Levetekɔ 4 - Yálá laawoo hɛɓɛ (dc)

Nɛ̨ŋɛ̨n mąąhvaalɛɛ haláá

¹ Yai-Laa yɛ Moisə ɓa:

² «Mɛ̨nįi ŋɛ̨i ɓo Israɛlə lonnii diɛ, yɛ́ diɛ: «Nu ta a nɛ̨ŋɛ̨n ɉəɠə dɛɠii pələ, dɔ́nŋąąi Yai-Laa ə naa, mąą nu yɛ mąą kala, mɛ̨nįɠaai tɔ́n gaa mą, yɛ da kɛ,

³ «Akɛ ɉaláá laa həli mun di ɉee diɛ nwulɔ mąąhəɠɛɛ lɔ mą ya ɓə nɛ̨ŋɛ̨n ɉəɠə, ə nɔi nuą kəlee kɛ la tii a nɛ̨ŋɛ̨n ɉəɠə nuą. Mąąnɛ̨ɛ̨ ə pa a nįŋɛ̨ hilɛ lon kpɛɠii hvo mą Yai-Laa pɔ, a nɛ̨ŋɛ̨n tii ə ɉəɠə mąąhvaalɛɛ haláá.

⁴ A pa a nįŋɛ̨ lon tii gee kaa kələ laaləi Yai-Laa lííla, ə ɲee pɛlɛ nwuɔ̨, ə nwun dee Yai-Laa lííla gee kaa kələ laaləi.

⁵ Ɉaláá laa həli mun tii, a yai di ɉee a nwulɔ mąąhəɠɛɛ, a nįŋɛ̨ ɲąmą həɠə, ə li la gee kaa kələ ɓa,

⁶ ə ɲee kpiɛ lɔ ɲąmą hu, ə daɠa gee mɛ̨i mɛ̨ihveelɛ ɉəɠə ɓɛla tii bɛlɛ́ mąąhəɠɛɛ laaləi mą, Yai-Laa lííla.

⁷ Yili pulu, ə ɲąmąi tii ta lɔ lansan kələn gəhi mįnɛ̨ɠaa diɛ Yai-Laa lííla, ɛlɛɛ, ə ɲąmą kpəli kəlee pu ɉaláá kulɔ kəhii ŋɛ̨i gee kaa kələ laaləi gɔwɔ mu.

⁸ Nįŋɛ̨ lon tii di gulɔ a haláá, yii kpɔ da gulɔ ɉu a Yai-Laa nwɔɔ ya ka: Nwulɔ yii a kɛ gboyɛli ɓa, da yii gaa gboyɛli mɛ̨i,

⁹ gwəi kwɛni kɔ́w hveelɛi da nwulɔi gaa mą, ə mą kɛ, ɲɛlɛ hunwɔ̨ la, da gəlee kulɔ.

¹⁰ Da gɛ kpɔlɔ yɛ bələi da gɛ la a liilaa haláá nįŋɛ̨. Yili pulu, ɉaláá laa həli mun a di kələn ɉaláá kulɔ kəhi mɛ̨i.

¹¹ Nįŋɛ̨ kɔlɔ, ɉuwɔ kəlee, nwun ganin, gɔwɔ kwąnąɠaa, gboyɛli da gbo hu kpo,

¹² nįŋɛ̨ kpəli kəlee, a mo di kulɔ la daa kpala, kɛɛnąą lɛlɛɛ ta ɓa, ɓɛi da kɛ ɉaláá luwu pilii laa, ə gələn naa kwɛi nwɔ̨n ma, ɉaláá luwu pilii.

Nɔi lonnii di wɔɔ nɛ̨ŋɛ̨n mąąhvaalɛɛ haláá kulɔ pələ

¹³ «Israɛlə lonnii kəlee da nɛ̨ŋɛ̨n ɉəɠə di tɛɠii, di mɛ̨nį ta kɛ yii Yai-Laa ə tɔ́n dɔɔ mą, diɛ gɛ di tɛɠii, diɛ di hɔn gɛ la tii,

¹⁴ ɓɛlɔwai di kili a pu la nɛ̨ŋɛ̨n tii hu, mąąnɛ̨ɛ̨ kpɔlɔ, di pa a nįŋɛ̨ hilɛ gbɔn, nɛ̨ŋɛ̨n tii mąąhvaalɛɛ mɛ̨nį ɓa, da li la gee kaa kələ laaləi.

¹⁵ Galanɉonŋąą kəlee da di yee pɛlɛ nįŋɛ̨n gbon nwuɔ̨, Yai-Laa lííla, di nwun dee Yai-Laa lííla.

¹⁶ Yili pulu, ɉaláá laa həli mun tii di ɉee a nwulɔ mąąhəɠɛɛ, a li a ɲąmąi tii gee kaa kələ mu.

¹⁷ Ɉaláá laa həli mun a ɲeekpuɔ lɔ ɲąmąi tii hu, ɛlɛɛ, ə daɠa gee mɛ̨i mɛ̨ihveelɛ ɉəɠə ɓɛla ɓa Yai-Laa lííla.

¹⁸ Ə ɲąmąi tii ta hiɛ ɉaláá kulɔi tii Yai-Laa lííla gee kaa kələ mu mįnɛ̨ɠaa diɛ. Ə gbəlii tii pu Yai-Laa mąąwiɛ haláá kulɔ kəhi kɔ́wɔ mu, yaa tii gee kaa kələ laaləi.

¹⁹ Ə ɉuwɔ wulɔɠaa kəlee həɠə, ə di kələn ɉaláá kulɔi.

