Levetekɔ 25 - Yálá laawoo hɛɓɛ (dc)

Tíi kɛ lɔi hvįįtɔɔ kwɛlan

¹ Yai-Laa ə pələ ɓo Moisə ɓa Sinai Yee nwuɔ̨, yɛ mą:

² «'Mo Israɛlə lonnii diɛ, yɛ́ diɛ: «Nɔi gáá pai dɛɛi ka pɔ, ka pa lɔi ɉu, nɔi kaa pai hvįįtɔɔ kwɛlan ɉɔlɔɓoi, Yai-Laa mąą mɛ̨nį ɓa.

³ Kwɛlan mɛ̨ida yee mu, ka káá pai tíi kɛi kaa ka kɔ̨nɔ̨n ɉɔlɔɓo.

⁴ Gwɛlan mɛ̨ihveelɛnąą, a kɛ a nɔi nwɔ hvįįtɔɔ kwɛlan Yai-Laa nwɔ hvįįtɔɔ kwɛlan ni; ka hva tíi kɛ la, ka hva viɲəɠaa mąą kulɔ.

⁵ Hɛn a tiliin mɔ̨nun deɛ pulu, ka hvo mąą hɛn tee, viɲə wului ka hvo mąą tee li, a ɓá, ka hvo gulɔ, nɔi nwɔ hvįįtɔɔ kwɛlan ni.

⁶ Nɔi nwɔ hviitɔɔi tii ɓə pai ka kɔ̨nɔ̨n gulɔi, yɛ kpinįi, ə́ wɔ luwɔɠaai, ə mą kɛ ə́ wɔ kóló kɛmun yii ya kɛ ɉalai, ə mą kɛ ə́ wɔ nwɛ̨ą da nuąi ə́ yəi bɛlɛ́n, hɛn a tiliin nɔi ɓa gbɔwɔ ɓa, ya ɓə pai kɛi a ka kɔ̨nɔ̨n.

⁷ Ə́ wɔ taatɛlɛɛɠaa di wɛi, da nɔwɔ huwɔɠaa, hɛn lɔpee nɔi a dɛɛ gbɔwɔ ɓa, ya ɓə di kaa pai mįi.

Nwun mąąɓo kwɛlan

⁸ «Ka hvįįtɔɔ hvóló lonon mɛ̨ihveelɛ, kwɛlan ba pələ tɛitɛi, ka gwɛlan mɛ̨ihveelɛi tii heei kɛ mɛ̨ihveelɛ. A kɛ tii kwɛlan bow nąąn kɔ́w mɛ̨inąąn ga tii.

⁹ Yili pulu, ɲąnin mɛ̨ihveelɛnąą nwɔ hvóló pow yələ yii gaa a nɛ̨ŋɛ̨n mąą hvaalɛɛ hvóló, ka túlú hvɛɛ ka wɔ lɔi nąą kɔ́lɔ kəlee.

¹⁰ Ka gwɛlan bow lɔɔli nąą kɛ a kwɛlan mąąhəɠɛɛ, ɛlɛɛ ka nɔi lonnii kəlee nwun mąąɓo lólóɓo. A kɛ́ ka yəi a hɛli, yɛ Yálá kɛ mɛ̨nįɠaa kili too ka ŋą, nu kəlee ə pənə ə li nąn nwɔ lɔi hu, nu kəlee ə pənə ə li ɉuwu hu.

¹¹ Gwɛlan bow lɔɔli nąą a kɛ ka yəi a hɛli, ka hva tíi kɛ, mɔ̨nun gbaɠaɠaai da lɛɛ gban ɉu, ka hvo dee, ɓá wuluɠaai da bɔn di kpɔwɔ ɓa, ka hvo di ɓá kulɔ.

¹² Gwɛlan tii a kɛ ka yəi a Yálá nwɔ hɛn mąąhəɠɛɛ, hɛnŋąąi da ɓɔn ka yəi ɲɛa, ka pɛli mįi.

¹³ «Gwɛlan tii yee mu, nu kəlee a pɛli ə li, ə hee nąn nwɔ lɔi hu.

¹⁴ Ka kɛi nɔi tii ta ya, a wala kɛ tii, kaa nɔwɔtɔɔ nɔi lon da ɓa, mąą hvo nɛ̨ɛ̨li ka ta hvo gaayɔwɔ hvulu.

