Levetekɔ 19 - Yálá laawoo hɛɓɛ (dc)

Bələi Yálá kaa bɔ nuą di túwɔ́ la

¹ Yai-Laa yɛ Moisə ɓa:

² «'Mo Israɛlə lonnii diɛ, yɛ diɛ: Ɲą́ą́ Yálá mą́ą́ həɠɛɛi, kaa kpɛli mąn, ka mąą ə həɠə tii.

³ «Nu kəlee ə nwumɛ̨ nąn da nee diɛ, ka nwɔ́ hvįįtɔɔ yələɠaai mąąwiɛ. Ɲą́ą́ ɓə gáá a Yai-Laa ka wɔ Yálá.

⁴ «'Ka hvo hvilɛn haliɠaa pulu, kaa di mąą nįnįn bɛli. Ɲą́ą́ gáá a Yai-Laa ka wɔ Yálá.

⁵ «Ka kɛi liilaa haláá kulɔ Yai-Laa ɓa, ka gɛ a hɛn nwɛli a too mą.

⁶ Da ɉaláá huwɔ mįi lɔ a ɉaláá kulɔ yələ, da mąą yələ laa ɓoɔ. Gbəli a lɛɛ a voló ɉaaɓa yələ, mąąnɛ̨ɛ̨ di gələn.

⁷ Nui a gulɔ nwəlii a da mįi a voló ɉaaɓa yələ, a kɛ kɛa a huwɔ kalaa, hva níí hon.

⁸ Nui a ɉuwɔi tii ta mįi, aa nɛ̨ŋɛ̨n ɉəɠə, mąąhɔlɔɓo, ɉɛn kɛ a Yai-Laa nwɔɔ, aa mɛlɛkpɛɛ mą. Mąąnɛ̨ɛ̨ di mąą nu kulɔ mɛlaa lɔwai.

⁹ «Ka kɛi ka pɔ yɛa mɔ̨nun dee, ka hvo ɉee nɔwɔ ɓa, ka hvo mɔ̨nun gban ɉu kwɛli.

¹⁰ Ka hvo ka wɔ viŋə ma kəlee kulɔ tɛ̨ɛ̨tɛ̨ɛ̨, yii a pu nɔi ɓa, ka hvo ɲɛɠɛ, ka di lɛɛ laa a yeehvowolo nuą da nwɛ̨ą di wɔɔ. Ɲą́ą́ ɓə gáá a Yai-Laa ka wɔ Yálá.

¹¹ «'Ka hvo nwuɔ̨ kɛ, ka hvo lɛɛ kɛ, ka hvo nu ta ɓowo.

¹² Ka hvo ka kwɛla a Náá lɛɛ mɛ̨nį hu, yili a kɛ nəi a ə́ wɔ Yálá laa kala mɛ̨nį. Ɲą́ą́ ɓə gáá a Yai-Laa.

¹³ «Hvó ə yee pənə ə́ ɓɛlan gaa lon ɉu, hvo too mɛ̨i. Kóló kɛ mun vɛla hvo lɛɛ ə́ yəi yələ hvo ɓɔ.

¹⁴ 'Hvó wəli wolomun nalan, 'hvo nu kalin ɉɛn naa ɲɛ̨ipumun dɔwɔ, bələ ɓə mąąnɛ̨ɛ̨ ə́ ɲɔw la ə́ wɔ Yálái ɓa; Ɲą́ą́ ɓə gáá a Yai-Laa ka wɔ Yálá.

¹⁵ «'Hvó kiti tee a hulu, 'hvo tɔɔ nu ta pulu nwɔ mąąwɛlilaa ɓa, nu kɛnɛ̨ ta hvo ə kilimąą pənə, kɛlaa, nuą kiti tee a tələnmolaa.

¹⁶ 'Hvó ə́ kaayɔwɔ ta laa kala, ə́ ɓɛlan gaalon ɲąmą wulu hvo lɛɛ ə́ nwuɔ̨. Ɲą́ą́ ɓə gáá a Yai-Laa.

¹⁷ «Yowolaa hvo kɛ ə́ kwəi yɛ hvilɛn na ə́ kaayɔwɔ ta ɓa. Ə́ ɓɛlan gaalon ɉutɔɔ, ə gɛ nɛ̨ŋɛ̨n da wulu hvo pa lɛɛ ə́ nwuɔ̨.

¹⁸ 'Hvó ə́ nwąną kulɔ, 'hvo ka wɔ lɔi hu nuą hɔn ɉee ə́ kwəi. Ə́ ɓɛlan gaalon nwɛli la kɛ yɛ ə́ kpinį. Ɲą́ą́ ɓə gáá a Yai-Laa.

¹⁹ «'Ka nwɔ́ tíɓoɠaai hon, hvó hvaa mą ə́ wɔ taatɛlɛɛɠaai di hvo a huwu tɔ̨nɔ̨, diɛ tɛ di kee ɓa. 'Hvó hihɛn ɉuwu hveelɛ hin ə́ pɔ yɛa, 'hvo həɠə too ə́ kwąną, ə ɓo a həɠə ɓɛla huwu hveelɛ a dee-tee.

