Levetekɔ 7 - Yálá laawoo hɛɓɛ (dc)

Nu pɔɔŋą pɛli Haláá

¹ «Nu pɔɔŋą pɛli Haláá kulɔ pələ ka: Ɉaláá yili kaa a hɛn mąąhəɠɛɛ.

² Haláá taatɛlɛɛi da gələn, ɓɛi da nwun dee laa, nąą ɓə da nu pɔɔŋą pɛli haláá taatɛlɛɛ nwun dee laa, yili pulu, ɉaláá laa həli mun ə ɲąmą ta taɠa ɉaláá kulɔi koo ɓa nąą kəlee.

³ Yili pulu, ə ɉuwɔ wulɔ kɛɛnąąɠaa laa həli Yai-Laa ɓa, diɛ ɓaa: Nwulɔ yii gaa gboyɛli ɓa, da nwon,

⁴ gwəi kwəni kɔ́w hveelɛi da nwulɔi a kɛ mą, da ɲɛlɛ hunwɔ̨la, da gulɔ di bɛlɛ gwəi kwɛni kɔ́w hveelɛi ɓa.

⁵ Ɉaláá laa həli mun a di kələn ɉaláá kulɔi, yili kaa a nu pɔɔŋą pɛli haláá hɛn da gələn a Yai-Laa nwɔɔ.

⁶ Hinąą yiiɠaai di kaa ɉaláá kulɔ nuą yəi bɛlɛ́n, da pɛli di ɉuwɔi tii ta mį́i; da mįi kɛɛnąą mąąhəɠɛɛ ɓa. Yili kaa a hɛn mąąhəɠɛɛ kpɔ kpąą.

⁷ Nu pɔɔŋą pɛli haláá kulɔ pələ kaa lɔ yɛ nɛ̨ŋɛ̨n mąąhvaalɛɛ haláá kulɔ pələ. Daatɛlɛɛi da gulɔ a ɉaláá, ɉaláá laa həli mun tii nɛ̨ŋɛ̨n mąąhvaalɛɛ haláá laa həli, nwɔɔ ɓaa ɉuwɔ.

Yii gaa a haláá laa həli mun nwɔɔ

⁸ «Haláá hɛn yii da gəlee kələn, nu ta a kɛ gaa da kulɔi, ɉuwɔi tii gɔlɔ a kɛ a ɉaláá laa həli mun tii góló kɛ nwɔɔ.

⁹ Haláá hɛn lɔpee da mɔ̨n, da yii da ɲili ə mą kɛ yii da ɲələn kwɛa ɓa; ɉaláá hɛn tii kaa a nui a ɉaláá laa həli nwɔɔ.

¹⁰ Haláá hɛn lɔpee da ɲɔwɔn wulɔ hu, a wala kɛ tii ə kɛ a gbala, yili kaa a Aarɔn lonnii di wɔɔ.

Liilaa Haláá

¹¹ «Liilaa Haláái da naa həli Yai-Laa ɓa, gulɔ pələ ka:

¹² Akɛ da bɛlɛ Yálá hɛɠɛɛɓo taatɛlɛɛ ɓa, ɉɛn mąąnɛ̨ɛ̨ di paa la a ɉɛɠɛɛɓo kɛ hɛn, ya ɓaa: nwɔmįi dɛ hɛn və ɉu, bɛliɛ a wulɔ. Lɛɠɛi dɛ hɛn və ɉu wulɔ puɔ mą, da nwɔmįi ɓɛla ɲąą kɛnɛ̨ ɲɔwɔnŋąą a wulɔ, dɛ hɛn və kɛ ɉu.

¹³ Mąąnɛ̨ɛ̨ di pa a lɛɠɛ tɛɛ, a Yálá kɔ́ hɛn, di bɛlɛ Yálá hɛɠɛɛɓo nwɔmįi ɓa.

¹⁴ Dá nwɔmįi tɛitɛi laa həli a ɉuwu tɛitɛi, di yili həɠə ɉu a Yai-Laa nwɔɔ; ɛlɛɛ ɉaláá laa həli mun tii níílaa taatɛlɛɛ ɲąmą taɠa ɉaláá kulɔi ɓai, nwɔɔ li.

¹⁵ Niilaa Haláá tii a Yálá hɛɠɛɛɓo Haláá, mąąnɛ̨ɛ̨ di ɉaláá taatɛlɛɛi tii ɉuwɔ mįi a ɲələi da naa həli la, da hvo lɛɛ yələ hvo ɓɔ mą.

¹⁶ «Nui a naa gwəi, yɛ gaa Yálá kɔ́i a taatɛlɛɛ ta, da ɉaláá huwɔi tii mįi a ɲələi da naa həli la, gbəli a lɛɛ, da pɛli di mįi a bulu ɓa yələ laa ɓɔɔ.

¹⁷ Kɛlaa, ɉuwɔ ta a lɛɛ volo ɉaaɓa nąą yɛ ɉəli, mąąnɛ̨ɛ̨ di gələn.

¹⁸ Mąąhɔlɔɓo, da liilaa haláá ɉuwɔ ta mį́i a voló ɉaaɓa nąą, nui ɉaláá laa həli, ɉaláá hva pɛli Yálá lii hon ɉii. Ɉaláá a lɛɛ a kpɛli, huwɔ kalaa li. Nui lɔpee a da mįi, aa nɛ̨ŋɛ̨n ɉəɠə.