²⁰ Bələi a gɛ la a nɛ̨ŋɛ̨n mąą hvaalɛɛ haláá nįŋɛ̨, bələ lɔ ɓə a gɛ la a niŋɛ̨i tii. Bələ lɔ ɓə a gɛ la a gbɔwɔ nwɛi. Yili ɓa, ɉaláá laa həli mun a gɛ lɔ tii a di wɛi, a kɛ tii, di mąąhvaa a lɛɛ.

²¹ A nįŋɛ̨ lon ɉəɠə, ə kulɔ la taai, ə gələn yɛ bələi ə nįŋɛ̨ yii tii kələn na. Yili kaa a nɔi nuą kəlee mąą hvaalɛɛ hɛn.

Ɲɛ̨itɔwɔ mun nwɔ nɛ̨ŋɛ̨n nwaa pələ

²² «Ɲɛ̨itɔwɔ mun a nɛ̨ŋɛ̨n ɉəɠə, yɛ Yai-Laa nwɔ tɔ́n nwooɠaai ta mąą kala dɛɠii,

²³ nɛ̨ŋɛ̨n ə ɉəɠə da nɛ mą, mąąnɛ̨ɛ̨ ə pa a ɓolu hilɛ yii kpɛɠii hva kɛ mą.

²⁴ A ɲee pɛlɛ molu hilɛ nwuɔ̨, di nwun dee ɓɛi da kɛ haláá hɛn da gəlee kələn nwun dee laa Yai-Laa lííla, nɛ̨ŋɛ̨n mąą hvaalɛɛ haláá ka tii.

²⁵ Ɉaláá laa həli mun a ɉaláá taatɛlɛɛi tii ɲąmą həɠə a ɲee kpuɔ, ə nɔ ɉaláá kulɔ kəhi mįnɛ̨ɠaa diɛ, yili pulu, ə ɲąmą kpəli pu ɉaláá kulɔ kəhi kɔ́wɔ mu.

²⁶ Ə ɉuwɔ wulɔɠaa kəlee kələn ɉaláá kulɔ kəhi mɛ̨i, yɛ bələi da gɛ la a liilaa haláá. Ɉaláá laa həli mun a nɛ̨ŋɛ̨n mąą hvaalɛɛ kóló kɛ nuą ɲɛ̨itɔwɔ mun ma, mąąhvaa a lɛɛ.

Nɔi lon da a nɛ̨ŋɛ̨n ɉəɠə nwaa pələ

²⁷ «Nɔi lon da a nɛ̨ŋɛ̨n ɉəɠə dɛɠii, yɛ Yai-Laa nwɔ tɔ́n nwoo ta mąąkala, yɛ kɛ la a hɔn mąą mun;

²⁸ nɛ̨ŋɛ̨n tii ə ɉəɠə da nɛ mą, mąąnɛ̨ɛ̨ ə pa a ɓoli haa, kpɛɠii hva kɛ mą, a haláá hɛn, nɛ̨ŋɛ̨n tii ə ɉəɠə mąą mɛ̨nį ɓa.

²⁹ A ɲee pɛlɛ nɛ̨ŋɛ̨n mąąhvaalɛɛ haláá taatɛlɛɛi tii nwuɔ̨, di nwun dee ɓɛi haláái da gəlee kələn, nwɔ taatɛlɛɛɠaa nwun dee laa.

³⁰ Ɉaláá laa həli mun ə ɲąmą ta həɠə a ɲee kpuɔ, ə ɉiɛ ɉaláá kulɔi mįnɛ̨ɠaa diɛ; Yili pulu, ə ɲąmą kpəli kəlee pu ɉaláá kulɔi gɔwɔ mu.

³¹ Ə nwulɔ kɛɛnąąɠaa kəlee kulɔ mą, yɛ bələi da gɛ la a niilaa haláá hɛn. Ɉaláá laa həli mun ə di kələn ɉaláá kulɔ kəhi mɛ̨i, gaa a haláá mąą kun nɛ̨ɛ̨, yɛ Yai-Laa liilaa. Ɉaláá laa həli mun a nɛ̨ŋɛ̨n mąąhvaalɛɛ kólói tii kɛ nɛ̨ŋɛ̨n ɉəɠə mun tii mɛ̨i, mąąhvaa a lɛɛ.

³² «Akɛ ɓɛlaa ɓə gaa bɔ ə gɛ a nɛ̨ŋɛ̨n mąąhvaalɛɛ haláá hɛn, mąąnɛ̨ɛ̨ ə kɛ a ɓɛlaa haai kpɛɠii hvo kɛ mą.

³³ A ɲee pɛlɛ daatɛlɛɛ tii nwuɔ̨, di nwun dee a nɛ̨ŋɛ̨n mąąhvaalɛɛ haláá, ɓɛi tii haláá hɛn da gəlee kələn, nwun dee laa.

³⁴ Ɉaláá laa həli mun a daatɛlɛɛ ɲąmą ta həɠə a ɲee kpuɔ, ə ɉiɛ ɉaláá kulɔi mįnɛ̨ɠaa diɛ. Ə ɲąmą kpəli kəlee pu ɉaláá kulɔi kɔ́wɔ mu.

³⁵ Ə nwulɔ kɛɛnąą kəlee kulɔ mą, yɛ bələi da gulɔ la liilaa haláá ɓɛlaa ɓa. Ɉaláá laa həli mun ə di kələn ɉaláá kulɔ kəhi mɛ̨i, ɓɛlɛɛ ɉaláá kɔ̨nɔ̨nŋąą diɛ yiiɠaai a Yai-Laa nwɛiɠaai. Ɉaláá laa həli mun a gólói tii kɛ nui a ɉon gɛ mąą mɛ̨nį ɓa, nɛ̨ŋɛ̨n mąą nu ə ɉəɠə mąąhvaa a lɛɛ.