Korɛntə veelɛ 13 - Yálá laawoo hɛɓɛ (dc)Polə nwɔ liɛwoo ɲąą kpɛɛi da yələ wala too woo 1 Gáá pai ká pɔɔli a ɉaaɓanąn. Mɛ̨nį kəlee ɲɛ̨i kaa pai kulɔi, nu hveelɛ, ɉaaɓa ŋą kɛla woo mɛ̨i. 2 Gáá bələi ŋɛ̨i ɓoi háákələi, nuąi daa ta nɛ̨ŋɛ̨n ɉəɠə diɛ, da nu takpɛliɠaa tii kəlee, ɓɛlɔwai və́ la ká lɔwai, lɔ yɛ bələi ŋą́ mo la, a nwɔ́ woo pilimąą hiɛ veelɛną yələ, ŋą́ pa pai ká pɔɔli, gáá pai di hon ɉii kpɔ a nwalawalaa; 3 hvó gaai, ká káá bɔ ká gaa, káá Kristə ɓə pə́lə́ ɓoi káá, bɔ́ pələ. Kristə hvįi hvo kpɛɛli ká mąą mɛ̨nį ɓa, kɛlaa a nwɔ huwalawalaa kulɔ pono ŋą ka lɔwai. 4 A tɛ̨ą di gbanwo kolɔwa ɓa, nwɔ hviikpɛɛlaa hu, kɛlaa, gaa a vulú, Yálá nwɔ huwalawala laa háálai. Ɛlɛɛ, kuɔ kpɛlimąn, ku hvįikpɛɛi Kristə hu, kɛlaa, ku kaa pai kɛi a ku hvulúmąą kwa diɛni, Yálá nwɔ huwalawala laa háálai ká pɔ pələ. 5 Káá kpinįi, 'ká ká kpɔwɔ mąą mɛ̨nį hukpɛ, ká gaa tai, akɛ ká káá laa na laa hu. 'Ká ká kpɔwɔ hukɔɔn dai, ká hvo mɔ̨ɔ̨ gbaɠala kɔlɔn, káá kɛ Jesus Kristə kaa ká hu? Hvo kɛli lɔ kani ká hukɔɔn di moi, ká hvo kulɔ li ɉu. 6 Náái na kiɛ, káá kpinį lee ká pɛli hvaai mą káá, ku hukɔɔn di moi, ku kulɔ ɉu nɛ̨kpɛlɛɛ. 7 Kwa Yálá hvɛli kuɔ, ká hvo nəi pa mɛ̨nį ɲɔ̨n nɔpee ta kɛ. Mɛ̨nįi ku kaa bɔ, ya lɔ hvaa da pa ká hukɔɔn ɉii, ká kulɔ ɉu nɛ̨kpɛlɛɛ, kɛlaa, ku kaa bɔ ká túwɔ́ a nɛlɛɛ, ə mą kɛ, daa ku kaa a hon mąą nuą. 8 Mąąhɔlɔɓo, hvaŋą hvo ku yəi, kuɔ pɛli tɔɔi tɛ̨ą la, yii gaa ku yəi, ku tɔɔi la tɛ̨ą pulu. 9 A neelee, kwa kɛ kwəinɛ̨ɛ̨ kulɔi, ɓɛlɔwai ku hvįi a kɛ la a gbɛɛ, ká hvaŋą yɛ kɛnɛ̨. Ku wɔɔ hvɛli woo nwun ga, ya ɓaa, ká mąą mɛ̨nį ə pɛli ɉu. 10 Yili mąą mɛ̨nį ɓə gɛi, ŋį́ mą kɛ kwɛaa la nwɔ̨nɔ̨ gɛ́ ɉɛɓɛ́i ŋɛ̨i tɛɛ la káá, ŋą́ pa kɛa kɛi ká lɔwai, və́ pa ká hon a nwalawalaa yɛ bələi gu Nąmu ə yili mąąlaa tɛɛ la bɔ́, a ká tɛ mɛ̨nį tɔwɔ, hvo kɛ a ká kala mɛ̨nį. 11 Yiihu kɛa, Ną́n nonni, ká kɛ kwəinɛ̨ɛ̨ hu, 'ká kóló kɛ, ə gɛ, ká mąą mɛ̨nį yɛ pɛli ɉu; 'ká ká keeni hvaŋąlɔ, woolaamąą ə kɛ ká lɔwai, ká ká wɔɔ yɛnɛ̨ɛ̨ kɛ liilaa hu, ə gɛ, wɛlikɛmąąlaa da liilaa Yálá yɛ pɛli kɛi ká pɔ. 12 'Ká ká keeni yee túwɔ́ɓo a nɛ̨ɛ̨laa, Yálá ŋą nuą kəlee diɛ ká túwɔ́ɓo. 13 Gu Nąmu Jesus Kristə nwɔ mɛ̨inɛ̨ɛ̨, Yálá nwɔ wɛlikɛmąąlaa, ɛlɛɛ, Kili-Mąąhəɠɛɛ nwɔ nɛ̨ɛ̨laa ə kɛ ká kəlee ká pɔ. |