¹⁹ Yili pulu, huwɔi lɔpee a tunwɔ̨n mąąliɓi hɛn da ɓa, mąą hvo nɛ̨ɛ̨li di hvo mį́i, da gələn. «Nui lɔi tɔ́n və mą a pɛli haláá huwɔ mįi.

²⁰ Kɛlaa, nui lɔi tɔ́n gaa mą, haláá yii daa naa həli Yai-Laa ɓa, a da mįi, mąąnɛ̨ɛ̨ di gulɔ ɲəi bɛlɛ́n nuą lɔwai.

²¹ Nui lɔpee a tunwɔ̨n tɔ́n ɉɛn da ɓa, ə kɛ a taatɛlɛɛ, ə kɛ a nu kan, ə kɛ a huwɔi lɔpee, tɔ́n gaa mą mąąliɓiɛi. Hɛn da naa həli Yai-Laa ɓa, a da mįi, mąąnɛ̨ɛ̨ di mąą nu kulɔ ɲəi bɛlɛ́n nuą lɔwai.»

Yii hvilɛn nɔi lonnii diɛ

²² Yai-Laa yɛ Moisə ɓa:

²³ «Mo Israɛlə lonnii diɛ yɛ́ diɛ: Taatɛlɛɛ wulɔi lɔpee, ə kɛ a nįŋɛ̨, ə kɛ a ɓɛlaa wulɔ, ə kɛ a ɓolu wulɔ; ka hva da mįi.

²⁴ Huwɔi aa haa gbɔwɔ ɓa, yii lɔwɔ huwɔ aa wolo mą, ka pɛli kólói lɔpee gəlee kɛi a di wulɔ, kɛlaa, ka hva di mįi.

²⁵ Nui lɔpee a taatɛlɛɛ ta laa həli Yai-Laa ɓa a haláá, ɛlɛɛ yɛ nwulɔ ta mį́i, mąąnɛ̨ɛ̨ di mąą nu kulɔ nɔi lonnii lɔwai, mąąhɔlɔɓo, aa ɉuwɔi tii ta mį́i.

²⁶ Ɓɛi lɔpee ka kɛ laa, ka hvo ɲąmą mįi, ə kɛ a nwɛ̨ni ɲąmą, ə mą kɛ a huwɔ huwui lɔpee takpɛli ɲąmą.

²⁷ Nui lɔpee a ɲąmą huwui lɔpee ta mį́i, mąąnɛ̨ɛ̨ di gulɔ nɔi lonnii lɔwai.»

²⁸ Yai-Laa yɛ Moisə ɓa:

²⁹ «Mo Israɛlə lonnii diɛ, yɛ́ diɛ: Nui liilaa haláá laa həlii Yai-Laa ɓa, mąąnɛ̨ɛ̨ ə Yai-Laa nwɛi kulɔ ɉu ə paa la.

³⁰ Yaa kpinįi ə pa a ɉaláá kɔ̨nɔ̨n, a Yai-Laa nwɔɔ. Ya ɓaa ɉuwɔ wulɔɠaai a pa a diɛ, ə bɛlɛ gəŋə ɓa; yɛ naa həli, yɛ bələi da naa həli la Yai-Laa ɓa.

³¹ Ɉaláá laa həli mun a ɉuwɔ wulɔɠaai tii kələn ɉaláá kulɔi, gəŋə nwɛi, Aarɔn da nonnii di wɔɔ li.

³² Ɛlɛɛ, mamįiyee wəla ə tɛɛ ɉaláá laa həli mun bɔ, yii ka ɉəɠə liilaa Haláá hu a Yai-Laa nwɛi, yaa ka tii.

³³ Mamįiyee wəlai tii kaa a Aarɔn lon niilaa haláá laa həli, nwɔɔ.

³⁴ Mąąhɔlɔɓo, gəŋəi tii di naa həlii, da ɉuwɔ wəlai tii di ɉəɠə ɉu, ŋą́ di hon Israɛlə lonnii yəi, da kɛi liilaa haláá kulɔ, gɛ́ di tɛɛ Aarɔn da nonnii di pɔ. Yili ɓə mąąnɛ̨ɛ̨ Israɛlə lonnii diɛ dɛɛ di pɔ a yələ kəlee.

³⁵ Aarɔn da nonnii di wɛi ka tii Yai-Laa nwɔ haláá kɔ̨nɔ̨nŋąąi hu, ə həɠə kpɔ ɲələi da di tɔɔ la Yai-Laa nwɔ kólói ɓa, ɉaláá kulɔ mɛ̨nį ɓa.

³⁶ Yili ɓə Yai-Laa ə naa Israɛlə lonnii nwuɔ̨, yɛ kɛ di dɛɛ Aarɔn da nonnii di pɔ, ə həɠə kpɔ di hee hvoló ɓa a nwulɔ mąąhəɠɛɛ, di wɔ mąątii li a kwɛlan gəlee da nwɔɔ, mąą hva hvalin.»

³⁷ Haláá yii da kwɛli hvilɛn na Yálá ɓa, haláá yii da gəlee kələn, nɛ̨ŋɛ̨n mąą hvaalɛɛ haláá, nu pɔɔŋą pɛli haláá, ɉaláá kulɔ nuą hee haláá da liilaa haláá, di kulɔ pələ ka tii.

³⁸ Yai-Laa ɓə nɛ Moisə ɓa Sinai Yee nwuɔ̨ a ɲələi ə kɛ la Israɛlə lonnii diɛ, di pa a Yai-Laa kɔ́ hɛnŋąą Sinai nɔi pun ɉu.