Levetekɔ 23 - Yálá laawoo hɛɓɛ (dc)

Israɛlə hɛliɠaa Túwɔ́ yələɠaa

¹ Yai-Laa yɛ Moisə ɓa:

² «'Mo Israɛlə lonnii diɛ, yɛ́ diɛ: «Yai-Laa nwɔ hɛli kpɛa-kpɛai da həli, mąąnɛ̨ɛ̨ ka ka ɲąąkpɔn, əgɛ, ka mąąwiɛ. Voló kpɛa-kpɛai mąąnɛ̨ɛ̨ gu gu kee kaa la, diɛ ka:

³ «Nu kəlee ə mąą kóló kɛ hvóló mɛ̨ida yee mu, kɛlaa, voló mɛ̨ihveelɛ yələ kaa a hvįįtɔɔ hvóló; ka ka ɲąąkpɔn a mąą yələ, ka náá mąąwiɛ. Ka hvo kóló ta lɔpee kɛ a mąą yələ. Yai-Laa nwɔ hvólói li, ɓɛi lɔpee ka kɛ laa heeni, ka ka kili lɛɛ ɉu.

⁴ «Yai-Laa nwɔ hɛli kpɛa-kpɛai yiiɠaai mąąnɛ̨ɛ̨ ka ka ɲąąkpɔn na, kaa mąąwiɛ, diɛ ka:

Pakə hɛli

⁵ «Ɲąnin dɔlɔɔ nwɔ hvóló pow kɔ́w nąąn ɲələ, yələ wulii, Yai-Laa nwɔ pakə hɛli ka tii.

⁶ «Ɲąnin tii nwɔ hvóló pow kɔ́w lɔɔli yələ ɓə gaa a lɛɠɛi dɛ hɛn və ɉu nwɔ hɛli, Yai-Laa nwɔ li. Hvóló mɛ̨ihveelɛ yee mu lɛɠɛi dɛ hɛn və ɉu, ya ɓə ka mįi.

⁷ Nɔwɔ kuu voló tɔlɔɔ yələ, ka ka ɲąąkpɔn, ka hva kóló walawala ta kɛ.

⁸ Nɔwɔ kuu voló kəlee yee mu, ka kɛ haláá kulɔi Yai-Laa ɓa, yii da gəlee kələn; voló mɛ̨ihveelɛ yələ, ka ka ɲąąkpɔn, ka hva kóló walawala lɔpee da kɛ.»

Hɛn nįnɛ̨ hɛli

⁹ Yai-Laa ə mo Moisə ɓa, yɛ mą:

¹⁰ «'Mo Israɛlə lonnii diɛ, yɛ́ diɛ: «Nɔi ŋɛ̨i gáá pai dɛɛi ka pɔ, ɓɛlɔwai ka li ka hee la ɉu, mɔ̨nun deei lɔwai a ɉəli, mɔ̨nun gɔn dɔlɔɔi ka dee, ka dɛɛ ɉaláá laa həli mun bɔ.

¹¹ Ɉaláá laa həli mun a mɔ̨nun gɔn tii lɛ Yai-Laa ɓa a naa həli pələ, ə ɲee hee mu, yili yɛ ka wɛli too mą. Ɉaláá laa həli mun a naa həli a túwɔ́ hvóló mąą yələ laa ɓoɔ.

¹² Voló tɔ̨nɔ̨i tii yee mu, mąąnɛ̨ɛ̨ ka haláá kulɔ Yai-Laa ɓa a kwɛlan dɔ̨nɔ̨ ɓɛlaa lon, yii kpɛɠii hva kɛ mą, a haláá hɛn da gəlee kələn,

¹³ Ka Yai-Laa kɔ́ hɛn bɛlɛ mą a lɛɠɛ hunwɔ̨ gəgən ɉu mɛ̨ida, ɲɔwɔɔ a wulɔ, yili kaa a haláá kɔ̨nɔ̨n mąą kun nɛ̨ɛ̨ a Yai-Laa nwɔɔ, yɛ niilaa, da nɔɔi ka bu nɔi ɓa, ɓɛi ka ɉaláá kulɔ laa, yii a kɛ a múluun gbulɔ.

¹⁴ Mąą hvo nɛ̨ɛ̨li, ka hvo mɔ̨nun nįnɛ̨ mįi, da ka pɔ yɛa hɛn nįnɛ̨ɠaa, hvo kɛ li ka gbɛa nįnɛ̨ tɛɛ Yálá pɔ. Ka wɔ yɛnɛ̨ɛ̨ kɛ pələ li a kwɛlan gəlee, ɓɛi lɔpee ka kɛ laa heeni.

Mɔ̨nun dee hɛli

¹⁵ «Túwɔ́ yələ a tɛɛ, ə həɠə ɲələi ŋɛ̨i ka paa la a mɔ̨nun gɔn dɔlɔɔɠaa, ka lɔwɔ mɛ̨ihveelɛ lonon,

¹⁶ Nɔwɔ mɛ̨ihveelɛnąą kulaa ɲą ɓə a voló pow lɔɔli yələ; ka pɛli kɛa Yai-Laa kɔ́i a mɔ̨nun nįnɛ̨.

