Korɛntə veelɛ 10 - Yálá laawoo hɛɓɛ (dc)

Polə ə gɛ kólo nwun mąąkɔ̨nwɔ̨

¹ Ɲą́ą́ Polə, ɲą́ą́ gbínįlee ɓə ká mąąnɛ̨ɛ̨i Kristə ŋą liinɛ̨ɛ̨ gwəilaa da ŋą wɛlikɛmąąlaa hu, ɲą́ą́ ŋɛ̨i ŋą́ kɛ ká ɲɛ̨i ɓa, gɛ́ gbɔ́wɔ́ koloon ká lɔwai, kɛlaa, ŋą́ kɛ kwɛaa la, níikpəlɛɛ káá,

² Gáá nɛ̨ɛ̨mąą hvəə káá, ká hvo gɛ və́ pa haŋą káá ɓɛlɔwai ŋą́ paa la ká pɔɔli, a niikpələi tii, gɛ́ ŋą́ pa nɛ nuąi da kɛ «ŋą́ túwɔ́ a nu kili», diɛ.

³ Bələi mąn ku ka la a nu kanŋaai, kɛlaa ku wɔ kɔ́i ku kaa gɔ́i, ku hvo gɔ́i a nu kili.

⁴ Mąąhɔlɔɓo, gɔ́ kɔ́ kwɛli hɛnŋąa di hvo həɠə nu kanŋaa yəi, kɛlaa, di hvaŋą a həɠə Yálá yəi, diɛ kɔ́-taaɠaa wolo. Ku kaa kiliŋąhiɛ ɲɔ̨nwɔ̨ɔ̨ɠaa hu kalai;

⁵ ɛlɛɛ, da ɲɛ̨itɛ mɛ̨nįi lɔpee a kɛ ə tɔɔ Yálá kɔlɔn mɛ̨nį la. Kwa kiliŋąhiɛ kəlee hon a luwɔ, diɛ pɛli lɛɛi Kristə woo mu;

⁶ ɛlɛɛ, ɓɛlɔwai ku wɔ lɛɛ nwoo mu laa ɲąą a pɛli la kpɔ a neelee, kwa pɛli kulɔ nwoo mu nuą hutɔɔi.

⁷ Ká ká ɲɛ̨i hee tai ká kpɔwɔ mɛ̨nįɠaa hu, akɛ gaa nu ta kwəi, yɛ kɛ gaa a Kristə ŋą nu, ə kɛ lɔ nwɔ̨nɔ̨ tii gwəi, yɛ kɛ, kuɔ kpɛli ku kaa a Kristə ŋą nuą.

⁸ Mąąhɔlɔɓo, nwumɛ̨ hva pɛli tɛi a ɲą́ą́, ɉuwalawalai gu Nąmu Jesus ə dɛɛ bɔ́ ká hutɔɔ mɛ̨nį ɓa, ɉu, hvo dɛɛ li bɔ́, ká kala mɛ̨nį ɓa.

⁹ Ɉɛɓɛ́ɠaai ŋą́ dɛɛ káá, hvo a ká mąąɲɔw mɛ̨nį;

¹⁰ gbala ə tɔɔ, daɠaa da kɛ diɛ: Nwɔ hɛɓɛ́ɠaai hu woo walawalaai, dɛɛ, gbinį lee ɓa, a kɛ ku lɔwai, nwoo vaŋą hvo ɉu.

¹¹ Nui a kɛ ɓoi tii, mąąnɛ̨ɛ̨ gili ə kɛ ɉu, yɛ kɛ: Bələi lɔ ku hvaa woo kaa la, kwa kɛ kwɛaala, ku wɔɔ hɛɓɛ́ɠaa hu, bələ lɔ ɓə ku kpinį lee kaa la, kwa kɛ ká lɔwai, bələ lɔ ɓə kwa túwɔ́ la.

¹² Ku hva ku liikpələ, kuɔ ku kpɔwɔ kɛ yɛ nu taɠaa, awala kɛ tii, kuɔ ku kpɔwɔ kɔɔn diɛ. Diɛi da mɛ̨nį kəlee gɔɔnmąą həɠə di kpɔwɔ mɛ̨i, di kili aa kpɛɛ di yəi.

¹³ Kɛlaa, ku wɛi, ku ɲɛ̨i pono mɛ̨nįi ku kaa nɛi káá, ku hva ku kpɔwɔ ɲąą kɛnɛ̨ ɉu, ku hvo tɛɛ ɲɛ̨n ma. Kɛlaa, kpaaləi Yálá ə naa ku tɔwɔ, ya ɓə, a ku wɔɔ kólói ɲɛ̨n, gbaaləi tii ɓə ku lɛɛ mą, kuɔ həli la káá.

¹⁴ Mąąhɔlɔɓo, ku hva mɛ̨nį ta kɛ ku hvo dɛɛ ɲɛ̨n ma, yɛ kwa wala həli ká pɔɔli, kuɔ tɔlɔɔ ɓə gbɛa həli ká pɔɔli a Kristə mąą wɛlɛɛ lɛlɛɛ.

¹⁵ Ku wɔɔ ɲɛ̨i ponolaa hvo tɛɠɛ li ɲɛ̨n ma, gɔwɔ hvo hvilɛn ni nu takpɛli kɛ kóló mɛ̨i, kɛlaa, ku kili kaa ɉu kuɔ, ká wɔɔ laa na laa hu aa kɛli kɛnɛ̨ yɛ tɛ tɔwɔi, gaa tɛi tɔwɔ ká yəi, ku wɔɔ kpaaləi ku naa ká ɲɛ̨i, ɉáálai;

¹⁶ Nwɛlɛɛ lɛlɛɛi ku naa həli ká pɔɔli, da ká kwɛlɛ lɔiɠaa kəlee hu, ku hvo ku ɲɛ̨i pono li nu takpɛliɠaa kɛ kóló mɛ̨i.

¹⁷ Nui yɛ ə gbɔwɔ ɲąą kɛnɛ̨, ə gbɔwɔ ɲąą kɛnɛ̨ gu Nąmu hu.

¹⁸ Nui a gbɔwɔ mąą liɛwoo kɛ, yɛ gbɔwɔ mąątɛ̨nɛ̨, yaa hvəə dɔlɔ ka mą, kɛlaa, nui gu Nąmu a mąą liɛwoo kɛ, a mąątɛ̨nɛ̨ pələ.