Levetekɔ 20 - Yálá laawoo hɛɓɛ (dc)

Túwɔ́ pələ ɲɔ̨n gulɔmun ɉutɔɔ pələ

¹ Yai-Laa yɛ Moisə ɓa:

² «'Mo Israɛlə lonnii diɛ, yɛ diɛ: «Nui lɔpee, ə kɛ a Israɛlə lon, ə kɛ a nwɛ̨ąi heeni Israɛlə lɔi hu, a Molɛkə kɔ́ a non da, mąąnɛ̨ɛ̨ di mąą nu paa, nɔi nuą da baa a kwɛni.

³ Ɲą́ą́n, ŋą́ ɲɛ̨i ɲɔ̨nwɔ̨ɔ̨ hee mąą nu ɓa, ŋį́ gulɔ nɔi nuą lɔwai; mąąhɔlɔɓo, aa non da tɛɛ Molɛkə pɔ, yɛ nwɔ́ pɛ́lɛ́i mąąliɓi la tii, ɛlɛɛ yɛ náá ɓɛlɛkpɛɛ mą.

⁴ Nɔi lonnii da di ɲįnąą kpulu ɓɛlɔwai nui tii kaa Molɛkə kɔ́i la a non, da wala kɛ bɔ di hvo baa,

⁵ Ɲą́ą́ gbinįi, ŋą́ hee mąą nu ɓa da ɲəi bɛlɛ́n nuą, gɛ́ di kulɔ nɔi lonnii lɔwai, ə mą kɛ nuąi kpɔ too bɔ ɉaláái tii kulɔi lɔwai Molɛkə ɓa.

⁶ «Nui lɔpee a li ɲąmuątaa tɔlukpɛmun da pɔɔli mąą tɔlukpɛ mɛ̨nį ɓa, yɛ gbɔwɔ mąąiɓi la tii, ŋą́ hee mąą nu hu, ŋį́ gulɔ nɔi nuą lɔwai.

⁷ 'Ka ka túwɔ́ pələ mąąhəɠə, ka mąą ə həɠə, mąąhɔlɔɓo, ɲą́ą́ ɓə gáá a Yai-Laa ka wɔ Yálá.

Yiipɛlɛ́n mɛ̨nį yiiɠaai tɔ́n gaa mą

⁸ «Ka ka yee kanąn nwɔ tɔ́nŋaai diɛ, ka bɔ túwɔ́ ɓo. Ɲą́ą́ ɓə gáá a Yai-Laa, yai a ka mąąhəɠə.

⁹ «Nui a nąn a wala kɛ tii nee lalan, mąąnɛ̨ɛ̨ di baa. Ɲąmą wulu a lɛɛ gbɔwɔ nwuɔ̨, mąąhɔlɔɓo, aa nąn da nee di lalan.

¹⁰ «Nui a laa a mɛlan nɛ̨ą, da nu hveelɛi tii paa.

¹¹ «Nui a laa a nąn nɛ̨ą ta, aa nąn gbuwulu kaa, da di nu hveelɛi di paa, di ɲąmą wulu a lɛɛ di nwuɔ̨.

¹² «Nui a laa a non nɛ̨ą, mąąnɛ̨ɛ̨ di di nu hveelɛi di paa; túwɔ́ pələ ɲɔ̨n ga tii di gulɔ, di ɲąmą wulu a lɛɛ di nwuɔ̨.

¹³ «Hulɔnu a laa a mɛlan ɉulɔnu, yɛ bələi a laa la a nɛ̨ɛ̨nu, yɛnɛ̨ɛ̨ həɠə mąą mɛ̨nį ka tii di nu hveelɛi daa gɛ, mąąnɛ̨ɛ̨ di di paa, di ɲąmą wulu a lɛɛ di kpɔwɔ nwuɔ̨.

¹⁴ «Nui a nɛ̨ɛ̨nu da nee di həɠə a nɛ̨ąni, kɛɛ kala mɛ̨nį li, mąąnɛ̨ɛ̨ di di kələn. Bələ ɓə nwɛli ɲɔ̨nwɔ̨ɔ̨ kɛɛ ti a kpɛɛ la ka lɔwai.

¹⁵ «Hulɔnu ta a laa a taatɛlɛɛ, mąąnɛ̨ɛ̨ di baa, ɛlɛɛ di daatɛlɛɛ paa.

¹⁶ «Nɛ̨ɛ̨nui a lɛɠɛ huwɔ ta ɓa yɛ kɛ da yaa di laa, mąąnɛ̨ɛ̨ ka nɛ̨ɛ̨nui tii da ɉuwɔ di paa, hvo kɛi di haa, di ɲąmą wulu ə lɛɛ di nwuɔ̨.

