Levetekɔ 5 - Yálá laawoo hɛɓɛ (dc)

Nɛ̨ŋɛ̨n ɉuwu takpɛliɠaa mąą hvaalɛɛ haláá

¹ «Nɛ̨ŋɛ̨n ɉəɠə pələ takpɛli ka nwɔ̨nɔ̨: Akɛ mɛ̨nį ta a tɛɛ taa ta hu, di nuą təli gɛla hvaa ɓo mɛ̨nį ɓa, nui mɛ̨nįi tii hukɔlɔn a wala gɛ hvo pa hvo gɛla hvaa ɓo, aa nɛ̨ŋɛ̨n tii wulu lɛɛ nwuɔ̨.

² «Awala kɛ tii, hɛn tɔ́n gaa mą nuą tɔwɔ, nu ta a tunwɔ̨n mą dɛɠii; yɛi kɛ a lɔwɔ huwɔ yii aa haa gbɔwɔ ɓa bowa, yii mąą hvo nɛ̨ɛ̨li nu hvo tunwɔ̨n mą, yɛ ə kɛ a taatɛlɛɛi haa gbɔwɔ ɓa bowa, yɛ ə kɛ a tala huwɔ ta powa; mąą nu aa gbɔwɔ mąąliɓi, aa ɉɔn gɛ.

³ «Awala kɛ tii, akɛ nu ta a tunwɔ̨n mɛlan nu kan ma yii mąą hvo nɛ̨ɛ̨li di hvo tunwɔ̨n mą nɔwai tii hu; ə kɛ a hɛn nɔpee yii tɔ́n gaa mą yɛ nu mąąliɓi, mąą nu a tunwɔ̨n mą, ɓɛlɔwai a gbaɠala kaa la, a kɛ a hɔn mąą mun.

⁴ «Awala kɛ tii, nu ta a gwɛla dɛɠii, ɛlɛɛ yaan, mąą hvo kɛ nɛ̨ɛ̨li hvo gwɛla; a gwɛla, yɛ ə kɛ a nɛlɛɛ, yɛi ə kɛ a ɲɔ̨nwɔ̨ɔ̨, gwɛla woo tii hva ɉəɠə mą, ɓɛlɔwai a gbaɠala kaa la, a kɛ a hɔn mąą mun.

⁵ «Nui lɔpee a ɉɔn gɛ mɛ̨nįɠaa tii ta hu, mąąnɛ̨ɛ̨ ə hvaa ɉɔn ma.

⁶ Yili pulu, mąąnɛ̨ɛ̨ ə pa a bɔɔŋą pɛli hɛn a ɓɛlaa haa Yai-Laa lííla, awala kɛ tii ɓolu haa, a yili kɛ tii nɛ̨ŋɛ̨n tii ə ɉəɠə mąą hvaalɛɛ mɛ̨nį ɓa. Ɉaláá laa həli mun a nɛ̨ŋɛ̨n mąąhvaalɛɛ kóló kɛ mą.

Yeehowolo nuą di wɔ haláá

⁷ «Hɛn a wala kɛ nu yəi yɛ pɛli taatɛlɛɛ hɔlɔɓoi, mąą nu a nɛ̨ŋɛ̨n ɉəɠə, a pɛli mą ə pa Yai-Laa pɔ a lɔwɔ tonwələn veelɛ, bɔɔŋą pɛli mɛ̨nį ɓa. Awala kɛ tii, kwii tonwələn veelɛ, da dɔ̨nɔ̨ kɛ a mąąhvaalɛɛ haláá hɛn, di dɔ̨nɔ̨ kɛ a haláá hɛn yii da gəlee kələn Yai-Laa ɓa.

⁸ A pa a diɛ ɉaláá laa həli mun bɔ, yili ə gbɛa nɛ̨ŋɛ̨ mąąhvaalɛɛ haláá laa həli. A nwɛ̨ni kpowola ɓɛla a ɲeeɲąnin, kɛlaa hva gulɔ ŋą.

⁹ A ɲąmą ta taɠa ɉaláá kulɔ kəhi koo ɓa, ə gbəli taɠa ɉaláá kulɔ kəhi kɔ́wɔ mu. Nɛ̨ŋɛ̨n mąąhvaalɛɛ haláá ka tii.

¹⁰ A veelɛnąą kɛ a haláá hɛn da gələə kələn, yɛ bələi mąą tɔ́n gaa la. Ɉaláá laa həli mun a nui tii nwɔ nɛ̨ŋɛ̨n ə ɉəɠə, mąąhvaalɛɛ kóló kɛ, mąąhvaa a lɛɛ.

¹¹ «Nu ta yee a wala pɛli lɔwɔ tonwənən veelɛ ɓa, a wala kɛ tii kwii tonwənən veelɛ ɓa, a pɛli mą ə pa a lɛɠɛ hunwɔ̨ kəgən ɉu nąąn, a nɛ̨ŋɛ̨n mąąhvaalɛɛ haláá hɛn; hva wulɔ kɛ mą, hva lansan hee gwɛlɛ. Mąąhɔlɔɓo, nɛ̨ŋɛ̨n mąąhvaalɛɛ haláá li.

¹² A paa la ɉaláá laa həli mun bɔ, yili a ɲee hvɛɛ ɉu, a kili too ŋą haláá. Ə gələn ɉaláá kulɔ kəhi mɛ̨i, ə bɛlɛ Yai-Laa nwɔ haláá kɔ̨nɔ̨nŋąą diɛ, nɛ̨ŋɛ̨n mąąhvaalɛɛ haláá li.

