Levetekɔ 22 - Yálá laawoo hɛɓɛ (dc)

Ɉaláá hɛnŋąą mįi pələ

¹ Yai-Laa yɛ Moisə ɓa:

² «'Mo Aarɔn da nonnii diɛ, yɛ́ diɛ: «Gɔɓo hɛn mąąhəɠɛɛɠaai Israɛlə lonnii da paa la bɔ́, di hvo tunwɔ̨n mą, əgɛ, di hvo pa náá pu. Ɲą́ą́ ɓə a Yai-Laa.

³ «'Mo diɛ yɛ́ diɛ: «Tɔn a kɛ ɉaláá laa həli nuą yəi bɛlɛ́n ɉulɔnu ta ɓa, a lɛɠɛ gɔɓo hɛn mąąhəɠɛɛɠaai Israɛlə lonnii da paa la Yai-Laa pɔ da ɓa, mąą nui hva kɛa lɛɛ nwɔ́ kólói hu. Yələ kəlee mɛ̨nį li. Ɲą́ą́ ɓə gáá a Yai-Laa.

⁴ Aarɔn kwəilon lɔpee hvólóɲɔ̨n a kɛ mą, a wala kɛ tii lə́ŋąn, hva pɛli ɉaláá hɛn mąąhəɠɛɛ ta mįi, hvo kɛli a gbɛa dɔ́n tii kulɔ gbɔwɔ ɓa, ə mąąhəɠə. Bələ lɔ ɓə gaa la, nui a tunwɔ̨n hɛn mąąliɓiɛ ta ɓa, ə kɛ a powa, ə kɛ a nui mąąkalayá kaa pui;

⁵ Ə kɛ a nui aa tunwɔ̨n ponun da ɓa yii tɔ́n gaa mą, a wala kɛ tii, aa tunwɔ̨n nu ta ɓa, mąą nu mąąliɓiɛ a tɔ́n ɉuwu lɔpee ta laa pɔɔ, di kəlee di mąą mɛ̨nį a kɛ lɔ tii.

⁶ Nui a tunwɔ̨n ɉɛnŋąąi tii ta ɓa, mąą a liɓi, ə lɛɛ ɉu yələ ə wulu; hva pɛli ɉaláá kɔ̨nɔ̨n mąą həɠɛɛ ta mįi, hvo kɛ li a gbɛa nwaa.

⁷ Hvóló a too kɛa, mąą nu mąą a həɠə, a pɛli mą ɉaláá kɔ̨nɔ̨n da mįi nąąlɔwai, mąąhɔlɔɓo, gɔ̨nɔ̨n ni.

⁸ Mąą hvo nɛ̨ɛ̨li Aarɔn huwuhu mun da lɔpee hvo huwɔi aa haa gbɔwɔ ɓa da mįi, a wala kɛ tii, yii kɛ mɛlan ɉuwɔ ta aa wolo mą; a yili kɛ tii, a tɔ́n bɛlɛ gbɔwɔ ɓa. Ɲą́ą́ ɓə gáá a Yai-Laa.

⁹ «Mąąnɛ̨ɛ̨ di di yee kɛ nwɔ́ tɔ́n nwooɠaai diɛ, di hvo di kpɔwɔ too nɛ̨ŋɛ̨n ɉu kɔ̨nɔ̨n mɛ̨nį hu. Da nwɔ́ɔ́ tɔ́n nwooɠaai mąą kala, da nəi haa. Ɲą́ą́ ɓə gáá a Yai-Laa, yai a di mąąhəɠə.

¹⁰ «Nui hvo ɓaa ɉaláá laa həli mun da, hva ɉaláá hɛn mąą həɠɛɛ ta mįi, ə mą kɛ ɉaláá laa həli mun mąą nwɛ̨ą, a wala kɛ tii, nwɔ kóló kɛmun yai da vɛla kulɔ, di ta lɔpee di hva hɛn mąą həɠɛɛ ta mįi.

¹¹ Kɛlaa, ɉaláá laa həli mun da a nu ya a wali, a pɛli ɉaláá kɔ̨nɔ̨n da mįi lɔ yɛ bɛlɛ́n mun da.

¹² Ɉaláá laa həli mun da lon nɛ̨ɛ̨nu a hee nui hvo a haláá laa həli mun bɔ, hva kɛa pɛli ɉaláá kɔ̨nɔ̨n mąąhəɠɛɛ ta mįi.

¹³ Kɛlaa, ɉaláá laa həli mun lon nɛ̨ɛ̨nu ta a kɛ a kalanin, a wala kɛ tii, ɉilɛ aa gulɔ lɔwɛi, lon a wala kɛ di lɔwai, a pənə a pa nąn bɔɔli, yɛ bələi ə kɛ la laa a nɛ̨ɛ̨non ɲələ, a pɛli nąn gɔ̨nɔ̨n da mįi. Yili a həɠə laa kɛa, nui hvo ɓaa ɉaláá laa həli mun, mąą hvo nɛ̨ɛ̨li hvo da mįi.

¹⁴ Nui a ɉɛn mąą həɠɛɛ ta mįi dɛɠii, mąąnɛ̨ɛ̨ ə bɔɔi tɛɛ ɉaláá laa həli mun bɔ ə da pɛlɛ kpɔ hɔlɔmun mą.

¹⁵ «Mąą hvo nɛ̨ɛ̨li ɉɛnŋąąi Israɛlə lonnii da gulɔ di wɔɔ hɛnŋąą lɔwai a Yai-Laa kɔ́ hɛn, ɉaláá laa həli nuą di hvo mąąliɓi.

