Levetekɔ 13 - Yálá laawoo hɛɓɛ (dc)

Nu kɔ́lɔ kala ɲɔ̨nŋąą

¹ Yai-Laa yɛ Moisə da Aarɔn diɛ:

² «Akɛ pala a kulɔ nu ta kɔ́lɔ ɓa, a wala kɛ tii kiliɠalan, a wala kɛ tii nu kɔ́lɔ nąą ta ə kwələ, gɛ pələ ə ɓo yɛ hvólóɲɔ̨n, mąąnɛ̨ɛ̨ dəli a nu Aarɔn pɔ, a wala kɛ tii non da; diɛi di kaa a ɉaláá laa həli nuą.

³ Ɉaláá laa həli mun a gɔlɔ ɓa ɲɔ̨n tii mąąkpɛɛ, ɓɛi tii ɲɔ̨n gaa laa, mąą nu kɔ́lɔ ɓa ləɠa a kɛ a gwɛlɛɛ laa, akɛ ɲɔ̨n tii a kɛi gɔlɔ woloon mo, a kɛ tii hvólóɲɔ̨n ni; da gaa akɛ a yaa, ɉaláá laa həli mun a kɛ mąą nu ɓa: tɔ́n gaa yɛ́.

⁴ Kɛlaa, akɛ nui tii kɔ́lɔ nąą ta a kɛ a gwəlɛɛ, nwoloon hvo ɓoli, naa ləɠaɠaa di hvo kwələ li, ɉaláá laa həli mun a ɲɔ̨n gɛ mun tii lɛɛ dɔ̨nɔ̨ kon ɉu, hvóló mɛ̨ihveelɛ yee mu.

⁵ Voló mɛ̨ihveelɛ yələ, ɉaláá laa həli mun yaa kpinįi a nui tii mąąkpɛɛ. Akɛ ɲɔ̨n a lɛɛ lɔ a gɛ pələ, da hvo pɛlɛ li mą, ɉaláá laa həli mun a nɛ̨ɛ̨ nwɔ̨nɔ̨ dɔ̨nɔ̨ kon ɉu, hvóló mɛ̨ihveelɛ yee mu.

⁶ Voló mɛ̨ihveelɛ yələ, ɉaláá laa həli mun a pənə ə mąąkpɛɛ, akɛ ɓɛi ɲɔ̨n gaa laa nąą a kɛi lɛɠɛ mą, hvo kulɔi pulu. Ɉaláá laa həli mun a mo mą yɛ mą: tɔ́n və yɛ́, ɲɔ̨n gbɛli kpɛli li. Mąą nu a mąąhəɠəɠaa waa lɔ ə li, a kɛ tii tɔ́n və mą.

⁷ Kɛlaa, akɛ ɓɛlɔwai ɉaláá laa həli mun ə kɛ la mą: ‹ə́ mąąhəɠɛɛi›, a li, ɲɔ̨n a kɛi kɛnɛ̨, a pənə nwɔ̨nɔ̨ ə pa ɉaláá laa həli mun bɔ.

⁸ Ɉaláá laa həli mun ə pənə ə mąąkpɛɛ, a ɲɔ̨n gaa da yɛ pɛlɛ mą, ɉaláá laa həli mun a kɛ mą: tɔ́n gaa yɛ́, a kɛ tii hvólóɲɔ̨n ni.

⁹ «Akɛ kɔ́lɔ kala ɲɔ̨n da a pɛlɛ nu ɓa, yɛ ɓo a hvólóɲɔ̨n ɉuwu ta; da li a mąą nu ɉaláá laa həli mun bɔ.

¹⁰ Ɉaláá laa həli mun a mąąkpɛɛ, a gaa yɛ ɉɛn tii gaa gɔlɔ ɓa, aa mąą nu kɔ́lɔ ləɠa kwələ, yɛ pala tee laa ɉuwɔ yɛ tɛ bala hu,

¹¹ a kɛ tii, hvólóɲɔ̨n ni, aa lamun nu kɔ́lɔ hu. Ɉaláá laa həli mun a mo yɛ tɔ́n gaa mąą nu ɓa, hva kɛa mąą nu lɛɛ dɔ̨nɔ̨ kon ɉu mąąkpɛɛ mɛ̨nį ɓa. Yili nwɛi hea hvo ɉu, tɔ́n gaa mąą nu ɓa.