¹⁵ Yá kɛi pa hɛn da yái nɔi lon da yəi, ə́ kiliŋąhiɛ gwɛlanŋąąi daa tɛɛ diɛ; yaa kpɛli ə gili lɛɛ kwɛlan aa gɛ laa yɛ tíi kɛ mą, yɛ kɛa pa nɔwɔtɔɔi.

¹⁶ Akɛ kwɛlan damąą aa lɛɛ pulu, bələ lɔ ɓə ɉɔ̨nwɔ̨ a kɛnɛ̨ la. Gwɛlan aa lɛɛ pulu, a wala kɛ a damąą, bələ lɔ ɓə ɉɛnŋąą hɔ̨nwɔ̨ ta a kulɔ la mą. Mąąhɔlɔɓo, a kɛ tii, díi kɛ kwɛlan aa lɛɛ pulu, nwɔ mɔ̨nun ka tii gaa nɔwɔtɔɔi yɛ́.

¹⁷ Ka ta hvo kɛ gaa gaayɔwɔ hvului yɛ tɔ̨nɔ̨ kulɔ mą. Bələ ɓə mąąnɛ̨ɛ̨ ə́ ɲɔw la ə́ wɔ Yálái ɓa. Mąąhɔlɔɓo, ɲą́ą́ ɓə gáá a Yai-Laa ka wɔ Yálá.

¹⁸ Ka nwɔ́ tɔ́nŋąą hon, ka bɔ mɛ̨nį kɛ, ka gɛ tii, ya ɓə a gɛ ka ka wɔ yɛnɛ̨ɛ̨ kɛ nɔi a ka wəli pulu laɠiɛ.

¹⁹ Hihɛn gaa pai lɛlɛi kaa, ka káá pai kɔ̨nɔ̨n ɉɔlɔɓoi, kaa mįi a ka liilaa kaa, ka ɓo a ka wəli pulu laɠiɛ.

²⁰ «Ka kaa pai kɛi diɛ: ‹Lə ɓə ku kaa pai mįi gwɛlan mɛ̨ihaaɓa nąą yee mu? Mąąhɔlɔɓo, ku hvo pai mɔ̨nun deei, ku hvo pai ku wɔ hihɛnŋąąi ɓa kulɔi›

²¹ Gwɛlan mɛ̨ida nąą, ŋą́ lúwɔ́ too kaa, gwɛlan dɔ̨nɔ̨i tii yee mu, ka kwɛlan ɉaaɓa kɔ̨nɔ̨n ɉɔlɔɓo.

²² Gwɛlan mɛ̨ihaaɓa nąą, ka tíi kɛ, kɛlaa, kɔ̨nɔ̨n bɔlɔ ɓə ni ka kɛ mįi, ə mą kɛ gwɛlan mɛ̨inąąn nɔwai; ə lɛɛ ɉu kɔ̨nɔ̨n nįnɛ̨ ə hɔlɔɓo ka yəi, bɔlɔ lɔ ɓə ni ka kɛ mįi.

Hɛnŋaa mąąɓo mɛ̨nį

²³ «Ka lɔi tɔlaa hee nu ta ɓa, mąą hvo nɛ̨ɛ̨li dɔlaa hvo haa. Mąąhɔlɔɓo, lɔi kaa a nwɔ́ɔ́, ka káá lɔ nwɔ́ lɔi tii mɛ̨i yɛ nwɛ̨ą, yɛ tɛɛ nuą.

²⁴ Yili mąą mɛ̨nį ɓa, nɔi ŋɛ̨i pai kɛi a ka wɔɔ, nu a da tɔlaa hee, mąąnɛ̨ɛ̨ dɔlaa heemun ə nɔi mąąɓo.

²⁵ «Kwələ a kɛ ə́ kaayɔwɔ ɓa, aa kpaan yɛ nwɔ lɔi ta tɔlaa hee, nui mąąnɛ̨ɛ̨ ə nɔi tii mąąɓo, ya ɓaa nɔi tɔlaa heemun gaayɔwɔ ta, yai da yaa di lɛɠɛɛi di kee ɓa; ya ɓə a pɛli nɔi ŋɛ̨i di dɔlaa hee mąąɓoi.

²⁶ Nu a wala hɔlɔɓo yɛ pɛli nɔi tii mąąɓoi, a kɛ tii, nɔi tɔlaa heemun yaa kpinįi ɓə a mąąɓo,

²⁷ a gwɛlanŋąą lono, ə həɠə nɔi tɔlaa hee yələ ɓa, kwɛlan ɲii aa kulɔ ɉu, a yili nwali tɛɛ dɔlaa honmun bɔ. Ɛlɛɛ, ə pənə ə nɔi həɠə.

