Lomaŋ 7 - Yálá laawoo hɛɓɛ (dc)

Kristalon hvo a tɔ́n nwɔ luwɔ

¹ Nąn nonnii, mɛ̨nįi gɛ́ ŋį́ mo káá, gaa yɛ ka kɛ a gɔlɔnŋąa; mąąhɔlɔɓo, ka dɔ́n gɔlɔn. Ɓɛlɔwai nu kaa la yɛnɛ̨ɛ̨, nąąlɔwai ɓə tɔ́n nwɔ yee pɛlimąą kaa la mą.

² Hilɛtai nɛ̨ą kɔwɔla yiliɛ ɉilɛ ɓa a tɔ́n yii kpɔ ɉilɛ kaa ni heeni. Ɉilɛ a haa, akɛ tii, gɔwɔla aa holoon.

³ Yili ɓa, ɉilɛ a kɛ ni heeni, a li hulɔnu takpɛli pɔ, a kɛ a wɛlikɛnɛ̨ɛ̨nu. Kɛlaa, ɉilɛ a haa, a lɛɛ gbɔwɔ ɓa, tɔn və mą, ə mą kɛa hee hulɔnu takpɛli pɔ, di hva kɛa kɛ mą, wɛlikɛnɛ̨ɛ̨nu.

⁴ Káá kpɛli mąn, ną́n nonnii, káá haa tɔ́n ma Kristə kpįnį hu, ə gɛ, ka kɛ a nu takpɛli nwɔɔ, a yai kulɔ haa yəi, əgɛ, guɔ pɛli ɓái, gu ɓá yɛ kɛ a Yálá nwɔɔ.

⁵ Ɓɛlɔwai gu kɛ la kɔ́lɔ yee kɔnmą, dɔ́n gala túwɔ́ɠaa lɔ ɓə gu kɛli mo; gu ɓá yɛ kɛ a haa nwɔɔ.

⁶ Kɛlaa yiihu kɛa, gwaa kulɔ dɔ́n mu. Mąąhɔlɔɓo, hɛn kɛi gu kɛ a haa ŋą hon, gwaa haa, gwaa kulɔ mu. Gwa pɛli kɛa gu gu wɔ yɛnɛ̨ɛ̨ pu nįnɛ̨ kɔlɔi, a tíi gwa mo Yálá ɓa, Kili-Mąąhəɠɛɛ hu, kɛlaa, hva kɛ kɛa yɛ dɔ́n nwooi a kala.

Dɔ́n mąą tíi

⁷ Yili mukulaa ɓaa a lə? Akɛti, tɔ́n gaa mɔ̨ɔ̨ a nɛ̨ŋɛ̨n? Kpaa-o, tɔ́n və a nɛ̨ŋɛ̨n. Kɛlaa, dɔ́n mə nɛ̨ŋɛ̨n nɛ mą́ą́. Yili ɓa, və́ kɛli pa ɲɛ̨i kulɔ bɔ kɔ́lɔn ɉii akɛ dɔ́n və kɛ diɛ: 'Hvó ɲɛ̨i kulɔ bɔ kɛ.

⁸ Dɔ́n nwɔ liɛwooi ti ɓə kɛa nɛ̨ŋɛ̨n ə ɉəɠə, yɛ ɲɛ̨i kulɔ bɔ tamąą lɔ la ɲéé pɔ. Mąąhɔlɔɓo, tɔ́n a wala kɛ laa, nɛ̨ŋɛ̨n kaa a bowa.

⁹ Tɔlɔɔ ti kɛ, dɔ́n və ni kɛ pa li; ŋį́ kɛ a vúlú. Kɛlaa, yii kɛa dɔ́n ə pa a liɛwoo, nɛ̨ŋɛ̨n aa mąn kɛ a vulú.

¹⁰ Ɲą́ą́n ŋą́ą́ haa: Liɛwoo ŋɛ̨i kɛ mąąnɛ̨ɛ̨ ə yɛnɛ̨ɛ̨ tɛɛ bɔ́, aa kɛ a báá hɛn.

¹¹ Mąąhɔlɔɓo, nɛ̨ŋɛ̨n aa tɛɛ tɔn ŋą liɛwoo hu, aa ɲą́ą́hɛn, yili pɔ pələ, haa aa həli mą́ą́.

¹² Yili ɓa, dɔ́n mąąhəɠɛɛi, bɔ liɛwoo mąąhəɠɛɛ, ɉaŋąą, nɛlɛɛ.

