Levetekɔ 16 - Yálá laawoo hɛɓɛ (dc)

Nɛ̨ŋɛ̨n mąąhvaalɛɛ yələ kɛnɛ̨

¹ Aarɔn non ɉinąą hveelɛi tii pa a nwɔ̨n lúwɔ́ hvo mą Yai-Laa lííla, di haa pulu, Yai-Laa yɛ Moisə ɓa:

² «'Mo ə́ liɛ Aarɔn ɓa, hvo kɛ gaa lɔi gɛɛnąą mąąhəɠɛɛ ɓa a niiɓa pələ ɉəɠə ɓɛla pulu, mįnɛ̨ kəhi ɲɛ̨itɔwɔ, hvo pa nəi haa; ɓɛlɔwai gáá pai gbɔ́wɔ́ lɛi la tulɔ kpinįn ɉu mįnɛ̨ kəhi laakalan mɛ̨i.

³ «Ɉɛn mąąnɛ̨ɛ̨ ə kɛ Aarɔn yəi yɛ lɔ la gee kaa kələ mu ya ka: Nįŋɛ̨ hilɛ gbɔn dɔ̨nɔ̨, yii gaa a nɛ̨ŋɛ̨n mąąhvaalɛɛ haláá hɛn, ə ɓɛlaa hilɛ tɔ̨nɔ̨ kulɔ a haláái da gəlee kələn.

⁴ A ɉaláá həɠə too gwąną, ə dɛmą pu mą, ə kilən ɉəɠə kwəlɛɛ pə pə too gwąną yii gaa a ɓɛlaa ləɠa, hąą yili kɔ́lɔi a ɓɛlaa ləɠa ə ɲili ɉąą, yili pulu, ə həɠə ɓɛla kwəlɛɛ yili nwun ma a ɓɔlɔ. Ɉaláá kulɔ həɠəɠaa ka tii; a gbɛa gbinį waa, yili pulu ə ɉɛnŋąą tii kɛ mą.

⁵ Israɛlə lonnii di pɛlɛ di kee ɓa, di ɓolu hilɛ hveelɛ tɛɛ bɔ a nɛ̨ŋɛ̨n mąąhvaalɛɛ haláá hɛn, di bɛlɛ ɓɛlaa hilɛ tɔ̨nɔ̨ ɓa, yii da gɛ a haláái da gəlee kələn.

⁶ «Aarɔn a nįŋɛ̨ gbɔn tii laa həli Yálá ɓa, yaa da ɲəi bɛlɛ́n nuą di wɔ nɛ̨ŋɛ̨n mąąhvaalɛɛ mɛ̨nį ɓa.

⁷ A molu hilɛ hveelɛi tii həɠə, ə di tɔɔ Yai-Laa lííla, gee kaa kələ laaləi,

⁸ Aarɔn a molu hilɛ hveelɛi tii kɔ́ a kpɛɛn, dɔ̨nɔ̨ a kɛ a Yai-Laa nwɔɔ, dɔ̨nɔ̨ ə lɛɛ a Azazɛlə nwɔɔ.

⁹ Molu hilɛ yii a lɛɛ a Yai-Laa nwɔɔ, Aarɔn a yili həɠə, ə gulɔ a nɛ̨ŋɛ̨n mąąhvaalɛɛ haláá.

¹⁰ Yii ŋɛ̨i lɛɛ a Azazɛlə nwɔɔ, da nɛɛ a vulú də li la Yai-Laa lííla, di di hɛɛtɔɔ mą, di gbala kpɛ, ə li nɔi pun ɉu Azazɛlə pɔ.

¹¹ «Aarɔn ə nįŋɛ̨ gbɔn ɉəɠə, ə naa həli Yai-Laa ɓa, da ɲəi bɛlɛ́n nuą di wɔ nɛ̨ŋɛ̨n mąąhvaalɛɛ mɛ̨nį ɓa, ə nįŋɛ̨ nwun dee.

¹² Ə ləɠi lon naahvɛɛ a ɉaláá kulɔi nwɔ̨n dəŋą ta, yii gaa Yai-Laa lííla, ə bɛlɛ lansan ɲee ɲąą hveelɛ ɓa, ə li a diɛ ɉəɠə ɓɛla pulu pələ.

