Korɛntə veelɛ 2 - Yálá laawoo hɛɓɛ (dc)

¹ Nwɛ́i, yii ŋį́ naa gwəi, ya ka: Vá pənə və́ pa ká pɔɔli liiɲąnwą hu.

² Gbala ə tɔɔ, ɲą́ą́ ŋɛ̨i ŋą́ ká liikələn ka kwəii, gbɛɛ ɓə pai gwə́inɛ̨ɛ̨i, ə kulɔ lɔ nui ŋą́ niikələn gwəi, bulu?

³ Nwɔ́ hɛɓɛ́i pɛ̨ɛ̨ nwun ni kɛ. Və́ kɛ bɔ, ŋą́ pa laa, və́ kɛ liiɲąnwąną hu, a nuąi mąą nɛ̨ɛ̨ di gwə́inɛ̨ɛ̨ di laa pɔɔ. Nwɛ́i náái kpɔ tii na, gɛ́, yii kpɔ hvilɛn na ká mąą mɛ̨nį, nwɔ́ kwəinɛ̨ɛ̨ kaa lɔ a káá kpɛlimąn ká wɔɔ kwəinɛ̨ɛ̨.

⁴ Yili ɓə gɛ, gɛ́ hɛɓɛ́ pɛ̨ɛ̨, gɛ́ dɛɛ káá, mɔ̨nɔ̨ kɛnɛ̨ hu da liikələn gwəi da wɔlɔ kpɔ-kpɔɔ; və́ gɛ tii, ká liiɲąnwąną mɛ̨nį ɓa, kɛlaa, ə gɛ, nwɛlikɛmąąlaa kɛnɛ̨i gwə́i, yɛ hvilɛn na káá, káá pɛli gɔlɔn ɉii.

Polə ə mɛ̨nį ɲɔ̨n gɛnɛ̨ kɛ mun mąąhvaalɛɛ

⁵ Akɛ di nu ta lííholi, ɲą́ą́ hvə di nííholi, kɛlaa, gwa gaa kpɔ tii, 'gu hvo nąą mąą walawala hvo tɛɛ ɲɛ̨n ɉu.

⁶ Yii viɛlaɓoɔ nu taaləi ti mąą mɛ̨nį ɓa ya ɓaa: Ká ɉutɔɔ.

⁷ Viɛlaɓoɔi ká mąąhvaalɛɛ, ká niilaa, ə gɛ, niiɲą hvo pa nəi nwąną hvo tɛɛ ɲɛ̨n ɉu.

⁸ Yili ɓə gɛi, gɛ́ ɉu hvɛli káá, 'ká ɉon a wɛlikɛmąąlaa,

⁹ Gbala ə tɔɔ, ɉɛɓɛ́i ŋą́ dɛɛ káá, yii lɔ kɛ gwə́i, ya ɓaa, ŋį́ ká hukɔɔn, akɛ ká lɛɛ nwoo mu kɛ mɛ̨nį kəlee hu.

¹⁰ Nui ka mąąhvaalɛɛ, ɲą́ą́ gbɛlimąn, ŋą́ mąąhvaalɛɛ. Mąąhɔlɔɓo, mɛ̨nįi ŋį́ nɛɛ a kpɛli, akɛ mun hɔlɔɔ, ŋį́ mɛ̨nį ta lɛɛ a kpɛli, ŋą́ gɛ tii ká mąą mɛ̨nį ɓa, Kristə ɲɛ̨i ɓa.

¹¹ Mąą hvo nɛ̨ɛ̨li, gu hvo gu kpɔwɔ lɛɛ laa ɓilihi hvo gu ɓowo, hvo gaai, gwəi kiliɠaa di hvo loo li guɔ.

Liihɛlɛn ə too Polə ɓa, gwəi ə nɛ̨ɛ̨

¹² Líi ŋą́ mo Troasə, Kristə mąą wɛlɛɛ lɛlɛɛ laa həli mɛ̨nį ɓa, ɛlɛɛ, gu Ną́mu ə pələ laa ɓo dúwɔ́ kpɔ kɛnɛ̨,

¹³ kɛlaa, níí hvo kɛ laa li gwə́i, mąąhɔlɔɓo, və́ ną́n non Titə kaa. Ŋį́ yələ wala kɛ diɛ, gɛ́ kɛa li Masedoanə lɔi hu.

¹⁴ Yálá mąmą, yai a gɔ nɛ̨ɛ̨ guɔ a yələ kəlee Kristə haalai, ɛlɛɛ, yɛ gɔlɔn mɛ̨nį mąą kwəinɛ̨ɛ̨ lɛlɛɛ tɛ ku yee hu kɛɛnąą kəlee ɓa.

¹⁵ Gɛ mɛ̨nį, ku kaa Yálá yəi a Kristə mąą kun nɛ̨ɛ̨ hɛn, ɓalo pələ mɛ̨i da nwun na a pili pələ mɛ̨i.

¹⁶ Daɠaa di wɛi gaa a haa kun, yɛ li a diɛ haa pɔ, daɠaa di wɛi, ɓalo kun mə, yɛ li a diɛ ɓalo hva kpɛɛ hu. Gbɛɛ ɓə a pɛli kɛi a góló taaləi tii kɛmun?

¹⁷ Ku hvo yɛ nuąi da kɛ Yálá lawoo kɛi a hɛn gwɛli hɛn. Kɛlaa yaamun, kwa gɛ a kwəi kwələlaa, Yálá ɓə ku tɔɔ la, kwa gɛ Yálá ɲɛ̨i ɓa, kwa kɛ pələ ɓoi Kristə laa hu.