¹² Kɛlaa, volóɲɔ̨n ɉu a kɛnɛ̨ nu kɔ́lɔ ɓa, yɛ ɓo gɔlɔ nąą kəlee, ə həɠə nwuɔ̨ ə həli la gɔwɔ ɓa, ɓɛi lɔpee ɉaláá laa həli mun ɲɛ̨i a həli laa,

¹³ ɉaláá laa həli mun a mąąkpɛɛ, yii kɛa volóɲɔ̨n aa gɔlɔ nąą kəlee hon, a mo ɲɔ̨n gɛ mun ma yɛ mą: Ə́ mąą aa həɠə, mąąhɔlɔɓo, gɔlɔ nąą kəlee aa kwələ.

¹⁴ Kɛlaa, yələi lɔpee da gɔlɔ nąą ta kaa la mu kpɔluɔ, a kɛ tii tɔ́n gaa mąą nu ɓa.

¹⁵ Ɉaláá laa həli mun a gɔlɔ mąąkpɛɛ, a mo yɛ diɛ tɔ́n gaa mą. Ɲɔn tii kulɔ gɔlɔ ɓa, tɔ́n gaa mą, hvólóɲɔ̨n ni.

¹⁶ Kɛlaa, gɔlɔ yii tii kpɔlu a pənə a kwələ, mąą nu a pənə ə li ə həli ɉaláá laa həli mun ma.

¹⁷ Ɉaláá laa həli mun a mąąkpɛɛ, ɓɛi tii ɲɔ̨n ə kɛ laa, nąą a pənə a kwələ, ɉaláá laa həli mun a mo ɲɔ̨n gɛ mun ma, yɛ mą: tɔ́n və yɛ́, a kɛ tii tɔ́n və mą.

¹⁸ «Munwɔ̨ a tɔɔ nu ta ɓa ə kpɛɛ,

¹⁹ Kɛlaa munwɔ̨ pala kpɔlɔɔn ɉu a lɛɛ a gwəlɛɛ, a wala kɛ tii nąą yɛ lən; mąąnɛ̨ɛ̨ mąą nu ə mo ɉaláá la həli mun ma ə mąąkpɛɛ.

²⁰ Akɛ ɉaláá laa həli mun a mąąkpɛɛ, ɓɛi tii munwɔ̨ ə tɔɔlaa, nąą a kɛ a nɔɔ ɉu, ɛlɛɛ nąą ləɠa kwəlɛɛ, ɉaláá laa həli mun a mo yɛ tɔ́n gaa mąą nu ɓa. A kɛ tii hvólóɲɔ̨n ɉuwu ta ka tii gɔwɔ tɔɔi laa munwɔ̨ pala kpɔlɔɔn ɉu.

²¹ Kɛlaa, ɉaláá laa həli mun a nąą mąąkpɛɛ, nąą ləɠa ta a wala kɛ a gwɛlɛɛ, nąą a wala kɛ a nɔɔ ɉu, gɔlɔ a kɛ lɔ a mu kwəlɛɛ, ɉaláá laa həli mun a mąą nu lɛɛ dɔ̨nɔ̨ kon ɉu hvóló mɛ̨ihveelɛ yee mu, mąąkpɛɛ mɛ̨nį ɓa.

²² Gɛɛnąąi tii ɲąą a kɛnɛ̨ gɔlɔ ɓa, a kɛ tii hvólóɲɔ̨n ni, tɔ́n gaa mąą nu ɓa.

²³ Kɛlaa, gɛɛnąąi tii a lɛɛ lɔ tii da hvo pɛlɛi mą, munwɔ̨ pala kpɔlɔɔn nɔ li, tɔ́n və mąą nu ɓa.