¹³ Ɲee ɲąą hveelɛi tii ə ɉəɠə, ə bu nwɔ̨n ŋą Yai-Laa lííla, nulu yɛ pɛlɛ gəhi da naa kalan di mɛ̨i; yili a kɛ tii, hva haa.

¹⁴ Ə ɲee lɔ nįŋɛ̨ ɲąmąi tii hu, ə daɠa gəhi laa kalan mɛ̨i voló həɠəi pələ da gəhi laa kalan ɲɛ̨i tɔwɔ pələ gee mɛ̨i mɛ̨ihveelɛ.

¹⁵ Ə molu hilɛ nwun dee a nɔi lonnii di wɔ nɛ̨ŋɛ̨n mąąhvaalɛɛ haláá, ə li a ɲąmą ɉəɠə ɓɛla pulu pələ; ə ɲąmą kɛ pələ kɛ lɔ yɛ bələi ə nįŋɛ̨ ɲąmą kɛ la. A ɲąmą ta taɠa mįnɛ̨ kəhi laa kalan mɛ̨i da ɲɛ̨itɔwɔ.

¹⁶ Israɛlə lonnii di wɔ woo tee ŋą laa, di wɔ kwɛli tee laa, yii mukulaa ɓaa di wɔ nɛ̨ŋɛ̨nŋąą kəlee, a di mąąhvaalɛɛ kóló kɛ; ə mą kɛ gee kaa kələi gaa di lɔwai ɓɛlɔwai da kɛ di mąąliɓi mɛ̨nį kɛi la.

¹⁷ Ɓɛlɔwai Aarɔn a lɔ la gɛɛnąą mąąhəɠɛɛ ɓa, yɛ gólóɠaai tii kɛ, nui lɔpee ta hva lɛɛ gee kaa kələ mu, ə lɛɛ ɉu, ə kpɛɛ a nɛ̨ŋɛ̨n mąąhvaalɛɛ haláá kulaa, gbinįi, da nwɔ pɛ́lɛ́i di mąą mɛ̨nį ɓa, da Israɛlə lonnii kəlee mąą mɛ̨nį ɓa.

¹⁸ A kulɔ geenąą mąąhəɠɛɛ ɓa, ə li ɉaláá kulɔi tii gee kaa kələ tənən ma Yai-Laa lííla, ə nɛ̨ŋɛ̨n mąą hvaalɛɛ kóló kɛ mɛ̨i, a nįŋɛ̨ gbɔn ɲąmą da molu hilɛ ɲąmą ta həɠə, ə ɉiɛ ɉaláá kulɔi mįnɛ̨ɠaa diɛ.

¹⁹ A ɲąmą ta taɠa a ɲeekpiɛ ɉaláá kulɔi kəhi mɛ̨i gee mɛ̨i mɛ̨ihveelɛ, yɛ nąą mąąhəɠə la Israɛlə lonnii di wɔ nɛ̨ŋɛ̨n di ɉəɠə mąą mɛ̨nį ɓa.

²⁰ «A kpɛɛ kɛa a nɛ̨ŋɛ̨n mąąhvaalɛɛ mɛ̨nįɠaa kɛɛ gɛɛnąą mąąhəɠɛɛ mɛ̨i, da gee kaa kələ mąą mɛ̨nį hu, ɉaláá kulɔ kəhi mɛ̨i, a mo di pa a molu hilɛi tii a vulúi.

²¹ Aarɔn a molu hilɛi tii lɛɛ a vulú, ə ɲee hveelɛi pɛlɛ nwuɔ̨, ə Israɛlə lonnii hɔnŋąą kəlee ɓo, da di wɔ woo tee ŋą mɛ̨nįɠaa kəlee da di wɔ kwɛli tee laa kəlee, yili ɓaa di wɔ nɛ̨ŋɛ̨n gəlee; ə gəlee pu molu hilɛi tii nwuɔ̨, yili pulu, ə nu ta kulɔ, yili ə molui tii hon, ə li la nɔi pun ɉu.

²² Mɛ̨nį ɲɔ̨nŋąąi tii kəlee da lɛɛ molu hilɛi tii ɓa, ə li la nɔi pun ɉu pələ. «Ɓɛlɔwai da li la a molui tii nɔi pun ɉu pələ,

²³ Aarɔn a pənə ə lɔ gee kaa kələ mu, ɉəɠəɠaai tii ə gɛ mą yɛ lɔ gɛɛnąą mąą həɠɛɛ ɓa, ə gulɔ mą ə bu laa.

