Levetekɔ 27 - Yálá laawoo hɛɓɛ (dc)

Mɛ̨nį laakwɛlanmoɔ

¹ Yai-Laa yɛ Moisə ɓa:

² «'Mo Israɛlə lonnii diɛ, yɛ́ diɛ: «Nu ta a nwoo kwɛlɛ, yɛ nu kan naakwɛlanmo Yai-Laa ɓa; akɛ kɛa bɔ ə nwoo pɔ mɛ̨nį kɛ, nu kan ɉɔ̨nwɔ̨ kɔ́lɔn bələ ka:

³ «Akɛ a hulɔnu, ə həɠə kwɛlan bow hveelɛ ɓa, ə həli pow mɛ̨ida ɓa, mąąnɛ̨ɛ̨ di wali kwələ pow lɔɔli tɛɛ, yii gaa a bɛlɛ́ mąąhəɠɛɛ mu wali kɛ pələ.

⁴ Akɛ nɛ̨ɛ̨nu ɓə, wali kwələ pow haaɓa.

⁵ «Akɛ a lon ɉulɔnu, ə həɠə kwɛlan nɔɔli ɓa, ə həli pow hveelɛ ɓa: wali kwələ pow hveelɛ, nɛ̨ɛ̨non nwɛi wali kwələ pow.

⁶ «Akɛ a hulɔnulon, ə həɠə ɲąnin dɔ̨nɔ̨ ɓa ə həli kwɛlan nɔɔli ɓa, wali kwələ lɔɔli, nɛ̨ɛ̨nu nwɛi wali kwələ haaɓa.

⁷ «Hulɔnui gaa kwɛlan a tɛɛ pow mɛ̨ida ɓa, wali kwələ pow kɔ́w lɔɔli, nɛ̨ɛ̨nu nwɛi, wali kwələ pow.

⁸ «Nu ta a kɛ a yeehvowolomun, ɲee a wala pɛli yii di vaa ɓo mą, nui ə naakwɛlanmo, a paa la ɉaláá laa həli mun nííla, yili ə wali ta hvaa ɓo mą, yɛ bələi nui tii nwɔ yee pɛli mąą kaa la.

⁹ «Akɛ taatɛlɛɛ ta ɓə, yii da pɛli Yai-Laa kɔ́i la, taatɛlɛɛ lɔpee nu a naakwɛlanmo tii, mąąhəɠɛɛi.

¹⁰ Di hva pɛli dakpɛli tɛɛi, di hva pɛli mąąhvalin ɉii, di hva pɛli nɛlɛɛ mąąhvalin ɉii a ɲɔ̨nwɔ̨ɔ̨, di hva ɲɔ̨nwɔ̨ɔ̨ mąąhvalin a nɛlɛɛ. Nu a taatɛlɛɛ ta mąąhvalin a dakpɛli, gəlee hveelɛi da lɛɛ a Yálá nwɔɔ.

¹¹ «Akɛ a taatɛlɛɛ huwu yii tɔ́n gaa mą, da daatɛlɛɛi tii tɔɔ ɉaláá laa həli mun nííla,

¹² ɉaláá laa həli mun a gaa, akɛ nɛlɛɛi, a wala kɛ tii akɛ ɲɔ̨nwɔ̨ɔ̨i; ɛlɛɛ ɉɔ̨nwɔ̨ yii a vaaɓo, ya ɓə a lɛɛ mą.

¹³ Da kɛ bɔ di mąąɓo, da ɉɔ̨nwɔ̨i tii ɉeei kɛ lɔɔli di dɛɛ.

¹⁴ «Nu a nwɔ pɛlɛ́ laakwɛlanmo a hɛn mąąhəɠɛɛ Yai-Laa ɓa, ɉaláá laa həli mun a gaa, akɛ nɛlɛɛi, a wala kɛ tii ɲɔ̨nwɔ̨ɔ̨, ɉɔ̨nwɔ̨i a vaaɓo, ya ɓə a lɛɛ mą.

¹⁵ Nui nwɔ pɛ́lɛ́i laakwɛlanmo, akɛ bɔ ə mąąɓo, a ɉɔ̨nwɔ̨ tii ɉee kɛ lɔɔli ə dɛɛ; bɛlɛ́ ə lɛɛ a nwɔɔ.

¹⁶ «Nu a nwɔ lɔi laakwɛlanmo Yai-Laa ɓa a hɛn mąąhəɠɛɛ, hɛn da pɛli ɉii laa, ya ɓə da ɉɔ̨nwɔ̨ kɔ́ɔn mą. Da kpai huwu gəgən ɉu nwun dɔ̨nɔ̨ hɔ̨nwɔ̨ kɛ a wali kwələ pow lɔɔli.

¹⁷ Nui a nwɔ tíi laakwɛlanmo a mąąɓo kwɛlan nɔwai, ɉɔ̨nwɔ̨i tii ɓə a lɛɛ mą.

¹⁸ Nui a nwɔ tíi laakwɛlanmo gwɛlan bulu, ɉaláá laa həli mun a ɉɔ̨nwɔ̨ laa ɓo yɛ bələi gwɛlanŋąą da lɛɛ la pulu mąąɓo kwɛlan yɛ həli. Nwalii di vaaɓo, da a kulɔ mą.

