laa na laa hu, di kɛ bɔ di ɉɔlɔɓo di túwɔ́ pələ hu, di kalin a di kɔwɔ kwɛni 33 Yɛ bələi bɛ̨ɛ̨ la Yálá lawoo hɛɓɛ́ hu yɛ mą: «Gáá kwɛni laai Siɔn, nui a kɔwɔ tuwɔ mą a too. Kɛlaa, nui a laa na, hva nwumɛ̨.» |