Levetekɔ 12 - Yálá laawoo hɛɓɛ (dc)

Nɛ̨ɛ̨nu aa naayɛɛ a nįnɛ̨ mąąhəɠə mɛ̨nį

¹ Yai-Laa yɛ Moisə ɓa:

² «'Mo Israɛlə lonnii diɛ, yɛ diɛ: «Akɛ nɛ̨ɛ̨nu a naayɛɛ a hulɔnu, tɔ́n gaa mą hvóló mɛ̨ihveelɛ yee mu, yɛ bələi lɔ a kɛ la nwɔ ɲąnin gaai lɔwai.

³ Voló mɛ̨ihaaɓa yələ, da nokolo hee kɛ́nɛ̨ ɓa.

⁴ Yili pulu, hvóló pow haaɓa kɔ́w haaɓa yee mu non gaa nɛ̨ɛ̨nu, ɲąmąi tii kulɔ mą, mąąnɛ̨ɛ̨ ə mąąhəɠə yili mąą mɛ̨nį ɓa. Hva ɲee lɛɠɛ hɛn mąąhəɠɛɛ lɔpee ta ɓa, hva li ɉaláá kulɔi, ə lɛɛ ɉu nwɔ mąąhəɠə hvóló ə kpɛɛ.

⁵ A naayɛɛ a lon nɛ̨ɛ̨nu, tɔ́n gaa mą lɔwɔ hveelɛ yee mu, yɛ pələi lɔ tɔ́n gaa la mɛ̨i nwɔ ɲąnin gaai lɔwai, ɲąmąi tii kulɔ mą, mąą mɛ̨nį ɓa. A mąąhəɠə hvóló pow mɛ̨ida kɔ́w mɛ̨ida tɛɛ pulu.

⁶ «Non gaa nɛ̨ɛ̨nu mąąhəɠə hvóló a kpɛɛ, ə kɛ a lon ɉulɔnu, ə kɛ a lon nɛ̨ɛ̨nu, mąąnɛ̨ɛ̨ ɓɛlaa lon yii aa kwɛlan dɔ̨nɔ̨ kɛ, ə li la gee kaa kələ laaləi ɉaláá laa həli mun bɔ, di gulɔ a haláá yii da gəlee kələn; da tonwələn dɔ̨nɔ̨, a wala kɛ tii ɓopo tɔ̨nɔ̨, di gɛ a nɛ̨ŋɛ̨n mąąhvaalɛɛ haláá hɛn.

⁷ Ɉaláá laa həli mun a di laa həli Yai-Laa ɓa, ə nɛ̨ŋɛ̨n mąąhvaalɛɛ kóló kɛ nɛ̨ɛ̨nui tii ɓa; a kɛ tii, mąą nɛ̨ɛ̨nui mąą aa həɠə ɲąmąi tii kulɔ mą mąą mɛ̨nį ɓa. «Nɛ̨ɛ̨nu a naayɛɛ a lon ɉulɔnu, a wala kɛ tii, lon nɛ̨ɛ̨nu, Dɔ́n gaa mɛ̨i, yaa li.

⁸ «Akɛ a wala pɛli ɓɛlaa lon ɉɔ̨nwɔ̨ hɔlɔɓoi, tonwələn veelɛ ɓə a paa la, dɔ̨nɔ̨ ə kɛ a haláái da gəlee kələn; dɔ̨nɔ̨ ə kɛ a nɛ̨ŋɛ̨n mąąhvaalɛɛ haláá. Ɉaláá laa həli mun a nɛ̨ŋɛ̨n mąą hvaalɛɛ kóló kɛ nɛ̨ɛ̨nui tii ɓa, a kɛ tii, mąą aa həɠə.»