Levetekɔ 18 - Yálá laawoo hɛɓɛ (dc)

Hilɛtai mąąwiɛ mɛ̨nį

¹ Yai-Laa ə hvaa Moisə pɔ,

² yɛ mą: «'Mo Israɛlə lonnii diɛ yɛ diɛ: «Ɲą́ą́ ɓə a Yai-Laa ka wɔ Yálá.

³ Ka hvo túwɔ́ yɛ bələi ka kɛi gɛ la Eziptə lɔi hu, ɓɛi ka kɛ laa. Ka hvo túwɔ́ yɛ bələi Kanaan nuą da túwɔ́ la, ɓɛi gáá lii laa a kaa, ka hvo hvilɛn di yíi pələ pulu.

⁴ Ka nwɔ́ tɔ́n nwooɠaa hon, ka lɛɛ nwɔ́ tíɓoɠaa pulu; ɲą́ą́ ɓə gáá a Yai-Laa ka wɔ Yálá.

⁵ «Ka nwɔ́ tɔ́n nwooɠaa da yɛnɛ̨ɛ̨ kɛ pələ hon bələ mąą yɛlɛ kɛ. Nui a di hon, a yɛnɛ̨ɛ̨ kpɛɛ hvo mą hɔlɔɓo. Ɲą́ą́ ɓə gáá a Yai-Laa.

⁶ «Hulɔnu ta hvo kɛ gaa laai a gaayɔwɔ nɛ̨ɛ̨nu. Ɲą́ą́ ɓə gáá a Yai-Laa.

⁷ «Hvó ə́ nąn gbuwulu kaa, hvó ə́ lee kpuwulu kaa, mąąhɔlɔɓo, ə́ lee li, ya gɛ tii, yáá di ɓɛlɛkpɛɛ diɛ.

⁸ «Hvó kɛ ə́ kaa laai a ə́ nąn nɛ̨ą ta, yá gɛ tii, yáá ə́ nąn mɛlɛkpɛɛ mą.

⁹ «Hvó laa a ə́ mąąhala; ə kɛ a ə́ nąn non, ə kɛ a ə́ lee lon. Di gaa ka yəi bɛlɛ́n, ə mą nwɔ̨nɔ̨ kɛ di gaa pɛlɛ́ takpɛli mu.

¹⁰ «Hvó laa a ə́ lon ɉulɔnu lon nɛ̨ɛ̨nu, hvó laa a ə́ lon nɛ̨ɛ̨nu lon nɛ̨ɛ̨nu, yá gɛ tii, yáá ə́ kpɔwɔ ɓɛlɛtoo, ə́ kpinį li.

¹¹ «Hvó laa a ə́ nąn nɛ̨ą lon nɛ̨ɛ̨nu; mąąhɔlɔɓo, gaa a ə́ nąn non, ə́ mąąhala li.

¹² «Hvó laa a ə́ nąn mąąhala, mąąhɔlɔɓo, da ə́ nąn di kaa a kɔ́lɔ tɔ̨nɔ̨.

¹³ «Hvó laa a ə́ lee niɛ nɛ̨ɛ̨nu, ə mą kɛ nəɠə nɛ̨ɛ̨nu, da ə́ lee di kɔ́lɔ kaa tɔ̨nɔ̨.

¹⁴ «Hvó ə́ nąn niɛ hulɔnu, a wala kɛ tii nəŋə hulɔnu kpuwulu kaa, hvó laa a nɛ̨ą, ə́ tɛlɛn ni.

¹⁵ «Hvó laa a ə́ lon ɉulɔnu nɛ̨ą, mąąhɔlɔɓo, ə́ lon nɛ̨ą li, mąą hvo nɛ̨ɛ̨li hvó gbuwulu kaa.

¹⁶ «Hvó laa a ə́ nąn non ɉulɔnu nɛ̨ą, ə́ nąn non gbuwulu lɔ li.