¹³ Ɉaláá laa həli mun a nɛ̨ŋɛ̨n mąąhvaalɛɛ kóló kɛ, nɛ̨ŋɛ̨n nu a ɉəɠə mɛ̨nįɠaai tii ta hu, mąą nu mąąhvaa a lɛɛ. Ɉaláá laa həli mun a mɛ̨nįɠaai tii kɛ yɛ bələi da ɉihɛn ɉaláá kulɔ la Yálá ɓa.»

Nɛ̨ŋɛ̨n bulu pɛli haláá

¹⁴ Yai-Laa yɛ Moisə ɓa:

¹⁵ «Nu ta a Yálá laa kala nɛ̨ŋɛ̨n ɉəɠə dɛɠii, yɛ Yai-Laa kɔ́ a ɲɔ̨nwɔ̨ɔ̨; mąąnɛ̨ɛ̨ ə pa a bɔɔŋą pɛli hɛn a ɓɛlaa hilɛi kpɛɠii hvo mą, ə ɉəɠə nwɔ taatɛlɛɛ kpulu hu, diɛ ɉɔ̨nwɔ̨ laa ɓo a wali, yɛ bələi bɛlɛ́ mąąhəɠɛɛ mu wali kaa la, ə naa həli a bɔɔŋą pɛli haláá.

¹⁶ Yili pulu, bɛlɛ́ mąąhəɠɛɛ mu mɛ̨nįi tii ə bili ɉu, hvo kɛli ə bɔɔ tɛɛ, yɛ ɉɛn tii ɉəən nɔɔli pɛlɛ mą, yɛ dɛɛ ɉaláá laa həli mun bɔ. Ɉaláá laa həli mun a nɛ̨ŋɛ̨n mąą hvaalɛɛ kóló kɛ mą, a bɔɔŋą pɛli haláá, a mɛlaa hilɛi tii, mąąhvaa a lɛɛ.

¹⁷ «Nu ta a nɛ̨ŋɛ̨n ɉəɠə, yɛ Yai-Laa nwɔ tiɓo ta kala dɛɠii pələ yɛ ɉɔn gɛ la tii, yɛ nɛ̨ŋɛ̨n nɛ̨ɛ̨ la gbɔwɔ nwuɔ̨,

¹⁸ mąąnɛ̨ɛ̨ ə pa a ɓɛlaa hilɛ ɉaláá laa həli mun bɔ, kpɛɠii hvo kɛ mą, a ɉəɠə nwɔ taatɛlɛɛ kpulu hu, ɉɔ̨nwɔ̨ yɛ həli nu pɔɔŋą pɛli haláá wali hu. Nɛ̨ŋɛ̨n tii mąą nu ə ɉəɠə gbaɠala hvo kɛ mą, ɉaláá laa həli mun a mąąhvaalɛɛ kóló kɛ mɛ̨i, nɛ̨ŋɛ̨n tii ə kulɔ mą.

¹⁹ Nu pɔɔŋą pɛli haláá li, hvo gaai mąą nu aa kɛ ɉɔn gɛ a Yai-Laa.»

²⁰ Yai-Laa yɛ Moisə ɓa:

²¹ «Akɛ nu ta a wala túwɔ́ a tələnmo pələ Yai-Laa ɲɛ̨i ɓa, ə mɛlan mowo laakɛ hɛn da mąą mɛ̨nį ɓa, a wala kɛ tii, hiŋɛn ɉɛn da mąą mɛ̨nį hu, a wala kɛ tii, nwuɔ̨ hɛn da mąą mɛ̨nį hu, a wala kɛ tii, gbəli yɛ ɲee pənə mɛlan ɉu,

²² gbəli, a hɛn da həɠə tooni yɛ ɉea mą, a wala kɛ tii, yɛ gwɛla a lɛɛ mɛ̨nįɠaai kpɔ nu a pɛli nɛ̨ŋɛ̨n ɉəɠəi ɉu da mąą mɛ̨nį hu;

²³ Nui a nɛ̨ŋɛ̨n daaləi tii ta həɠə, mąąnɛ̨ɛ̨, hɛn ə nwuɔ̨, a wala kɛ tii, hɛn ə gulɔ mɛlan ɲəi, a wala kɛ tii, ɉɛn di dɛɛ bɔ naaikɛ mɛ̨nį ɓa, a wala kɛ tii ɉɛn ə ɉəɠə tooni, mąąnɛ̨ɛ̨ ə pənə ə di tɛɛ.

²⁴ Da hɛn nɔpee ə gwɛla mąą mɛ̨nį hu a lɛɛ, mąąnɛ̨ɛ̨ ə bɔɔ hu tɛɛ, ə ɉɛn tii ɉeei lɔɔli nąą pɛlɛ mą. A dɛɛ ɉɛn nąmu pɔ ɓɛlɔwai a ɉɔn gɔlɔn na, yɛ bɔɔŋą pɛli haláá kulɔ.

²⁵ A pa ɉaláá laa həli mun bɔ a nwɔ taatɛlɛɛ kpului hu ɓɛlaa hilɛ ta yii kpɛɠii hvo mą, ə bɔɔŋą pɛli la Yai-Laa pɔ pələ; ɉɔ̨nwɔ̨ yɛ pɛli nu pɔɔŋą pɛli haláá taatɛlɛɛ hɔ̨nwɔ̨ hu.

²⁶ Ɉaláá laa həli mun a nɛ̨ŋɛ̨n mąą hvaalɛɛ kóló kɛ mɛ̨i Yai-Laa lííla, nwɔ nɛ̨ŋɛ̨n mąąhvaa a lɛɛ, ə mą kɛ, hɔn nɔpee aa gɛ.»