Korɛntə veelɛ 5 - Yálá laawoo hɛɓɛ (dc)

¹ Mąąhɔlɔɓo, ku kili kaa ɉu kuɔ, bɛlɛ́i ŋɛ̨i ku kaa mu ɓɛ yɛnɛ̨ɛ̨, gaa lɔ a ɓuwu, a pa kalai, pɛlɛ́ kpɔ-kpɔɔ kaa ku yəi, yai Yálá kpinįi ə dɔɔ, yələkɔlɔn ɉu pɛlɛ́ li, nu yee hvə dɔɔ li;

² Yiihu, kwa kɛ ɲįŋɛ̨i, kuɔ ku lii pɔ wɔlɔ, kuɔ kɛ ku kɛ mu, yai a ku wɔɔ ɲələi pələ pɛlɛ́i;

³ Ŋį́ mo kɛ, ku kaa kɛa kɛ mui, ku hvo li kɛ a ku kpuwulu.

⁴ Ɓɛlɔwai gu kaa ni la ɲɛ̨nɛ̨ɛ̨ pɛlɛ́i ŋɛ̨i mui, gu kaa ɲiŋɛ̨i yɛ tiɛ̨ kɛnɛ̨ a kɛ gu nwuɔ̨, tɛ̨ą li, hvo kɛli gu kulɔ nu kɔ́lɔ hu, kɛlaa, ku kaa bɔ ku yələkɔlɔn ɉu nwɛi tɛ mą, ə gɛ, yɛnɛ̨ɛ̨ kpɛɛ hvo mą, ə hɛn haa kaa mą mąą hvalin.

⁵ Nui gu pɛli tínąą tii mąą mɛ̨nį ɓa, Yálá kpinįi ɓə. Yaa ɓə gu kɔ a ŋą Kilii yəi mɛ̨inɛ̨ɛ̨ dɔlɔɔ.

⁶ Yili ɓa tii, ku hvaŋąlɔi lɔ a yələ kəlee, bələi mąn ku ɉukɔlɔn na kuɔ kɛ, yii kpɔ ni ku kaa gɔlɔi ŋɛ̨i hu, ku hvo ku wɔɔ pɛlɛ́i mu, ku mąą kwɛai ni gu Nąmu ɓa.

⁷ Hvo gaai, ku kaa ku wɔɔ yɛnɛ̨ɛ̨ kɛi laa na laa hu, ku ɲɛ̨i hvo tɔɔ li hɛn da ɓa.

⁸ A tɛ̨ą, ku hvaŋąlɔɔi lɔ a yələ kəlee, ɛlɛɛ, ku kaa kɛa bɔ ku kulɔ gɔlɔi ŋɛ̨i hu, gwəli ku hee gu Ną́mu kwɛlɛ.

⁹ Yili ɓa, ku kɔlɔi ŋɛ̨i, ɲɛ̨i mąą ə hvaliŋ-o, ku kulɔ ɉu-o, yii ku gwɛlii ya ɓaa, kwa Yálá lii hon nɔ.

¹⁰ Mąąhɔlɔɓo, hvo kɛli gu kəlee gu tɔɔ Kristə ŋą kitii lííla, ə gɛ, mɛ̨nįi nu tɛitɛi ə gɛ nwɔ yɛnɛ̨ɛ̨ yee mu, yɛ ə kɛ a nɛlɛɛ, yɛ ə kɛ a ɲɔ̨nwɔ̨ɔ̨, yɛ mąą hvɛla hɔlɔɓo.

Kristə aa nu kanŋaa da Yálá ni di lɔwai ponnaa kulɔ

¹¹ Yii kani, bələi mąąnɛ̨ɛ̨ gu ɲɔw la gu Nąmu ɓa, nu kəlee ə gɔlɔn, kwa tɔɔ a ku nwąnąi, kuɔ nuą kilaa pono, ɛlɛɛ, Yálá ɲɛ̨i ɓa, ku mąą mɛ̨nį hu ponoɔi. Nwɔ́ɔ́ kwəi pələ, mą́ą́ mɛ̨nį hu ponoɔi káá kpɛlimąn ká kili hu pələ.

¹² Ku hvo pənəi kuɔ ku kpɔwɔ mąą mɛ̨nį lɛ káá, kɛlaa ku kaa bɔ, ká ɲɛ̨i ə pono ku mąą mɛ̨nį hu, nuąi di nwun dɛ mɛ̨nį kaa a ɲɛ̨i həɠə mąą, hva həɠə di koo kpala,, káá pɛli di woo hu tooi.

¹³ Akɛ ɓowo hvaa ɓə ku mo, ku mo Yálá ɓa. Kɛlaa, akɛ kilimąą woo ɓə, akɛtii, ká mąą mɛ̨nį ɓə.

¹⁴ Kristə nwɔ wɛlikɛmąąlaa aa hee ku hu, ku kili kaa ɉu kuɔ, yii nu tɔ̨nɔ̨ ɓə nu kəlee pulu haa ɓo, akɛti kani, nu kəlee ka ti haa.

¹⁵ Ɛlɛɛ, ə nu kəlee pulu haa ɓo, ə gɛ, nuąi di hvulú kɔwɔ ɲą, di hvo yɛnɛ̨ɛ̨ kɛ a di kpɔwɔ mąą mɛ̨nį, kɛlaa, di yɛnɛ̨ɛ̨ kɛ nui haa ə nwun, mąą mɛ̨nį ɓa.

¹⁶ Yili ɓa, yiihu kɛa, gu hvo nu ta kɔlɔn nu kan gɔlɔ hu, akɛ gu Kristə kɔlɔn a nu kanŋaa di wɔ nu kɔlɔn bələ, bələ yili hvəə kɛa ku gɔlɔn na.

¹⁷ Yili ɓa, nui gaa Kristə hu, gaa kɛa a gulaa-nįnɛ̨, ɲɛnɛ̨ɛ̨ pɔlɔ aa tɛɛ, mąą aa hvalin a nįnɛ̨.

¹⁸ Yili kəlee ə həɠə Yálá pɔ, yai gwa diɛni gu lɔwai pɔnnaa kulɔ, a Kristə, ə gu yee lɔ geei; ɛlɛɛ, ə ɲee lɔ geei kólói tii lɛɛ gu yəi.

¹⁹ Mąąhɔlɔɓo, ə kɛ a pələ lɔpee gəlee, Yálá ɓə, yaa kpinįi da nu kanŋaa di lɔwai ponnaa kulɔ a Kristə; hvo nu kanŋaa di wɔ nɛ̨ŋɛ̨nŋaa kwələ kulɔ diɛ; ɛlɛɛ, ə bonnaa kulɔ woo tii lɔ gu la.

²⁰ Yili ɓa, Kristə laa hu ɓə, ku kaa la ɓɛ lɔi mɛ̨i, a ɲɛ̨i kɔw, ɛlɛɛ, ku pɔ pələ ɓə Yálá a ká təli la. Kristə laa hu, ku kaa nɛ̨ɛ̨mąą hvəə káá, kuɔ, 'ká ká kpɔwɔ lɛɛ laa, di ká lɔwai ponnaa kulɔ, ká Yálá ni ká yee ə lɔ gee hu.

²¹ Nɛŋɛ̨n nɔpee hvo Kristə ɓa, kɛlaa, Yálá ə gu wɔɔ nɛ̨ŋɛ̨n diɲɛ̨ɠaa hee nwuɔ̨. Yiihu kɛa, Kristə pɔ pələ, Yálá aa gu kɛ la a tələnmo nuą.