¹⁹ «Nui nwɔ tíi laakwɛlanmo, akɛ bɔ ə mąąɓo, a ɉɔ̨nwɔ̨i tii ɉeei kɛ lɔɔli ə dɛɛ. Díi ə pənə ə lɛɛ ɲəi.

²⁰ «A wala díi mąąɓo, a nɔwɔtɔɔ nu takpɛli ɓa, mąąɓo mɛ̨nį hva kɛa kɛ ɉu.

²¹ Ɛlɛɛ, díi a lɛɛ a hɛn mąąhəɠɛɛ, a Yai-Laa nwɔɔ, yɛ tíi Yálá aa ɲee pɛlɛ mɛ̨i. Ɓɛlɔwai a lɛɛ la gbɔwɔ ɓa a mąąɓo kwɛlan, a lɛɛ a ɉaláá laa həli mun nwɔɔ.

²² «Nu a tíi ya, a wala kɛ a gbɔwɔ nwɔɔ, a naakwɛlanmo Yai-Laa ɓa,

²³ ɉaláá laa həli mun a ɉɔ̨nwɔ̨ laa ɓo, ə lɛɛ ɉu mąąɓo kwɛlan ə həli, di nwali tɛɛ a mąą yələ lɔ. Hɛn mąąhəɠɛɛ li a Yai-Laa nwɔɔ.

²⁴ Nui di díi ya ɲəi, díi a pənə ə lɛɛ ɲəi a mąąɓo kwɛlan nɔwai, yili ɓa, nui gwɛlin ni, ya ɓə a lɛɛ ɲəi.

²⁵ «Da hɛn gəlee hɔ̨nwɔ̨ laa ɓo, yɛ bələi ɉɛli pɛlɛ́ nwɔ wali hvaŋą kaa la, wali kwələ tɔ̨nɔ̨ ɲąą a kwɛlɛ a ɉəei pow hveelɛ.

Yálá kɔ́ hɛn dakpɛliɠaa

²⁶ «Nu hva pɛli nwɔ taatɛlɛɛ lon dɔlɔɔ laakwɛlanmoi, gɛɛ mɔ̨ɔ̨ a non dɔlɔɔ, Yai-Laa nwɔɔ li a bɔlɔ, ə kɛ a nįŋɛ̨, ə mą kɛ a taatɛlɛɛ pɛlɛɛ ta.

²⁷ Akɛ a taatɛlɛɛi tɔ́n gaa mą, da mąąɓo, di ɉɔ̨nwɔ̨ heei lɔɔli nąą kulɔ di bɛlɛ mą; da wala mąąɓo, mąąnɛ̨ɛ̨ di nɔwɔtɔɔ yɛ bələi da ɉɔ̨nwɔ̨ laa ɓo la.

Hɛn naakwɛlanmoɔ Yai-Laa ɓa

²⁸ «Nu yəi hɛn lɔpee ta, ə kɛ a nu kan, ə kɛ a taatɛlɛɛ, ə kɛ a nu nwɔ lɔi bələ tɔ̨nɔ̨, a naakwɛlanmo Yai-Laa ɓa, a wala kɛ tii, ə gwɛlɛ mą, ɉɛn tii lɔwɔ hva kɛa tɔɔ, nwun mąą hvaa kɛa pɛli ɓoi, hɛn nɔpee tɔ́n gaa mą naakwɛlanmoɔ, gaa a hɛn mąąhəɠɛɛ kpɔ kpąą, Yai-Laa nwɔɔ li.

²⁹ Ɛlɛɛ, nu kan lɔpee da naakwɛlanmo Yai-Laa ɓa, tɔ́n gaa mą, nwun mąą hva kɛa pɛli ɓoi, hvo kɛ li da baa.

³⁰ «Hɛn bow nąą lɔpee a kulɔ lɔi hu, yɛ ə kɛ a hihɛn ɉuwu ta, ə kɛ a wulu ɓá ta, gəlee kaa a Yai-Laa nwɔɔ, hɛn mąąhəɠɛɛ li a Yai-Laa nwɔɔ.

³¹ Nu ta akɛ bɔ ə nwɔ hɛn bow nąą da mąąɓo, da ɉɔ̨nwɔ̨ heei kɛ lɔɔli ə gulɔ.

³² Hɛn bow nąą lɔpee da gulɔ a taatɛlɛɛ, nįŋɛ̨, a wala kɛ tii taatɛlɛɛ pɛlɛɛ ta, hɛn mąąhəɠɛɛ li a Yai-Laa nwɔɔ,

³³ ə lɛlɛ-oo, ə ɲɔ̨nwɔ̨ɔ̨-oo, huyɛɠɛ mɛ̨nį hvo ɉu, mąąhvalin mɛ̨nį hvo ɉu, nu ta a kɛ bɔ ə da mąąhvalin, daatɛlɛɛi da mąąhvalin, da yii di mąąhvalin na, gəlee da kɛ a hɛn mąąhəɠɛɛ, di hva pɛli di mąąɓoi.»

³⁴ Diɓoɠaai Yai-Laa ə dɛɛ Moisə pɔ Israɛlə lonnii mąą mɛ̨nį ɓa, Sinai Yee nwuɔ̨, diɛ ka tii.