Levetekɔ 11 - Yálá laawoo hɛɓɛ (dc)

Hɛnŋąą di mąąhəɠɛɛ da yii mąą hvo həɠə li Huwɔi tɔ́n gaa mą da yii tɔ́n və mą

¹ Yai-Laa yɛ Moisə da Aarɔn diɛ:

² «Ka mɛ̨nįi ŋɛ̨i ɓo Israɛlə lonnii diɛ, kaa diɛ: Yɛnɛ̨ɛ̨ huwɔɠaa kəlee lɔwai, yiiɠaai ka pɛli di mįi, diɛ ka:

³ Huwɔi lɔpee gɔwɔɲąnįn mɛlaɓoɔ ɉu hveelɛ, diɛ kɔ̨nɔ̨n mįi diɛ pənə diɛ dɛ di lá diɛ ɉu mįi, ka pɛli ka di mįi,

⁴ Kɛlaa, ɉuwɔɠaai da kɔ̨nɔ̨n mįi diɛ pənə diɛ dɛ di lá di kɔ́wɔ ɲąnin mɛla hvo ɓoli ɉu hveelɛ, ka hvo da mįi; diɛ ɓaa: Ɲɔ̨ɔ̨mɛ̨ɛ̨, mąąhɔlɔɓo, bələi mąn a kɔ̨nɔ̨n mįi la, yɛ pənə yɛ dɛ ná, gɔwɔ ɲąnin və ɓɛlaɓo li ɉu hveelɛ, tɔ́n gaa mą.

⁵ «Kwɛlaayilɛ, a kɔ̨nɔ̨n mįi yɛ pənə yɛ dɛ ná yɛ ɉu mįi, kɛlaa gɔwɔ ɲąnin və ɓɛlaɓo li ɉu: tɔ́n gaa mą.

⁶ «Tɔ́n gaa hɔwolo ɓa, a kɔ̨nɔ̨n bənə yɛ dɛ ná tɛ̨ą li, kɛlaa gɔwɔ ɲąnin və ɓɛlaɓo li ɉu;

⁷ «Ɓoi ka, tɔ́n gaa mą, gɔwɔ ɲąnin mɛlaɓoɔi kpɔ ɉu hveelɛ, kɛlaa hva pənə hvo kɔ̨nɔ̨n dɛ ná yɛ ɉu mįi.

⁸ Mąą hvo nɛ̨ɛ̨li ka hvo di huwɔ mįi. Ka hvo tunwɔ̨n di powa ɓa. Tɔ́n gaa diɛ.

Yái huwɔɠaa

⁹ «Yái huwɔɠaa lɔwai, yiiɠaai ka pɛli di mįi diɛ ka: Yái huwɔ lɔpee, ə kɛ a gboloyá hu huwɔ, ə kɛ a tɛɛyá hu huwɔ, gala ə ɓo mą, ka pɛli mįi.

¹⁰ Kɛlaa, yiiɠaai kpɔ gbaalən və mą, di kala hvo diɛ, di kɛ a gboloyá hu huwɔ a wala kɛ tii tɛɛyá hu huwɔɠaa, bɛlɛɛɠaa da yai huwɔi lɔpee gala hvo mą, tɔ́n gaa diɛ.

¹¹ Mąąnɛ̨ɛ̨ ka di kaa a huwɔɠaai tɔ́n gaa diɛ, mąą hvo nɛ̨ɛ̨li ka hvo di huwɔ mįi, ɛlɛɛ ka di powa kaa a hɛn mąąliɓiɛ.

¹² Yái huwɔ lɔpee gala hvo mą, tɔ́n gaa gəlee ɓa, ka hvo mįi.

Nwɛ̨niɠaa

¹³ «Nwɛ̨niɠaa lɔwai, yiiɠaai tɔ́n gaa mą, mąą hvo nɛ̨ɛ̨li ka hvo mįi, diɛ ka: kuwɔ, kuwɔkpaan da yápɔ-kuwɔɠaa kəlee, ka hvo da mįi.

¹⁴ Kɔ́ɔ́wɔ, kunwunu-gala-hukulɔ-kulɔ, da duwaa, huwui lɔpee gəlee,

¹⁵ goą-goą huwu kəlee,

¹⁶ hɔ̨nwɔ̨nɔ̨gɔlɔn, kpaan, kpaan-gwələ-həɠə, da geelə huwu lɔpee gəlee.