²⁴ «Akɛ nwɔ̨n a nu ta kələn nąą ta, nwɔ̨n bɔɔ kɛɛnąąi tii, hɛn da a kɛ laa yɛ lən, mu pɔɔ la kpɔluɔ a wala kɛ tii gwəlɛɛ,

²⁵ ɉaláá laa həli mun a mąąkpɛɛ, a nąą ləɠa kaa yɛ kwələ, nąą wolo toɔ ɉu, a kɛ tii hvólóɲɔ̨n ga tii gbala tɔɔi nwɔ̨n bala kpɔlɔɔn tii hu. Ɉaláá laa həli mun a kɛ mąą nu ɓa: tɔ́n gaa yɛ́, hvólóɲɔ̨n ɉuwu ta li.

²⁶ Kɛlaa ɉaláá laa həli mun a mąąkpɛɛ, nąą ləɠa ta hvo kwələ li nąą nwolo hvo too li ɉu, ɛlɛɛ nąą mu kwəlɛɛ, ɉaláá laa həli mun a nui tii lɛɛ dɔ̨nɔ̨ kon ɉu hvóló mɛ̨ihveelɛ yee mu,

²⁷ voló mɛ̨ihveelɛ yələ, a mąąkpɛɛ, nąą ta a pɛlɛ mą, ɉaláá laa həli mun a mo yɛ tɔ́n gaa mą. Hvólóɲɔ̨n ɉuwu ta li.

²⁸ Kɛlaa akɛ gɛɛnąą mu kwəlɛɛi tii a kɛ lɔ a gɛ pələ, da a wala pɛlɛ mą, nąą tɛɠiɛ, a kɛ tii nwɔ̨n bala kpɔlɔɔn nɔ li. Ɉaláá laa həli mun a mo yɛ tɔ́n və mą, nwɔ̨n bala kpɔlɔɔn ga tii.

²⁹ «Akɛ hulɔnu, a wala kɛ tii nɛ̨ɛ̨nu ta ɓə ɲɔ̨n a pɛlɛ nwun ganin ma, a wala kɛ tii nɛ̨ŋɛ̨ŋ ma,

³⁰ ɉaláá laa həli mun a ɲɔ̨n tii mąąkpɛɛ, gɔlɔ nąą a kɛ a nɔɔ ɉu, nąą ləɠa ə ɓo a mu kpɔluɔ a wala kɛ tii yɛ kwələ, dɔɔ tɛitɛi, ɉaláá laa həli mun a mo yɛ tɔ́n gaa mąą nu ɓa, a kɛ tii gbɔwɔlɔ ka tii aa pɛlɛ mąą nu nwun ma, a wala kɛ tii, nɛ̨ŋɛ̨ŋ ma.

³¹ Kɛlaa, ɉaláá laa həli mun a ɲɔ̨n tii mąąkpɛɛ, nąą a wala kɛ a nɔɔ ɉu, ə mą kɛ naa ɓa ləɠa hvo tɛɠi li, nui tii ɲɔ̨n gaa mą, ɉaláá laa həli mun a nɛɛ dɔ̨nɔ̨ kon ɉu hvóló mɛ̨ihveelɛ yee mu.

³² Voló mɛ̨ihveelɛ yələ, ɉaláá laa həli mun a ɲɔ̨n tii mąąkpɛɛ, ɲɔ̨n da a wala pɛlɛ mą, gɔlɔ ɓa ləɠa ta a wala kɛ a mu kpuluɔ, ɲɔ̨n a wala nąą lɔ ɉu,

³³ mąąnɛ̨ɛ̨ mąą nu ə nwun bu, kɛlaa ɓɛi ɲɔ̨n gaa laa, hvo nąą kalaan, yili pulu, ɉaláá laa həli mun a pənə nwɔ̨nɔ̨ ə nɛɛ dɔ̨nɔ̨ kon ɉu hvóló mɛ̨ihveelɛ yee mu.

³⁴ Voló mɛ̨ihveelɛ yələ, a ɲɔ̨n mąąkpɛɛ, akɛ ɲɔ̨n da hvo pɛlɛ li mą, akɛ hvo gɔlɔ nąą ta lɔ li ɉu, ɉaláá laa həli mun a kɛ ɲɔ̨n gɛ mun ma: tɔ́n və yɛ. Mąą nu a mąąhəɠəɠaa waa lɔ; a kɛ tii tɔ́n və mą.

