Levetekɔ 8 - Yálá laawoo hɛɓɛ (dc)

Ɉaláá laa həli nuą tɔlɔɔɠaa hee mɛ̨nį Aarɔn da nonnii di laakwɛlanmo mɛ̨nį Yálá nwɔ kólói ɓa

¹ Yai-Laa yɛ Moisə ɓa:

² «Aarɔn həɠə da nonnii, ə́ ɉəɠəɠaa da nwulɔ mąąhəɠɛɛ həɠə, ə́ nɛ̨ŋɛ̨n ɉaláá nįŋɛ̨ hilɛ lon da mɛlaa hilɛ hveelɛi həɠə, ɛlɛɛ, ə́ gbɔlɔi tii nɛɠɛi hvo tɛ li gaa ɉu, ə́ ɉəɠə.

³ Ə́ nuą kəlee ɲąąkpɔn gee kaa kələ laaləi.»

⁴ Moisə ə gɛ yɛ bələi Yai-Laa ə mo la, nuą kəlee di di ɲąąkpɔn gee kaa kələ laaləi,

⁵ Moisə yɛ nu kpulu ɓa: «Mɛ̨nį Yai-Laa ə mo yɛ gu gɛ yá ka.»

⁶ Moisə ə Aarɔn tɔɔ da nonnii, ə di waa a ya.

⁷ Ə ɉəɠə mu həɠə too Aarɔn kwąną, ə ɉąą yili kɔ́lɔ yili nəŋəi, ə ɉəɠə kwɛa too gwąną, ə gilɛn ɉəɠə too gwąną, ə gilɛn ɉəɠə mɛ̨i həɠə ɓɛla kɛ mą, ə gbulɔn galan bulu.

⁸ Ə ɉəɠə mɛ̨i yiɓɛ kɛ mą, ə Yálá mąąni kɛ kpɛ̨ɛ̨ gɔw too ɉu.

⁹ Ə mɔlɔ lɔ nwuɔ̨, ə nwulu powa mąą nįnįn tii a ɉɛni, ə ɉee mɔlɔ ɓa dɔwɔ pələ. Bələ ɓə da gɔlɔn na, diɛ kɛ gaa a Yálá nwɔ nu mąąhəɠɛɛ, yɛ bələi Yai-Laa ə Moisə tí la.

¹⁰ Moisə ə nwulɔ mąąhəɠɛɛ həɠə, ə da hiɛ bɛlɛ́ ɓa, da mu hɛnŋąą kəlee, yɛ di laakwɛlanmo la tii Yálá ɓa.

¹¹ Ə da taɠa ɉaláá kulɔi ɓa gee hu mɛ̨ihveelɛ, ə da lɔ ɉaláá kulɔi ɓa, da gwɛlɛ hɛnŋąą kəlee, da ɲa pu hɛn, da ɉɛn tii ɉeɛ mɛ̨i, yɛ yili kɛ tii a Yálá nwɔ kóló kɛ hɛnŋąą.

¹² Ə nwulɔ mąąhəɠɛɛ tii ta pu Aarɔn nwuɔ̨, ə da lɔ mą, yɛ naakwɛlanmo la Yai-Laa ɓa.

¹³ Moisə ə Aarɔn lonnii tɔɔ, ə ɉəɠəɠaa too di kwąną, ə ɉąą yili kɔ́lɔ yili di ləŋəi, ə mɔlɔɠaa lɔ di nwuɔ̨; yɛ bələi Yai-Laa ə dí la.

¹⁴ Ə mo di pa a nɛ̨ŋɛ̨n mąą hvaalɛɛ haláá kulɔ nįŋɛ̨ gbɔn, Aarɔn da nonnii di di yee laa nįŋɛ̨ gbɔn tii mɛ̨i.

¹⁵ Moisə ə nwun dee, ə ɲąmą həɠə, ə da lɔ ɉaláá kulɔi ɓa a ɲeekpiɛ,

¹⁶ ɉuwɔ wulɔi tii kɛ ɲɛlɛ mɛ̨i, da gboyɛli ɓa, bɛlɛɛ gwəi kwɛni kɔ́w hveelɛi ɓa, ə di kələn ɉaláá kulɔi.

¹⁷ Nįŋɛ̨ kɔ́lɔ, ɉuwɔ da gbo, di di kələn daa pulu, yɛ bələi Yai-Laa ə Moisə tí la.

¹⁸ Ə pa a ɉaláá ɓɛlaa hilɛ yii da gəlee kələn, Aarɔn da nonnii di di yee pɛlɛ nwuɔ̨,

¹⁹ Moisə ə nwun dee, ə ɲąmą taɠa ɉaláá kulɔi goo ɓa nąą kəlee.

²⁰ Moisə ə ɉuwɔ tee a gbuwuɠaa, ə nwulɔ da ɉuwɔ kpuwuɠaa da nwulɔ di kələn.

