Lomaŋ 4 - Yálá laawoo hɛɓɛ (dc)

Abrahamə nwɔ laa na laa

¹ Lə mɛ̨nį ɓə gwa pɛli moi gu kalaɓɔlɔ Abrahamə mąą mɛ̨nį hu? Lə mɛ̨nį ɓə ə ɉɔlɔɓo gɔlɔ ɓa pələ?

² Akɛ tələnmolaai Abrahamə ə ɉɔlɔɓo Yálá ɲɛ̨i ɓa, ə Ɉɔlɔɓo dúwɔ́ pələ hu, a pɛli mą kɛ ə gbɔwɔ ɲąą kɛnɛ̨. Kɛlaa, hva pɛli gbɔwɔ ɲąą kɛnɛ̨i Yálá ɲɛ̨i ɓa.

³ Lə mɛ̨nį ɓə Yálá lawoo hɛɓɛ́ kaa moi? Yɛ: Abrahamə ə laa Yálá la, yili ɓə gɛ a tələnmomun.

⁴ Nui a kólo kɛ, a vɛla hɔlɔɓo, vɛlai ti hvo a mɛ̨inɛ̨ɛ̨, yili kaa a nwɔ hvɛ̨nɛ̨yá hvɛla.

⁵ Kɛlaa yaamun, nɛ̨ŋɛ̨n ɉəɠəmun a laa nui a mɛ̨nį ɲɔ̨n gɛmun mąąhvaalɛɛ na, nwɔ laa na laa ti a gɛ a tələnmomun.

⁶ Bələ ɓə, nui Yálá ə dələnmo hvo kulɔ dúwɔ́ pələ hu, Davidə ə kɛli mąądɛnɛ̨ la yɛ kɛ mą:

⁷ «Nui daa ɉɔn mąąhvaalɛɛ, nwun na nɛ̨ɛ̨i ɓə, ɛlɛɛ, diɛ nwɔ nɛ̨ŋɛ̨n lɛɛ mą a kpɛli.

⁸ Nui Nąmu aa lɛ̨ą nwɔ nɛ̨ŋɛ̨nŋaa diɛ, nwun na nɛ̨ɛ̨ ɓə.»

⁹ Akɛti núwɔ́i ti kaa lɔ mɔ̨ɔ̨ a kɛnɛ̨ lɛa di wɔɔ? Hvo mɔ̨ɔ̨ a kɛnɛ̨ kpolɔwaɠaa di wɔɔ? Gu kɛ diɛ: «Abrahamə nwɔ laa na laa ɓə dələnmo.»

¹⁰ Kɛlaa, akɛti mįnɛ̨ lɔwai ɓə yili ə kɛ la? Ɓɛlɔwai ə kɛ la a kɛ́nɛ̨ kpolɔwa a wala kɛti kɛ́nɛ̨ lon? Kpaa! Yili hvo kɛ gɛ́nɛ kɛɛ pulu. Ə kɛ nwɔ kɛ́nɛ̨ kpolɔwa laa hu.

¹¹ Yili pulu ɓə di kɛnɛ̨ mɛ̨nį kɛ la, a nwɔ laa na laa kɔlɔn ɉɛn tələnmolaa hu, ɓɛlɔwai ə kɛ ni la a kɛnɛ̨ kpolowa. Yili ɓə gɛ a, laa na laa nuąi di hvo hee li kɛnɛ̨ ɓa, di kalaɓɔlɔ, əgɛ, di pɛli kɛi a tələnmo nuą.

¹² Abrahamə kaa lɔ nwɔ̨nɔ̨ a nuąi di kɛ́nɛ̨ kɛɛ di kalaɓɔlɔ diɛi di hva di kilitɔɔ lɔ kɛ́nɛ̨ mɛ̨nį ɓa, kɛlaa, laa na laai kɛ gu kalaɓɔlɔ Abrahamə yəi, di hvo ni kɛ ɉee li kɛ́nɛ ɓa, ya ɓə di hvilɛn ŋąą bulu.