³⁵ Kɛlaa da kɛ mą: tɔ́n və yɛ́, yili pulu ɲɔ̨n tii ta ə pɛlɛ mą,

³⁶ ɉaláá laa həli mun a pənə ə mąąkpɛɛ; akɛ ɲɔ̨n da aa kɛ mą, a kɛ mąą nu ɓa: tɔ́n gaa yɛ́. A kɛ tii kɛa, di hva mąąkpɛɛ akɛ mąą ləɠa ta mu kpɔluɔi a wala kɛ tii da kwəlɛɛi.

³⁷ Kɛlaa, akɛ ɲɔ̨n a lɛɛ lɔ a gɛ pələ, ɛlɛɛ nąą ləɠa tɛɠiɛ, a kɛ tii ɲɔ̨n aa kpɛɛ, tɔ́n və mąą nu ɓa. Ɉaláá laa həli mun a kɛ mą tɔ́n və yɛ́.

³⁸ «Hɛn gwəlɛɛ ta a kɛ hulɔnu a wala kɛ tii nɛ̨ɛ̨nu ta kɔ́lɔ ɓa, mu yɛ lən,

³⁹ ɉalala laa həli mun a mąąkpɛɛ, ɉɛn tii mu a kɛ lɔ a gwəlɛɛ, kɛlaa mɔlɔɔ hvəi, mąąnɛ̨ɛ̨ gili ə pu ɉu yɛ mɛ̨nį ta hvəli, mąą nu kɔ́lɔ ka tii kwələ gɛɛnąą tii ɓa, tɔ́n və mą, kiliɠalan nɔ li.

⁴⁰ «Nu ta nwuɔ̨ a kɔ́mɔ, nwun nəɠa lɔ ka tii pu, tɔ́n və mą.

⁴¹ Nwuɔ̨ a kɔ́mɔ̨ dɔwɔ la pələ, nwuɔ̨ lɔ ka tii kɔ́mɔ̨, tɔ́n və mą.

⁴² Kɛlaa, hɛn da a kɛ nwuɔ̨ a wala kɛ tii dɔwɔla ɓɛi tii kɔ́mɔ̨, gwəlɛɛ mukpɔluɔ, hvólóɲɔ̨n ga tii bɛlɛ pələ kwɛlii nwun ma, a wala kɛ tii dɔwɔla.

⁴³ Ɉaláá laa həli mun a mąąkpɛɛ, ɓɛi ti ɲɔ̨n gaa laa, nąą pɔɔ la a kɛ a gwəlɛɛ, dɔwɔla a wala kɛ ti nwun ma, yɛ ɓo yɛ hvólóɲɔ̨n yii a kɛ nu kɔ́lɔ ɓa,

⁴⁴ a kɛ tii hvólóɲɔ̨n nąmu li, tɔ́n gaa mą. Ɉaláá laa həli mun a mo yɛ tɔ́n gaa mąą nu ɓa. Ɲɔ̨n aa ɉon nwun ma pələ.

⁴⁵ «Nui hvólóɲɔ̨n gaa mą, mąąnɛ̨ɛ̨ ə həɠə haɠa too gwąną, hva nwun ɉu pili, ə naa ɓa ləɠa mɛ̨i kpulu, mąąnɛ̨ɛ̨ a kɛi hiɛ, yɛ tómą yɛ kɛ mą: ‹Nu ɲɔ̨n gaa pai! Nu ɲɔ̨n gaa pai!›

⁴⁶ Bələi lɔ ɲɔ̨n a lamun la mą, bələ lɔ ɓə dɔ́n a lamun la mɛ̨i, nui tɔ́n gaa mą, a kulɔ mɛlaa kaalɛa pɔ, yɛ ɓo daa pulu pələ.

Həɠə hviliin ŋąą mąą mɛ̨nį

⁴⁷ «Akɛ həɠə nąą ta a hviliin, ə kɛ a həɠəi di bɛli a huwɔ ləɠa a wala kɛ tii həɠə kpɛli,

⁴⁸ ə kɛ a huwɔ kɔ́lɔ həɠə, a wala kɛ, tii huwɔ ləɠa həɠə, ə kɛ a həɠə ɓɛla, ə kɛ a həɠəi di bala di yee ɲą, həɠəi lɔpee di gɛ a huwɔ kɔ́lɔ paa,

⁴⁹ gɛɛnąą hviliin ŋąąi tii a kɛ ɉəɠə ɓa, ə kɛ a huwɔ ləɠa, ə kɛ a dɛɠi a wala kɛ tii gbɔlu, gaa a hɛn da nɛ ɉaláá laa həli mun ma.