²⁴ A kpɛɛ a yili ə gbinį waa a yá gɛɛnąą mąąhəɠɛɛ ɓa; Yili pulu, nwɔ hɛnŋąąi tɔlɔɔ nee kɛ mą, ə yiliɠaa kɛ mą, ə kulɔ, ɉaláái da gəlee kələn, ə yili kulɔ, gbɔwɔ mąą mɛ̨nį ɓa, da nɔi nuą mąą mɛ̨nį ɓa.

²⁵ Nɛ̨ŋɛ̨n mąąhvaalɛɛ haláá taatɛlɛɛɠaai tii ə di wulɔɠaa kələn ɉaláá kulɔi.

²⁶ «Nui di dɔɔ yɛ li a Azazɛlə nwɔ ɓolu hilɛi, a gbɛa mąą hɛnŋąą waa, ə gbinį waa gɛɛ hvo kɛ tɛi taai.

²⁷ Nįŋɛ̨ gbɔn da molu hilɛi tii kɛ a nɛ̨ŋɛ̨n mąąhvaalɛɛ taatɛlɛɛ, diɛi tii di di ɲąmą həɠə diɛ li la gɛɛnąą mąąhəgɛɛ ɓa, diɛ nɛ̨ŋɛ̨n mąą hvaalɛɛ kóló kɛ la, da ɉuwɔ həɠə di kulɔ la daa pulu, di ɉuwɔ, gɔlɔ ə mą kɛ gbo, di gəlee kələn.

²⁸ Nui a li ɉɛnŋąąi tii kələn ɉii, a lɛɛ daa pulu ə mąą hɛnŋąą waa, ə gbinį waa, hvo tɛɠa kɛ tɛi taai.

²⁹ «Ka hiɛ pələ ka tii a yələ kəlee. Ɲąnin mɛ̨ihveelɛnąą nwɔ hvóló pow yələ, mąąnɛ̨ɛ̨ ka hin nɔ, ka hvo kólói lɔpee ta kɛ, ə kɛ a nɔi lon ə mą kɛ a nwɛ̨ąi heeni ka kɔ́wɔ mɛ̨i.

³⁰ Mąąhɔlɔɓo, volói tii ɓə da nɛ̨ŋɛ̨n mąąhvaalɛɛ kóló kɛ la ka mɛ̨i, yɛ nɛ̨ŋɛ̨n gulɔ kaa, ka mąą yɛ həɠə la tii ka wɔ nɛ̨ŋɛ̨nŋąą diɛ, Yai-Laa ɲɛ̨i ɓa.

³¹ Túwɔ́ yələ li ka yəi, gaa a hvįįtɔɔ hvóló, kaa hin nɔ la a lɔwai lɔpee gəlee. Yili kaa a yələ kəlee mɛ̨nį.

³² «Nui a nɛ̨ŋɛ̨n mąąhvaalɛɛ kóló kɛ, yaa ɓa ɉaláá laa həli mun; yai da ɉee a nwulɔ mąąhəɠɛɛ, ɉaláá kulɔ mɛ̨nį ɓa, a nąn mąąhvalin. Ə ɉəɠə kwɛlɛɛɠaa kɛ mą, ɉaláá kulɔ həɠəɠaa li.

³³ Ə nɛ̨ŋɛ̨n mąąhvaalɛɛ kóló kɛ gɛɛnąą mąąhəɠɛɛ mɛ̨i, da gee kaa kələ mɛ̨i, da ɉaláá kulɔi kəhi mɛ̨i, da ɉaláá kulɔ nuą mɛ̨i, ɛlɛɛ da nɔi lonnii kəlee ɲąąkpɔnŋąą mɛ̨i.

³⁴ «Ka hiɛ pələ ka tii, hva ɉəɠə mą, Israɛlə lonnii di wɔ nɛ̨ŋɛ̨n mąąhvaalɛɛ pələ li kwɛlan dɛitɛi kəlee ɲee mu.» Mɛ̨nįi Yai-Laa ə Moisə tí la, Aarɔn ə gəlee kɛ.