¹³ Yili ɓa, dɔn nwoo pɔ yíí ɓoɔ hvəə gɛ, Yálá yɛ yɛnɛ̨ɛ̨ kəlee laakwɛlanmo la Abrahamə ɓa da ɉuwu, a gwɛlin, kɛlaa, nwɔ laa na laa dələnmolaa hu ɓə.

¹⁴ Akɛ dɔ́n bɔ yíi ɓoɔ ɓə gwa hɛn Yálá kwɛlin ɉɔlɔɓo la, laa na laa nwun vəli kɛ mą, ɛlɛɛ, mɛ̨nįi ə naakwɛlanmo a lɛɛ a kpɛli.

¹⁵ Mąąhɔlɔɓo lííholi a kulɔ dɔ́n ɉu. Ɓɛi tɔ́n və laa, mɛ̨nį kalaa hvo laa.

¹⁶ Yili ɓa, laa na laa háálai ɓə Yálá ə naakwɛlan mo la, ə gɛ, yili ə kɛ a Yálá nwɔ mɛ̨inɛ̨ɛ̨ yii dɔlɔ a kɛ mą Abrahamə huwu hu nuą kəlee diɛ, nuąi di kaa tɔ́n bɔ yíi ɓoi, diɛ tɔ̨nɔ̨ lɔ hvəə, kɛlaa, ə mą kɛ, nuąi laa na laa kaa di yəi, yɛ pələi Abrahamə ə kɛ la. Abrahamə ka a gu kəlee gu nąn.

¹⁷ Yɛ bələi bɛ̨ɛ̨ la Ɉɛɓɛ́ hu, yɛ mą: «Ŋą́ą́ ə́ kɛ a huwu tamąą di nąn.» Abrahamə kaa a gu nąn Yálá ti ə laa na ɲɛ̨i ɓa, Yai a haa nuą kɛ a di vulú, hɛn hvo yɛnɛ̨ɛ̨ yɛ gɛ laa.

¹⁸ Abrahamə ə laa Yálá la ə gilitɔɔ mą, mɛ̨nį kəlee hu, yili ɓə gɛ a nu huwu tamąą di nąn yɛ bələi di kɛ la mą. Ə́ lonnii kaa pai tamąi.

¹⁹ Abrahamə kaa kwɛlan ə kɛ a kwɛlan nwun dɔ̨nɔ̨, kɛlaa, nwɔ laa na laa hu hvo haa, bələi mąn bɔlɔɔ kɛ la, nɛ̨ą Sara yaa kpɛli bɔlɔɔ, lon gaai hvo kɛa kɛ mą.

²⁰ Mɛ̨nįi Yálá ə naakwɛlanmo Abrahamə ɓa, ɲįnɛ̨-ɲįnɛ̨n hvo kɛ nwɔ laa na laa hu, yaamun, nwɔ laa na laa ə vaŋąlɔ, yɛ Yálá tɛnɛ̨.

²¹ Gili ə kɛ kpɔ kɛ, yɛ kɛ mɛ̨nįi ə naakwɛlanmo mą, a pɛli bɔ mɛ̨nį kɛi.

²² Yili ɓə gɛ, a tələnmomun.

²³ Kɛlaa, yaa tɔ̨nɔ̨ lɔ hvəə ɉɛɓɛ́ ə kɛ mą: Tələnmomun.

²⁴ Nwoo ti ə ɓo guɔ kpɛli gu laa mɛ̨i, guɔi ŋɛ̨i gwaa laa Yálá la yai gu Ną́mu Jesus kulɔ haa yəi, ə gɛ, a vulú.

²⁵ Ya pa, gu wɔ mɔ̨nɔ̨ɠąąi ka tii ə ɉəɠə, ə haa, ə nwun gu mąąhəɠə mɛ̨nį ɓa.