²⁰ «Hulɔnu ta a laa a luwɔ nɛ̨ɛ̨nu ta, yan yili nwɔ wɛli ə ɓo laa; kɛlaa, di hvo ni nɛ̨ɛ̨non tii nwun mąąɓo li, a kɛ nąmu hvo ni ɲee kulɔ li ɉu, ɉulɔnu kpɔ a yili dɔ́n ɉala nwɛli hulɔnu ɓa, kɛlaa di hva da nɛ̨ɛ̨nu di paa, mąąhɔlɔɓo, di hvo ni kɛ nɛ̨ɛ̨nui tii nwun mąąɓo li.

²¹ Mąąnɛ̨ɛ̨ ɉulɔnui tii ə pa a ɓɛlaa hilɛ gee kaa kələ laaləi, a Yai-Laa nwɔɔ, bɔɔŋą pɛli haláá hɛn ni.

²² Mɛlaa hilɛi tii ɓə ɉaláá laa həli mun gaa pai nui tii pɔɔŋą pɛlii la, Yai-Laa lííla, nɛ̨ŋɛ̨n nui tii ə ɉəɠə mąąhvaalɛɛ hɛn ni.

²³ «'Ka pa lɔi nɔi laakwɛlanmoɔ hu, ka pɛli ɓá wului lɔpee da hin ɉii, kɛlaa ka maɠaa kaa yɛ hɛn tɔ́n gaa mą, ka hvo ma ta mįi kwɛlan ɉaaɓa yee mu.

²⁴ Gwɛlan nąąn nąą, maɠaa kəlee da lɛɛ a Yai-Laa nwɔɔ, a mą́ą́wiɛ hɛli yələ.

²⁵ Gwɛlan nɔɔli nąą kɛa, ka pɛli má ta mįi, bələ ɓə ka wɔ wuluɠaai ta kaa pai kɛi pɛlɛi la mą a kwɛlan gəlee. Ɲą́ą́ ɓə gáá a Yai-Laa ka wɔ Yála.

²⁶ «'Ka hvo huwɔ mįi ɓɛi ka ɲąmą pulaa, ka hvo tɔlukpɛ, ka hvo ɲɛ̨ąkpɛ.

²⁷ Ka hvo ka wəli kwɛlɛ kpɛlɛ kalaan, ka hvo ka kpɛlɛ mąą tee.

²⁸ 'Ka hvo ka kpɔwɔ mąą nwąną haa mɛ̨nį hu, 'ka hvo nu ta pɔlɔn baa. Ɲą́ą́ ɓə gáá a Yai-Laa.

²⁹ «'Hvo ə́ lon nɛ̨ɛ̨nu ɓɛlɛkpɛɛ mą, a gɛi ya mo a wɛlikɛnɛ̨ɛ̨nu, nɔi hvo pa nee ɲee too wɛli kɛɛ hu, naa hvo pa hvɛɛ a wɛli mɛ̨nį.

³⁰ 'Ka nwɔ́ hvįįtɔɔ yələɠaa mąąwiɛ, ka nwɔ́ pɛ́lɛ́i mąąwiɛ. Ɲą́ą́ ɓə gáá a Yai-Laa.

³¹ «'Ka hvo ɲąmuątaa tɔlu mɛ̨nį kaa a tɛ̨ą, ka li di pɔ, yili a ka mąąliɓi. Ɲą́ą́ ɓə gáá a Yai-Laa, ka wɔ Yálá.

³² «Heei tɛɛ nwun bowa nąmu pɔ, pɔlɔlaa mąąwiɛ; bələ ɓə ya ɲɔw la ə́ wɔ Yálái ɓa. Ɲą́ą́ ɓə gáá a Yai-Laa.

³³ «Nwɛ̨ą a hee ə́ kɔ́wɔ mɛ̨i ə́ wɔ lɔi hu, ka hvo ka yee pənə ɉu.

³⁴ Mąąnɛ̨ɛ̨ ka nwɛ̨ą hon yɛ nɔi lon da, yɛ ka ta. Nwɛli la kɛ yɛ ə́ kpinį, mąąhɔlɔɓo, kaa kpɛli ka kɛ a nwɛ̨ą Eziptə lɔi hu. Ɲą́ą́ ɓə gáá a Yai-Laa ka wɔ Yálá.

³⁵ «'Ka hvo hvulu kɛ hɛnŋąą kɔɔn ɉi: yɛ ə kɛ a gwɛa yee, yɛ ə kɛ a wiɛ pələ, ə mą kɛ, gəgən ɉu.

³⁶ 'Ka wɔ hɛn gɔɔn gəgənŋąą di kɛ a di pɛliɛ ɉu. Ɲą́ą́ ɓə gáá a Yai-Laa, yai ka kulɔ Eziptə lɔi hu.

³⁷ «'Ka ka yee kanąn nwɔ́ tíɓoɠaai da dɔ́nŋąą kəlee diɛ, kaa bɔ túwɔ́ ɓo. Ɲą́ą́ ɓə gáá a Yai-Laa.»