Korɛntə veelɛ 3 - Yálá laawoo hɛɓɛ (dc)

Mįnɛ̨ nįnɛ̨ hu kolo kɛ nuą

¹ Kuɔ ɓə mɔ̨ɔ̨ kuɔ ku pa tɔɔ nwɔ̨nɔ̨, kuɔ ku kpɔwɔ lɛ káá a ku mąątɛ̨nɛ̨ pələ? Awala kɛ tii, ku kpɔwɔ mąą liɛwoo kɛ hɛɓɛ́ kɛ mɛ̨nį mąąkpaan gaa kuɔ, kuɔ paa la ká pɔ? A wala kɛ ti, káá dɛɛ ku pɔ, yɛ bələi yili mąąkpaan gaa la nu takpɛliɠaa diɛ?

² Káá ɓə a ku wɔɔ hɛɓɛ́i, ɉɛɓɛ́i tii pɛ̨ɛ̨i ku nii hu, nu kəlee di gɔlɔn, diɛ mo.

³ Gəlee ə mą kɛ, ka káá a hɛɓɛ́i Kristə ə bɛ̨ɛ̨, galihvaɓoɔ kuɔ, kuɔ naa həli; hvo pɛ̨ɛ̨ li a hɛɓɛ́-yá, kɛlaa, bɛ̨ɛ̨i a Yálá hvulúmąą ŋą Kilii yee pɔɔ, hvo pɛ̨ɛ̨ li kwɛni ɓɛla mɛ̨i, kɛlaa, bɛ̨ɛ̨i nuą kili pɔ.

⁴ Bələ kpɔ ɓə gaa la ku kwəi Yálá ɲɛ̨i ɓa, Kristə háálai.

⁵ Ə kɛ ŋɛ̨i kwa pɛli lɛɛi ku kpɔwɔ ɓa, ku kpɔwɔ hvan ɉu, kuɔ pɛli mɛ̨nį lɔpee ta kɛi, yili hvəə, ku hvaŋą a həɠə Yálá yəi.

⁶ Yaa ɓə a hvaŋą tɛɛ ku pɔ, kuɔ pɛli kɛi a mįnɛ̨ nįnɛ̨ hu kóló kɛ nuą, mįnɛ̨ nįnɛ̨i tii hvo a hɛɓɛ́ kɔw, kɛlaa, gaa a Kili-Mąąhəɠɛɛ ŋą mɛ̨nį; hvo gaai, dɔn ɉɛɓɛ́, a nu paa, kɛlaa, Kili-Mąąhəɠɛɛ nwɛi, a yɛnɛ̨ɛ̨ tɛɛ nu pɔ.

⁷ Dɔ́n nwooɠaa tii pɛ̨ɛ̨i kɛ kwɛnį ɓɛla mɛ̨i, dɔn tii a nu paa, Moisə ɓə kɛ a ŋą tímun. Bələi mąn ə kɛ la tii, ə kɛli mąąwiɛlaa kɛnɛ̨ hɔlɔɓo ɲəi, mąąwiɛlaa tii ɓə kɛli Moisə ɲɛ̨ilai lən, Israɛlə lonnii di hvo kɛli pɛli di ɲai heei ɲɛ̨ilai, yá pa, hvo lamun mą,

⁸ gu hvo mun kɛ, Yálá nwɔ Kilii ŋą kóló, nwɔ mąąwiɛlaa hva mɔ̨ɔ̨ kɛnɛ̨ ə tɛɛ yili ɓa?

⁹ Akɛ dɔ́n a nu nwun na pili, ŋą kolo nwɔ mąąwiɛlaa kaa tii, gu hvo mun kɛ, tələnmolaa ŋą kolo nwɛi, yee hva mɔ̨ɔ̨ tɛɛ yili ɓa?

¹⁰ Gaa tii a tɛ̨ą, golo tɔlɔɔ ŋą mąąwiɛlaa tii, da mɔ̨ɔ̨ gɔɔn háákələi mąąwiɛlaa ɓa? Nu hva kpɛli gɔɔn ɉii gee ɓa, háákələi nwɛi kɛnɛ̨i dɛɛ mą.

¹¹ Gbala ə tɔɔ, akɛ hɛn lamun hvo kɛ mą, mąąwiɛ pələ ə kɛ tii, gu hvo mu kɛ, mɛ̨nįi kpɛɛ hvo mą?

¹² Ku ɲɛ̨i kɛɛ mɔ̨ɔ̨ mɛ̨nį taaləi tii tɔwɔ, yili ɓə a ku wɔɔ laa na laa hvaŋą kɛ ɉu.

¹³ Ku hvo gɛi yɛ Moisə, yai kɛi həɠə pɛlɛ ɲɛ̨ilai, ə gɛ Israɛlə lonnii di hvo nəi pa volo tɔ̨nɔ̨ kɛɛponoi tii, kpɛɛi lɔwai kaa.

¹⁴ Kɛlaa, di kili hu ə kpinį, ə mą kɛ yiihu ɓə, da kɛli mįnɛ̨ həɠɛɛ tɔlɔɔ hu woo ɓo, ɉəɠə ɓɛlai tii kaa lɔ ni laa, hvo ni həɠə li laa; mąąhɔlɔɓo, Kristə hu ɓə a həɠə la laa.

¹⁵ A tɛ̨ą, hááɓa háá, di mą nwɔ̨nɔ̨ kɛ Moisə ŋą hɛɓɛ́i ɓoi, həɠə pɛlɛɛi lɔ ni di kili mɛ̨i.

¹⁶ Kɛlaa, nui aa gili tínɛ̨n gu Nąmu pɔ pələ, yaa lɔ ɓə gili mɛ̨i aa həɠə.

¹⁷ Mąąhɔlɔɓo, gu Ną́mu kaa a Kili, yaan, ɓɛi gu Ną́mu-Nįi kaa laa, nąą ɓə lɛɛ gbɔwɔ ɓa laa kaa laa.

¹⁸ Ɛlɛɛ, gu kəlee kpɔ, ɉəɠə ɓɛla aa həɠə gu ɲɛ̨i, gu Nąmu ŋą mąąwiɛlaa ta aa həli guɔ, gu ɲɛ̨ilai mąą aa hvalən, gwaa kɛ a gulɔmąą, gu wɔ mąąwiɛlaa ta yɛ pɛlɛ lɔ mą a yələ kəlee gu Nąmu haalai, yai a Kili.