Levetekɔ 2 - Yálá laawoo hɛɓɛ (dc)

Yálá kɔ́ hɛn

¹ «Nu ta a kɛ bɔ ə Yai-Laa kɔ́ a hɛn da, ɉɛn tii mąąnɛ̨ɛ̨ ə kɛ a lɛɠɛ hunwɔ̨, ə wulɔ pu mą, ə lansan kpɛŋɛn mɛ̨i.

² Da paa la Aarɔn lonnii a ɉaláá laa həli nuą di pɔ. Di yee ɲą tɔ̨nɔ̨ həɠə nɛɠɛ hunwɔ̨ hu, ɉumɔɔ a wulɔ da lansan, ɉaláá laa həli mun ə gələn ɉaláá kulɔi, a kili too ŋą haláá, gaa a haláá hɛn da gələn mąą kun nɛ̨ɛ̨, yɛ Yai-Laa liilaa.

³ Ɉaláá hɛn gbəlii a lɛɛ, gaa a Aarɔn da nonnii di wɔɔ, gaa a kɔ̨nɔ̨n mąąhəɠɛɛ, mąąhɔlɔɓo, Yai-Laa nwɔ haláá hɛn di gələn, da ka tii.

⁴ «Ya pa a Yálá kɔ́ hɛn, yɛ ɓo a lɛɠɛ mɔ̨n ŋąą, mąąnɛ̨ɛ̨ ə kɛ yɛ nwɔ̨mįi kɛ pələ, di hvo lɛɠɛ tɛ hɛn bu ɉu. Kɛlaa di nɔ wulɔ hu, a wala kɛ tii, mąąnɛ̨ɛ̨ ə kɛ a yii di ɲɔwɔɔn a wulɔ.

⁵ «Akɛ, ə́ wɔ Yálá kɔ́ hɛn a kɛ a hɛn yii daa ɲələn, mąąnɛ̨ɛ̨ di nɛɠɛ hunwɔ̨ yɔwɔ a wulɔ, dɛ hɛn və kɛ ɉu.

⁶ Ya ɉu yali a gbuɔɠaa, ə́ wulɔ pu mą. Yili kaa a Yálá kɔ́ hɛn.

⁷ «Akɛ, di Yálá kɔ́ hɛn tii yili ləɠii, mąąnɛ̨ɛ̨ di nɛɠɛ hunwɔ̨ yɔwɔɔn wulɔ hu.

⁸ «Yá paa a Yálá kɔ́ hɛn tii bɛliɛ a Yai-Laa nwɔɔ, ə́ dɛɛ ɉaláá laa həli mun bɔ. Yili ə li la ə naa ɉaláá kulɔi.

⁹ Ɉaláá laa həli mun a ɉaláá hɛn tii ta həɠə, yili kaa a kili too ŋą haláá. Ə yili kələn ɉaláá kulɔi. Yili kaa a haláá mąą kun nɛ̨ɛ̨, yɛ Yai-Laa liilaa.

¹⁰ Ɉaláá hɛn gbəli a kɛ a Aarɔn da nonnii di wɔɔ. Kɔ̨nɔ̨n mąąhəɠɛɛ ka tii, mąąhɔlɔɓo, Yai-Laa nwɔ haláá hɛn di gələn da li.

¹¹ «Ɉaláá hɛnŋąąi kpɔ ka káá pai kɛi Yai-Laa kɔ́i la ka hvo lɛɠɛ tɛ hɛn bu da hu. Mąą hvo nɛ̨ɛ̨li da kɛi Yai-Laa kɔ́ hɛn gələn, lɛɠɛ tɛ hɛn da kwɛ̨in nwulɔ di hvo kɛ da hu.

¹² Ka pɛli mą ka Yai-Laa kɔ́ a hɛn dɔlɔɔ, kɛlaa ka naa həli a hɛn mąą kun nɛ̨ɛ̨ haláá kulɔi.

¹³ «Yálá kɔ́ hɛn nɔpee ə́ kaa pai la, mąąnɛɛ ə́ kpolo kɛ mą. 'Hvó kpɔ Lɛ̨ą kpolo ɓa, mąąhɔlɔɓo, kpolo kaa a ka Yálá ni ka lɔwai mįnɛ̨ gɔɔn mąą. Ə́ wɔ Yálá kɔ́ hɛn gəlee kpolo pɛlɛ mą, yɛ́ naa həli.

¹⁴ «Ya kɛi pa Yai-Laa kɔ́i a ə́ yəi ɲɛa hihɛn mɛ̨ikɔw, a kɛ a hɛn gbaɠa ɓa, 'nɛ nwɔ̨n ma ə pola, ə́ vunwɔ̨ yɛ́ tɛɠa paa la.

¹⁵ Ə́ wulɔ pɛlɛ mą, da lansan, hihɛn mɛ̨ikɔw haláá ka tii.

¹⁶ Yili pulu, ɉaláá laa həli mun a da kələn a kili too ɲą hɛn; a nɛɠɛ ta həɠə, ə nwulɔ ta həɠə, ə bɛlɛɛ lansan kəlee ɓa. Yili kaa a haláái da gələn Yai-Laa ɓa.