Korɛntə veelɛ 4 - Yálá laawoo hɛɓɛ (dc)

Kristə kaa gɛlaɠaa kɛ kolo hu

¹ Yii yan, Yálá nwɔ ɲɛ̨imąąwɛlikaa hu, aa goloi ŋɛ̨i kalihvaɓo kuɔ, ku hvįi hva kpɛɛ gɛi.

² Nwumɛ̨ mɛ̨nįɠaai noɔ, kwaa lənə yiliɠaa diɛ, ku hva túwɔ́ a nuą ɓowo pələ, ɛlɛɛ, ku hvo nwɔ̨nɔ̨ Yálá laawoo mąąhvalin, kɛlaa yaamun, nwumɛ̨ mɛ̨nį, kwaa yiliɠaai lɛɛ laa, ku hvo gbąnąlaa túwɔ́ ɓoi, ku hvo Yálá lawoo ɲɛ̨ilaai mąą hvalin Ɉii. Kɛlaa yaamun, tɛ̨ą yii gaa ɉu, ya ɓə kwa nɛ a ɉuponoɔ, ə gɛ, nu kəlee di kilitɔɔ mąą laa hɔlɔɓo Yálá ɲɛ̨i ɓa.

³ Akɛ nwɛlɛɛ lɛlɛɛi ku kaa naa həlii, mɛ̨i kpuluɔi, mɛ̨i kpuluɔi lɔ nwun na pili nuą diɛ.

⁴ A diɛi tii di hvo laai nwɛlɛɛ lɛlɛɛ la, diɛi, ɲɛnɛ̨ɛ̨ ŋɛ̨i hu yálá aa di kili ɲɛ̨i wolo, ə gɛ, di hvo pa nəi Kristə ŋą mąąwiɛlaa mąą wɛlɛɛ lɛlɛɛ kaa, a Kristə yai gaa a Yálá mąąnįnįn.

⁵ Ku kpɔwɔ mąą kalan vəi ku kaa gɛi, kɛlaa gu Nąmu Jesus Kristə ɓə. Yii ɓaa ku kpinįi ku wɛi, kwa ku kpɔwɔ lɛ a ká wɔɔ tínuą Jesus mąą mɛ̨nį ɓa.

⁶ Mąąhɔlɔɓo, Yálá ŋɛ̨i kɛ diɛ: 'Kɛɛ ə pono kpinį hu! Yaa ti lɔ ɓə kɛ a kɛɛ pono ku lii hu, yɛ ŋą mąąwiɛlaa kɔ́lɔn gili tɛɛ ka gu pɔ, yai lən ɉii Kristə ɲɛ̨ilaai.

⁷ Kɛlaa, ɉɛn gɔw ti, naaikɛɛi gu yəi ləɠi-kpɛli hu, ə gɛ, nuą diɛ pɛli gbaɠala kaai a nɛlɛɛ, diɛ kɛ ɉuwalawala kɛnɛ̨ taaləi ti ə həɠə Yálá pɔ, kuɔ hvəə.

⁸ Ku hvanąąi bələ kəlee, kɛlaa, ku hvo wolo li, kwa too ku kaa kanąn mɛ̨nįɠaa hu, kɛlaa, kuɔ kulɔ ɉu,

⁹ di hvilɛnŋąą ku pulu, kɛlaa, di hva ku hon, diɛ ku too, kɛlaa, ku nwun va lɛɛ ɉu.

¹⁰ A yələ kəlee, mɔ̨nɔ̨ɠaa Jesus ə mįi, ku kaa di mįi ku kɔlɔ hu, ɲɛ̨n deei hvo kɛ mą, ə gɛ, Jesus ŋą yɛnɛ̨ɛ̨ yɛ pɛli tooi pono ŋą ku kɔ́lɔ hu.

¹¹ Hvo gaai, yələ kəlee, kuɔi ku hvulú kɔwɔ ɲą, da ku kwɛlɛ haa ɓa, Jesus mąą mɛ̨nį ɓa, ə gɛ, Jesus ŋą yɛnɛ̨ɛ̨ yɛ pɛli tooi la pono ŋą kpɔ hələ-tətə, ku kɔlɔ hu, yai haa kaa mą.

¹² Bələ lɔ ɓə, haa a gɛ kolo kɛ la ku hu, kɛlaa, yɛnɛ̨ɛ̨ yɛ nwɛi kɛ ká hu.

¹³ Ɛlɛɛ yaan, gilitɔɔmąą laa tii kɛɛ mɔ̨ɔ̨ ku yəi, kuɔ Yálá mɛ̨nį kaa la a tɛ̨ą, yai di mąą mɛ̨nį pɛ̨ɛ̨, diɛ kɛ la mą: «Gaa ɓə ŋą́ mo a tɛ̨ą, yili ɓə gɛ, gɛ́ hvaa mą» yili a kɛ tii, kuɔ kpɛlimąn, ku gaa a tɛ̨ą, yili mąą mɛ̨nį ɓə ku kaa hvaai la.

¹⁴ Hvo gaai, ku kili kaa ɉu kuɔ, nui gu Nąmu Jesus nwun haa nuą lɔwai, gaa lɔ pai gu nwun ɉii tii gwa Jesus ni, yɛ gwa káá ni gu heei kulɔ gwɛlɛ.

¹⁵ Mɛ̨nįɠaai kpɔ laai kuɔ, ká mąą mɛ̨nį ɓə, nɛ̨ɛ̨laa ta yɛ pɛlɛ la mą, gbɔn ɉu yɛ kɛnɛ̨ la, ɛlɛɛ, Yálá ŋą mąąwiɛlaa hɛɠɛɛɓo woo hu yɛ wiɛ la.

Ká gu yɛnɛ̨ɛ̨ kɛ laa na laa hu

¹⁶ Yili ɓə a gɛ, ku hvįi hva kpɛɛ, ə mą kɛ, ku kili kaa ɉu, ku kɔlɔ kaa lii haa pɔ pələ, ku nįį hu pələ nwɛi, gaa lɔ yɛ pu nįnɛ̨ kɔlɔi a yələ kəlee da nwɔɔ.

¹⁷ Hvo gaai, mɔ̨nɔ̨ logolo tiikpɛi ŋɛ̨i pai kpɛɛi, gaa a ɲɛ̨i pono kɛnɛ̨ɛ̨i kpɛɛ hvo mą, heɛ nuą tɔwɔ.

¹⁸ Ku wɛi, mɛ̨nįɠaai kaa kaa diɛ, ku hvo di pulu, kɛlaa yiiɠaai hva kaa, diɛ ɓə kwa gwɛli, yiiɠaai kaa kaa diɛ, hvoló tɔ̨nɔ̨ mɛ̨nįɠaa lɔ li, kɛlaa Yii kaa hvo mą, kpɛɛ hvo diɛ.