¹⁷ Muú da muú huwu lɔpee gəlee.

¹⁸ Kwɛli-Muú, yá-kan, yá-nwɛ̨ni huwu lɔpee gəlee,

¹⁹ wɔɓɛ, da kələnɔw.

Koon-koon ɉɛnŋąą

²⁰ «Koon-koon ɉɛnŋąą kpɔ di kɔ́wɔ kaa diɛ nąąn diɛ hiɛ mɛ̨i, tɔ́n gaa gəlee ɓa ka yəi.

²¹ Kɛlaa, koon-koon ɉɛnŋąąi di kɔ́wɔ kaa di mu nąąn, daɠaa kaa laa, ka pɛli mįi, diɛ ɓaa: yiiɠaai di kɔ́wɔ kaa diɛ, di wɛla ə ɓo diɛ, diɛ pɛli teen ɉii la lɔi mɛ̨i.

²² Yiiɠaai kɛa ka pɛli di mįi, diɛ ka: Peelə huwu kəlee, da Ɉai huwu lɔpee gəlee.

²³ Kɛlaa, koon-koon ɉɛn lɔpee gɔwɔ kaa mu nąąn, tɔ́n gaa mą.

Ɉɛn a tɔ́n bɛlɛ nu ɓa

²⁴ «Ɉuwɔɠaai tɔ́n gaa mą, nui lɔpee a tunwɔ̨n da powa ɓa, a kɛ tii, mąą nu aa gbɔwɔ mąąliɓi a volói tii, ə lɛɛ la ɉu yələ ə wulu.

²⁵ Nui lɔpee a di ta powa kpəŋə, mąąnɛ̨ɛ̨ ə mąą həɠə waa, mąą nu mąą liɓiɛ ə lɛɛ ɉu yələ ə wulu.

²⁶ Huwɔi lɔpee gɔwɔ ɲąnin və ɓɛla li, hva pɛli kɔ̨nɔ̨n bənəi hvo dɛ na, yɛ ɉu mįi, tɔ́n gaa mą. Nui a tunwɔ̨n diɛ, aa tɔ́n bɛlɛ gbɔwɔ ɓa.

²⁷ Yili a həɠə laa, huwɔi lɔpee gɔwɔ kaa mu nąąn, yɛ hiɛ yɛ nu hiɛ pələ, tɔ́n gaa mą. Nui a tunwɔ̨n da powa ɓa, mąą nu a gbɔwɔ mąąliɓi a volói tii, ə lɛɛ ɉu yələ ə wulu.

²⁸ Ɛlɛɛ nui lɔpee a da powa həɠə, mąąnɛ̨ɛ̨ ə mąąhəɠə waa. Mąą nu aa gbɔwɔ mąąliɓi a volói tii ə lɛɛ la ɉu yələ ə wulu. Ɉuwɔɠaai tɔ́n gaa mą ka mąą mɛ̨nį ɓa, diɛ ka tii.

²⁹ «Huwɔɠaai da tala lɔi ɓa, yiiɠaai tɔ́n gaa diɛ, diɛ ka: Ɉɛ̨ŋɛ̨, ɲinɛ̨, kwələ huwui lɔpee,

³⁰ ɓailon, loolo da hvɛlɛɛn ɉuwu lɔpee gəlee.

³¹ Huwɔ yiiɠaai da tala, yiiɠaai tɔ́n gaa diɛ, diɛ ka tii, nui a tunwɔ̨n da powa ɓa, aa gbɔwɔ mąąliɓi a volói tii, ə lɛɛ ɉu yələ ə wulu.

³² Ɉuwɔ huwui tii ta powa a too hɛn da mɛ̨i, mąą hɛn tii mąą aa liɓi; Ə kɛ a wulu, ə kɛ a həɠə, ə kɛ a huwɔ kɔ́lɔ, ə kɛ a ɓíi, da kóló kɛ hɛnɲaŋą lɔpee ta, mąąnɛ̨ɛ̨ di mąą waa a yá, a kɛ a hɛn mąąliɓiɛ ə lɛɛ la ɉu yələ ə wulu, yili pulu mąą a həɠə.

