Levetekɔ 24 - Yálá laawoo hɛɓɛ (dc)

Gee kaa kələ mu nwɔ̨n ɉee hɛn

¹ Yai-Laa yɛ Moisə ɓa:

² «'Mo Israɛlə lonnii diɛ, di olivə wulɔ nwunu kwɛli, di paa la ə́ pɔ, a nwɔ̨n ɉee hɛn, nwɔ̨n ə kɛ lɔ a dɔɔ a yələ kəlee.

³ Ɉəɠə ɓɛla lííla, mįnɛ̨ kəhi ŋɛ̨i gee kaa kələ mu ɲɛ̨i tɔwɔ ɓə Aarɔn kaa pai nwɔ̨n ɉeei laa yɛ lən Yai-Laa lííla yələwului da yələwala, Ka wɔ yɛnɛ̨ɛ̨ mąą tɔ́n da li a yələ kəlee, hva ɉəɠə mą, kaa gɛ a kwɛlan gəlee.

⁴ Gaa pai naɓonŋąą heei nwulɔ nwɔ̨n ɉeei mɛ̨ihveelɛi tii ɓa, yai gaa a hɛni hu waa hva-hva, yɛ lən a yələ kəlee da nwɔɔ.

Yálá kɔ́ lɛɠɛ

⁵ «'Lɛɠɛ hunwɔ̨ həɠə, ə́ bilɛkɛ pow kɔ́w hveelɛ, ə́ mɔ̨n. Gəgən ɲąą mɛ̨ida lɛɠɛ hunwɔ̨ ɓə a kɛ a nɛɠɛ kpinįn dɔ̨nɔ̨ nwɔɔ.

⁶ Ə́ di laa gee mɛ̨i a ɲɛli hveelɛ, mɛ̨ida mɛ̨ida, ɉɛni hu waa hva-hva taɓali mɛ̨i Yai-Laa lííla.

⁷ Ə́ lansan pu ɲɛli tɛitɛi mɛ̨i, ə́ gələn, yili a kɛ a kili too ŋą kɔ̨nɔ̨n; Yai-Laa nwɔ haláá hɛn ni.

⁸ «Hviitɔɔ yələ tɛitɛi kəlee, da di laa tii Yai-Laa lííla. Yili a həɠə Israɛlə lonnii yəi, mįnɛ̨ ka tii a yələ kəlee mɛ̨nį, hva ɉəɠə mą.

⁹ Aarɔn da nonnii di wɔɔli, di kaa pai kɛi mįi kɛɛnąą mąąhəɠɛɛ ɓa; Mąąhɔlɔɓo, hɛn mąąhəɠɛɛ li, yii di ɉəɠə Yai-Laa kɔ́ haláá hu. Ka mąą tɔ́n da li a yələ kəlee hva ɉəɠə mą.»

Mɛ̨nį ɲɔ̨n gwələ kulɔ pələ

¹⁰ Israɛlə nɛ̨ɛ̨nu ta lon da Eziptə mun da lon, diɛi lɛɛ Israɛlə lonnii pɔ diɛ pa; hvaa ə too Israɛlə nɛ̨ɛ̨nui ti lon da Eziptə mun da di lɔwai,

¹¹ Israɛlə nɛ̨ɛ̨nu lon tii, ə Yálá laa ɓɛlɛ too, ə Yálá lalan. Di ɉon di paa la Moisə pɔ. Nɛ̨ɛ̨nui tii laa ɓaa kɛ a Selomitə, Divri lon ni, ə kulɔ Dan huwuhu.

¹² Di dɛɛ nuą pɔ, əgɛ di di yee kɛ mą a nɛlɛɛ, ə lɛɛ ɉu diɛ Yai-Laa woo mąąkpɔn.

¹³ Nąąlɔwai Yai-Laa yɛ Moisə ɓa:

¹⁴ «Nui tii nalan bili, ka kulɔ la daa pulu pələ, nuąi kpɔ nwoo mɛ̨n, di di yee laa nwuɔ̨, ɛlɛɛ Israɛlə nuą kəlee di ɉɔɔ a kwɛni.

¹⁵ Yili pulu, niɛwooi ŋɛ̨i kɛ Israɛlə lonnii diɛ, yɛ́ diɛ: «Nui lɔpee a nwɔ Yálái lalan, nwɔ nɛ̨ŋɛ̨n nwulu a lɛɛ gbɔwɔ nwuɔ̨.

¹⁶ Ɛlɛɛ, nui a Yai-Laa laa ɓɛlɛ too woo ɓo, da baa; yɛ ə kɛ a nwɛ̨ą, yɛ ə kɛ a nɔi lon, Israɛlə nuą kəlee da ɉɔɔ, da baa mąąhɔlɔɓo, aa Yálá laa ɓɛlɛ too.

¹⁷ «Nui a mɛlan gaalon gɛlɛ ə baa, mąąnɛ̨ɛ̨ di gɛlɛɓo kɛmun tii paa

¹⁸ Nui a taatɛlɛɛ ta kɛlɛ ə baa, mąąnɛ̨ɛ̨ ə bɔɔ kulɔ ɉu a vulú.

¹⁹ «Nui a nɔi lon da mąą nwąną, mąąnɛ̨ɛ̨ di mąą nwąną yaa kpɛli.

²⁰ Nui a nu ta nąą ta yali, da mąą nu yaa kpɛli nąą ta yali; Yá nu ɲɛ̨i wolo lɔ di ə́ ɲɛ̨i wolo, yá nu ɲin gulɔ, di ə́ ɲin gulɔ; Mɛ̨nį lɔ nu a bɛlɛ mɛlan ma, yaa lɔ ɓə da bɛlɛ mą.

²¹ «Nu a taatɛlɛɛ paa, a bɔɔi kulɔ, nui a nu kɛlɛ a baa, da mąą nu paa.

²² «Nɔi mąą tɔ́n gaa lɔ pai kɛi tɔ̨nɔ̨ nu kəlee mąą mɛ̨nį hu, yɛ ə kɛ a nwɛ̨ą, yɛ ə kɛ a nɔi lon, Mąąhɔlɔɓo, ɲą́ą́ ɓə gáá a Yai-Laa ka wɔ Yálá,»

²³ Moisə ə mɛ̨nįɠaai tii kəlee laa həli Israɛlə lonnii diɛ. Nui tii Yálá lalan, di kulɔ la daa pulu, di ɉɔɔ a kwɛni. Mɛ̨nįi Yai-Laa ə Moisə tí la, Israɛlə lonnii di gɛ.