⁵⁰ Ɉaláá laa həli mun a gɛɛnąąi tii mąąkpɛɛ, yili pulu ə ɉɛn tii laa kɛɛnąą ta ɓa ə hvóló mɛ̨ihveelɛ kɛ laa.

⁵¹ Voló mɛ̨ihveelɛ yələ, a gɛɛnąąi tii mąąkpɛɛ, a kɛ ɉu a kɛnɛ̨ ɉəɠə ɓɛlai tii ɓa, ə kɛ a həɠəi di bala di yee ɲą, a wala kɛ tii, ɉuwɔ kɔ́lɔ paa ɓa, a wala kɛ tii hɛn lɔpee ta; a kɛ tii ɉɛn tii mąą aa liɓi, yili kaa a hɛn ɲɔ̨nwɔ̨ɔ̨, yii a pɛli ə bɔɔ lɛɛ da kpɛli ɓa, tɔ́n gaa mą.

⁵² Ɉaláá laa həli mun a ɉəɠəi tii kələn a wala kɛ tii ɉuwɔ kɔ́lɔ paai tii. Mąąhɔlɔɓo, hɛn ɲɔ̨n ni yii di hva pɛli nwaai, mąąnɛ̨ɛ̨ di gələn.

⁵³ Kɛlaa, ɉaláá laa həli mun a mąąkpɛɛ, ə gaa gɛɛnąą hviliin ŋąąi ti ta hvo pɛlɛ li mą, ɉəɠə ɓɛla a wala kɛ tii ɉuwɔ kɔ́lɔ paai tii ɓa yii di bɛli a hɛn da,

⁵⁴ ɉaláá laa həli mun a mo di nąą waa, di pənə di naa hvóló mɛ̨ihveelɛ a tɛɛ, di pənə di mąąkpɛɛ.

⁵⁵ Yili pulu da mąą kələ, di mąąkpɛɛ di gaa, viliin tii hvo kulɔ li ɉu, ɉu hvo kɛnɛ̨ li, tɔ́n gaa mąą hɛn tii ɓa, da mąą hɛn tii kələn.

⁵⁶ Kɛlaa, ɉaláá laa həli mun a nąą mąąkpɛɛ ɉɛn tii mąą waa pulu, nąą ɲɛ̨i kwəlɛɛ, a nąą tee mą.

⁵⁷ Kɛlaa, hɛn da a pənə a kɛ ɉəɠəi ti ɓa, ə kɛ a həɠə ɓɛla, a həɠəi di bala di yee ɲą, a wala kɛ ti hɛn lɔpee gaa a huwɔ kɔ́lɔ, a kɛ tii ɉɛn tii bɔɔ lɛɛ ɉəɠə ɓa, ya ka tii pənəi yɛ bɛlɛi kwɛli a nįnɛ̨, da mąą hɛn ti kələn.

⁵⁸ «Yii ɓaa həɠə ɓɛla, ə kɛ a yiihəɠə, ə kɛ a hɛn lɔpee gaa a huwɔ kɔ́lɔ, da nwaa, ɉɛn tii bɔɔ ə kɛ ɉu a kulɔ ɉu, da pənə nwɔ̨nɔ̨ di nwaa, a kɛ tii tɔ́n aa kulɔ mą.»

⁵⁹ Yili ɓə kɛ a tɔ́n yɛ hvilɛn na hɛnŋąą hviliin mɛ̨nį ɓa; ə kɛ a həɠə ɓɛla, ə kɛ a yiihəɠə, ə mą kɛ hɛn lɔpee da bɛli a huwɔ kɔ́lɔ. Bələ ɓə da tɛɛ la diɛ tɔ́n gulɔ mą, a wala kɛ tii tɔ́n yɛ lɛɛ la mą.