Lomaŋ 14 - Yálá laawoo hɛɓɛ (dc)

Hvo nu ta laa ɓo

¹ Nuąi di hvii kpɛɛ laa na pələ mɛ̨i, ka ka yee hee di mu ka hvo di laa pələɓo.

² Nu taɠaa di wɔɔ laa na laa a gɛ, diɛ pɛli hɛn gəlee mįi, daɠaa di wɔɔ hvįikpɛɛlaa yɛ gɛ, pɛlɛ́n gɔ̨nɔ̨n nɔ ɓə a mįi.

³ Nui a hɛn gəlee mįi, mąą hvo nɛ̨ɛ̨li hvo vįikpɛɛmun viiɓo, vįikpɛɛmun yaan mąą hvo nɛ̨ɛ̨li hvo hɛn gəlee mįimun giti tee. Mąąhɔlɔɓo, Yálá a ɲee hee gəlee mu.

⁴ Gbɛɛ ɓaa a yɛ́, yai, nui hvo a yɛ́ tímun, yɛ́ giti tee? Ə tɔɔ-o, ə too-o; ə́ wɔɔ lə mɛ̨nį ɓə ɉu? Da Ną́mu di lɔwai li. Ɛlɛɛ, ɲee kaa pai lɔi, mąąhɔlɔɓo, hvaŋą kaa gu Nąmu yəi, yɛ dɛɛ bɔ.

⁵ Hvóló kəlee hvo nu taɠaa ɲɛ̨i ɓa tanɔ̨n, ə ɓo dakpɛliɠaa ɲɛ̨i ɓa tanɔ̨n. Hvo kɛ li nu kəlee kili la ə kɛ a deɛ nwɔ kiliŋąhiɛ hu.

⁶ Nui a yələ ta hviala ɓo, a gɛ ti yɛ gu Nąmu mąąwiɛ la. Nui a hɛn gəlee mįi, a gɛ tii, yɛ gu Nąmu mąąwiɛ la. Mąąhɔlɔɓo, a Yálá hɛɠɛɛɓo, gɔ̨nɔ̨n ti mąą mɛ̨nį ɓa. Nui hva hɛn gəlee mįi a gɛ ti, yɛ gu Nąmu mąąwiɛ la, yɛ Yálá hɛɠɛɛɓo.

⁷ A tɛ̨ą, nu ta hvo yɛnɛ̨ɛ̨ gbɔwɔ ɓa, nu ta hva nwɔ̨nɔ̨ haa gbɔwɔ ɓa.

⁸ Mąąhɔlɔɓo, gwa kɛ yɛnɛ̨ɛ̨, gu kaa gu Ną́mu yəi, gwa haa, gu haa gu Ną́mu mąą mɛ̨nį ɓa. Yili ɓa, gu kɛ yɛnɛ̨ɛ̨-o, gu haa-o, gu kaa a gu Ną́mu nwɔɔ.

⁹ Mąąhɔlɔɓo, Kristə kɛ mɛ̨nį a haa nuą, da yɛnɛ̨ɛ̨ nuą di Nąmu ɓə gɛ, yɛ haa la, yɛ pənə yɛ nwun.

¹⁰ Kɛlaa, yɛ́i ŋɛ̨i, lə mɛ̨nį ɓa, ə́ kaa ə́ ɓɛlan giti tee? Ɛlɛɛ, yɛ́n, lə mɛ̨nį ɓa, ə́ kaa ə́ ɓɛlan viiɓoi? Gu kəlee guɔ pa tínąą tɔɔi Yálá ŋą kitii lííla.

¹¹ Mąąhɔlɔɓo, bɛ̨ɛ̨i ɉɛɓɛ́ hu, gu Ną́mu yɛ: «Nu kəlee kaa pai pui gbəlin na, nííla, nɛ̨n gəlee yɛ Yálá mąąwiɛ pələ noloɓo.»

¹² Yili ɓa, nu kəlee a tinąą di kwɛlanmo Yálá ɓa.

Ka túwɔ́ pələ hvo nu ta lan

¹³ Ka gu kpəla gu kee ni la ɓoɔ ɓa. Kəlee yaamun, yii mąąnɛ̨ɛ̨ gu gu kiliŋąhiɛ mą ya ɓa: Mąą hvo nɛ̨ɛ̨li gu túwɔ́ pələ hvo nu ta həɠə Yálá pələ mɛ̨i.

¹⁴ Náái na, gíli la teɛ kpɔ gu Ną́mu Jesus laa hu gɛ́ diɛ: hɛn lɔpee ta hvo kɔ́hɔɓo li, kɛlaa, nui a gaa yɛ gɔhɔɓoɔi, yaa tɔ̨nɔ̨ lɔ ɓə kɔ́hɔ ɓoɔi ɲɛ̨i ɓa.

¹⁵ Kɔ̨nɔ̨n yá mįi ə kɛ a ə́ ɓɛlanmun nan ɉɛn, yá mįi, a kɛ tii, hvó hiɛi wɛlikɛmąąlaa hu. 'Gɛ a nɛlɛɛ, ə́ kɔ̨nɔ̨n və, nui Kristə ə haa mąą mɛ̨nį ɓa, nwun na pili.

¹⁶ Hɛn nɛlɛɛ ə́ ɲɛ̨i ɓa, mąą hvo nɛ̨ɛ̨li hvo kɛ ə́ ɓɛlan ɲɛ̨i ɓa a mɛ̨nį ɲɔ̨n.

¹⁷ Mąąhɔlɔɓo, Yálá-taa tɔɔlaa hvo a kɔ̨nɔ̨n da kpələ hɛn, bələi gaa la, bələ ka: gaa a, tələnmolaa, liilaa da kwəinɛ̨ɛ̨i Kili-Mąąhəɠɛɛ a dɛɛ gu pɔ.

¹⁸ Nui a kɛi tí kɛ tii Kristə ɓa, ya ɓə gaa a Yálá liiɓamun. Ɛlɛɛ, nuą da dɛ̨nɛ̨.

¹⁹ Yili ɓə gaa mą, ká gu liilaa hee pələ kwɛli gu kee lɔwai.

²⁰ Hvo Yálá ŋą kólói kala a kɔ̨nɔ̨n mɛ̨nį. Gəlee mąąhəɠɛɛi tɛ̨ą li, kɛlaa, kɔ̨nɔ̨n yá mįi yɛ ə́ ɓɛlan nwɔ kiliŋąhiɛ həɠə Yálá kɔ́lɔn bələ ɓa, yili ɓə ɲɔ̨nwɔ̨ɔ̨.

²¹ Yii nɛlɛɛ ya ɓaa: Nu hvó huwɔ mįi, hvo lɔɔ kpɛlɛ, ɛlɛɛ, da hɛn nɔpee a nu həɠə Yálá pələ mɛ̨i.

²² Mɛ̨nį kɔlɔnŋąąi ə́ ɉɔlɔɓo laa na laa hu, yii lɛɛ ə́ kwəi ka Yálá ka lɔwai. Nui kiliŋąhiɛ pələ hva ɉɔn gaa mą, mąą nu nwun na nɛ̨ɛ̨i.

²³ Kɛlaa, nu a kɛi kɔ̨nɔ̨n mįi, ɲinɛ̨-ɲinɛ̨n ə ɓo ɉu, hɔnmąąmun ni, mąąhɔlɔɓo, hvo gɛi a ə́ kwəi kwɛlɛɛ laa na laa hu. Yaan, mɛ̨nįi hvó gɛi a ə́ kwəi kwɛlɛɛ laa na la hu, nɛ̨ŋɛ̨n ni.