³³ Ɉuwɔ taaləi tii ta a too pɔlɔ hɛnɲaŋą ta hu, ɉɛnɲaŋąi tii hu hɛnŋąą kəlee mąą a liɓi, mąąnɛ̨ɛ̨ ka ɉɛnɲaŋąi tii wolo.

³⁴ Akɛ yá ɓə kɛ ɉɛnɲaŋąi tii hu, ɲái tii a taɠa kɔ̨nɔ̨n ma, gɔ̨nɔ̨n tii a kɛ a mąąliɓiɛ; a kɛ a kpələ hɛn lɔpee, mąą a liɓi.

³⁵ Ɉuwɔ taaləi tii powa ta a too hɛn da mɛ̨i, ɉɛn tii a kɛ a hɛn mąąliɓiɛ, akɛ nwɔ̨n dinii ɓə, a wala kɛ tii ləɠi yili hɛnɲaŋą ta ɓə. Mąąnɛ̨ɛ̨ ka di kaa a hɛnɲaŋąi tɔ́n gaa diɛ.

³⁶ Kɛlaa, akɛ ya nwun gulɔi ɓə, a wala kɛ tii yálɔwa hu, tɔ́n va kɛ yiliɠaai diɛ, kɛlaa nui a tunwɔ̨n ɉuwo powa ɓa, aa tɔ́n ɉəɠə.

³⁷ Di ta powa a too hihɛn ɉuwu ta mɛ̨i, ɉihɛn ɉuwui tii, tɔ́n va kɛ mą.

³⁸ Kɛlaa a kɛ daa gbɛa yá pu mɔ̨nun gɔw ɓa, ɉuwɔɠaai tii ta powa ə too ɉu, a kɛ tii tɔ́n gaa mɔ̨nun gɔwi tii ɓa.

³⁹ «Ɉuwɔɠaai di kaa a ka kɔ̨nɔ̨n, da a haa gbɔwɔ ɓa, nui a ɲee pɛlɛ ɓɔwa ɓa, a tɔ́n ɉəɠə ə lɛɛ ɉu yələ ə wulu.

⁴⁰ Nui a ɉuwɔ powai tii ta mįi, mąąnɛ̨ɛ̨ ə mąąhəɠəɠaa waa, tɔ́n a kɛ mą ə lɛɛ ɉu yələ ə wulu.

⁴¹ «Ɉuwɔ pɛlɛɛɠaai tii da tala, tɔ́n gaa gəlee ɓa, ka hvo da mįi.

⁴² Ɉuwɔɠaai kpɔ da tala, a wala kɛ tii diɛ tala di kɔ́wɔ nąąn mɛ̨i ə mą kɛ gɔwɔ tamąą mu, yiliɠaa ɓə tɔ́n gaa diɛ.

⁴³ Ka hvo ka kpɔɔ mąąliɓi a ɉuwɔ huwui tii ta lɔpee, yiiɠaai da tala da yiiɠaa da kɛ tiliin ɉii di koo mɛ̨i, ka hvo tɔ́n bɛlɛ ka kpɔwɔ ɓa a da lɔpee laa pɔɔ.

⁴⁴ Mąąhɔlɔɓo, ɲą́ą́ ɓə a Yai-Laa ka wɔ Yálá, mąąnɛ̨ɛ̨ ka ka kpɔwɔ mąąhəɠə, mąąhɔlɔɓo, mą́ą́həɠɛɛi. Ka hvo ka mąąliɓi a ɉuwɔ pɛlɛɛɠaai tii da tala lɔi mɛ̨i.

⁴⁵ Mąąhɔlɔɓo, ɲą́ą́ Yai-Laa, ɲą́ą́ ɓə ka kulɔ Eziptə lɔi hu, ə gɛ, ŋį́ kɛ a ka wɔ Yálá; mąąnɛ̨ɛ̨ ka mąą ə həɠə, mąąhɔlɔɓo, mą́ą́həɠɛɛi.»

⁴⁶ Mɛ̨nįɠaai mąąnɛ̨ɛ̨ ka gɔlɔn yɛ hvilɛn na huwɔɠaa, nwɛ̨niɠaa, yái huwɔɠaa da tala huwɔɠaa diɛ, yaa li.

⁴⁷ Yili ɓə pai tɔ́n ɉuwɔɠaa da yiiɠaai tɔ́n və diɛ, yiiɠaai da di mįi da yiiɠaai di hva di mįi, di kulɔ nɔwai lɛi kaa.