Lomaŋ 10 - Yálá laawoo hɛɓɛ (dc)Ɉuifə da huwu takpɛli di Nąmu kaa tanɔ̨n 1 Nąn nonnii, yii gáá bɔ, gɛ́ vɛli Yálá ɓa di mąą mɛ̨nį ɓa, ya ɓaa: Di kəlee di nwun mąą ə ɓo. 2 Mąąhɔlɔɓo, ŋą́ pɛli ŋą́ mąą kɛla hvaaɓo gɛ́ diɛ: Yálá mɛ̨nį kɛ kwəinɛ̨ɛ̨ kaa di hu; kɛlaa, di wɔ kwəinɛ̨ɛ̨i ti, mɛ̨nį kɔ́lɔn ŋąą, hvo ɉu pono li di yəi. 3 Dələnmolaai a həɠə Yálá pɔ gɔlɔn di hvo mo li, ɛlɛɛ, diɛ kpinįi diɛ di wɛi kwɛli, yili ɓə gɛ di hvo lɛɛ la Yálá nwɔ tələnmolaai mu. 4 Mąąhɔlɔɓo, Kristə ɓə a dɔ́n gbɛlai, əgɛ, nuąi da laa na, di tələnmolaa hɔlɔɓo. Nui a laa Ną́mu Jesus la nwun mąą a ɓo 5 Dələnmolaai a kulɔ tɔn ɉu, Moisə kpinįi ə bɛ̨ɛ̨, yɛ mą: Nui a pɔ mɛ̨nį kɛ, nwun mąą a ɓo. 6 Kɛlaa, tələnmolaai a kulɔ laa na hu, nwoo ka: 'Hvó kɛ mą ə́ kwəi pələ, gbɛɛ ɓə pai tɛi yələi? Gaa yɛ yá kɛli kɛ ə́ Kristə kulɔ yələi ə́ ɲɛɛ. 7 'Hvó kɛ diɛ nwɔ̨nɔ̨: «Gbɛɛ ɓə pai yɛɛi ŋąmuątaa?» Gaa yɛ yá kɛli Kristə kulɔ haaɓɛlaa lɔwai. 8 Akɛti, lə mɛ̨nį ɓə moɔ kani? Nwoo tii yɛ: «Nwoo tii kaa kpɔlɔɔ ə́ kwɛlɛ, gaa ə́ laaləi, ə ɓo ə́ lii pɔ.» Ya ɓaa: Laa na laai gu kaa naa həli. 9 Akɛ yá mo ə́ laaləi yɛ diɛ: Jesus kaa a ə́ Nąmu, ə́ laa na ə́ lii hu, yɛ diɛ: Yálá ə nwun gulɔ haa ɓɛlaa lɔwai, ə́ nwun mąą a ɓo. 10 Mąąhɔlɔɓo, nu a laa na nii hu, a kɛ a tələnmomun, ɛlɛɛ, yɛ́ mo a ə́ laaləi ə́ nwun mąą a ɓo. 11 Hvó gaai, Yálá lawoo hɛɓɛ́ yɛ diɛ: «Nui lɔpee a laa ná hva nwumɛ̨.» 12 Yili ɓa, ɓɛlaɓo hvo Ɉuifəɠaa da huwu takpɛliɠaa di lɔwai. Di kəlee di Nąmu kaa tanɔ̨n, nui a nwoo tɛ bɔ pələ, a mɛ̨inɛ̨ɛ̨ kɛ mąą nu ɓa. 13 Yaan, yɛ pələi Yálá lawoo hɛɓɛ́ ə mo la, yɛ diɛ: «Nui lɔpee a Ną́mu təli, a nwun mąąɓo.» 14 Akɛ tii, da pɛli di woo tɛ pələ kɛi ləi bɔ pələ, akɛ di hvo laa li na? Da pɛli laai ləi na, akɛ, di hvo naa woo mɛ̨n ni? Da pɛli di mąą mɛ̨nį mɛ̨n nəi, akɛ, nu ta hvo naa həli li diɛ? 15 Nu ta a pɛli naa həlii ləi, akɛ, di hvo dɔɔ li? Yɛ bələi Yálá lawoo hɛɓɛ́ ə mo la, yɛ diɛ: «Nuąi nwɛlɛɛ lɛlɛɛ laa həli, di kɔ́wɔ lɛlɛɛi di mu.» 16 Kɛlaa, nu kəlee hvo ɲee heeli nwɛlɛɛ lɛlɛɛ mu. Esai ə mo nwɔ̨nɔ̨ yɛ diɛ: «Námu, nwɛlɛɛ lɛlɛɛi ku naa həlii, gbɛɛ ɓə laai na?» 17 Nwɛlɛɛ lɛlɛɛ mɛ̨n ŋąą ɓə laa na laa a kulɔ ɉu, nwɛlɛɛ lɛlɛɛ ɓaa: Kristə mąą mɛ̨nį laa həliɛ. 18 Akɛti nuąi di hvo laa na, di hvo mɔ̨ɔ̨ nwɛlɛɛ lɛlɛɛi ti mɛ̨n? Kɛlaa di mɛ̨n gbɔ! Yɛ bələi Yálá lawoo hɛɓɛ́ kaa moi la yɛ diɛ: Di woo ə həli yɛnɛ̨ɛ̨ nąą kəlee, di wɔ kalan gɛ woo ə həli lɔi kpɛlai. 19 Akɛti Israɛlə lonni di hvo mɔ̨ɔ̨ gbaɠala kaa? Yá pa Moisə ə kpɔ diɛ: «Gáá pai tóló lɔi ka hu huwu takpɛliɠaa mąą mɛ̨nį ɓa, ŋą́ ka wɔ lii kələn gwəi hu kɛnɛ̨ huwu takpɛliɠaa mąą mɛ̨nį ɓa, diɛi kili hvo diɛ.» 20 Esai ə mo kpɔ yɛ diɛ: «Yálá yɛi: ‹Nuąi di hvo kɛi gwɛ́li, daa gáá, nuąi di hvo mą́ą́nįn gɛ li, ŋą́ą́ gbɔ́ɔ́ lɛ diɛ.›» 21 Kɛlaa, yii hvilɛn na Israɛlə lonnii diɛ: «Yálá yɛ: ‹Yələ kəlee, nuąi kɛ di kwɛli təɛ, diɛ kulɔ nwóó mu, diɛ ɓə ɲee haŋąa kɛ di pɔ pələ.›» |