¹⁷ «Hulɔnu a mąąhala kɛ a nɛ̨ą, di ɓo nąn ɓa, a wala kɛ tii di ɓo lee ɓa; diɛ di kee kpuwulu kaa; nwumɛ̨ mɛ̨nį li, mąąnɛ̨ɛ̨ di di lɛɛ di tɔ̨nɔ̨ kon ɉu di wɔ lɔi hu nuą ɲɛ̨i ɓa, mąąhala kpuwulu mɛ̨i həɠəi ə mo, yili a kɛ nwuɔ̨ a nɛ̨ŋɛ̨n.

¹⁸ «Hulɔnu a ɲąnin nɛɛ nɛ̨ɛ̨nu ɓa a laa la, mąąnɛ̨ɛ̨ di di nu hveelɛi di lɛɛ di tɔ̨nɔ̨ kon ɉu, mąąhɔlɔɓo, di nu hveelɛi di hvaa mą, di nɛ̨ɛ̨nui tii nwɔ ɲąmą nwun gulɔi mɛ̨i həɠə.

¹⁹ «'Hvó laa a ə́ lee niɛ nɛ̨ɛ̨nu, awala kɛ tii, nəɠə nɛ̨ɛ̨nu; 'hvó laa a ə́ nąn mąąhala, mąąhɔlɔɓo, di kəlee di kaa a kɔ́lɔ tɔ̨nɔ̨, nuą da yili kɛ tii, daa nɛ̨ŋɛ̨n ɉəɠə.

²⁰ «Nui a laa a galá nɛ̨ą, aa galá kpuwulu kaa; di nu hveelɛi da lɛɛ a lon nwɛli di haa.

²¹ «Nui a niɛ a wala kɛ tii nəɠə nɛ̨ą həɠə a nɛ̨ą, mąąliɓi mɛ̨nį li, aa nąn non gbuwulu mɛ̨i həɠə, da lɛɛ a lon nwɛli.

²² «Ka ka yee kanąn nwɔ́ tɔ́nŋąą da bɔ liɛwooɠaa kələə ɓa, ka bɔ mɛ̨nį kɛ, əgɛ, nɔi ŋɛ̨i gáá ka lɔi ɉu, kaa hee laa, nɔi hvo pa nəi ɲee kulɔ ka mu.

²³ Nu huwui tii gáá di kpɛi ka tɔwɔi, ka hvo hvilɛn di wɔɔ yɛnɛ̨ɛ̨ kɛ pələ pulu; dúwɔ́ ɲɔ̨nŋąą tii kɛi di mo, yili ɓə gɛ di ɓɛlɛ yɛ kpɛɛ la gwə́i;

²⁴ ɛlɛɛ, gɛ́ kɛ kaa: «‹Kaa ɓə di wɔ lɔi kaa lɛɛi ka yəi, ɲą́ą́ ɓə dɛɛi ka pɔ a ka wɔɔ. Ɓɛi hɛn gəlee da lɛlɛ laa.› «Ɲą́ą́ Yai-Laa ka wɔ Yálá, ɲą́ą́ ɓə ka həɠə ɉu hį́i lɔi kəlee lɔwai.

²⁵ Yili ɓa, huwɔɠaai tɔ́n gaa diɛ, da yiiɠaai tɔ́n və diɛ, nwɛ̨niɠaa tɔ́n gaa diɛ, da yiiɠaai tɔ́n və diɛ, mąąnɛ̨ɛ̨ ka kɛ a di kulɔ nɔwai kɔ́lɔn ŋąą, əgɛ, ka hvo pa nəi tɔ́n bɛlɛ ka kpɔwɔ ɓa a ɉuwɔɠaai tii ta, da nwɛ̨niɠaa tii ta laa pɔɔ, da yiiɠaa kpɔ da tɔ́n bɛlɛ nu ɓa, diɛ hiɛ lɔi mɛ̨i. Ŋą́ di kulɔ nɔwai lɛ tii kaa, əgɛ, ka kɛ a di kɔ́lɔn ŋąą.

²⁶ «Ka kaa a Nwɔ́ɔ́ɠaa, 'ka ka mąąhəɠə, Mąąhɔlɔɓo, Mą́ą́həɠɛɛi, Ɲą́ą́ gáá a Yai-Laa; Ŋą́ ka həɠə ɉu hį́i lɔi kəlee lɔwai, əgɛ, ka kɛ a nwɔ́ɔ́.

²⁷ «Nui lɔpee, ə kɛ a hulɔnu ə kɛ a nɛ̨ɛ̨nu a nwɔ mɛ̨nį laa həli ɲąmuątaa tɔlukpɛ nuą diɛ, mąąnɛ̨ɛ̨ di mąą nui paa; da lɛɛ ɉɔɔi a kwɛni, ə lɛɛ ɉu ə haa. Di ɲąmą wulu a lɛɛ di kpɔwɔ nwuɔ̨.»