¹³ Akɛti, ɉɛn nɛlɛɛi ŋɛ̨i, aa kɛ a báá hɛn? Kpaa-o! Ya hvəə, nɛ̨ŋɛ̨n mə gɛ, gɛ́ kɛ a haa mun. Bələi kpɔ nɛ̨ŋɛ̨n nwɔ kɛ pələ kaa la, aa yili kulɔ ponoŋą. Ɉɛn kɛ nɛlɛɛ aa ɉəɠə aa gɛ a báá hɛn. Bələ ɓə nɛ̨ŋɛ̨n ə kɛ la a hɛn yii ɲɔ̨nwɔ̨ɔ̨ dɛɛ gɛi ɓa tɔ́n nwɔ liɛwoo pɔ.

Nɛŋɛ̨n aa hee nu mɛ̨i

¹⁴ Gu gɔlɔn gbɔ a tɛ̨ą guɔ diɛ: Tɔ́n gaa a nįį hu mɛ̨nį. Kɛlaa, ɲą́ą́ gáá nu kɔ́lɔ hu, daa nɔ́wɔtɔɔ yɛ luwɔ nɛ̨ŋɛ̨n ma.

¹⁵ Hvó gaai, mɛ̨nįɠaai ŋą́ kɛ gɛi, vá kɛ gbaɠala kaai gbɔ́ɔ́ yəi. Mąąhɔlɔɓo, yii ŋą́ kɛ bɔ ŋį́ gɛ, yili hvəə ŋą́ gɛ. Kɛlaa, yii nwɛli kpɛɛ mą́ą́ yili ɓə mun ŋą́ kɛ gɛi.

¹⁶ Yaan, akɛ yii və́ bɔ, ya ɓə ŋą́ kɛ gɛi, ŋį́ gɔlɔn gɛ́: Tɔ́n nɛlɛɛi.

¹⁷ Yili ɓa, ɲą́ą́ hvəə, ŋą́ kɛ dúwɔ́ ɲɔ̨nŋąą ti ɓoi, kɛlaa nɛ̨ŋɛ̨n ti aa ɉee kulɔ ɉú, ya ɓə gɛi.

¹⁸ Mąąhɔlɔɓo, ŋą́ gɔlɔn gwɔ́wɔ́ hu pələ, gɛ́ kɛ: Mɛ̨nį lɛlɛɛ kɛ kili hvo ɉú; mukulaa ɓaa: Yili hvo nwɔ́ nu kɔ́lɔ hu. Bələi mąn mɛ̨nį lɛlɛɛ kɛ kili kaa la ɲą́, gɛ huwalawala hvo ɲə́i.

¹⁹ Mąąhɔlɔɓo, mɛ̨nį lɛlɛɛ ŋą́ kɛ bɔ ŋį́ gɛ, yili hvəə ŋą́ gɛ, ɲɔ̨nwɔ̨ɔ̨ yii və́ bɔ, yili ɓə ŋą́ gɛ.

²⁰ Akɛ mɛ̨nįi və́ bɔ ya ɓə ŋą́ kɛ gɛi, ɲą́ą́ hvəə ŋą́ kɛ gɛi. Kɛlaa, nɛ̨ŋɛ̨n ti ɉú, ya ɓə yili kɛi.

²¹ Ŋą́ą́ mɛ̨nį ta kaa nwɔ́ kɛ pələ hu, ɓɛlɔwai mɛ̨nį lɛlɛɛ kɛ kili a too la ɲą́, mɛ̨nį ɲɔ̨n mə a tɛ ɲéé hu, gɛ́ gɛ.

²² Gbala ə tɔɔ, nwɔ́ nu kili hu pələ, ŋą́ nííɓa mɛ̨nį kaa Yálá nwɔ tɔ́n hu.

²³ Kɛlaa, ŋą́ą́ tɔ́n da kpɛli kaa gɔ́lɔi yɛ kɔ́ pɛlɛ nwɔ́ kiliŋąhiɛ lɛlɛɛ ɓa yɛ gɛ́ a nɛ̨ŋɛ̨n nwɔ luwɔ.

²⁴ Ee kə! Kpalo aa gáá-e! Gbɛɛ ɓə pai gúloi ɉaa kɔ́lɔi ŋɛ̨i hu?

²⁵ Mąąwiɛ ə kɛ Yálá ɓa gu Ną́mu Jesus Kristə laa hu, mąąhɔlɔɓo, Yálá ɓə a pɛli mą. Ŋɔ́ kiliŋąhiɛ lɛlɛɛ hu pələ, ŋą́ą́ kɛ kɛa a Yálá nwɔ tɔ́n nwɔ timun, kɛlaa, nwɔ́ nu hvii kpɛɛ laa hu, gáá a nɛ̨ŋɛ̨n nwɔ tɔ́n nwɔ timun.