Levetekɔ 9 - Yálá laawoo hɛɓɛ (dc)

Aarɔn da nonnii di di wɔ kólói kpala tɔɔ

¹ Voló mɛ̨ihaaɓa yələ, Moisə ə Aarɔn da nonnii di təli, da Israɛlə kalanɉonŋąą;

² Yɛ Aarɔn ɓa: «Nįŋɛ̨ lon gwɛli, nɛ̨ŋɛ̨n ɉaláá mɛ̨nį ɓa, da ɓɛlaa hilɛ tɔ̨nɔ̨ haláá yii da gəlee kələn mąą mɛ̨nį ɓa, kpɛɠii hvo kɛ veelɛi tii ta ɓa. Ə́ di laa həli Yai-Laa ɓa.

³ Yili pulu, ə́ nwooɠaai ŋɛ̨i ɓo Israɛlə lonnii diɛ, yɛ́ diɛ: Ka ɓolu hilɛ həɠə nɛ̨ŋɛ̨n ɉaláá kulɔ mɛ̨nį ɓa; ka kwɛlan dɔ̨nɔ̨ ɓɛlaa lon da kwɛlan dɔ̨nɔ̨ nįŋɛ̨ lon di həɠə, kpɛɠii hvo kɛ di ta lɔpee ɓa, haláá yii da gəlee kələn mąą mɛ̨nį ɓa.

⁴ Ɛlɛɛ, nįŋɛ̨ hilɛ da ɓɛlaa hilɛ, liilaa haláá kulɔ mɛ̨nį ɓa Yai-Laa ɓa. Yili pulu, ə́ Yálá kɔ́ lɛɠɛ pɛli a wulɔ, mąąhɔlɔɓo, háákələi ɓə Yai-Laa kaa pai gbɔwɔ lɛi la kaa.»

⁵ Ɉɛnŋąąi tii Moisə ə di hvaaɓo, di pa a diɛ gee kaa kələ laaləi, yili pulu, nuą kəlee di lɛɠɛ laa, di tɔɔ Yai-Laa lííla.

⁶ Moisə yɛ diɛ: «Mɛ̨nįi Yai-Laa yɛ ka gɛ, Yai-Laa yɛ pɛli nwɔ mąąwiɛ lɛi la kaa yaa li.»

⁷ Ya ɓə Moisə a kɛ Aarɔn ɓa: «Ə́ mąą lɛɠɛ ɉaláá kulɔi ɓa, nɛ̨ŋɛ̨n ə́ ɉəɠə ə́ mąąhvaalɛɛ haláá kulɔ, da haláá hɛn da gəlee kələn, ə́ kpɔwɔ mąą mɛ̨nį ɓa, ká ə́ wɔ pɛ́lɛ́i. Yili pulu, ə́ nuą di wɔ Yálá kɔ́ hɛn laa həli, yɛ nu mąą hvaalɛɛ haláá kóló kɛ di mąą mɛ̨nį ɓa, yɛ bələi Yai-Laa ə mo la.»

⁸ Aarɔn ə lɛɠɛ ɉaláá kulɔ kəhi ɓa, ə nɛ̨ŋɛ̨n mąąhvaalɛɛ haláá nįŋɛ̨ lon baa, gbɔwɔ kɛ nɛ̨ŋɛ̨n mąą mɛ̨nį ɓa.

⁹ Aarɔn lonnii di ɲąmą tɛɛ bɔ, ə ɲeekpiɛ lɔ ɉu, ə ɉiɛ ɉaláá tabali mįnɛ̨ɠaa diɛ, ə gbəli pu ɉaláá kulɔ kəhi kɔ́wɔ mu.

¹⁰ Nɛŋɛ̨n mąąhvaalɛɛ haláá huwɔi tii, nwulɔ, gwəi kwɛni kɔ́w hveeelɛi da ɲɛlɛ hunwɔ̨la, ə di kələn ɉaláá kulɔ kəhi mɛ̨i yɛ bələi di Moisə tí la.

¹¹ Ɉuwɔ leelee da gɔlɔ, ə́ di kələn ɉįi, pulu pələ.

¹² Aarɔn ə ɉaláá taatɛlɛɛ yii da gələn nwun dee, nonnii di ɲąmą tɛɛ bɔ, ə da taɠa ɉaláá kulɔ kəhi koo ɓa.

¹³ Di ɉaláá huwɔ kpuwuluɠaa tɛɛ bɔ, ə mą kɛ, nwun ganin, ə di kələn ɉaláá kulɔ kəhi mɛ̨i.

¹⁴ Ə gboyɛli da gɔwɔ kwąnąɠaa waa, ə di kələn ɉaláá kulɔ kəhi mɛ̨i, a haláái da gəlee kələn.

¹⁵ Ə nuą di wɔ Yálá kɔ́ hɛnŋąą laa həli Yai-Laa ɓa. Ə nuą di wɔ nɛ̨ŋɛ̨n mąąhvaalɛɛ haláá ɓolu hilɛ həɠə, ə nwun dee, ə naa həli yɛ bələi ə gɛ la a ɉaláá taatɛlɛɛ dɔlɔɔɠaa.

¹⁶ Ə ɉaláá yii da gələn nwɔ taatɛlɛɛ tɔɔ, ə naa həli a naa həli pələ.

¹⁷ Ə ɉaláá yii da gələn naa həli, ə da həɠə ɲee hvɛɛ, ə gələn ɉaláá kulɔi, bɛlɛɛ yələ wala pɔ haláá hɛn ma.

¹⁸ Nįŋɛ̨ hilɛi da mɛlaa hilɛi nuą di paa la a líílaa haláá, ə di nwun dee, nonnii di ɲąmą tɛɛ bɔ, ə daɠa ɉaláá kulɔ kəhi kwɛlɛ nąą kəlee.

¹⁹ Nįŋɛ̨ hilɛ da mɛlaa hilɛ wulɔɠaa, nwon, da nwulɔi tii gboyɛli ɓa, gwəi kwɛni kɔ́w ɓa, da ɲɛlɛ ɓa,

²⁰ di di pɛlɛ gəŋə bələ tɔ̨nɔ̨ ɓa, di di kələn ɉaláá kulɔi.

²¹ Aarɔn ə gəŋə hveelɛi da mamįiyee wəla həɠə ə nɛ Yai-Laa ɓa a naa həli pələ yɛ bələi Moisə ə mo la.

²² Aarɔn ə ɲee haŋą nuą mɛ̨i, ə lúwɔ́ too nuą diɛ, ə yɛɛ. Aa kɛ ɲee laa kulɔ a nɛ̨ŋɛ̨n mąąhvaalɛɛ haláá kulaa da ɉaláá yii da gəlee kələn da liilaa haláá.

²³ Moisə da Aarɔn di lɔ gee kaa kələ mu, yili pulu di kulɔ lúwɔ́ too mɛ̨nį ɓa nuą diɛ, nąąlɔwai ɓə Yai-Laa nwɔ mąąwiɛ ə kulɔ la pɔ̨nɔ̨ ŋą nuą ɲɛ̨i ɓa.

²⁴ Nwɔ̨n da ə kulɔ Yai-Laa lííla, ɉaláá hɛnŋąąi kɛ ɉaláá kulɔ kəhi mɛ̨i da ɉuwɔ wulɔɠaa, ə di kələn. Nuą kəlee di nąą kaa, di tómą a kwəinɛ̨ɛ̨, di pɛlɛ di liiɓa nɔi ɓa.