¹⁷ «Hvó laa a nɛ̨ɛ̨nu ta, da non nɛ̨ɛ̨nu, hvó laa a non ɉulɔnu lon nɛ̨ą, hvó nwɔ̨nɔ̨ laa a non nɛ̨ɛ̨nu nwɔ lon nɛ̨ɛ̨nu, yɛ́ di kpuwulu kaa, da nɛ̨ɛ̨nui tii ni di kɔ́lɔ kaa tɔ̨nɔ̨. Yili kaa a yɛnɛ̨ɛ̨ kala túwɔ́ ɓoɔ.

¹⁸ «Hvó laa a ə́ nɛ̨ą logolo, a wala kɛ tii ə́ yólaa, ɓɛlɔwai ə nɛ̨ą kaa ni la yɛnɛ̨ɛ̨; yili a tolo muhəɠə.

¹⁹ «Nɛ̨ɛ̨nu a ɲąnin gaa, hvo lɛɠɛ mą; mąąhɔlɔɓo, tɔ́n gaa mą.

²⁰ «Hvó laa a nɔi lon da nɛ̨ą, yá gɛ tii, tɔ́n a kɛ yɛ́.

²¹ «Hvó ə́ lon da tɛɛ, diɛ Molɛkə hali kɔ́ la, hvo ə́ wɔ Yálái laa pu a dúwɔ́ pələ yili, Ɲą́ą́ ɓə gáá a Yai-Laa.

²² «Hvó laa a ə́ ɓɛlan ɉulɔnu, yɛ bələi yá gɛ la a nɛ̨ɛ̨nu, yɛnɛ̨ɛ̨ mąą kalaa li.

²³ «Hvó laa a taatɛlɛɛ ta; yá gɛ tii, tɔ́n a kɛ yɛ́. Nɛ̨ɛ̨nu ta hvo kɛ gaa gbɔwɔ tɛɛi taatɛlɛɛ ta pɔ, da yaa diɛ laa; yɛnɛ̨ɛ̨ həɠə mąą túwɔ́ li.

²⁴ «Ka hvo ka mąąliɓi a dúwɔ́ taaləi tii ta lɔpee. Nɔiɠaa ŋɛ̨i gáá di kpɛi ka tɔwɔ, dúwɔ́ taaləi tii ɓə di kɛi mo, diɛ di mąąliɓi la.

²⁵ Nuą daa nɔi mąąliɓi, ŋą́ di hutɔɔ nwɔ nɛ̨ŋɛ̨n tii mąą mɛ̨nį ɓa. Yili ɓə gɛ nɔi yɛ ɲee kulɔ di mu.

²⁶ «Ka wɛi, 'ka lɛɛ nwɔ́ tɔ́nŋąą, da nwɔ́ tíɓoɠaa pulu. Ka hvo dúwɔ́ taaləi tii ta ɓo, yɛ ə kɛ a nɔi lon da, a wala kɛ tii nwɛ̨ąi heeni ka kɔ́wɔ mɛ̨i.

²⁷ Ɲɛ̨nɛ̨ɛ̨ həɠə mąą túwɔ́ɠaa tii, nuąi kɛ ka tɔwɔ ɓɛ nɔi, yili ɓə di yee ə kɛ ɉu; nɔi yɛ kɛ la a lɔi mąąliɓiɛ.

²⁸ Ka gɛ a nɛlɛɛ, nɔi hvo pa ɲee kulɔ ka mu, a gɛi ka mo a lɔi mąąliɓiɛ, hvo nəi pa ɲee kulɔ ka mu, yɛ bələi ə gɛ la a nuąi kɛ ka tɔwɔ ɓɛ nɔi.

²⁹ Yili ɓa, nui lɔpee a dúwɔ́ taaləi tii ta ɓo, mąąnɛ̨ɛ̨ di gulɔ nwɔ nuą lɔwai.

³⁰ «'Ka lɛɛ nwɔ́ tɔ́n nwooɠaa pulu, ka hvo gɛɛ kala túwɔ́ taaləi tii ta ɓo, yai di kɛi gɛ ɓɛ nɔi ka tɔwɔ. Ka hvo ka mąąliɓi a mɛ̨nį taaləi tii ta. Ɲą́ą́ ɓə gáá a Yai-Laa ka wɔ Yálá.»