¹⁷ Ɓɛi lɔpee ka kɛ laa heeni, ka pa a lɛɠɛ mɔnŋąą hveelɛ, dɛitɛi kəlee pɛliɛ a gəgən ɉu haaɓa lɛɠɛ hunwɔ̨, dɛ hɛn yɛ ɓo ɉu. Ka wɔ hihɛnŋąą mɛ̨ikɔw li, a Yai-Laa nwɔɔ.

¹⁸ Yii mąąnɛ̨ɛ̨ ka naa nɛɠɛ mɔ̨nŋąą tii mɛ̨i, ya ɓaa: kwɛlan dɔ̨nɔ̨ ɓɛlaa lonnii mɛ̨ihveelɛ, kpɛɠii hvo kɛ da ɓa; nįŋɛ̨ hilɛ tɔ̨nɔ̨, ɓɛlaa hilɛ hveelɛ, di gəlee kulɔ Yai-Laa ɓa a haláái da gəlee kələn, di bɛlɛ Yálá kɔ́ hɛn ma da nɔɔ; haláá mąą kun nɛ̨ɛ̨ li yɛ Yai-Laa liilaa.

¹⁹ Ka nɛ̨ŋɛ̨n mąąhvaalɛɛ haláá kulɔ a ɓooli hilɛ, ka liilaa haláá kulɔ a kwɛlan dɔ̨nɔ̨ ɓɛlaa hilɛ hveelɛ.

²⁰ Ɉaláá laa həli mun a mɛlaa lonnii hveelɛi tii laa həli Yai-Laa ɓa a naa həli pələ, ə bɛlɛ mɔ̨nun dɔlɔɔ lɛɠɛ mɔ̨n ŋąą tii ɓa. Di kaa a hɛn mąąhəɠɛɛɠaa, a Yai-Laa nwɔɔ, ɉɛnŋąą tii da lɛɛ ɉaláá laa həli mun ɲəi.

²¹ Voló tɔ̨nɔ̨i tii yee mu, ka nuą təli, ka ka ɲąąkpɔn mą́ą́wiɛ mɛ̨nį ɓa, ka hva kóló lɔpee ta kɛ a mąą yələ; yili kaa a ka wɔ yɛnɛ̨ɛ̨ kɛ pələ ta, kwɛlan gəlee mɛ̨nį li, ɓɛi lɔpee ka kɛ laa heeni, hva ɉəɠə mą.

²² «Ka kɛi ka pɔ yɛa mɔ̨nun dee, ka hvo dee ka hvo həli la nɔwɔ laa pɔ, ka kɛi mɔ̨nun dee, mɔ̨nun gbaɠa yiiɠaa tii da too, ka hvo ɲɛɠɛ díi hu. Ka yiliɠaai lɛɛ laa a yeehowolo nuą da nwɛ̨ą di wɔɔ. Ɲą́ą́ ɓə gáá a Yai-Laa ka wɔ Yálá.»

Kili lɛɛ ɉu hvóló da kwəinɛ̨ɛ̨ hvóló

²³ Yai-Laa yɛ Moisə ɓa:

²⁴ «'Mo Israɛlə lonnii diɛ, yɛ́ diɛ: «Ɲąnin mɛ̨ihveelɛnąą nwɔ hvóló dɔlɔɔ, kaa ka yəi a hvįįtɔɔ hvóló, yɛ mɛ̨nį kili too ka ŋą, ə ɓo a hɛli, ka ka ɲąąkpɔn a ɲələ, kaa mą́ą́wiɛ.

²⁵ Ka hva kóló lɔpee ta kɛ a mąą yələ, haláái da gəlee kələn, kaa gulɔ Yai-Laa ɓa.»

Nɛ̨ŋɛ̨n mąąhvaalɛɛ hvóló kɛnɛ̨

²⁶ Yai-Laa yɛ Moisə ɓa:

²⁷ «Yili a həɠə laa, ɲąnin mɛ̨ihveelɛnąą tii nwɔ hvóló pow yələ, nɛ̨ŋɛ̨n mąąhvaalɛɛ hvóló kɛnɛ̨ li, ka haláá kulɔ a ɲələ, ka hin nɔ.

²⁸ Ka hvo kóló lɔpee ta kɛ a ɲələ, nɛ̨ŋɛ̨n mąąhvaalɛɛ hvóló kɛnɛ̨ li, diɛ nɛ̨ŋɛ̨n mąąhvaalɛɛ kóló kɛ la ka mɛ̨i Yai-Laa ka wɔ Yálái lííla.

²⁹ Nui lɔpee a wala hin nɔ a mąą yələ, mąąnɛ̨ɛ̨ di gulɔ nwɔ nuą lɔwai.

³⁰ Nui lɔpee a kóló kɛ a mąą yələ, ŋą́ gulɔ nwɔ́ nuąi lɔwai.