²¹ Moisə ə gboyɛli da gɔwɔ kwąnąɠaa waa, ə gəlee kələn ɉaláá kulɔi. Haláá hɛn, yii da gələn, mąą kun nɛ̨ɛ̨ yɛ niilaa yaa li. Gaa a haláá kɔ̨nɔ̨n da gələn a Yai-Laa nwɔɔ, yɛ bələi Yai-Laa ə Moisə tí la.

²² Ə mo di pa a mɛlaa hilɛ veelɛ nąą, a ɉaláá kulɔ nuą hee ɓɛlaa hilɛ. Aarɔn da nonnii di di yee pɛlɛ nwuɔ̨.

²³ Moisə ə nwun dee, ə ɲąmą həɠə, ə da hiɛ Aarɔn ɓa-mįi-yee wəli ɓa, ə mą kɛ mamįiyee kpiɛɉinɛ̨ ɓa, da mamįiyee kɔ́wɔ kpiɛɉinɛ̨ ɓa.

²⁴ Moisə ə Aarɔn lonnii tɔɔ, ə ɲąmą ta lɔ di ɓa-mįi-yee wəliɠaa diɛ, da di ɓa-mįi-yee kɔ́wɔ kpiɛɉinɛ̨ɠaa. Yili pulu, Moisə ə ɲąmą taɠa ɉaláá kulɔi ɓa.

²⁵ Ə ɉuwɔ wulɔɠaa həɠə, da nwon da nwulɔi tii kɛ gboyɛli mɛ̨i, ɲɛlɛ, gwəi kwɛni kɔ́w hveelɛi da di wulɔ, da mamįiyee wɛla;

²⁶ Gbɔlɔi tii kɛ Yai-Laa lííla, nɛɠɛi hvo tɛ li ə ɓo ɉu, nwɔ̨mįi hvo tɛ li ə dɔ̨nɔ̨ həɠə ɉu, nwɔ̨mįi di bɛli a nwulɔ dɔ̨nɔ̨, nɛɠɛ tɔ̨nɔ̨, ə di laa ɉuwɔ wulɔɠaa da mamįiyee wɛla mɛ̨i.

²⁷ Ə gəlee laa Aarɔn da nonnii di yee ŋą, ə mo di naa həli Yai-Laa ɓa a naa həli pələ.

²⁸ Moisə ə pənə ə ɉəɠə di yəi, ə gələn ɉaláá kulɔi, ə mą kɛ ɉaláá da gələn. Haláá laa həli mun ɉee hala li, yii mąą kun nɛ̨ɛ̨ yɛ Yai-Laa liilaa. Yili kaa a haláá yii da gələn.

²⁹ Moisə ə ɉuwɔ kəŋə həɠə, ə naa həli Yai-Laa ɓa a naa həli pələ. Ɉaláá kulɔ nuą hee haláá ɓɛlaa hilɛi tii hu, Moisə nwɛi nąą li, yɛ bələi Yai-Laa ə Moisə tí la.

³⁰ Moisə ə nwulɔ mąąhəɠɛɛ ta həɠə, da ɲąmąi tii ɉaláá kulɔi, ə da taɠa Aarɔn ɓa da mąą həɠə, ə gɛ lɔ tii a nonnii diɛ kpɛli; bələ ɓə di Aarɔn da nonnii, da di mąą həɠəɠaa laakwɛlanmo la Yálá nwɔ kólói ɓa.

³¹ Moisə yɛ Aarɔn da nonnii diɛ: «Ka mɛlaa yii tii ɉuwɔ yili gee kaa kələ laaləi, nąą ɓə ka mįi laa, da ɉaláá laa həli nuą hee lɛɠɛi gaa gbɔlɔ hu. Yɛ bələi ŋą́ ə́ tí la, gɛ́ yɛ́: Aarɔn da nonnii ɓə da mįi.

³² Akɛ ɉuwɔ da nɛɠɛ kpəli ta a lɛɛ, yá gəlee kələn.

³³ Hvóló mɛ̨ihveelɛ yee mu, ka hvo həɠə gee kaa kələ laaləi, ə lɛɛ ɉu, di kpɛɛ a ka heɛ; mąąhɔlɔɓo, ka hee mɛ̨nį, da góló kɛ hvóló mɛ̨ihveelɛ yee mu, yɛ bələi di gɛ la háákələi.

³⁴ Bələ ɓə Yai-Laa ə mo la, yɛ di gɛ tii ka mɛ̨i.

³⁵ Ka káá pai lɛɛi gee kaa kələ laaləi hvóló mɛ̨ihveelɛ yee mu, hvóló da kpinį, yili pulu, ka pɛli kɛa Yai-Laa nwɔ kólói kɛi. Mɛ̨nįɠaa da kɛ tii, ka hvo kɛa pai haai, bələ ɓə di dí la.»

³⁶ Aarɔn da nonnii di Dɔ́n nwooɠaai tii kəlee hon, yii Yai-Laa ə mo Moisə ɓa, yɛ naa di nwuɔ̨.