Levetekɔ 17 - Yálá laawoo hɛɓɛ (dc)

Mąąhəɠə mɛ̨nį nwɔ tɔ́n Ɲąmą mąąwiɛ mɛ̨nį

¹ Yai-Laa yɛ nwɔ̨nɔ̨ Moisə ɓa:

² «'Mo Aarɔn da nonnii da nɔi lonnii diɛ, yɛ diɛ; Mɛ̨nį Yai-Laa ə mo ya ka:

³ «Israɛlə lon da a taatɛlɛɛ ta nwun dee, yɛ ə kɛ a nįŋɛ̨, yɛ ə kɛ a ɓɛlaa, yɛ ə kɛ a ɓolu, ə kɛ taa kwəi, hvo kɛ a taa kwəi;

⁴ a wala gɛ hvo paa la gee kaa kələ laaləi, hvo naa həli Yai-Laa ɓa ɲəi bɛlɛ́ laaləi; mąąnɛ̨ɛ̨ di mąąni kɛ ɲąmąi tii ə bu mąą mɛ̨nį ɓa. Mąąnɛ̨ɛ̨ di mąą nui tii kpɛ nɔi lonnii lɔwai.

⁵ Yili a kɛ tii, Israɛlə lonnii di hva taatɛlɛɛ ta kulɔ a haláá lɔwɔi, kɛlaa, mąąnɛ̨ɛ̨ di paa la ɉaláá laa həli mun bɔ gee kaa kələ laaləi, yɛ gulɔ a liilaa haláá Yai-Laa ɓa.

⁶ Ɉaláá laa həli mun a ɲąmą taɠa Yai-Laa nwɔ haláá kəhi ɓa gee kaa kələ laaləi, yɛ nwulɔ kələn, haláá mąą kun nɛ̨ɛ̨ li yɛ Yai-Laa lííla.

⁷ A kɛ ti di hva kɛa di wɔɔ taatɛlɛɛɠaa ta kulɔ a haláá ɲinɛ̨n ma yai a kɛ di ɲąątɔɔi a túwɔ́ pələ ɲɔ̨nŋąą. Yələ kəlee tɔ́n ga tii, a kwɛlan gəlee mɛ̨nį.

⁸ «'Mo nwɔ̨nɔ̨ diɛ, yɛ diɛ: Israɛlə mun da, a wala kɛ tii, ka mąą nwɛ̨ąi gaa heeni ka kɔ́wɔ mɛ̨i, da a ɉaláái da gəlee kələn gulɔ, a wala kɛ tii, Yálá kɔ́ haláá kulɔ,

⁹ a wala gɛ hvo paa la gee kaa kələ laaləi, hvo gɛ a Yai-Laa nwɔ haláá; mąąnɛ̨ɛ̨ di mąą nu kulɔ nwɔ nuą lɔwai.

¹⁰ «Israɛlə lon da, a wala kɛ tii, nwɛ̨ąi heeni ka kɔ́wɔ mɛ̨i, da a ɲąmą mįi, ŋą́ hee ɲąmą mįi mun tii hu, ŋį́ gulɔ nwɔ nuą lɔwai.

¹¹ Mąąhɔlɔɓo, hɛn kpɔ gaa a vulú, nwɔ yɛnɛ̨ɛ̨ kaa ɲąmą hu. Ɛlɛɛ, ŋį́ dɛɛ ka pɔ, kaa pɛli ka wɔɔ yɛnɛ̨ɛ̨ nwun mąąɓo haláá kulɔi la ɉaláá kulɔ kəhi mɛ̨i. Mąąhɔlɔɓo, ɲąmą ɓə da ka wɔ yɛnɛ̨ɛ̨ nwun mąąɓo la.

¹² Yili mąą mɛ̨nį ɓə ŋą́ kɛ la Israɛlə lonnii diɛ: ‹Maa hvo nɛ̨ɛ̨li ka ta hvo ɲąmą mįi; ə mą kɛ a nwɛ̨ąi gaa heeni ka kɔ́wɔ mɛ̨i, mąą hvo nɛ̨ɛ̨li ə ɲąmą mįi.›

¹³ «Israɛlə lon da, a wala kɛ tii, nwɛ̨ąi gaa ka yəi bɛlɛ́n da, a li huwɔ kpɛi, ə huwɔ ta hon, a wala kɛ tii, nwɛ̨ni, ə ɓo a mįi huwɔ, mąąnɛ̨ɛ̨ ə ɲąmą pu lɔi ɓa, ə pɔlɔ pu mɛ̨i.

¹⁴ Mąąhɔlɔɓo, pɛli hɛn gəlee nwɔ yɛnɛ̨ɛ̨ kaa ɲąmą hu, akɛ gaa nii a vulú. Yili mąą mɛ̨nį ɓə ŋą́ kɛ la Israɛlə lonnii diɛ: ‹Ka hva pɛli hɛn da lɔpee ɲąmą lɛɛi ɉu ka hvo mįi; mąąhɔlɔɓo, pɛli hɛn gəlee nwɔ yɛnɛ̨ɛ̨ kaa ɲąmą hu. Nui a da mįi, mąąnɛ̨ɛ̨ di gulɔ mɛlaa lɔwai.›

¹⁵ «Nui lɔpee! Ə kɛ a nɔi lon, ə kɛ a nwɛ̨ą, a huwɔ haa gbɔwɔ ɓa mįi, awala kɛ tii, lɔwɔ huwɔ ta ə wolo mą, ə baa, nui a mįi, mąąnɛ̨ɛ̨ mąą nu ə mąą həɠə waa, ə gbinį waa a yá, tɔ́n a kɛ mąą nu ɓa a mąą yələ, ə lɛɛ ɉu yələ ə wulu, nąąlɔwai ɓə mąą a həɠə la.

¹⁶ A wala nii mąą həɠə waa, hvo gbinį waa, nɛ̨ŋɛ̨n gaa mą.»