Levetekɔ 6 - Yálá laawoo hɛɓɛ (dc)

Ɉaláá laa həli nuą maa mɛ̨nį Haláá hɛn yii da gəle kələn

¹ Yai-Laa yɛ Moisə ɓa:

² «Mɛ̨nįɠaa ŋɛ̨i laa həli Aarɔn da nonnii diɛ, yɛ diɛ: «Haláá hɛn da gəlee kələn gulɔ pələ ka: Ka ɉaláá hɛn naa ɉaláá kulɔ nwɔ̨n dəŋą ŋą, ə yii laa, ə lɛɛ la ɉu yələ ə ɓɔ, nwɔ̨n və luwun.

³ Ɉaláá laa həli mun a həɠə kwəlɛɛ, da dɛmą kwəlɛɛ kɛ mą. Daatɛlɛɛɠaa kələn ŋąą pulu, nunwui tii a lɛɛ ɉaláá kulɔi, ɉaláá laa həli mun a gələ laa, ə ɉee ɉaláá kulɔi kwɛlɛ.

⁴ Nąąlɔwai, a ɉaláá kulɔ həɠəɠaa kulɔ mą, ə həɠə takpɛli too gwąną ə li ə nuwu pili daa kpala kɛɛnąą mąąhəɠɛɛ ta ɓa.

⁵ Nwɔ̨n ŋɛ̨i a kɛ ɉaláá kulɔi, mąą hvo nɛ̨ɛ̨li hvo luwun. Yələwala kəlee ɉaláá laa həli mun a kwɛi tɔɔ nwɔ̨n ma, ɉaláá hɛn da gəlee kələn, gwɛiɠaa tii mɛ̨i ɓə da naa laa, gɛɛ di hvo kɛ pai liilaa haláá kulɔi, yaai gaa a ɉuwɔ wulɔɠaa.

⁶ Mąąnɛ̨ɛ̨ hvóló kəlee nwɔ̨n ə kɛ a dɔɔ ɉaláá kulɔi, mąą hvo nɛ̨ɛ̨li hvo luwun.

Yálá kɔ́ hɛn a kulɔ hihɛn ɉu

⁷ «Bələi mąąnɛ̨ɛ̨ di Yálá kɔ́ la a hihɛn má ta, bələ ka: Aarɔn lonnii ɓə da yili laa həli Yai-Laa ɓa, ɉaláá kulɔ kəhi lííla.

⁸ Ɉaláá laa həli mun dɔ̨nɔ̨ a ɲee pɛlɛ nɛɠɛ hunwɔ̨ hu, yii wulɔ kaa mą, da lansan, ə gələn ɉaláá kulɔi; liilaa haláá kun nɛ̨ɛ̨ li, yɛ nu nąą kili too Yai-Laa ŋą.

⁹ Gbəlii tii a lɛɛ, Aarɔn da nonnii da mį́i gee kaa kələ gwəli hąąi, di hva lɛɠɛ tɛ hɛn bu ɉu.

¹⁰ Di hva lɛɠɛ tɛ hɛn bu nɛɠɛ hu diɛ mɔ̨n. Yili ɓə ŋą́ dɛɛ di pɔ, yɛ kulɔ nwɔ́ haláá hɛnŋąąi hu, yii di gələn gaa a hɛn yii mąąhəɠɛɛ, yɛ bələi di nɛ̨ŋɛ̨n mąąhvaalɛɛ haláá kɛ la.

¹¹ Aarɔn lonnii hinąą lɔ ɓə da mį́i, yili kaa a tíɓo yii vilɛn ŋąąi yɛ́ ka ə́ lonnii kaa a yələ kəlee mɛ̨nį, ɉalááɠaai da gələn Yai-Laa lííla mąą mɛ̨nį hu. Gulaa ka pulu, nu takpɛli lɔpee a tunwɔ̨n da ɓa, mąąnɛ̨ɛ̨ ə haa.»