³¹ Ka hvo kóló lɔpee ta kɛ a mąą yələ, yili kaa a ka wɔ yɛnɛ̨ɛ̨ kɛ pələ mąą tɔ́n da, kwɛlan gəlee yee mun, ɓɛi lɔpee ka kɛ laa heeni, hva ɉəɠə mą.

³² Túwɔ́ yələ li ka yəi a hvįįtɔɔ yələ, ka hin nɔ a mąą yələ; ə həɠə ɲąnin nwɔ hvóló mɛ̨inąąn ɲələ ɓa, ə həli la bulu ɓa yələ laaɓoɔ ɓa, ka hva kóló lɔpee ta kɛ.»

Ɉəɠə kələ hɛli

³³ Yai-Laa ə mo Moisə ɓa, yɛ mą:

³⁴ «'Mo Israɛlə lonnii diɛ, yɛ́ diɛ: «Ɲąnin mɛ̨ihveelɛnąą tii nwɔ hvóló pow kɔ́w lɔɔli yələ ɓə gaa a ɉəɠə kələ hɛli, ka ɉɛlii tii pu hvóló mɛ̨ihveelɛ ye mu, kaa Yai-Laa mąąwiɛ la.

³⁵ Voló tɔlɔɔ, ka ka ɲąąkpɔn, ka hva kóló walawala kɛ a ɲələ.

³⁶ Voló mɛ̨ihveelɛi tii kəlee yee mu, mąąnɛ̨ɛ̨ kaa haláá kulɔ Yai-Laa ɓa, a haláái da gələn. Voló mɛ̨ihaaɓa yələ, ka ka ɲąąkpɔn, ka haláá kulɔ Yai-Laa ɓa a ɲələ. Volói tii ɓə gaa a ɉɛli ɲee laa kulɔ yələ, ka hva kóló walawala ta kɛ a mąą yələ.

³⁷ «Yai-Laa nwɔ hɛli kpɛa-kpɛaa ka tii, mąąnɛ̨ɛ̨ ka ka ɲąąkpɔn na, kaa haláá laa həli Yai-Laa ɓa, haláái da gəlee kələn, kaa naa həli, a wala kɛ tii, Yálá kɔ́ haláá, liilaa haláá, kaa Yálá kɔ́ a lɔɔ, yɛ bələi voló tɛitɛi kəlee nwɔ haláá heekpəlin na kaa la.

³⁸ Yili a kulɔ ɉu, ka ka kili lɛɛ túwɔ́ yələ mąą tɔ́n hon bələ hu, yai gaa a Yai-Laa nwɔɔ; ə mą kɛ a Yálá kɔ́ hɛnŋąą ka di laakwɛlanmo, ɛlɛɛ, yiiɠaai ka gulɔ Yai-Laa ɓa a naa gwəi haláá, ka ɉaláá hɛnŋąą tii kəlee pɛlɛ gee ɓa ka naa həli a mąą yələ.

³⁹ «Ɲąnin mɛ̨ihveelɛnąą nwɔ hvóló pow kɔ́w lɔɔli yələ, ka kpɛɛ kɛa a ka pɔ yɛa hihɛnŋąą kəlee ɓa kulaa, mąąnɛ̨ɛ̨ ka hiɛ mąąhəɠɛɛ kulɔ a hɛli Yai-Laa ɓa hvóló mɛ̨ihveelɛ yee mu. Voló tɔlɔɔ a kɛ a hvįįtɔɔ hvóló; voló mɛ̨ihaaɓa yələ ə ɓo a hvįįtɔɔ hvóló.

⁴⁰ Voló dɔlɔɔ yələ, ka pa a ka wɔ hihɛnŋąąi má lɛlɛɛɠaa, ka pa a gwala laa, a wulu laa nwunu, da yá-kwɛlɛ-ɓɔɔ laa. Ka kɛi pa, ka pa a ka kwəinɛ̨ɛ̨ voló mɛ̨ihveelɛi tii kəlee yee mu; Yai-Laa ka wɔ Yálái lííla.

⁴¹ Ka ɉiɛ mąąhəɠɛɛ tii kulɔ a hɛli Yai-Laa ɓa, kaa mąąwiɛ hvóló mɛ̨ihveelɛ yee mu. Kwɛlan gəlee yee mu, ka wɔ yɛnɛ̨ɛ̨ kɛ pələ mąą tɔ́n da li, hva ɉəɠə mą.

⁴² Hvóló mɛ̨ihveelɛ yee mu, Israɛlə lonnii kəlee kpun, da kɛ ɉəɠə pɛlɛ́ mu,

⁴³ əgɛ, kwɛlan ɉəli pələ tɛitɛi, kaa gbaɠala kaa, kaa diɛ kələɠaa ɓə Israɛlə lonnii di kɛ mu, ɓɛlɔwai ŋį́ di kulɔ la Eziptə lɔi hu. Ɲą́ą́ ɓə gáá a Yai-Laa ka wɔ Yálá.»

⁴⁴ Bələi mąąnɛ̨ɛ̨ di Yai-Laa nwɔ hɛliɠaai pu la, Moisə ə gəlee bələ lɛ Israɛlə lonnii diɛ.