¹⁶ Da ɉaláá hɛn mąą həɠɛɛɠaa tii ta mįi, ɓɛlɔwai ɉɛn tii mįi mɛ̨nį mąą laa hvo tɛɛ li la di pɔ, da nɛ̨ŋɛ̨n ɉee Israɛlə nuą nwuɔ̨, yii mąąnɛ̨ɛ̨ di di pɔɔŋą pɛli ɉu. Mąąhɔlɔɓo, ɲą́ą́ ɓə gáá a Yai-Laa, yai a di mąąhəɠə.»

Bələi mąąnɛ̨ɛ̨ di ɉaláá taatɛlɛɛɠaa həɠə la

¹⁷ Yai-Laa yɛ Moisə ɓa:

¹⁸ «'Mo Aarɔn da nonnii diɛ, da Israɛlə lonnii kəlee, yɛ́ diɛ: «Israɛlə mun da, a wala kɛ tii, nwɛ̨ąi heeni Israɛlə lɔi hu, a kɛ bɔ ə pa a Yálá mąąwiɛ haláá hɛn Yai-Laa pɔ, ə kɛ a yii gaa a naa gwəi haláá hɛn, ə kɛ a yii ə naakwɛlanmo,

¹⁹ ka kɛ bɔ di di yee hee mu, mąąnɛ̨ɛ̨ ɉaláá hɛn ə kɛ a taatɛlɛɛ hilɛ, kpɛɠii hvo kɛ mą, yɛ ə kɛ a nįŋɛ̨, ɓɛlaa, a wala kɛ tii ɓooli.

²⁰ Ka hvo taatɛlɛɛ ta laa həli, yii kpɛɠii kaa mą, a kɛ tii, di hva di ɲɛ̨i lɛlɛɛ hee kaa.

²¹ Nu ta a nwoo kwɛlɛ, a wala kɛ tii, a lɛɛ gbɔwɔ ɓa, gwəi a nɛ̨ɛ̨, yɛ kɛ gaa liilaa haláá laa həli Yai-Laa ɓa, yɛ ə kɛ a nįŋɛ̨, yɛ ə kɛ a ɓɛlaa, a wala kɛ tii, ɓooli, a kɛ bɔ di di yee hee mu, mąąnɛ̨ɛ̨ kpɛɠii lɔpee ta hvo kɛ daatɛlɛɛ tii ɓa.

²² Daatɛlɛɛ ɲɛ̨i hvo kɛ a nwoloɔ, nąą ta hvo kɛ a ɲaliɛ, nąą ta hvo kɛ a deɛ mą, pala hvo kɛ mą, lɔwɔ hvo kɛ mą, hvo kɛ kwɛlɛɲɛ̨-kwɛlɛɲɛ̨. Ka hvo ɉɛn daaləi tii ta laa həli Yai-Laa ɓa, yɛ ə kɛ a haláá hɛn da gələn ɉaláá kulɔi.

²³ Taatɛlɛɛ lɔpee, ə kɛ a nįŋɛ̨, ə kɛ a ɓɛlaa, a wala kɛ tii ɓooli, kpɛɠii a kɛ mą, nąą ta a kɛ a ɲaliɛ, da pɛli di gulɔ a haláá kpɛli kpɛli, kɛlaa a kɛ a naa gwəi haláá, di hva di yee hee mu.

²⁴ Ka hvo taatɛlɛɛ ɓɛlaa ta laa həli Yai-Laa ɓa, ka hvo yili ta kɛ ka wɔ lɔi hu.

²⁵ Ka hvo kpɛli daatɛlɛɛ taaləi tii ta hon nwɛ̨ą yəi, kaa naa hɛli ka wɔ Yálái ɓa a gɔ̨nɔ̨n, di kala ka tii daa mo, kpɛɠii ka tii daa ɉee diɛ, di hva pɛli di yee heei mu ka yəi.»

²⁶ Yai-Laa yɛ Moisə ɓa:

²⁷ «Taatɛlɛɛ ta a gaa, ə kɛ a nįŋɛ̨ lon, ə kɛ a ɓɛlaa lon a wala kɛ tii, ɓooli lon; a lɛɛ nee ɓa, ə hvóló mɛ̨ihveelɛ kɛ. A kɛ tii, da pɛli di naa həli Yai-Laa ɓa a haláá; da pɛli di yee heei mu.

²⁸ Kɛlaa, ka hvo taatɛlɛɛ ta paa da non hvóló tɔ̨nɔ̨ yee mu, ə kɛ a nįŋɛ̨, ə kɛ a ɓɛlaa.

²⁹ «Ka kɛi Yai-Laa mąąwiɛ haláá kulɔ, ka gulɔ a gulɔ pələ, əgɛ, yɛ pɛli ɲee heei mu.

³⁰ Mąąnɛ̨ɛ̨ di ɉaláá huwɔi yili kəlee mįi a mąą yələi tii lɔ, di hva da lɛɛ laa yələ hvo ɓɔ mą. Ɲą́ą́ ɓə gáá a Yai-Laa.

³¹ «Mąąnɛ̨ɛ̨ ka nwɔ́ tɔ́n nwooɠaa tii laa hɔmo, ka bɔ mɛ̨nį kɛ. Ɲą́ą́ ɓə gáá a Yai-Laa.

³² Mąą hvo nɛ̨ɛ̨li, ka hvo náá mąąhəɠɛɛ ŋɛ̨i kala, ya ɓə a gɛ Israɛlə lonnii di mą́ą́həɠə mɛ̨nį kili kɔ́lɔn. Ɲą́ą́ ɓə gáá a Yai-Laa, yai a ka mąąhəɠə.

³³ Ɲą́ą́ ɓə ka kulɔ Eziptə lɔi hu, əgɛ, ŋį́ kɛ a ka wɔ Yálá. Ɲą́ą́ ɓə gáá a Yai-Laa.»