²⁸ Kɛlaa, a wala hɛn ɉɔlɔɓo, yɛ pɛli nɔi mąąɓoi la, ɉɛn tii di dɔlaa hee, a lɛɛ dɔlaa honmun yəi, ə lɛɛ ɉu mąąɓo kwɛlan ə ɉəli, nɔi a lɛɛ gbɔwɔ ɓa, mąąɓo kwɛlan gəlee yee mu, a kɛ tii, nɔi nąmu a pɛli nwɔ lɔi həɠəi.

²⁹ «Nu a ɲii pɛlɛ́ tɔlaa hee, mąą taa tii hįi a kɛ mą, a pɛli ə mąąɓo kwɛlan dɔ̨nɔ̨ tɛɛ pulu. Dɔlaa hee kwɛlan a kɛ lɔ a kwɛlan dɔ̨nɔ̨.

³⁰ Kɛlaa, akɛ da wala mąąɓo, kwɛlan dɔ̨nɔ̨ ɲąąkpalaa a tɛɛ, dɔlaa a haa, bɛlɛ́i tii a lɛɛ a dɔlaa honmun nwɔɔ, da nonnii, di hva pənə di hvo dɛɛ. Hva kulɔ ɲəi ə mą kɛ mąąɓo kwɛlan aa ɉəli.

³¹ Taaɠaai hįi hvo mą, ɉu pɛlɛ́ɠaa hon bələ kaa lɔ yɛ tíi kɛ lɔiɠaai, da pɛli di di mąąɓo. Ɛlɛɛ, bɛlɛ́ nwun mąą a ɓo a mąąɓo kwɛlan.

³² «Mąąɓo mɛ̨nį mąą laa kaa Levi lonnii yəi a yələ kəlee, di wɔ taaɠaai hu, da di wɔɔ pɛlɛ́ɠaai daaɠaa tii hu.

³³ Ə mą kɛ Levi lon dakpɛli ɓə, da pɛlɛ́ tɔlaa hee mą, bɛ́lɛ́i daa dɔlaa hee Levi taa ta hu, mąąɓo kwɛlan a ɉəli, bɛlɛi tii nwun mąą a ɓo; mąąhɔlɔɓo, Levi taaɠaa hu pɛlɛ́ɠaa li, di wɔɔ li Israɛlə lonnii lɔwai.

³⁴ Tíi a kɛ di wɔ taaɠaa tii kwɛlɛ, di hva dɔlaa hee; mąąhɔlɔɓo, di wɔ lɔi li a yələ kəlee.

Yee howolo nuą mąąkpɔnmąą ɓo pələ

³⁵ «Kwələ a kɛ ə́ kaayɔwɔ ta ɓa, hɛn da hvo ɲəi hvo gulɔ la, mąąnɛ̨ɛ̨ ə́ kpɔnmąą tɛɛ bɔ; ə kɛ a nwɛ̨ą, ə kɛ a nɔi lon da, yɛ pɛli nwɔ yɛnɛ̨ɛ̨ kɛi ə́ kwɛlɛ.

³⁶ Hvo tɔ̨nɔ̨ kwɛli nwuɔ̨, hvo ə́ yee pənə ɉu, bələ ɓə mąąnɛ̨ɛ̨ ə́ ɲɔw la Yálá ɓa, ka ə́ kaayɔwɔ kaa pɛli ɲíi ɓoi la a nɛlɛ.

³⁷ Hvo wali tɛɛ bɔ, yɛ́ pənə yɛ́ tɔ̨nɔ̨ kwɛli mą, hvo kɔ̨nɔ̨n dɛɛ bɔ, yɛ́ ə́ yee pənə ɉu.

³⁸ Ɲą́ą́ Yai-Laa ka wɔ Yálá ɲą́ą́ ɓə ka kulɔ Eziptə lɔi hu, gɛ́ Kanaan lɔi tɛɛ ka pɔ, gɛ́ pɛli gbɔ́wɔ́ lɛi la tii a ka wɔ Yálá.

Nu nwun mąąɓo mɛ̨nį

³⁹ «Ə́ wɔ kwələ a kɛ ə́ kaayɔwɔ ta ɓa, a gbɔwɔ hee yɛ́ a tɔlaa, mąą hvo nɛ̨ɛ̨li hvo bɛlɛ luwɔ kóló ɓa.