¹² Yai-Laa yɛ Moisə ɓa:

¹³ «Ɲələi da Aarɔn da nonnii di hee la a nwulɔ mąąhəɠɛɛi, ɉaláá hɛn mąąnɛ̨ɛ̨ di paala, ya ka: Lɛɠɛ hunwɔ̨ gəgən ɲąą haaɓa, yii a kɛ a yələ kəlee haláá hɛn, bələ tɔ̨nɔ̨ yələ wala, bələ tɔ̨nɔ̨ yələ wulii.

¹⁴ Da ɲələn nwɔ̨mįi kɛ ləɠi hu a wulɔ. Ə́ paa la, bɛliɛ kpɔ a nɛlɛɛ, ə́ ɉaláá lɛɠɛi tii hu yali a gbuɔ pɛlɛɛ, ə naa həli Yai-Laa ɓa, hɛn mąą kun nɛ̨ɛ̨ li, yɛ Yai-Laa liilaa.

¹⁵ «Non ɉinąą lɔwai, nui di pai ɉeei a ɉaláá laa həli mun a nwulɔ mąąhəɠɛɛ a gɛ lɔ tii, yələ kəlee tɔ́n ni, da gələn gbɔ tɛ̨ɛ̨tɛ̨ɛ̨ Yai-Laa ɓa.

¹⁶ Hihɛn lɔpee haláá laa həli mun a Yálá kɔ́ la, mąąnɛ̨ɛ̨ di gələn gbɔ tɛ̨ɛ̨tɛ̨ɛ̨, di hva da mį́i.»

Nɛ̨ŋɛ̨n mąą hvaalɛɛ haláá kulɔ pələ ka

¹⁷ Yai-Laa yɛ Moisə ɓa:

¹⁸ «Mo Aarɔn da nonnii diɛ: Nɛ̨ŋɛ̨n mąąhvaalɛɛ haláá kulɔ pələ ka: Da nɛ̨ŋɛ̨n mąąhvaalɛɛ taatɛlɛɛ paa, ɓɛi da daatɛlɛɛ kələn naa, Yai-Laa lííla. Gaa a hɛn yii mąąhəɠɛɛ.

¹⁹ Ɉaláá laa həli mun tii a ɉaláá kulɔ, ya ɓə a ɉaláá hɛn mį́i. Ɛlɛɛ mąąnɛ̨ɛ̨ ə mį́i gɛɛnąą mąąhəɠɛɛ ɓa, gee kaa kələ gwəli hąąi.

²⁰ Hɛn lɔpee a tunwɔ̨n ɉuwɔ ta ɓa, gaa a Yálá nwɔɔ. Ɲąmą ta a taɠa həɠə ta ɓa, ɓɛi tii ɲąmą ə taɠa laa, mąąnɛ̨ɛ̨ di nąą waa kɛɛnąą mąąhəɠɛɛ ɓa.

²¹ Da ɉaláá hɛn ɉuwui tii yili ləɠi kpɛli hu, mąąnɛ̨ɛ̨ di nəɠi wolo, da ɲili kwɛli ləɠi hu, mąąnɛ̨ɛ̨ di ɉu kalaan di ɉu heɠeen a ya.

²² Nui lɔpee gaa a ɉaláá laa həli mun da, a pɛli da mįi, hɛn mąąhəɠɛɛ li.

²³ Kɛlaa, nɛ̨ŋɛ̨n mąąhvaalɛɛ haláá taatɛlɛɛ lɔpee nwɛi, da li a ɲąmą gee kaa kələ mu, diɛ nɛ̨ŋɛ̨n mąąhvaalɛɛ kóló kɛ gɛɛnąą mąąhəɠɛɛ tii ɓa, mąą hvo nɛ̨ɛ̨li diɛ mį́i, mąąnɛ̨ɛ̨ di gəlee kələn.