Korɛntə veelɛ 6 - Yálá laawoo hɛɓɛ (dc)

¹ Yii kani, ku kaa Yálá ŋą kóló ɓa, ku kaa ká liɛwoo kɛi, kuɔ; Yálá ŋą mɛ̨inɛ̨ɛ̨ ŋɛ̨i ka ɉɔlɔɓo, ka hvo hee ɉu kpɛli-kpɛli.

² Hvo gaai, moɔi diɛ mą: «Ŋą́ ə́ woo mu hon, a mɛ̨inɛ̨ɛ̨ yələ, ŋą́ ə́ mąąkpɔnmąąɓo, a nwun mąąɓo yələ, ɲələ lɛlɛɛ ka kani aa həli.» Nuą ɓalo hvoló di vaaɓo, aa həli.

³ Ku hvo kpɛli bɔ kpɔ tiikpə, ku hvo kɛ a nu kɔ́wɔ tuwɔ kwɛni nui lɔpee ta ɓa, ə gɛ, ku wɔ kólói mąą kulɔi hvo pa kɛ mą.

⁴ Kɛlaa yaamun, mɛ̨nį kəlee hu, kwa ku kpɔwɔ lɛ a Yálá ŋą tínuą, a hvaŋąlɔ kɛnɛ̨, mɔ̨nɔ̨ hu, yee tɔɔ gwaną mɛ̨nįɠaa hu, liihɛlɛn ɉu,

⁵ kɛlɛ ɓo hu, gaho hu, diɛ nuą ɲąątɔɔ kuɔ, hvįikpɛɛlaa hu, yíikpəlin ɉu, pulu hu,

⁶ mąąhəɠəlaa hu, mɛ̨nį kɔlɔnŋąą hu, liikpələ laa hu, lii nɛ̨ɛ̨gwəi hu, a Kili-Mąąhəɠɛɛ, a wɛlikɛmąą laa leelee,

⁷ a tɛ̨ą woo, a Yálá ŋą hvaŋą, a kɔ́-kɔ kwɛlinŋaai kwa pɛlɛmąą kɛ la, da yiiɠaai kwa tələnmolaa mąąkɔ̨nwɔ̨ la,

⁸ mąąwiɛlaa hu da ɓɛlɛkpɛɛ gwəi laa hu, laa kala hu da nu laa lɛlɛɛ ɓoɔ hu, diɛ ku kaa a lɛɛ nuą, yá pa kuɔ tɛ̨ą ɓo,

⁹ diɛ ku kaa yɛ nuąi kɔlɔn və diɛ, yá pa, ku kɔlɔnŋąą, diɛ ku kaa yɛ haa nuą, yá pa, ku kaa yɛnɛ̨ɛ̨, da ku mɔ̨nɔ̨ɓo, kɛlaa, di hva ku paa,

¹⁰ da ku liikələn ku kwəi, kɛlaa, ku kwəinɛ̨ɛ̨i lɔ a yələ kəlee, ku kaa a yeehowolo nuą, kɛlaa, kuɔ nu tamąą kɛ a hɛn gɔw nąmįną, ku hvɛɠɛɛ, kɛlaa yaamun, hɛn gəlee kaa ku yəi.

¹¹ Korɛntə nuą, ku pələ ɓo káá a tɛ̨ą, ku ku kwəi kwələ káá kpɔ kɛnɛ̨.

¹² Gaa ká kwəi, káá ká kwəi loo kuɔ, káá kpinįi ɓə ká kwəi loɔ ká kpɔwɔ ɓa.

¹³ Gáá bələi ŋɛ̨i ɓoi káá yɛ nónnii, káá kpɛlimąn 'ká gwələ kulɔ kuɔ, 'ká ká kwəi kwələ kpɔ kɛnɛ̨, ká kpɔwɔ ɓa.

'Ká kulɔ ká woo ɓa ká Yálá ni ká lɔwai

¹⁴ Nuąi di hvo laa li Yálá la, ká diɛ ni ka hvo bɛlɛ gee ɓa mɛ̨nį kɛ, gbala ə tɔɔ, nɛ̨ɛ̨laa lə kɛɛ ɓə gaa tələnmomun da hvulumun di lɔwai? Awala kɛ tii, kpɔn nə kɛɛ ɓə kɛɛ pono da kpinį da pɛli naai?

¹⁵ Woo laa mąą lə kɛɛ ɓə a pɛli kɛi Kristə da ɓilihi di lɔwai? Nɛ̨ɛ̨laa huwu lə kɛɛ ɓə a pɛli kɛi laa namun da nui hvo a laa namun di lɔwai?

¹⁶ Bɛlɛ gee ɓa lə kɛɛ ɓə a pɛli kɛi Yálá hee pɛlɛ́ da haliɠaa di lɔwai? Gbala ə tɔɔ, guɔ ɓə gu kaa a Yálá hvulúmąą hee pɛlɛ́; yɛ pələi Yálá ə mo la, yɛ kɛ diɛ: «Gáá pai heei di lɔwai, gɛ́ hiɛ laa, Ŋį́ ɓo a di wɔ Yálá, diɛn, di ɓo a nwɔ́ nu huwu.»

¹⁷ Yili ɓə gɛ, gu Nąmu Yálá yɛ kɛ diɛ: «'Ká kulɔ kani nuą ti lɔwai, 'ká diɛni 'ká ká ɓɛla ɓo, ka hvo tunwɔ̨n hɛn gɔhɔɓoɔ ɓa, ká gɛ ti, ŋą́ ɲéé hee ká mu.

¹⁸ Ŋą́ kɛ a ká nąn, ka kɛ a nónnii. Hééɓolaa kəlee Nąmu Yálá woo li!»