⁴⁰ Ɉon yɛ kóló kɛ mun da ɉala, a wala kɛ tii yɛ nwɛ̨ą a kɛ ə́ yəi bɛlɛ́n, a lɛɛ ə́ yəi bɛlɛ́n góló kɛi, ə lɛɛ ɉu mąąɓo kwɛlan ə həli.

⁴¹ Gwɛlan a ɉəli, a kulɔ ə pɔɔli da nonnii, di li di yəi bɛlɛ́n, di hee di wəlingią lɔi ɓa.

⁴² Mąąhɔlɔɓo, nuąi ŋį́ di kulɔ Eziptə lɔi hu, nwɔ́ tí nuą li, nu ta hva pɛli di lɔwɔ́tɔɔi yɛ da kɛi luwɔ lɔwɔ́tɔɔ.

⁴³ Hvó ɉon a mɔ̨nɔ̨ ɓo pələ. Bələ ɓə mąąnɛ̨ɛ̨ ka ɲɔw la ka wɔ Yálái ɓa.

⁴⁴ «Luwɔ hinąą da luwɔ nɛ̨ąą ka káá pai kɛi di yái ka kwɛlɛ lɔiɠaa hu,

⁴⁵ ka da yá nwɔ̨nɔ̨ ka mąą nwɛ̨ąąi heeni ka kɔ́wɔ mɛ̨i di yəi; a wala kɛ tii, di huwu ta, yii heeni ka pɔɔli. Mąąhɔlɔɓo, daa di hamu pili kɛa laa. Luwɔɠaa tii kaa pai kɛi a ka pɔɔ.

⁴⁶ Ka pɛli di lɛɛi ka lonnii yəi. Ka lonnii di wɔɔ li; diɛi tii, ka pɛli di kɛi a luwɔɠaa a yələ kəlee. Kɛlaa, ka huwu, diɛi ɓaa Israɛlə lonnii, mąą hvo nɛ̨ɛ̨li ka hvo da kɛ a ka wɔɔ luwɔ, kaa hee mɛ̨i kaa mɔ̨nɔ̨ ɓo.

⁴⁷ «Nwɛ̨ą a kɛ heeni ə́ kɔ́wɔ mɛ̨i, nwɔ kwələ ə ɓo ə́ nąn non da ɓa, ə́ kaayɔwɔ a gbɔwɔ tɔlaa hee ə́ mąą nwɛ̨ąi tii ɓa, a wala kɛ tii nwɛ̨ą yəi bɛlɛ́n mun da,

⁴⁸ ə mą kɛ daa kpɛɛ a ɲąąwooɓoɔ, gaayɔwɔ ta a pɛli nwun mąąɓoi.

⁴⁹ Galá ta a wala kɛ tii ɲəi bɛlɛ́n mun da a pɛli ə nwun mąąɓo, yaa kpinįi ɲee a lɔ, a pɛli ə gbɔwɔ nwun mąąɓo.

⁵⁰ A kɛ tii nui ɉon a tɔlaa, da yaa di woo a laa mą, ə həɠə ɉon ɲələ ɓa a tɔlaa, ə həli nwun mąąɓo kwɛlan mą, da gwɛlan nonon, di nwali lonon a kóló kɛ mun nwɔ hvóló tɔ̨nɔ̨ wali.

⁵¹ Akɛ kwɛlan damąą kaa ni pulu, a gbɔwɔ nwun mąąɓo a nwalii di ɲa la bələ tɔ̨nɔ̨.

⁵² Akɛ gwɛlan aa lɛɛ pulu mąąɓo kwɛlan yɛ ɉəli, hvo tamą li, a gbɔwɔ mąąɓo, ə bɛli gwɛlan aa lɛɛ pulu mą.

⁵³ Mąą nu a kɛ dɔlaa nąmu pɔɔli yɛ kóló kɛ mun da ɉala, kɛlaa dɔlaa nąmu hva hee mɛ̨i a mɔ̨nɔ̨ ɓo pələ.

⁵⁴ Nwun mąą a wala pɛli ɓoi a pələ lɔpee ta, nwun mąąɓo kwɛlan a ɉəlii, a lɛɛ gbɔwɔ ɓa da nonnii.

⁵⁵ «Mąąhɔlɔɓo, ɲą́ą́ ɓə Israɛlə lonnii kɛ a nwɔ́ tí nuą, diɛi tii ŋį́ di kulɔ Eziptə lɔi hu. Ɲą́ą́ ɓə gáá a Yai-Laa ka wɔ Yála.