Korɛntə veelɛ 7 - Yálá laawoo hɛɓɛ (dc)

¹ Nwɛ́likɛmąą nuą, yii kani Yálá kpinįi aa mɛ̨nį taaləi tii laakwɛlanmo guɔ, 'ká gu gu kpɔwɔ kpinįi mąąhəɠə, hɛn a nu kɔlɔ da nįį kɔhɔɓo gəlee yəi, 'ká gu gu kpɔwɔ mąąhəɠə mɛ̨nį, ɲee laa kulɔ kɛ Yálá ŋą ɲɔwmąąlaa hu.

Polə nwɔ kwəinɛ̨ɛ̨ mɛ̨nį

² 'Ká ká yee hee ku mu ká lii hu pələ; ku hvo nu ta hvulu li mɛ̨nįi lɔpee ta hu, ku hvo nu ta too li, ku hvo nu ta yəi mįi li.

³ Və́ yili ɓoi ti káá, ká hvala mɛ̨nį ɓa, mąąhɔlɔɓo, ŋą́ą́ gbɛa kɛ mo káá, ká káá ku lii hu, ə kɛ haa hu, ə kɛ ku hvulú kɔwɔ ɲą.

⁴ Kilitɔɔmąą laa kɛnɛ̨ɛ̨ kaa ɲə́i, ká mąą mɛ̨nį ɓa, ɲɛ̨i pono kɛnɛ̨ɛ̨ kaa ɲə́i ká mąą mɛ̨nį ɓa, gwə́inɛ̨ɛ̨i kpɔ kɛnɛ̨ ku wɔ mɔ̨nmɔ̨ɠaa kəlee hu.

⁵ Hvo gaai, bələi mąn ku paa la Masedoanə, ku hvo hvįįtɔɔ hɔlɔɓo, kɛlaa mɔ̨nɔ̨ huwu lɔpee ə həli kuɔ; di kɔ pɛlɛ kuɔ ɲɛnɛ̨ɛ̨ pələ, ɲɔw yɛ ɓo ku hu pələ.

⁶ Kɛlaa, Yálái a kpɔɔmąąyɛɛ nuą liilaa, ə ku liilaa a pai Titə ə mo,

⁷ hvo lɛɛ lɔ a ba mɛ̨nį, kɛlaa, vaŋąlɔi ə ɉɔlɔɓo ká yəi, ká ɲɛ̨i tɔɔ mɛ̨nį mą́ą́, mą liihɛlɛn, ká wɔlɔ woo, ká wɔ wɛlikɛmąąlaa yɛ hvilɛn na mą́ą́, ə ɉukulɔ mą́ą́, yili ə nwɔ́ gwə́inɛ̨ɛ̨ ta kɛ nwɔ̨nɔ̨ mą.

⁸ A tɛ̨ą, ə mą kɛ, ŋą́ hɛɓɛ́i hu woo ə ká liikələn ká kwəi, yili niihɛlɛn və mą́ą́. Ɛlɛɛ, ə mą kɛ nwɔ̨nɔ̨, ŋą́ niihɛlɛn ɉeei, ɉɛɓɛ́i tii hu woo, ə nwąną lɔ káá a lɔwai logolo.

⁹ Gwə́inɛ̨ɛ̨i yiihu, ká lii ɲąąnwąną mɛ̨nį hvəə, gwə́inɛ̨ɛ̨i la, kɛlaa, ká lii ɲąąnwąną mɛ̨nįi tii, aa gɛ, káá ká hɔn mąąpənə. Mąąhɔlɔɓo, ká lii ɲąąnwąną mɛ̨nįi, bələ ɓə Yálá ə kɛ la bɔ, yii ɓaa ká pɔ pələ nwɛi, ku hvo mɛ̨nį ɲɔ̨n da laa li káá.

¹⁰ Hvo gaai, liikələn gwəi a həɠə Yálá pɔ yɛ həli nu ɓa, a gɛ, nu ə ɉɔn mąąhvalin malo mɛ̨nį ɓa, hva ɲeekpiɛ too na. Liikələn gwəi a həɠə yɛnɛ̨ɛ̨ pɔ, a nu lɔ haa hu.

¹¹ Niikələn gwəi ti həɠə Yálá pɔ, mɛ̨nįi a gɛ, káá gaa! Kɛlaa, a tɛ̨ą: Aa ká pu káá gílí! Káá nɛ̨ɛ̨mąą hvə, káá ká kpɔwɔ ɓɛlɛ tooi kaa, káá ɲɔw, mą́ą́ lii too mɛ̨nį ká kwəi, ká hvaŋą yɛ lɔ! Ə kɛ a pələi lɔpee, káá kpinįi káá nɛ, káá, ká hɔn və mɛ̨nįi ti hu.

¹² Ká gaa kani gɛ́ ɉɛɓɛ́i ŋɛ̨i tɛɛ káá, nui ɉɔn gɛ mąą mɛ̨nį hvəə, nui di di hɔn gɛ la mąą mɛ̨nį hvəə, kɛlaa ə gɛ, káá kpinįi káá pɛli gaai Yálá ɲɛ̨i ɓa, káá kɛ ku mąą mɛ̨nį nwąnąąi káá.

¹³ Yili ɓə ku liilaa, niilaa mɛ̨nįi tii a həɠə laa, ku kwəi ə nɛ̨ɛ̨ nwɔ̨nɔ̨, a Titə kwəinɛ̨ɛ̨i ká mo, mąąhɔlɔɓo, ká niilaa, ká nįilɔ kpɔ kɛnɛ̨.

¹⁴ Mąąhɔlɔɓo, gbɔ́wɔ́ ɲąąkɛnɛ̨i ŋį́ mo ɲɛ̨i ɓa, ká mąą mɛ̨nį hu, və́ nwúmɛ̨ li yili hu, kəlee, yɛ bələi kwa kɛ tɛ̨ą ɓoi la káá a yələ kəlee, ɲɛ̨i ponoi ku ɉɔlɔɓo ká yəi, káá nɛ a tɛ̨ą Titə ɲɛ̨i ɓa.

¹⁵ A giliŋąhiɛ a vilɛn ká wɔɔ lɛɛ nwoo mu laa kəlee ɓa, ká wɛlii gaa mą, da lɔ ɓə a pɛlɛ mą, ɛlɛɛ, bələi ká ká yee hee la mu, a ɲɔw mąą yɛ kpɛlin.

¹⁶ Gwə́inɛ̨ɛ̨ kpɔ kɛnɛ̨, a gɛ mɛ̨nį, ŋą́ pɛli gílítɔɔi káá mɛ̨nį kəlee hu.